Mach utsʼatic cheʼ bʌ miʼ toʼol ñusañob wocol jiñi mach bʌ jontolobic (mañajobic). Cheʼ bʌ mi laj qʼuel miʼ ñusañob wocol, an majqui miʼ mejlel i ñaʼtan chaʼan maʼañix i cʼʌjñibal cheʼ mi lac mel chuqui wem bʌ.

An muʼ bʌ i ñopob chaʼan mi lac chʌmel i mi lac chaʼ ilan pañimil (chʼocʼan), i mach ti junsujtel jach miʼ yujtel bajcheʼ ili. Miʼ ñaʼtañob chaʼan cheʼ bʌ mi lac mel chuqui wem bʌ ili ora cheʼ bʌ cuxulontola, ñumen weñix chuqui mi caj lac ñusan cheʼ bʌ mi lac chaʼ chʼocʼan. Pero mi tsaʼ lac mele mach bʌ weñic, mi caj lac ñusan cabʌl wocol. Ili wiñicob xʼixicob (quixtañujob) miʼ ñopob chaʼan cheʼ bʌ juntiquil wem bʌ lac piʼʌl miʼ yilan wocol tiʼ cajʌch chaʼan an chuqui tsiʼ mele mach bʌ weñic tiʼ ñaxam bʌ i cuxtʌlel. Pero cʼajtiben a bʌ:

• ¿Chucoch yom mi la quilan wocol ili ora tiʼ caj chuqui tsaʼ bʌ lac mele ti wajali i mach bʌ cʼajalix lac chaʼan?

• Mi mucʼʌch caj laj cʼamʼan o mi caj lac taj jumpʼejl accidente tiʼ caj chuqui mach bʌ weñic tsaʼ lac mele ti yambʌ laj cuxtʌlel, ¿chucochto yom mi lac chaʼlen wersa laj cʌntan lac bʌ?

  CHAʼAN MAʼ ÑUMEN CɅN

  Ochen yaʼ ti jw.org i qʼuele jiñi video ¿Chucoch Dios woliʼ yʌcʼ ti ujtel jiñi wocol?

Cheʼ bʌ an majqui miʼ ñusan wocol maʼañic woliʼ yʌqʼuentel i toj i mul ti Dios

An qʼuiñil bajcheʼ jach ora miʼ mejlel i waʼ tajonla jumpʼejl wocol.

«Mach jinic wen yujil bʌ ajñel muʼ bʌ i cʼotel ñaxan. Mach jinic wen pʼʌtʌl bʌ muʼ bʌ i mʌjlel i chaʼan. Mach chaʼanic i ñaʼtibal miʼ taj i bʌl i ñʌcʼ jini cabʌl bʌ i pusicʼal. Jini wen yujil bʌ eʼtel mach ti pejtelic ora miʼ taj i ñuclel tiʼ wut i piʼʌlob. An muʼ bʌ i tajob, an mach bʌ i tajayobic. Tijicña jini am bʌ i coltʌntel tiʼ pejtelel chuqui yom i taj. Maʼanic majqui yujil baqui ora mi caj i chujquel ti wocol» (ECLESIASTÉS 9:11, 12).

Mi la quilan wocol come xmulilonla tsaʼ la quila pañimil

Jiñi quixtañujob miʼ cʼʌñob jiñi tʼan mulil chaʼan miʼ yʌcʼob ti ñaʼtʌntel chuqui mach bʌ weñic miʼ mejlel. Pero jiñi Biblia miʼ cʼʌn jaʼel chaʼan miʼ yʌcʼ ti ñaʼtʌntel jiñi mulil tsaʼ bʌ i cʌybeyonla ti lac pejtelel jiñi Adán yicʼot Eva.

«Awilan, xmulilon tsaʼ quila pañimil. Añʌch c mul cʼʌlʌl cheʼ cʌntʌbilon i chaʼan c ñaʼ» (SALMO 51:5).

Jiñi mulil an i yʌcʼʌ ti cabʌl wocol jiñi quixtañujob

Mach cojach an i ñajtʼesayonla tiʼ tojlel jiñi tsaʼ bʌ i Meleyonla, an i ñajtʼesayonla jaʼel tiʼ tojlel yambʌlob yicʼot an tac bʌ ti lac joytilel. Ili an i yʌcʼʌ chaʼan ti lac pejtelel mi lac ñusan wocol.

«Come cheʼ com c mel chuqui utsʼat, an jontolil tic pusicʼal» (ROMANOS 7:21).

«Temel woli ti ajacniyel pejtelel jini pañimil. Woli ti bajqʼuel yilal cʼʌlʌl wʌle» (ROMANOS 8:22).