Qʼuele ti ñuc a cuxtʌlel yicʼot i chaʼan yañoʼ bʌ
¿CHUCOCH ÑUC I CʼɅJÑIBAL?
Cheʼ bʌ mi lac mel muʼ bʌ i ticʼlañonla o muʼ bʌ mejlel i ticʼlan yañoʼ bʌ mi lac pʌs chaʼan maʼañic mi laj qʼuel ti ñuc jiñi laj cuxtʌlel yicʼot i cuxtʌlel yañoʼ bʌ.
-
Jiñi muʼ bʌ i ñucʼ cigarro miʼ mejlel i taj cáncer, i mi añix i chaʼan ili cʼamʌjel i maʼañic miʼ cʌy i ñucʼ, ñumen wocol chaʼan miʼ lajmel. Lʌcʼʌ tiʼ pejtelel lac piʼʌlob tsaʼ bʌ chʌmiyob tiʼ caj añob i chaʼan cáncer de pulmón chaʼañʌch maʼañic tsiʼ cʌyʌyob i ñucʼob cigarro o tiʼ caj tsaʼ ajñiyob yaʼ baqui miʼ wen ñujqʼuel cigarro.
-
Ti jujumpʼejl jab, cabʌlob miʼ ñusañob wocol tiʼ caj julbʌl. Jiñi Universidad de Stanford am bʌ ti Estados Unidos miʼ yʌl chaʼan jinto jiñi maʼañic bʌ chuqui miʼ chaʼleñob cheʼ miʼ yujtel julbʌl tac ti escuela miʼ wen ochelob i bʌqʼuen i muʼto mejlel i ticʼlañob cabʌl jab.
-
Mi juntiquil miʼ ñijcan carro cheʼ bʌ yʌc (qʼuixin) o tsiʼ cʼʌñʌ droga miʼ mejlel i taj jumpʼejl accidente ti carretera o miʼ mejlel i juchʼ yambʌ lac piʼʌlob. Ili miʼ pʌs chaʼan jiñi mach bʌ añic miʼ qʼuel ti ñuc jiñi cuxtʌlel miʼ yʌqʼuen i ñusan wocol yambʌ lac piʼʌlob.
MUʼ BɅ MEJLEL A MEL
Mach a mel muʼ bʌ mejlel i cʼamʼesañet. Mi maʼ cʌlʌx jap lembal, maʼ cʼʌn droga, maʼ ñucʼ cigarro o jiñi cigarro electrónico miʼ mejlel i cʼamʼesañet. Mi maʼ mel iliyi woli (choncol) a pʌs chaʼan maʼañic maʼ qʼuel ti ñuc i cuxtʌlel yañoʼ bʌ yicʼot i cuxtʌlel a familia. Anquese wocolʌch chaʼan miʼ cʌjyel pejtelel iliyi, mucʼʌch i mejlel.
Cʌntan a bʌ chaʼan maʼañic chuqui maʼ chaʼlen i chaʼan maʼañic chuqui miʼ chaʼleñob yañoʼ bʌ. Wen qʼuele chaʼan yaʼ ti a wotot maʼañic chuqui muʼ bʌ i low o miʼ yʌcʼ ti wocol yañoʼ bʌ. Mi an a carro o a moto yom tsajal (xucʼul) bajcheʼ maʼ ñijcan, i acʼʌ ti qʼuelol mi an chuqui asiyem i chaʼan. Cheʼ jaʼel, mach a jacʼ cheʼ bʌ an chuqui maʼ subentel a mel pero bʌbʌqʼuen chuqui maʼ chaʼlen.
Pʌsbeñob a wutslel yambʌ lac piʼʌlob. ¿Chucoch ñuc i cʼʌjñibal iliyi? Come cheʼ bʌ jiñi lac piʼʌlob miʼ tsʼaʼleñob i bʌ o mach yomic i qʼuelob i bʌ tiʼ caj baqui tilemob, chuqui ti tʼan yujilob o bajcheʼ yilalob jin muʼ bʌ i yʌcʼ ti ujtel guerra o chaʼan miʼ ticʼlʌntel yambʌ lac piʼʌlob. Jin chaʼan, cheʼ bʌ mi lac pʌsbeñob la cutslel majqui jach bʌ lac piʼʌl woli (yʌquel) lac pʌs chaʼan mucʼʌch laj qʼuel ti ñuc jiñi i cuxtʌlelob.
