Lʌcʼʌl mi la cajñel ti Dios
Cheʼ bajcheʼ tsaʼ laj qʼuele ti ñaxam bʌ temaj, cabʌl lac piʼʌlob miʼ qʼuelob jiñi Biblia bajcheʼ jumpʼejl chʼujul bʌ libro. Cheʼ bʌ miʼ pejcañob jiñi Biblia yicʼot miʼ jacʼob jiñi ticʼojel tac, ñumen lʌcʼʌl miʼ yubiñob i bʌ ti Dios yicʼot miʼ tajbeñob i sujmlel i cuxtʌlel.
Jiñi Biblia miʼ yʌl chaʼan jiñi lʌcʼʌl bʌ miʼ yajñelob ti Dios, weñob i melbal (chaʼlibal) yicʼot wen chuqui miʼ melob (Judas 18, 19). Cheʼ jaʼel, miʼ chʼʌmob ti ñuc jiñi i ticʼojel tac. Pero jiñi mach bʌ lʌcʼʌlic miʼ yajñelob ti Dios cojach miʼ bajñel ñaʼtañob i bʌ (Efesios 5:1).
YOM AN A PIJTAYA
PRINCIPIO AM BɅ TI BIBLIA: «Mi mach chʼejletic tiʼ yorajlel wocol tsʼitaʼ jach a pʼʌtʌlel» (Proverbios 24:10).
¿CHUQUI YOM I YɅL ILI? Cheʼ an lac chʼijiyemlel maʼañic mi lac lʌtʼ jiñi wocol tac muʼ bʌ lac ñusan ti jujumpʼejl qʼuin. Pero jiñi lac pijtaya miʼ coltañonla chaʼan mi lac chʌn chaʼlen wersa. Miʼ cʼajtesʌbeñonla chaʼan an wocol tac mucʼ jach bʌ i ñumel i cheʼ jaʼel añʌch chuqui mi laj cʌn cheʼ bʌ miʼ tajonla jiñi wocol tac.
¿CHUQUI YOM MAʼ MEL? Ñaʼtan chuqui wen tac bʌ miʼ cajel ti talto bʌ qʼuin. Chaʼlen wersa chaʼan maʼ taj jiñi ñaʼtʌbil bʌ a chaʼan, i mach a pensarin chuqui tajol muʼ bʌ i mejlel ti ujtel ti a tojlel o mach a pijtan chaʼan miʼ laj tojʼan jiñi a wocol tac. Tiʼ sujm añʌch chuqui miʼ mejlel ti ujtel tac mach bʌ pijtʌbilic lac chaʼan (Eclesiastés 9:11, TNM). An qʼuiñil ñumen wento miʼ loqʼuel, i mach cheʼic bajcheʼ tsaʼ lac ñaʼta. Chaʼan mi lac chʼʌmben i sujm iliyi, jiñi Biblia miʼ lajeʼ bajcheʼ jiñi pacʼ: «Yom maʼ chʌn chaʼlen pacʼ cʼʌlʌl ti sʌcʼan cʼʌlʌl ti icʼan, come mach a wujilic baqui bʌ miʼ cajel ti colel. Ticʼʌl muqʼuix i laj colel. Muqʼuix i yʌqʼueñet i wut» (Eclesiastés 11:6).
MIʼ MEJLEL A TAJBEN I JACʼBAL JIÑI ÑUC TAC BɅ CʼAJTIYA
PRINCIPIO AM BɅ TI BIBLIA: «Isujmʌch jini a tʼan» (Juan 17:17).
¿CHUQUI YOM I YɅL ILI? Jiñi Biblia miʼ yʌqʼuen i jacʼbal jiñi cʼajtiya tac muʼ bʌ lac melben lac bʌ. Jumpʼejl ejemplo, cʼajtiya tac bajcheʼ ili:
-
¿Chucoch wʌʼ añonla ilayi?
-
¿Chucoch mi lac ñusan wocol?
-
¿Chuqui mi lac chaʼlen cheʼ bʌ mi lac chʌmel?
-
¿Chuqui miʼ cajel ti talto bʌ qʼuin?
Yonlel lac piʼʌlob an i tajbeyob i jacʼbal ili cʼajtiya tac cheʼ bʌ tiʼ tsajiyob jiñi Biblia, i wʌle ñumen tijicñayobix.
¿CHUQUI YOM MAʼ MEL? Mic subeñet lojon chaʼan maʼ tsajin chuqui miʼ cʌntesañonla jiñi Biblia. Cʼajtiben juntiquil i testigo Jehová chaʼan miʼ coltañet a chʼʌmben i sujm. Cheʼ jaʼel, maʼ mejlel ti ochel ti jiñi lon c página i chaʼan Internet jw.org o maʼ majlel ti jiñi lon c tempa bʌ. Mach tojbilic la cochib yicʼot maʼan miʼ cʼajtintel taqʼuin.
YAMBɅ PRINCIPIO TAC AM BɅ TI BIBLIA
Ochen yaʼ ti jw.org/ctu i qʼuele jiñi video ¿Chucoch yom mi lac pejcan jiñi Biblia?, am bʌ ñumen ti 800 tʼan tac.
YOM MI LAJ CɅN CHAʼAN I CʼɅJÑIBALɅCH LAC CHAʼAN DIOS
«Tijicña jiñi muʼ bʌ i ñaʼtañob chaʼan ñucʌch i cʼʌjñibal i chaʼan bʌ Dios» (MATEO 5:3, TNM).
ÑUMEN CɅÑɅ JIÑI DIOS MUʼ BɅ I YɅJLEL YAʼ TI BIBLIA
«Lʌcʼtesan laʼ bʌ baʼan Dios. Cheʼ jini mi caj i lʌcʼtesan i bʌ baʼ añetla» (SANTIAGO 4:8).
PEJCAN JIÑI BIBLIA YICʼOT WEN ÑAʼTAN
«Tijicña jini winic [...] tiʼ mandar lac Yum, miʼ chʌn ñaʼtan chuqui yom lac Yum ti qʼuinil yicʼot ti acʼʌlel [...]. Pejtel chuqui miʼ mel jini winic utsʼat miʼ yujtel» (SALMO 1:1-3).
Miʼ mejlel a qʼuel jaʼel iliyi
¿Muʼ ba mejlel i coltañon jiñi Biblia?
Ili libro miʼ chʼʌm tilel wen tac bʌ ticʼojel.
