¿Jimba Dios tsiʼ mele jiñi universo yicʼot jiñi cuxtʌlel o cheʼ jach tsaʼ bajñel caji? Jiñi muʼ bʌ i yʌlob jiñi físicojob tiʼ tejchibal ili tema mach wis lajalic bajcheʼ muʼ bʌ i yʌl jiñi Biblia. An lac piʼʌlob muʼ bʌ i coltañob junchajp, pero an yambʌlob muʼ bʌ i coltan jiñi yambʌ. Jin chaʼan, cabʌl lac piʼʌlob miʼ cʼʌñob libro tac muʼ bʌ i wen chojñel yicʼot programa tac ti televisión chaʼan miʼ wen coltañob muʼ bʌ i ñopob. Cheʼ jaʼel, cabʌlob mach yujilobix chuqui yom miʼ ñaʼtañob.

Tajol jiñi maestrojob tiʼ subeyetla chaʼan jiñi universo yicʼot jiñi cuxtʌlel cheʼ jach tsaʼ bajñel caji i maʼañic juntiquil tsaʼ bʌ i mele. Pero ¿tsaʼ bʌ i pʌsbeyetla chuqui tac miʼ pʌs chaʼan i sujmʌch jiñi? O tajol jiñi añoʼ bʌ i yeʼtel ti ñopbalʌl tac tiʼ subeyetla chaʼan añʌch majqui tsiʼ mele chuqui tac an. Pero ¿tsaʼʌch ba i pʌsbeyetla chuqui tac miʼ pʌs chaʼan i sujmʌch jiñi? ¿O tsaʼ jach i yʌlʌyob chaʼan jiñʌch junchajp yom bʌ mi lac ñop o chaʼan yom jach an lac ñopoñel?

Tajol jatet tsaʼix a ñopo a wen ñaʼtan iliyi i tajol maʼ ñaʼtan chaʼan mach mejlic lac ñaʼtan mi añʌch juntiquil tsaʼ bʌ i mele chuqui tac an. Tajol maʼ cʼajtiben a bʌ mi ñucʌch i cʼʌjñibal cheʼ mi lac ñaʼtan i jacʼbal ili cʼajtiya.

Ili revista mi caj i pʌs chuqui tac tsiʼ colta cabʌlob chaʼan miʼ ñopob chaʼan añʌch juntiquil tsaʼ bʌ i mele chuqui tac an. Cheʼ jiñi, mi caj i tsictesan chucoch ñucʌch i cʼʌjñibal cheʼ mi lac ñaʼtan bajcheʼ tsaʼ caji jiñi cuxtʌlel.