Jiñi wiñicob xʼixicob (quixtañujob) an qʼuiñil mach yomobic i wen qʼuel jiñi yambʌlob tiʼ caj yambʌ baqui chʼoyolob, yʌñʌl i colorlelob i pʌchʌlel, yambʌlob i tʼan, yʌñʌl i ñopbalob, o chaʼan mach wen añobic chuqui an i chaʼan. An muʼ bʌ i tsʼaʼ qʼuel yambʌlob chaʼan yʌñʌlob i jabilel, tiʼ caj baqui jaxʌl tsiʼ chaʼle qʼuejun, chaʼan an i cʼamʌjel o chaʼan bajcheʼ yilal. Pero miʼ ñaʼtañob chaʼan maʼañic woliyob (choncolob) ti tsʼaʼleya.

¿Am baʼ chaʼan jiñi? Mach wocolic mi laj cʌn mi juntiquil woli (yʌquel) i tsʼaʼ qʼuel i piʼʌl, pero wocolʌch chaʼan miʼ mejlel lac bajñel cʌn mi cheʼ woli la cujtel jaʼel. Cheʼ mi la cʌl tiʼ sujm, ti lac pejtelel mucʼʌch lac tsʼitaʼ ubin bajcheʼ iliyi. Jiñi maestro chaʼan sociología David Williams miʼ yʌl chaʼan cheʼ bʌ juntiquil mach weñic chuqui miʼ ñaʼtan tiʼ tojlel yambʌlob, mach weñic chuqui mi caj i mel (chaʼlen) tiʼ tojlel juntiquil mi an baqui miʼ taj, i tajol mi muqʼuicto i cʌn bajcheʼ yilal woliʼ mel.

Jumpʼejl ejemplo, Yovitsa chumul ti jumpʼejl alʌ tejclum yaʼ ti Europa baqui an junmojt lac piʼʌlob yʌñʌloʼ bʌ. Miʼ yʌl: «Tsaʼ c ñaʼta chaʼan tiʼ pejtelel jiñi quixtañujob jontolob (mañajob). Maʼañic tsaʼ c ñaʼta chaʼan woliyʌch c tsʼaʼ qʼuelob. Mic suben c bʌ: ‹Pero muʼ bʌ c ñaʼtan tiʼ tojlelob i sujmʌch›».

Jiñi yumʌlob miʼ melob cabʌl mandar baqui miʼ yʌl chaʼan junlajal yom mi laj qʼuel lac bʌ. Pero jiñi quixtañujob maʼañic miʼ jacʼob. ¿Chucoch? Come jiñi mandar cojach miʼ ticʼ chuqui miʼ mel jiñi quixtañujob, pero maʼañic miʼ mejlel i qʼuextʌbeñob i pensar. Cheʼ mi lac tsʼaʼ qʼuel yambʌlob loqʼuen ti lac pensar yicʼot ti lac pusicʼal. Pero ¿maʼañix ba chuqui miʼ mejlel lac mel? ¿Anto ba i tsʼʌcal?