Jiñi muʼ bʌ caj i tojʼesan jiñi wocol
Yonlel wiñicob xʼixicob (quixtañujob) an i jacʼʌyob jiñi principio tac am bʌ ti Biblia tsaʼix bʌ laj qʼuele tilel i tsaʼ mejli i locʼsañob jiñi tsʼaʼleya tiʼ pusicʼal. Pero joñonla mach mejlic lac jisan pejtelel jiñi tsʼaʼleya tac am bʌ ila ti pañimil (mulawil). Cheʼ jiñi, ¿am ba chuqui miʼ mejlel i jisan?
Jumpʼejl yumʌntel toj bʌ
Cʼʌlʌl ti wajali jiñi yumʌlob maʼañic an mejli i jisañob jiñi tsʼaʼleya. ¿Yom ba i yʌl jiñi chaʼan maʼañic majqui miʼ mejlel i jisan?
Chaʼan miʼ jilel jiñi tsʼaʼleya, juntiquil yumʌl yom miʼ mel ili tac:
-
1. Yom miʼ ñijcʌben i pusicʼal jiñi quixtañujob chaʼan miʼ qʼuextañob i pensar yicʼot bajcheʼ miʼ yubiñob i bʌ tiʼ tojlel yambʌlob.
-
2. Yom miʼ locʼsañob ti lac pusicʼal jiñi tsaʼ bʌ i teche chaʼan mi lac tsʼaʼlen yambʌlob.
-
3. Yom miʼ waʼchocon yumʌlob junlajal bʌ miʼ qʼuelob jiñi quixtañujob.
-
4. Yom miʼ coltan jiñi quixtañujob añoʼ bʌ tiʼ pejtelel Pañimil chaʼan juntemel miʼ yajñelob.
Jiñi Biblia miʼ yʌl chaʼan Dios tsaʼix i waʼchoco jumpʼejl yumʌntel muʼ bʌ caj i mel pejtelel jiñi. Ili cʌmbil bajcheʼ «i yumʌntel Dios» (Lucas 4:43).
Qʼuele chuqui mi caj i yʌqʼueñonla jiñi yumʌntel.
1. Wem bʌ cʌntesʌntel
Jiñi muʼ bʌ caj i chumtʌlob ila ti Pañimil mi caj i cʌntesʌntelob i melob chuqui toj (ISAÍAS 26:9).
«Cheʼ toj miʼ melob winicob ñʌchʼʌl mi caj i yajñelob. Chaʼan tiʼ caj miʼ chaʼleñob chuqui toj, tijicñayob mi caj i cʼajob i yo. Maʼanix bʌqʼuen tiʼ pejtelel ora» (ISAÍAS 32:17).
¿Chuqui yom i yʌl? Jiñi i Yumʌntel Dios mi caj i cʌntesʌben jiñi quixtañujob chuqui wem bʌ. Cheʼ bʌ mi laj cʌn jiñi wem bʌ yicʼot mach bʌ weñic, miʼ qʼuextʌyel bajcheʼ mi laj qʼuel yambʌlob. Pejtelel jiñi pañimil mi caj i cʌñeʼ chaʼan jiñi toj bʌ jiñʌch cheʼ mi laj cʼuxbin majqui jach bʌ quixtañu.
2. Coltʌntel
«Dios mi caj i sujcubeñob i yaʼlel i wut. Maʼanix majch miʼ caj ti chʌmel. Maʼanix ucʼtaya mi uqʼuel mi wocol ti pejtelel ora. Come tsaʼix ñumi jini ñaxan tac bʌ» (APOCALIPSIS 21:4).
¿Chuqui yom i yʌl? Jiñi i Yumʌntel Dios mi caj i jisan pejtelel jiñi wocol am bʌ i teche cheʼ bʌ jiñi quixtañujob miʼ ticʼlan yambʌlob. Jiñi muʼ bʌ i ticʼlʌntelob maʼañix chuqui mi caj i ñijcañob chaʼan miʼ yubiñob tsʼaʼleya tiʼ pusicʼalob.
3. Juntiquil wem bʌ yumʌl
«Mach jelchojquic mi caj i mel winicob. Maʼanic mi caj i ñop uʼyaj tʼan yicʼot lot. Mi caj i coltan jini pʼumpʼuñoʼ bʌ yicʼot jini utsoʼ bʌ muʼ bʌ i ticʼlʌntelob» (ISAÍAS 11:3, 4).
¿Chuqui yom i yʌl? Jesucristo, jiñi Rey i chaʼan i Yumʌntel Dios, mi caj i mel i yeʼtel ti toj ila ti Pañimil i maʼañic mi caj i yajcan majqui wen mi caj i qʼuel. Jesús maʼañic miʼ yajcan baqui bʌ tejclum wen miʼ qʼuel yicʼot baqui bʌ maʼañic, i miʼ mejlel i mel chaʼan jiñi wem bʌ i mandar tac miʼ tsʼʌctesan pejtelel jiñi pañimil.
4. Cheʼ temel miʼ yajñelob jiñi quixtañujob
Jiñi i Yumʌntel Dios mi caj i coltan jiñi quixtañujob chaʼan «junlajalob i ñaʼtʌbal yicʼot i cʼuxbiya yicʼot i tʼan» i chaʼan «jumpʼejl jach i pusicʼalob» (FILIPENSES 2:2).
¿Chuqui yom i yʌl? Jiñi tsaʼ bʌ i coltayob jiñi i Yumʌntel Dios temel mi caj i yajñelob tiʼ sujm. Lajalob «i tʼan» mi caj i yajñelob o temel mi caj i yajñelob come mi caj i cʼuxbiñob i bʌ tiʼ sujm.