¿CHUCOCH ÑUC I CʼɅJÑIBAL?

• Qʼuelbilix chaʼan jiñi lac piʼʌlob muʼ bʌ i ñaʼtañob chaʼan maʼañobic i cʼʌjñibal miʼ mejlel i tajob ansiedad, depresión, tajol miʼ cʌyob i cʼuxob i waj o ñumeñix ti pʼis bajcheʼ miʼ cʼuxob. Cheʼ jaʼel, miʼ mejlel i wen japob lembal, miʼ cʼʌñob droga o mach weñic bajcheʼ miʼ cʼʌñob jiñi tsac tac muʼ bʌ i yʌqʼuentelob.

• Jiñi yujil bʌ chaʼan añʌch i cʼʌjñibal maʼañic miʼ laj i bʌ yicʼot yañoʼ bʌ, jin chaʼan maʼañic miʼ tajeʼ wocol yicʼot yañoʼ bʌ i an i yamigojob. Pero jiñi muʼ bʌ i ñaʼtan chaʼan maʼañic i cʼʌjñibal miʼ ñumen mulan i yʌl chuqui mach bʌ weñic tiʼ tojlel yañoʼ bʌ, i jiñi miʼ mejlel i yʌcʼ chaʼan miʼ ñajtʼesan i bʌ tiʼ tojlel i yamigojob.

• Jiñi yujiloʼ bʌ chaʼan añobʌch i cʼʌjñibal wen jach miʼ ñusañob majlel jiñi wocol tac i maʼañic miʼ yʌcʼob chaʼan an chuqui miʼ mʌctañob cheʼ an chuqui yomob i mel. Pero jiñi mach bʌ añic i cʼʌjñibal miʼ yubiñob i bʌ maʼañic i lʌjtʼel i chaʼañob jiñi wocol tac i maʼañic miʼ ñaʼtañob chuqui yom miʼ melob.

 MUʼ BɅ MEJLEL A MEL

Sʌclan wem bʌ a wamigojob. Otsan ti a wamigojob jiñi muʼ bʌ i qʼuelob ti ñuc yañoʼ bʌ, jiñi muʼ bʌ i sʌclañob a wenlel yicʼot muʼ bʌ i coltañetob chaʼan maʼ mel chuqui wen.

Coltan yañoʼ bʌ. Mi maʼ pʌs a wutslel i wen chuqui maʼ mel tiʼ tojlel yañoʼ bʌ, mi caj a wubin a tijicñʌyel i añʌch a cʼʌjñibal mi caj a wubin a bʌ. Mach yʌlʌyic mi maʼañic majqui miʼ qʼuel ti ñuc jiñi tsaʼ bʌ a mele.

Coltan a walobilob chaʼan miʼ qʼuelob chaʼan añobʌch i cʼʌjñibal. Junchajp bajcheʼ miʼ mejlel a mel jin cheʼ maʼ cʌy chaʼan miʼ bajñel tojʼesañob jiñi i wocol tac baʼ jaxʌl miʼ mejlelob. Jiñi mi caj i coltañob i ñaʼtan chuqui yom miʼ mejlel cheʼ miʼ tajob jumpʼejl wocol. Cheʼ jaʼel, mi caj qʼuelob chaʼan añobʌch i cʼʌjñibal i jiñi mi caj i coltañob cheʼ bʌ ñucobix.