Ti laj cʼocʼlel
Jiñi Biblia mach jumpʼejlic libro i chaʼan bʌ tsʼac, pero mucʼʌch i subeñonla chaʼan mi laj cʌntan laj cʼocʼlel. Laʼ laj qʼuel principio tac muʼ bʌ i mejlel i coltañonla.
MI LAC MEL CHUQUI WEM BɅ
PRINCIPIO AM BɅ TI BIBLIA: «Maʼanic winic muʼ bʌ i tsʼaʼlen i bʌcʼtal. Miʼ weʼesan, miʼ cʌntan ti utsʼat» (Efesios 5:29).
¿CHUQUI YOM I YɅL ILI? Ili principio miʼ subeñonla chaʼan mi laj cʌntan laj cʼocʼlel. An tac estudio muʼ bʌ i yʌl chaʼan tiʼ caj i melol mach tac bʌ weñic miʼ tajonla jiñi cʼamʌjel. Jin chaʼan, mi la com chaʼan cʼocʼonla yom mi lac mel chuqui wem bʌ.
¿CHUQUI YOM MAʼ MEL?
-
Cʌntan chuqui maʼ cʼux. Chaʼlen wersa chaʼan maʼ cʼux muʼ bʌ i coltan a bʌcʼtal yicʼot yom maʼ wen jap jaʼ.
-
Mele ejercicio. Ti lac pejtelel miʼ mejlel i coltañonla ti laj cʼocʼlel anquese an tsʌts bʌ laj cʼamʌjel o yan tac bʌ lac wocol. Jiñi a familiajob o jiñi doctorob miʼ mejlel i subeñetob chaʼan maʼ mel jiñi ejercicio, pero jatetix a wujil mi a womʌch a mel.
-
Yom wen maʼ wʌyel. An lac piʼʌlob mach bʌ añic miʼ wen wʌyelob tiʼ caj chaʼan cabʌl chuqui yom i melob. Pero cheʼ maʼañic mi lac wen wʌyel mi laj cʼamʼan. Jin chaʼan, cheʼ wen maʼ wʌyel ñumen tijicña mi caj a wubin.
CɅYɅ A MEL MACH TAC BɅ WEÑIC
PRINCIPIO AM BɅ TI BIBLIA: «Jini chaʼan laʼ lac poc loqʼuel pejtelel bibiʼ tac bʌ am bʌ ti lac bʌcʼtal yicʼot lac pusicʼal» (2 Corintios 7:1).
¿CHUQUI YOM I YɅL ILI? Ñumen cʼocʼ mi caj a wajñel mi maʼañic maʼ wotsan ti a bʌcʼtal muʼ bʌ i mejlel i cʼamʼesañet, cheʼ bajcheʼ jiñi cʼujts. I ñucʼol jiñi cʼujts jiñʌch junchajp muʼ bʌ i wen pʼol cʼamʌjel yicʼot miʼ yʌcʼ ti chʌmel (sajtel) lac piʼʌlob.
¿CHUQUI YOM MAʼ MEL? Alʌ jala mi caj a cʌy jiñi cʼujtsijel i tsʼijbun ti jumpʼejl calendario yicʼot suben jiñi a wujil bʌ chaʼan mi caj i coltañet. Teche a choc jiñi a cʼujts o tiʼ pejtelel muʼ bʌ a cʼʌn tiʼ melol ili mach bʌ weñic melbalʌl (chaʼlibal). Mach yomic maʼ majlel yaʼ baqui añob jiñi yujiloʼ bʌ i ñucʼol cʼujts.
YAMBɅ PRINCIPIO TAC AM BɅ TI BIBLIA
Mi a wom jumpʼejl Biblia, miʼ mejlel a cʼajtiben juntiquil i testigo Jehová.
YOM TSAJILET
«Cheʼ maʼ mel tsijiʼ bʌ a wotot, yom maʼ joy tsʼajquiben i jol yaʼ baʼ mi laʼ letsel ame yajlic juntiquil, ame anic a mul cheʼ jini» (DEUTERONOMIO 22:8).
MACH YOMIC MAʼ BɅCʼ MICHʼAN
«An cabʌl i pusicʼal jini mach bʌ orajic yujil michʼajel, pero jini ora bʌ miʼ michʼan miʼ pʌs i tontojlel» (PROVERBIOS 14:29).
PʼISBIL JACH YOM MAʼ CHAʼLEN UCHʼEL
«Mach a piʼlen majlel [...] jini woʼob jax bʌ tiʼ bʌl i ñʌcʼ» (PROVERBIOS 23:20).
