¿Añix ba cʼʌlʌl tiʼ pejtelel ora jiñi universo?

Génesis 1:1 miʼ yʌl: «Cheʼ tiʼ cajibal tsiʼ mele Dios jini panchan yicʼot pañimil».

Cheʼ bʌ maxto i taja jiñi jabil 1950, cabʌl científicojob tsiʼ ñaʼtayob chaʼan jiñi universo añʌch cʼʌlʌl tiʼ pejtelel ora. Pero ili ora, tiʼ coltaya jiñi tajbil tac bʌ, lʌcʼʌ tiʼ pejtelel científicojob miʼ ñopob chaʼan añʌch i tejchibal jiñi universo.

¿Bajcheʼ yilal jiñi Pañimil ti wajali?

Génesis 1:2, 9 miʼ yʌl chaʼan tiʼ cajibal «mach chajpʌbilic pañimil. Maʼanic i cʼʌjñibal jaʼel», yicʼot jaʼ jach an.

Iliyi miʼ taj i bʌ yicʼot jiñi tajbil bʌ i chaʼan jiñi científicojob. Jumpʼejl ejemplo, jiñi biólogo Patrick Shih miʼ yʌl chaʼan tiʼ ñaxan ti ili planeta maʼañic oxígeno chaʼan miʼ mejlel lac jap icʼ, maʼañic teʼ tac yicʼot maʼañic chuqui tac cuxul bʌ. Jiñi revista Astronomy miʼ yʌl: «Jiñi tsijib investigación tac miʼ pʌs chaʼan ti ñaxan, ila ti Pañimil jaʼ jach an, i mach colemic baqui maʼañic jaʼ o junyajl maʼañic baqui tiquin».

 ¿Bajcheʼ tsaʼ qʼuextʌyi majlel jiñi atmósfera am bʌ ti Pañimil?

Génesis 1:3-5 miʼ yʌcʼ ti ñaʼtʌntel chaʼan jiñi i sʌclel pañimil tsaʼix caji ti cʼaxel yaʼ ti atmósfera pero ila ti Lum maxto wen tsiquilic baqui woliʼ tilel. Tsaʼto ñumi cabʌl jab chaʼan miʼ cʼajpan pʌs i bʌ jiñi Qʼuin yicʼot jiñi Luna (Génesis 1:14-18).

Jiñi Centro Smithsonian de Investigaciones Ambientales miʼ yʌl chaʼan ti ñaxan, jiñi atmósfera mach wen tsiquilic miʼ yʌcʼ ti ñumel jiñi sʌclel ila ti Lum. Miʼ yʌl: «Jiñi metano am bʌ ti icʼ miʼ pʼol jiñi yeʼeb muʼ bʌ i mʌc pejtelel jiñi Lum ti wajali». Ti wiʼil, «tsaʼ jili jiñi yeʼeb i azul tsaʼ majli jiñi panchan».

¿Bajcheʼ tsaʼ caji jiñi cuxtʌlel ila ti Lum?

Cheʼ bajcheʼ miʼ yʌl Génesis 1:20-27, cheʼ tsaʼ caji jiñi cuxul tac bʌ bajcheʼ iliyi: Ñaxan jiñi chʌy, cheʼ jiñi, jiñi xmateʼmut, jiñi añimal tac am bʌ ti Lum i wiʼilix jiñi lac piʼʌlob. ¿I chuqui miʼ yʌlob jiñi científicojob? Miʼ ñaʼtañob chaʼan jiñi chʌy tac ñaxanto tsaʼ pʼojli i wiʼilix jiñi mamífero tac, i chaʼan jiñi lac piʼʌlob junyajl wiʼilix tsaʼ mejliyob.

An muʼ bʌ i yʌlob chaʼan jiñi Biblia maʼañic miʼ taj i bʌ yicʼot jiñi tajbil bʌ i chaʼan jiñi ciencia. Pero lʌcʼʌ tiʼ pejtelel ora miʼ yʌlob iliyi come maxto i wen chʼʌmbeyob i sujm chuqui miʼ yʌl jiñi Biblia.

Jiñi Biblia maʼañic miʼ yʌl chaʼan jiñi universo o jiñi Pañimil an jaxto i chaʼan 6 mil jab. Muʼ bʌ i yʌl jiñʌch chaʼan jiñi universo yicʼot jiñi Pañimil tsaʼ mejli «cheʼ tiʼ cajibal» (Génesis 1:1). Jiñi Biblia maʼañic miʼ ñoj al jalix tsaʼ ujti jiñi.

Jiñi Biblia maʼañic miʼ yʌl chaʼan jiñi cuxtʌlel ila ti Pañimil tsaʼ mejli ti 6 qʼuin muʼ bʌ i jalʼan 24 hora. Miʼ cʼʌn jiñi tʼan qʼuin chaʼan miʼ taj ti tʼan cabʌl ora. Jumpʼejl ejemplo, miʼ yʌl chaʼan jiñi lac planeta yicʼot jiñi cuxtʌlel tsaʼ mejli ti jiñi 6 qʼuin muʼ bʌ i taj ti tʼan Génesis capítulo 1. Ti Biblia, iliyi cʌmbil bajcheʼ «jiñi bʌ qʼuin cheʼ bʌ Jehová * Dios tsiʼ mele jiñi panchan yicʼot Pañimil» (Génesis 2:4, TNM). Jin chaʼan, jiñi jujumpʼejl qʼuin cheʼ bʌ Dios tsiʼ chajpa jiñi Lum yicʼot tsiʼ yʌcʼʌ jiñi cuxtʌlel tajol tsaʼ jalʼa cabʌl jab.

Jiñi Biblia maʼañic miʼ yʌl chaʼan maʼañic miʼ mejlel ti qʼuextʌyel bajcheʼ yilal jiñi cuxul tac bʌ cheʼ bʌ miʼ ñumel majlel jiñi jabil tac. Jiñi libro chaʼan Génesis miʼ yʌl chaʼan jiñi añimal tac tsaʼ mejli «ti jujunchajp» (Génesis 1:24, 25). Jiñi tʼan «jujunchajp» muʼ bʌ i cʼʌn jiñi Biblia mach jumpʼejlic tʼan científico bʌ, tsiquil chaʼan cabʌl chuqui tac cuxul bʌ woliʼ taj ti tʼan. Jin chaʼan, mach junchajpic jach chuqui ochem yaʼi. Ili miʼ yʌcʼ ti ñaʼtʌntel chaʼan junmojt añimal mucʼʌch i mejlel ti qʼuextʌyel bajcheʼ yilal ti wiʼil.

 ¿Chuqui maʼ wʌl jatet?

Jiñi Biblia miʼ yʌl bajcheʼ tsaʼ caji jiñi universo, bajcheʼ yilal jiñi Lum ti wajali yicʼot bajcheʼ tsaʼ caji jiñi cuxtʌlel. Mi jiñi Biblia miʼ mejlel i yʌl ti wen yicʼot ti tsʼʌcʌl ili, ¿mach ba muqʼuic i mejlel i subeñonla majqui tsiʼ mele pejtelel ili? Jiñi Encyclopædia Britannica, miʼ yʌl «cheʼ jiñi cuxtʌlel tsaʼ tili ti junchajp chuqui wen ñuc bʌ, […] maʼañic miʼ jatsʼ i bʌ ti tʼan yicʼot yujiloʼ bʌ jiñi científicojob ili ora». *