Qʼuelben wem bʌ i melbal yambʌlob
Jiñi wocol
Cheʼ bʌ an majqui miʼ chanʼesan i bʌ, tsʼaʼ miʼ qʼuel yambʌlob, jin jach miʼ bajñel ñumen ñaʼtan i bʌ, ñuc miʼ qʼuel i bʌ yicʼot maʼañic i cʼʌjñibal miʼ qʼuel yambʌlob. Majqui jach miʼ mejlel i yajlel ti ili wocol. Jiñi Encyclopædia Britannica miʼ yʌl: «An lac piʼʌlob muʼ bʌ i yʌlob chaʼan jiñi i cultura ñumen wento bajcheʼ yan tac bʌ tiʼ caj bajcheʼ yilal chumulob, chuqui miʼ cʼuxob, jiñi i pislelob, jiñi i costumbre, jiñi muʼ bʌ i ñopob yicʼot tiʼ caj yan tac bʌ». ¿Chuqui miʼ mejlel a mel chaʼan maʼañic maʼ yajlel ti ili wocol?
Principio am bʌ ti Biblia
«Yom pecʼ mi laʼ mel laʼ bʌ. Yom ñumen ñuc mi laʼ qʼuel laʼ piʼʌlob cheʼ bajcheʼ mi laʼ bajñel qʼuel laʼ bʌ» (FILIPENSES 2:3).
¿Chuqui yom i yʌl ili? Chaʼan yom an a pecʼlel chaʼan maʼañic maʼ chanʼesan a bʌ. Mi añʌch a pecʼlel miʼ cajel a chʼʌm ti ñuc chaʼan jiñi yambʌlob ñumen wento chuqui yujilob melob bajcheʼ jatet. Tiʼ pejtelel jiñi cultura wen.
Laʼ laj qʼuel tsaʼ bʌ ujti tiʼ tojlel Stefan. Tsaʼ coli ti jumpʼejl país comunista i tsiʼ cʌyʌ i tsʼaʼlen jiñi lac piʼʌlob chʼoyoloʼ bʌ ti país tac mach bʌ
comunistajob. Miʼ yʌl: «Chaʼan mi laj cʌy lac tsʼaʼlen yambʌlob, ñuc i cʼʌjñibal cheʼ bʌ mi lac ñaʼtan chaʼan jiñi yambʌlob ñumen ñucob bajcheʼ joñonla. Mach luʼ cujilic, i ti bele ora añʌch chuqui miʼ mejlel j cʌn tiʼ tojlel yambʌlob».¿Chuqui yom maʼ mel?
Yom wen jach bajcheʼ maʼ qʼuel a bʌ yicʼot maʼ chʼʌmben i sujm chaʼan jatet maʼ mel mach tac bʌ weñic jaʼel. Chʼʌmʌ ti ñuc chaʼan an chuqui wen yujil yambʌlob i jatet mach a wujilic melol. I mach a ñaʼtan chaʼan mach laj weñic i melbal jiñi yambʌlob.
Chaʼan maʼañic maʼ ñaʼtan mach bʌ weñic tiʼ tojlel yambʌlob, cʼajtiben a bʌ:
Chʼʌmʌ ti ñuc chaʼan an chuqui wen yujil yambʌlob i jatet mach a wujilic melol.
-
¿Mach ba ñoj weñic jiñi mach bʌ añic mic mulan tiʼ tojlel jiñi quixtañu, o cojach chaʼan miʼ mel mach bʌ ñʌmʌlic c mel?
-
¿Mejl ba i qʼuel jaʼel mach bʌ weñic tic tojlel jiñi quixtañu?
-
¿Chuqui ñumen yujil melol ili quixtañu mach bʌ wen cujil melol joñon?
Mi mucʼʌch a jacʼ tiʼ pejtelel a pusicʼal ili cʼajtiya tac, mi caj a cʌy a tsʼaʼlen yambʌlob i mi caj i cʼotel a qʼuel jiñi wen tac bʌ i melbalob.