Jiñi tsʼaʼleya maʼañic miʼ jilel ti jumpʼejl jach qʼuin. Yom mi la cʌqʼuen i yorajlel yicʼot yom mi lac chaʼlen wersa chaʼan mi lac tsʼʌcan jumpʼejl laj cʼamʌjel, lajalʌch miʼ yujtel jaʼel cheʼ bʌ mi lac chaʼlen wersa chaʼan mi lac locʼsan ti lac pusicʼal jiñi tsʼaʼleya. ¿Chuqui yom mi lac mel chaʼan maʼañix mi lac tsʼaʼlen yambʌlob?

«Jini ñumen yom bʌ jiñʌch cʼuxbiya, come miʼ yʌqʼuetla ti tem ajñel ti jumpʼejl laʼ pusicʼal» (COLOSENSES 3:14).

¿Chuqui yom i yʌl ili? Cheʼ bʌ mi lac mel chuqui tac wem bʌ tiʼ tojlel yambʌlob miʼ tem acʼonla ti ajñel. Mi mucʼʌch a cʼuxbin yambʌlob i maʼ pʌsbeñob, xucʼu xucʼul mi caj a choc loqʼuel ti a pusicʼal jiñi tsʼaʼleya i maʼañix mi caj a chaʼ wis acʼ ti ochel.

Ñaʼtan bajcheʼ tac miʼ mejlel a pʌs chaʼan maʼ cʼuxbiñob jiñi mach bʌ a womic a qʼuelob. Mach cʼʌñʌlic maʼ mel chuqui tac wocol bʌ. Ñopo a mel ili tac:

• Pʌsbeñob wen tac bʌ a melbal, jumpʼejl ejemplo chucbeñob jiñi puerta o aqʼueñob jiñi a buchlib yaʼ ti carro.

• Tsʼitaʼ chaʼlen tʼan yicʼotob, anquese mach wen yujilobic jiñi a tʼan a wujil bʌ.

• Pʌsʌ a pijt cheʼ bʌ an chuqui miʼ melob maʼañic bʌ maʼ chʼʌmben i sujm.

• Wen ñʌchʼtan chuqui miʼ yʌlob i ñopo a chʼʌmben i sujm jiñi i wocolob.