Mi lac taj lac tijicñʌyel
Jiñi Biblia miʼ taj ti tʼan jiñi melbalʌl (chaʼlibal) tac mach bʌ yomic mi lac mel yicʼot jiñi wem bʌ melbalʌl yom bʌ an lac chaʼan.
JIÑI MICHʼAJEL
PRINCIPIO AM BɅ TI BIBLIA: «Jini mach bʌ orajic yujil michʼajel ñumen ñucʌch bajcheʼ ñuc bʌ soldado» (Proverbios 16:32).
¿CHUQUI YOM I YɅL ILI? Yom mi laj cʌn lac ticʼ lac michʼajel. Añʌch chuqui miʼ mejlel i yʌcʼonla ti michʼan, pero mi maʼan mi lac ticʼ lac bʌ miʼ yʌcʼonla ti cabʌl wocol. Tsiquilʌch cheʼ bʌ juntiquil lac piʼʌl maʼañic miʼ ticʼ i michʼajel miʼ mejlel i yʌl o miʼ mel mach bʌ weñic muʼ bʌ i wiʼil acʼ ti pensar.
¿CHUQUI YOM MAʼ MEL? Tiqʼui jiñi a michʼajel chaʼan maʼañic miʼ yʌqʼueñet a mel mach bʌ weñic. An lac piʼʌlob muʼ bʌ i ñaʼtañob chaʼan woli (choncol) i pʌsob i chʼejlel cheʼ bʌ miʼ pʌsob i michʼajel, pero tiʼ sujm woli (yʌquel) jach i pʌsob i cʼunlel. Jiñi Biblia miʼ yʌl: «Mi mach mejlic lac ticʼ lac bʌ lajalonla bajcheʼ jejmenix bʌ tejclum mach bʌ anic i tsʼajquil tiʼ joytilel» (Proverbios 25:28). Junchajp muʼ bʌ i mejlel i coltañonla lac ticʼ lac michʼajel jiñʌch cheʼ mi lac ñaʼtan baqui tsaʼ tejchi. Jiñi Biblia miʼ yʌl: «Jini wen bʌ i pusicʼal mach orajic miʼ michʼan» (Proverbios 19:11). Cheʼ mucʼʌch a cʌn bajcheʼ tsaʼ tejchi jiñi wocol mi caj i coltañet chaʼan maʼañic maʼ michʼan.
QʼUELE TI ÑUC MUʼ BɅ A MELBENTEL
PRINCIPIO AM BɅ TI BIBLIA: «Subenla Dios wocolix i yʌlʌ» (Colosenses 3:15).
¿CHUQUI YOM I YɅL ILI? An muʼ bʌ i yʌlob chaʼan jiñi lac piʼʌlob muʼ bʌ i qʼuelob ti ñuc chuqui añob i chaʼan miʼ yubiñob i tijicñʌyel. Cheʼʌch an i yʌlʌyob jaʼel jiñi chʌmeñoʼ bʌ i familia o jiñi am bʌ i sʌtʌyob i chubʌʼan. Chaʼan maʼañic miʼ yubiñob i chʼijiyemlel, miʼ qʼuelob ti ñuc chuqui an i chaʼañob i mach jiñic chuqui tsaʼ bʌ i sʌtʌyob.
¿CHUQUI YOM MAʼ MEL? Tsʼijbun ti jujumpʼejl qʼuin chuqui muʼ bʌ a qʼuel ti ñuc anquese mach jamʌ tsiquilic. Tajol cheʼ bʌ miʼ sʌcʼan pañimil, cheʼ bʌ maʼ chaʼlen tʼan a wicʼot a familia o chaʼan cuxulet ti jiñi bʌ qʼuin. Mi mucʼʌch a mel bajcheʼ ili, tijicña mi caj a wajñel.
Yambʌ muʼ bʌ i mejlel i coltañet jiñʌch cheʼ bʌ maʼ wʌqʼueñob wocolix i yʌlʌ a familia o a wamigojob chaʼan an i coltayetob. Ñaʼtan chuqui maʼ qʼuel ti ñuc tiʼ tojlelob, cheʼ jiñi, subeñob o tsʼijbubeñob majlel jumpʼejl carta o chocbeñob majlel jumpʼejl mensaje. Cheʼ bajcheʼ jiñi, mi caj i ñumen pʼʌtʼan majlel a cʼuxbiya i mi caj a wubin a tijicñʌyel cheʼ maʼ coltan yambʌlob (Hechos 20:35).
YAMBɅ PRINCIPIO TAC AM BɅ TI BIBLIA
Miʼ mejlel a chaʼlen ti descargar jiñi Biblia ti audio o jiñi yan tac bʌ jun loqʼuem bʌ ti Biblia. Jiñi audio i chaʼan jiñi Biblia añix ti 40 tʼan tac yaʼ ti jw.org.
MACH A WOTSAN A BɅ BAQUI WOLI AʼLEYA
«Cheʼ miʼ cajelob ti leto miʼ yutsi pʼojlel cheʼ bajcheʼ jaʼ. Jini chaʼan cʌyʌx leto ame utsi pʼojlic» (PROVERBIOS 17:14).
MACH A WEN PENSARIN JIÑI MUʼTO BɅ CAJ I YUJTEL
«Mach mi laʼ mel laʼ pusicʼal chaʼan jini muʼ to bʌ i yujtel ijcʼʌl. Yaʼto tsiquil chuqui miʼ yujtel ijcʼʌl. Jasʌl jach mi lac ñaʼtan ili wocol am bʌ wʌle» (MATEO 6:34).
WEN ÑAʼTAN MUʼ BɅ CAJ A MEL
«Cheʼ jini mi caj a cʌntʌntel chaʼan wen bʌ a pusicʼal, chaʼan tsaʼ chʼʌmbe isujm» (PROVERBIOS 2:11).