«Chʌn [...] ñusʌben laʼ bʌ laʼ mul tiʼ pejtelel laʼ pusicʼal cheʼto jaʼel mi an majqui miʼ taj i sajtemal ti laʼ tojlel» (COLOSENSES 3:13).

Tajol joñonla mi lac low yambʌlob i cheʼ jaʼel miʼ lowoñobla tiʼ caj luʼ xmulilonla. Jin chaʼan ti lac pejtelel yom mi lac ñusʌben lac bʌ lac mul, i cheʼ bʌ mi lac mel bajcheʼ jiñi, mach lecojix mi caj laj qʼuel lac bʌ. Mach laj qʼuextan jontolil yicʼot mach lac pam suben tiʼ wut baqui bʌ i sajtemal (Romanos 12:17). Pero ¿ixcu mi cʌlʌxix chuqui tsiʼ melbeyonla i mach mejlic lac ñusʌben mi la cubin? Mi cheʼ bajcheʼ jiñi, ñumen wen cheʼ mi lac bajñel pejcan i wen jach bajcheʼ yom mi lac mel. La com bʌ jiñʌch cheʼ mi lac tojʼesan jiñi wocol, i mach jiñic mi laj qʼuel majqui an i mul (Romanos 12:18).

«Yicʼot laʼ pecʼlel yom mi laʼ ñaʼtan chaʼan jiñi yambʌlob ñumen ñucob bajcheʼetla» (FILIPENSES 2:3).

Mi an lac pecʼlel yicʼot mi laj qʼuel ti ñuc jiñi lac piʼʌlob, jiñi yambʌlob mi caj i mulañob ajñel yicʼotonla come mi caj i qʼuelob chaʼan utsonla yicʼot mi lac chʼʌmob ti ñuc, i chaʼan maʼañic mi caj lac yilo melbeñob mach bʌ weñic. Pero mi tsaʼ lac ñaʼta chaʼan joñonla ñumen ñuconla i tiʼ pejtelel ora la com miʼ mejlel bajcheʼ mi la cʌl, cojach mi la cʌcʼ  ti tejchel wocol. Jiñi yambʌlob maʼañix mi caj i mulañob i ñochtañonla i tajol mach cabʌlic la camigojob mi caj i cʌytʌl o mi juntiquilicto.

«Dios junlajal miʼ qʼuel pejtelel lac piʼʌlob, miʼ chʼʌm pejtelel muʼ bʌ i bʌcʼñan yicʼot muʼ bʌ i mel chuqui wen, mach yʌlʌyic baqui chʼoyol» (HECHOS 10:34, 35).

Jiñi tsaʼ bʌ i meleyonla (pʌtʌyonla) junlajal miʼ qʼuelonla, mach yʌlʌyic baqui tilemonla, baqui bʌ lac tʼan, mi cabʌl lac chubʌʼan o mi yʌñʌl i colorlel lac pʌchʌlel. «Tiʼ tojlel juntiquil wiñic tsiʼ mele jujunmojt lac piʼʌlob» (Hechos 17:26). Ili yom i yʌl chaʼan ti lac pejtelel lac familia lac bʌ. Cheʼ bʌ wen jach mi laj qʼuel jiñi yambʌlob yicʼot utsonla, tijicña mi caj i yajñelob, cheʼonla jaʼel yicʼot jiñi tsaʼ bʌ i meleyonla.

«Mach laʼ wotsan laʼ bʌ ti wocol» (COLOSENSES 3:12).

Cheʼ bʌ utsonla yicʼot mach ti orajic mi lac michʼan, jiñi yambʌlob mi caj i mulañob ajñel la quicʼot, i yujilob chaʼan miʼ mejlelob i subeñonla chuqui miʼ ñaʼtañob yicʼot miʼ ticʼoñobla come maʼañic mi caj lac michʼan. I mi an majqui miʼ michʼan yicʼotonla, pero mi wen jach bajcheʼ mi lac jacʼben mi caj i coltan chaʼan miʼ yutsʼan majlel. Proverbios 15:1 miʼ yʌl: «Jini uts bʌ tʼan miʼ lajmesʌben i michʼajel winic. Jini tsʌts bʌ tʼan miʼ yutsi techben i michʼajel».

«Ñumen an tijicñʌyel cheʼ mi la cʌcʼ i mach jiñic cheʼ mi lac chʼʌm» (HECHOS 20:35).

Cabʌl lac piʼʌlob mucʼ jach i bajñel ñaʼtañob i bʌ yicʼot cabʌl chuqui yomob. Pero mi la cujil i tʼoxol chuqui an lac chaʼan, wen tijicña mi caj la cubin lac bʌ (Lucas 6:38). Jiñi yujil bʌ tʼoxol chuqui an i chaʼan, ñumen tijicña come miʼ cʼuxbin yambʌlob i mach jiñic chuqui tac an. I jiñi cʼuxbiya jiñʌch muʼ bʌ i ñijcan chaʼan miʼ yʌqʼuen wocolix i yʌlʌ jiñi yambʌlob cheʼ bʌ an chuqui miʼ yʌqʼuentel (Colosenses 3:15). Cʼajtiben a bʌ: «¿Majqui com ajñel quicʼot? ¿Jimba maʼañic bʌ miʼ qʼuel i bʌ ti ñuc, miʼ tʼox chuqui an i chaʼan yicʼot miʼ qʼuel ti ñuc chuqui miʼ yʌqʼuentel?, o ¿Jimba mach bʌ añic miʼ mel iliyi?». La com bʌ la cʌl jiñʌch chaʼan cheʼ yom mi lac mel bajcheʼ la com mi lac melbentel (Mateo 7:12).