An qʼuelbil chaʼan jiñi xcolelob muʼ bʌ i ñumen ñusañob ora ti Internet miʼ tajob wocol tac cheʼ bʌ bajcheʼ iliyi:

• Mach tijicñayobic mi mach yicʼotobic i celular o tableta.

• Miʼ ticʼlan yambʌlob ti Internet o miʼ ticʼlʌntelob jaʼel.

• Miʼ mejlel i taj i qʼuelob pornografía anquese maʼañic woliʼ sʌclañob.

CɅYɅLOB JACH TI CELULAR O TABLETA

Yaʼ ti Internet cabʌl jax chuqui miʼ mejlel lac taj muʼ bʌ i mejlel ti sujtel ti vicio, jumpʼejl ejemplo jiñʌch jiñi alas tac. Ili mach cheʼ jach miʼ toʼol ajlel. Jiñi libro En defensa de la conversación miʼ yʌl: «Pejtelel jiñi aplicación am bʌ ti celular o tableta melbil chaʼan mach comix laj cʌy laj cʼʌn». Jiñi empresa tac miʼ ñumen tajob cabʌl taqʼuin cheʼ bʌ mi lac ñusan cabʌl ora laj cʼʌn jiñi aplicación baqui miʼ loqʼuel jiñi anuncio tac.

ÑAʼTANCU ILI: ¿Yaʼ jach ba chuculob jiñi a walobilob tiʼ celular o tableta? ¿Bajcheʼ miʼ mejlel a coltañob chaʼan ñumen wen miʼ cʼʌñob jiñi i yorajlel am bʌ i chaʼañob? (EFESIOS 5:15, 16).

TICʼLɅNTEL TI INTERNET

An lac piʼʌlob ñumen jontol bʌ miʼ sujtelob cheʼ miʼ cʼʌñob Internet i maʼañix miʼ chʼʌmob ti ñuc yambʌlob, ili an yʌcʼʌ chaʼan miʼ ticʼlan yambʌlob.

An cheʼ bʌ miʼ melob bajcheʼ iliyi come yom chaʼan miʼ chʼʌjmelob ti ñuc yicʼot chaʼan miʼ ñumen cʌjñelob. I an muʼ bʌ i yubiñob chaʼan wolix i ticʼlʌntelob mi an baqui maʼañic tsaʼ pʌjyiyob.

ÑAʼTANCU ILI: ¿Muʼ ba i pʌs jiñi a walobilob chaʼan mucʼʌch i chʼʌm ti ñuc yambʌlob cheʼ bʌ miʼ cʼʌñob Internet? (Efesios 4:31). ¿Bajcheʼ yubil miʼ yubiñob i bʌ cheʼ bʌ an baqui maʼañic tsaʼ pʌjyiyob?

PORNOGRAFÍA

Ili ora, yaʼ ti Internet mach wocolix miʼ mejlel lac taj página tac baqui miʼ pʌs i chaʼan tac bʌ tsʼiʼlel. Anquese añʌch chuqui miʼ mejlel a mel chaʼan maʼañic miʼ tajob i qʼuel a walobilob jiñi, an i tajol mach jasʌlic.

Cheʼ bʌ miʼ chojquel majlel imagen tac chaʼan bʌ tsʼiʼlel ti celular o tableta, cʌmbil bʌ jaʼel bajcheʼ sexting o sexteo, jumpʼejlʌch tsʌts bʌ mulil. Jin chaʼan, muʼ bʌ i melob iliyi miʼ tajob wocol yicʼot añoʼ bʌ i yeʼtel i mach yʌlʌyic jaypʼejl i jabilelob, come woliʼ pucob pornografía baqui miʼ loqʼuel xbiʼtalob.

ÑAʼTANCU ILI: ¿Bajcheʼ miʼ mejlel a coltan a walobil chaʼan maʼañic miʼ qʼuel o miʼ choc majlel imagen tac chaʼan bʌ tsʼiʼlel ti Internet? (EFESIOS 5:3, 4).

CɅNTESAN TI WEN A WALOBILOB

Anquese jiñi a walobilob i wen cʌñʌyobʌch chaʼan jiñi tecnología, pero yomʌch miʼ cʌntesʌntelob i cʼʌn ti wen. Jiñi libro Indistractable (Indistraíble) miʼ yʌl chaʼan cheʼ bʌ juntiquil xbiʼtal mi la cʌqʼuen jumpʼejl celular o tableta cheʼ bʌ maxto wen yujilic bajcheʼ miʼ cʼʌjñel, lajal bajcheʼ mi la cʌcʼ chaʼan miʼ choc ochel i bʌ ti jaʼ i mach yujilic ñuxijel.

Chaʼlen ti marcar jiñi a wom bʌ a mel yicʼot a walobil o tsʼijbun yan tac bʌ muʼ bʌ a mulan a mel:

• Mic suben bajcheʼ yom miʼ cʼʌn Internet.

• Mij coltan chaʼan mach lecojic miʼ yubin mi an baqui maʼañic tsaʼ pʌjyi.

• Mic chaʼlen ti bloquear jiñi página chaʼan Internet mach tac bʌ weñic.

• Mic chʌcʌ qʼuelben chuqui an tiʼ teléfono.

• Mic suben jaypʼejl hora miʼ mejlel i cʼʌn i celular o tableta.

• Mic suben chaʼan maʼañic miʼ chʼʌm majlel i celular o tableta tiʼ cuarto cheʼ ti abʌlel.

• Maʼañic miʼ cʌqʼuen i cʼʌn i celular o tableta cheʼ bʌ woli lon j cʼux lon c waj.