Muʼ bʌ i pʌsbeñonla Dios miʼ yʌqʼueñonla lac pijtaya
Dios miʼ wʌn subeñonla chaʼan ti talto bʌ qʼuin cabʌl chuqui miʼ cajel ti qʼuextʌyel. Mi caj i jisan jiñi wocol yicʼot mi caj i yʌcʼ chaʼan tijicña mi lac chumtʌl tiʼ pejtelel ora (Salmo 37:11). ¿Chucoch miʼ mejlel lac ñop iliyi? Come «mach lajalic Dios bajcheʼ winicob yujiloʼ bʌ lot» (Números 23:19). Mi caj laj qʼuel chuqui tac mi caj i mel Dios.
Dios mi caj i jisan jiñi jontoloʼ bʌ
«Anquese miʼ pʼojlelob jini jontoloʼ bʌ cheʼ bajcheʼ miʼ pasel jam, lolom jach. Come mux i jisʌntelob. Mach colicob tiʼ pejtelel ora» (SALMO 92:7).
Cheʼ bajcheʼ tsaʼ laj qʼuele ti yambʌ artículo ili pañimil (mulawil) ñumen jontolix. Pero mach yomic miʼ yʌcʼ ti toj sajtel lac pusicʼal iliyi come jiñi Biblia tsaʼix i wʌn alʌ ti 2 Timoteo 3:1-5 chaʼan ti jiñi «cojix tac bʌ qʼuin» miʼ ñumen cajel jontolil. Ili cojix tac bʌ qʼuin i chaʼañobʌch jiñi mach bʌ añic miʼ jacʼbeñob i tʼan Dios. Tsʼitaʼ jax yom chaʼan Dios miʼ jisan jiñi mach bʌ yomobic i qʼuextan i melbal (chaʼlibal). Cheʼ jiñi, cojach mi caj i cʌytʌlob jiñi muʼ bʌ i jacʼbeñob i tʼan Dios. Cheʼ bajcheʼ miʼ yʌl Salmo 37:29: «Mi caj i yʌqʼuentelob jini pañimil jini tojoʼ bʌ. Mi caj i yajñelob tiʼ pejtelel ora».
Dios mi caj i jisan Satanás
«Jiñi Dios muʼ bʌ i yʌcʼ ñʌchʼtʌlel miʼ yʌcʼ Satanás tiʼ yebal laʼ woc chaʼan miʼ tʼuchtan» (ROMANOS 16:20).
Satanás, jiñi xibajob yicʼot jiñi jontoloʼ (mañajoʼ) bʌ miʼ jisʌntelob, miʼ cajel ñʌchʼtʌlel ila ti Pañimil. Dios miʼ wʌn subeñonla: Maʼañic majch mi caj i bʌcʼtesañetla (Miqueas 4:4).
Dios mi caj i jisan cʼamʌjel yicʼot chʌmel
«Jiñi i chumlib Dios yaʼan yicʼot jiñi quixtañujob [...]. I mi caj i sujcubeñob i yaʼlel i wut, maʼañix miʼ cajel chʌmel, mi muqʼuicto i cajel chʼijyemlel, uqʼuel yicʼot cʼuxyajiyel» (APOCALIPSIS 21:3, 4).
Dios mi caj i jisan jiñi wocol am bʌ i teche Satanás, Adán yicʼot Eva, i cheʼ jaʼel mach xmulilix mi caj la cajñel. Jin chaʼan, maʼañix miʼ cajel wocol, mi cʼamʌjel yicʼot «maʼañix miʼ cajel chʌmel». Jiñi muʼ bʌ i cʼuxbiñob Dios yicʼot miʼ jacʼbeñob i tʼan mi caj i chumtʌlob tiʼ pejtelel ora. ¿Baqui?
Dios mi caj i sujtesan ti paraíso ili Pañimil
«Ti jim bʌ ora jini tiquin bʌ lum mi caj i yubin i tijicñʌyel. Miʼ caj ti nich yaʼ baʼ jochol jini lum» (ISAÍAS 35:1).
Cheʼ bʌ Dios miʼ jisan jiñi jontolil, mi caj i sujtel ti jumpʼejl paraíso ili Pañimil. Wen yʌxix miʼ cajel yicʼot mi caj i wen acʼ i wut (Salmo 72:16). Jiñi mar tac yicʼot yan tac bʌ jaʼ luʼ sʌc mi caj i yajñel yicʼot cabʌl chuqui cuxul tac bʌ mi caj i yajñel yaʼi. I tajol jaʼel maʼañix baqui ora mi caj laj cʼʌn jiñi tʼan contaminación. Jiñi muʼ bʌ caj i yajñelob ti paraíso mi caj i melob i yotot chaʼan miʼ chumtañob, maʼañix majqui pʼumpʼum mi caj i yajñel, maʼañix majqui mi caj i ñusan wiʼñal i maʼañix majqui mi caj i chumtʌl ti calle (Isaías 65:21, 22).
Dios mi caj i chʼojyesan chʌmeñoʼ bʌ
«Mi caj i chaʼ chʼojyelob» (HECHOS 24:15).
¿A wom ba a chaʼ qʼuel jiñi a familia yicʼot a wamigojob tsaʼ bʌ chʌmiyob? Cheʼ bʌ ili Pañimil sujtemix ti jumpʼej paraíso, jiñi Dios mach bʌ añic i pʼisol i pʼʌtʌlel mi caj i chaʼ chʼojyesañob. ¡Ñaʼtancu bajcheʼ cʼamel bʌ tijicñʌyel miʼ cajel cheʼ bʌ mi laʼ chaʼ taj laʼ bʌ, miʼ cʌñetob i cheʼ jaʼel maʼ cʌñob! Jiñi Biblia miʼ yʌl chaʼan an xbiʼtalob yicʼot añobix bʌ i jabilel tsaʼ bʌ chaʼ chʼojyesʌntiyob chaʼan miʼ chaʼ tem ajñelob yicʼot i familia. Jesucristo tsiʼ chʼojyesa chaʼtiqui uxtiquil i cabʌlob tsiʼ qʼueleyob jiñi (Lucas 8:49-56; Juan 11:11-14, 38-44).
Miʼ mejlel a qʼuel jaʼel iliyi
¡JAMɅX A WUT!
Wocol tac ti pañimil: Mach a sʌt a pijtaya
Jiñi Biblia miʼ coltañonla lac lʌtʼ jiñi wocol tac i miʼ yʌqʼueñonla lac pijtaya.
CʼAJTIYA TAC CHAʼAN BɅ BIBLIA
¿Chuqui miʼ yʌl jiñi Biblia chaʼan jiñi chaʼ chʼojyel?
Tajol miʼ toj sajtel a pusicʼal cheʼ maʼ wubin majqui mi caj i chaʼ chʼojyesʌntelob.
CʼAJTIYA TAC CHAʼAN BɅ BIBLIA
¿Bajcheʼ mi caj i tajtʌl ñʌchʼtʌlel ila ti Pañimil?
Jiñi Biblia miʼ yʌl chaʼan jiñi i Yumʌntel Dios mi caj i chʼʌm tilel ñʌchʼtʌlel.
