Pero mi mach weñic bajcheʼ miʼ cʼʌñob miʼ mejlel i tajob wocol bajcheʼ tac iliyi:

• Miʼ mejlel i chilbeñob i yorajlel chaʼan miʼ tem ajñelob.

• Miʼ bej ñaʼtañob i yeʼtel anquese añobix tiʼ yotot.

• Maʼañix miʼ ñopbeñob i bʌ i tʼan i tajol juntiquil mach xucʼulix tiʼ tojlel i piʼʌl.

CHEʼ TEMEL MI LAʼ WAJÑEL

Juntiquil ñoxiʼal i cʼabaʼ Michael miʼ yʌl: «An i tajol cheʼ bʌ yaʼañon quicʼot quijñam lajal bajcheʼ mach yaʼic an quicʼot. Jin jach woliʼ qʼuel i celular i yaʼi miʼ subeñon: ‹Ay, ñusʌbeñon. Maxto c tajbe i yorajlel chaʼan mic pejcan ili mensaje tac›». Jonathan, ñujpuñem bʌ jaʼel, miʼ yʌl chaʼan «an qʼuiñil jumpʼejl xñujpuñel yaʼʌch lajal añob, pero lajal bajcheʼ jiñi juntiquil wen ñajt baqui an».

ÑAʼTANCU ILI: ¿Jaysujtel tiʼ caj jumpʼejl llamada o jumpʼejl mensaje miʼ mʌctañon chaʼan maʼañic mic ñusan qʼuin quicʼot c ñoxiʼal o quijñam? (EFESIOS 5:33).

JIÑI EʼTEL

An lac piʼʌlob yom bʌ miʼ jacʼob llamada o correo tac tiʼ pejtelel ora tiʼ caj i yeʼtelob. I an yambʌlob wocol bʌ miʼ yubiñob chaʼan miʼ cʌyob i ñaʼtan i yeʼtel anquese yaʼix añob tiʼ yotot. Juntiquil ñoxiʼal i cʼabaʼ Lee miʼ yʌl: «Ñoj wocol mi cubin chaʼan maʼañic mic jacʼ jiñi llamada o mensaje tac chaʼan queʼtel cheʼ bʌ tsaʼix cʌlʌ chaʼan mi caj c ñusan qʼuin quicʼot quijñam». I juntiquil ijñamʌl i cʼabaʼ Joy miʼ yʌl: «Añon ti cotot mic chaʼlen eʼtel i wocol mi cubin chaʼan mic ñaʼtan bajcheʼ ora yom mij cʌy. Yom mic chaʼlen wersa chaʼan pʼisbil jach bajcheʼ mij qʼuel jiñi queʼtel».

ÑAʼTANCU ILI: Cheʼ bʌ miʼ pejcañet a ñoxiʼal o a wijñam, ¿woliyʌch baʼ ñʌchʼtan chuqui miʼ subeñet? (LUCAS 8:18).

JIÑI XUCʼTɅLEL

Jumpʼejl encuesta tsaʼ bʌ mejli tsiʼ yʌlʌ chaʼan cabʌl xñujpuñel miʼ chaʼleñob leto tiʼ caj mach yujilobic chuqui tac miʼ letsan ti Internet i ñoxiʼalob o i yijñamob. I jiñi 10% tsaʼ bʌ melbentiyob jiñi encuesta tsiʼ yʌlʌyob chaʼan añʌch i cʼʌjquesayob ti Internet chuqui tac mach bʌ yujilobic i ñoxiʼal o i yijñam.

Miʼ yʌjlel chaʼan jiñi an tac bʌ ti Internet lajal bajcheʼ wocol tac mach bʌ tsiquilic i muʼto i mejlel i yʌcʼ chaʼan juntiquil miʼ chaʼlen tsʼiʼlel. Jin chaʼan, maʼañic miʼ toj sajtel lac pusicʼal cheʼ bʌ jiñi abogadojob yujiloʼ bʌ chaʼan divorcio miʼ yʌlob chaʼan tiʼ cajʌch jiñi Internet an yonlel muʼ bʌ i cʌyob i bʌ.

ÑAʼTANCU ILI: ¿Muʼ baʼ muc cheʼ maʼ chocben majlel mensaje mach bʌ a ñoxiʼal o a wijñam? (PROVERBIOS 4:23).

ÑAʼTAN JIÑI ÑUMEN ÑUC BɅ I CʼɅJÑIBAL A CHAʼAN

Juntiquil lac piʼʌl maʼañic bʌ miʼ cʼux i waj miʼ mejlel ti cʼamʼan. I cheʼ miʼ yujtel jaʼel ti jumpʼejl xñujpuñel, mi maʼañic miʼ chʼʌmob ti ñuc jiñi hora yom bʌ miʼ ñusañob yicʼot i piʼʌl mi caj i tajob wocol (Efesios 5:28, 29).

Tem qʼuelela jiñi laʼ wom bʌ laʼ mel o tsʼijbunla jiñi laʼ wom tac bʌ laʼ mel chaʼan jiñi tecnología maʼañic miʼ yʌcʼ ti wocol jiñi laʼ ñujpuñel.

• Mi lac tem cʼux lac waj junsujtel ti jumpʼejl qʼuin.

• Mi lac jumucʼ cʌy jiñi lac celular o tableta.

• Mi lac chajpan chaʼan an chuqui mi laj comol mel.

• Mi lac yʌp lac celular o lac tableta cheʼ ti acʼʌlel i ñajt baqui mi laj cʌy.

• Mi lac chaʼlen tʼan 15 minuto jujumpʼejl qʼuin i maʼañic mi laj cʌy ti lac tʼejl lac celular o lac tableta.

• Mi la cʌl jaypʼejl hora mi caj laj cʼʌn jiñi Internet.