MUʼ BɅ LON C MEL JIÑI I TESTIGOJONBɅLON JEHOVÁ
Mij coltan lojon lac piʼʌlob chaʼan miʼ qʼuextañob i melbal. Cabʌl lac piʼʌlob an i cʌyʌyob i mel mach tac bʌ weñic. An tsaʼix bʌ i cʌyʌ i cʼʌñob droga, i cʌlʌx japob lembal, i ñucʼob cigarro. I cheʼto jaʼel, jiñi muʼ bʌ i cʌlʌx michʼañob ti wajali, utsobix ili ora. Jiñi am bʌ i coltayob jiñʌch am bʌ i cʌñʌyob yaʼ ti Biblia yicʼot ti lon c tempa bʌ tac.
Cheʼ bʌ mi lon c mel i yotlel lon c tempa bʌ o yan tac bʌ, mij cʌntan lojon jiñi muʼ bʌ i chaʼleñob coltaya. Pejtelel muʼ bʌ i chaʼleñob coltaya miʼ wen subentelob bajcheʼ miʼ mejlel i cʌntañob i bʌ yicʼot miʼ pʌsbentelob bajcheʼ miʼ cʼʌñob jiñi eʼtijibʌl tac chaʼan construcción. Cheʼ jaʼel, miʼ chʌcʌ qʼuejlel chaʼan luʼ weñʌch an yaʼ baqui mic chʼujutesan lojon Dios. Cheʼ bajcheʼ jiñi, mi lon c tsʼʌctesan muʼ bʌ i cʼajtiñob jiñi añoʼ bʌ i yeʼtel yaʼ baqui chumulon lojon.
Mij coltan lojon lac piʼʌlob cheʼ mi yujtel wocol tac. Ti 2022, tiʼ petol pañimil tsaʼ wen ujti wocol bajcheʼ icʼ jaʼal, yujquel o yan tac bʌ. Jiñi i testigojonbʌlon Jehová tsaʼ lon c choco majlel coltaya baqui tsaʼ ujti wocol, i cheʼ jaʼel tsaʼ cʼʌjñi cabʌl taqʼuin chaʼan miʼ yʌqʼuentelob chuqui i cʼʌjñibal bʌ i chaʼañob.
Cheʼ ti 2014 yaʼ ti África Occidental yicʼot ti 2018 yaʼ ti República Democrática del Congo tsaʼ ñumi jumpʼejl tsʌts bʌ cʼamʌjel i cʼabaʼ Ébola. Jin chaʼan, tsaʼ lon c pʌsbe lac piʼʌlob chuqui miʼ mejlel i melob chaʼan maʼañic miʼ tajob ili cʼamʌjel. I tsaʼ chojquiyob majlel i testigojob Jehová chaʼan miʼ tsictesañob chucoch ñuc i cʼʌjñibal cheʼ mi lac jacʼ tʼan. Cheʼ jaʼel, tsaʼ ajqʼui jaʼ yicʼot xapom yaʼ baqui mic tempan lon c bʌ chaʼan jiñi lac piʼʌlob miʼ pocob i cʼʌb. I tsaʼ subentiyob chuqui tac yambʌ miʼ mejlel i melob chaʼan maʼañic miʼ cʼamʼañob.
Ti Sierra Leona, ti jumpʼejl estación de radio tsaʼ chaʼlenti ti felicitar jiñi i testigojob Jehová come tsiʼ coltayob jiñi añoʼ bʌ tiʼ ñopbal yicʼot yambʌ lac piʼʌlob chaʼan maʼañic miʼ tajob ili cʼamʌjel.
Ti Liberia, tsaʼ ajqʼui jaʼ yicʼot xapom ti jiñi Yotlel tempa bʌ chaʼan miʼ pocob i cʼʌb cheʼ bʌ tsaʼ ñumi jiñi Ébola ti 2014.
a Ili mandar tsaʼ bʌ aqʼuentiyob jiñi israelitajob ti wajali tsiʼ pʌsʌ chaʼan wen ñucʌch i cʼʌjñibal chaʼan miʼ cʌntañob i familia yicʼot yambʌ lac piʼʌlob chaʼan maʼañic chuqui miʼ chaʼleñob.
