¿Tsaʼix ba i taja i qʼuel jiñi ciencia bajcheʼ tsaʼ caji jiñi universo yicʼot jiñi cuxtʌlel? Tiʼ sujm maʼañic. Cabʌlob miʼ ñaʼtañob chaʼan jiñi cosmología miʼ mejlel i tsictesan bajcheʼ tsaʼ caji jiñi universo. Pero Marcelo Gleiser, juntiquil maestro chaʼan Astronomía yaʼ ti Universidad am bʌ ti Dartmouth, yicʼot agnóstico bʌ, miʼ yʌl: «Maxto c wis tsictesa lojon bajcheʼ tsaʼ tili jiñi universo».

¿I chuqui miʼ mejlel la cʌl chaʼan bajcheʼ tsaʼ caji jiñi cuxtʌlel? Jiñi revista Science News miʼ yʌl: «Tajol maʼañic miʼ mejlel ti ñoj ñaʼtʌntel bajcheʼ tsaʼ caji jiñi cuxtʌlel ila ti Lum. Wajalix tsaʼ jili lʌcʼʌ tiʼ pejtelel jiñi xajlel yicʼot bac tac muʼ bʌ i pʌs chuqui tsaʼ ujti tiʼ tejchibal». Ili tsaʼ tac bʌ ajli miʼ pʌs chaʼan jiñi ciencia maxto mejli i yʌl bajcheʼ tsaʼ caji jiñi universo yicʼot jiñi cuxtʌlel.

Tajol maʼ cʼajtiben a bʌ: «Mi an majqui tsiʼ yʌcʼʌ jiñi cuxtʌlel ila ti Lum, ¿majqui jiñi? Cheʼ jaʼel, mi an juntiquil uts bʌ yicʼot am bʌ i ñaʼtʌbal tsaʼ bʌ i mele chuqui tac an, ¿chucoch miʼ yʌqʼueñonla lac ñusan wocol? ¿Chucoch miʼ yʌcʼ chaʼan an cabʌl ñopbalʌl? ¿Chucoch miʼ yʌcʼ chaʼan yonlel lac piʼʌlob añoʼ bʌ i ñopbal miʼ melob chuqui tac mach bʌ weñic?».

Jiñi ciencia maʼañic miʼ mejlel i jacʼ jiñi cʼajtiya tac, pero jiñi mach yomic i yʌl chaʼan maʼañic i jacʼbal. Tiʼ sujm, yonlel lac piʼʌlob tsaʼix i tajbeyob i jacʼbal yaʼ ti Biblia.

An científicojob tsaʼix bʌ i yʌqʼueyob i yorajlel chaʼan miʼ tsajiñob chuqui miʼ yʌl jiñi Biblia. ¿A wom ba a ñaʼtan chucoch muqʼuix i ñopob chaʼan añʌch juntiquil tsaʼ bʌ i mele chuqui tac an? Cucu ti jw.org i yaʼ ti buscador tsʼijbun «Muʼ bʌ i yʌlob chaʼan baqui tilem jiñi cuxtʌlel».