Ti jujumpʼejl qʼuin, cabʌl lac piʼʌlob miʼ chaʼleñob wersa chaʼan miʼ tajob taqʼuin. I jiñi wocol tac am bʌ ti pañimil miʼ ñumen tsʌtsʼesan iliyi. ¿Chucoch?

• Lʌcʼʌ tiʼ pejtelel ora miʼ letsel i tojol bʌlñʌcʼʌl yicʼot renta tac cheʼ bʌ an wocol tiʼ caj taqʼuin ti jumpʼejl tejclum.

• Mach wen añic eʼtel yicʼot mach letsic mi lac tojtʌl.

• Jumpʼejl yujquel lum yicʼot yan tac bʌ wocol miʼ mejlel i ticʼlan o i jem otot, tienda tac yicʼot yan tac bʌ chuqui an. Ili miʼ yʌcʼ chaʼan cabʌl lac piʼʌlob miʼ yochelob ti pobre.

• Mi weñʌch bajcheʼ maʼ cʼʌn a taqʼuin, mach wocolic mi caj a wubin cheʼ miʼ tilel jumpʼejl wocol tiʼ caj taqʼuin.

• Cʼajtesan chaʼan jiñi taqʼuin muʼ bʌ a taj, jiñi lotol tac bʌ a chaʼan o pejtelel chuqui tac an a chaʼan miʼ mejlel ti jilel i cʼʌjñibal.

• An chuqui tac maʼañic bʌ miʼ mejlel i mʌn jiñi taqʼuin, bajcheʼ jiñi tijicñʌyel o chaʼan temel miʼ yajñel lac familia.

Jiñi Biblia miʼ yʌl: «Mi an i bʌl lac ñʌcʼ yicʼot lac pislel, yom tijicñayonla chaʼan jiñi» (1 Timoteo 6:8).

Cheʼ tijicñayonla mach yomic i yʌl chaʼan an lac chaʼan pejtelel chuqui la com, yom i yʌl chaʼan tijicñayonla come jasʌlʌch mi la cubin cheʼ an lac chaʼan pejtelel jiñi i cʼʌjñibal bʌ lac chaʼan. Ñuc i cʼʌjñibal cheʼ mi laj cʼajtesan iliyi, ñumento cheʼ mach cabʌlic lac taqʼuin.

Tajol yom maʼ qʼuextan bajcheʼ chumulet chaʼan tijicña maʼ wajñel. Mi tiʼ pejtelel ora maʼ ñop a mʌn mach bʌ mejlic a toj, mi caj a ñumen taj wocol.