Qʼuele ti ñuc a familia
¿CHUCOCH ÑUC I CʼɅJÑIBAL?
Cheʼ bʌ ti jumpʼejl familia junlajal miʼ qʼuelob i bʌ ti ñuc tijicña miʼ yajñelob yicʼot an ñʌchʼtʌlel.
-
Jiñi libro Siete reglas de oro para vivir en pareja miʼ yʌl chaʼan cheʼ bʌ jiñi ñujpuñemoʼ bʌ miʼ qʼuelob i bʌ ti ñuc «mi caj i pʌsob i cʼuxbiya ti chuqui tac miʼ melob ti jujumpʼejl qʼuin».
-
Qʼuelbilix chaʼan jiñi alobob muʼ bʌ i qʼuelob ti ñuc yañoʼ bʌ ñumen tijicñayob, maʼañobic i wocol yicʼot i papá i mamá, yicʼot maʼañic miʼ wen tajob depresión, ansiedad o yan tac bʌ.
MUʼ BɅ MEJLEL A MEL
Alʌ a wicʼot a familia bajcheʼ miʼ mejlel laʼ pʌs chaʼan mucʼʌch laʼ qʼuel laʼ bʌ ti ñuc. Ñaxan, ti laʼ pejtelel yom mi laʼ chʼʌmben i sujm chuqui yom i yʌl cheʼ mi laj qʼuel ti ñuc yañoʼ bʌ. I chaʼpʼejlel, tsʼijbunla bajcheʼ mi caj laʼ pʌs chaʼan mi laʼ qʼuel laʼ bʌ ti ñuc. I yuxpʼejlel, comol alʌla chaʼan mi laʼ ñaʼtan chuqui yom miʼ mel jujuntiquil.
Ñaxan jatet yom maʼ pʌs chaʼan maʼ qʼuel ti ñuc jiñi a familia. Miʼ mejlel a cʼajtiben a bʌ: «¿Jin jach ba mic joy tajbeñob ti tʼan chuqui mach bʌ weñic miʼ melob? ¿Muʼ ba c wajleñob cheʼ bʌ an chuqui miʼ yʌlob? ¿Mucʼʌch ba c chʼʌm ti ñuc cheʼ bʌ an chuqui woli c subentel? ¿O mic waʼ tsʼocbeñob i tʼan cheʼ bʌ an chuqui woliʼ subeñoñob?».
Mele iliyi: Ñopo a pʌsben jiñi a piʼʌl yicʼot a walobilob chaʼan mucʼʌch a qʼuelob ti ñuc, mach yʌlʌyic mi mucʼʌch i pʌsob chaʼan miʼ qʼueletob ti ñuc o maʼañic.
Pʌsʌ chaʼan mucʼʌch a qʼuel ti ñuc jiñi yambʌ anquese mach lajalic bajcheʼ mi laʼ ñaʼtan. Mach a wʌl tʼan tac bajcheʼ iliyi: «Joy cheʼetʌch bajcheʼ jiñi» o «Maʼañix maʼ junyaj qʼuelon ti ñuc». Ili tʼan tac miʼ mejlel i low jiñi a familia yicʼot miʼ mejlel i ñumen tech wocol.
MUʼ BɅ LON C MEL JIÑI I TESTIGOJONBɅLON JEHOVÁ
Jiñi i testigojonbʌlon Jehová mi lon c mulan chaʼan jiñi yambʌ lac piʼʌlob miʼ qʼuelob ti ñuc jiñi i familia. Jiñʌch muʼ bʌ c wen tajeʼ lon ti tʼan ti jiñi libro, folleto yicʼot ti jiñi video tac muʼ bʌ c locʼsan lojon. Pejtelel iliyi mach tojbilic.
CHAʼAN JIÑI ÑUJPUÑEMOʼ BɅ: Ti jiñi sección «Ñujpuñel yicʼot familia» baqui miʼ yʌl «Jiñi ñujpuñel» an cabʌl tema muʼ bʌ i mejlel i coltan jiñi ñujpuñemoʼ bʌ chaʼan. . .
-
miʼ tem coltañob i bʌ.
-
miʼ pʌsbeñob i bʌ cʼuxbiya.
-
miʼ ñusʌbeñob i bʌ i mul.
(Ochen ti jw.org i tsʼijbun «ñujpuñel»).
CHAʼAN JIÑI TATɅLOB: Ti jiñi sección «Ñujpuñel yicʼot familia» baqui miʼ yʌl «I cosʌntel alʌlob» an tema tac muʼ bʌ i mejlel i coltan jiñi tatʌlob chaʼan miʼ cʌntesañob i yalobil chaʼan. . .
-
miʼ melob chuqui wen.
-
miʼ tsʼʌctesañob i yeʼtel.
-
miʼ cʌn i bajñel ticʼob i bʌ.
(Ochen ti jw.org i tsʼijbun «cosʌntel alʌlob» o «cosʌntel xcolelob»).
Cheʼ jaʼel, qʼuele jiñi revista ¡Jamʌx a wut! número 2, 2018 «12 ticʼojel chaʼan tijicña miʼ yajñel a familia» am bʌ ti jw.org.
CHAʼAN JIÑI XCOLELOB: Ti jiñi sección «Xcolelob» am bʌ ti jw.org miʼ tilel tema tac, video yicʼot yan tac bʌ chaʼan miʼ coltan jiñi xcolelob chaʼan. . .
-
wen jach miʼ pejcañob i papá i mamá.
-
miʼ cʌn i tojʼesañob cheʼ bʌ an chuqui mach weñic miʼ melob.
-
chuqui miʼ mejlel i melob chaʼan jiñi i papá i mamá miʼ yʌcʼob ti loqʼuel.
(Ochen ti jw.org i tsʼijbun «xcolelob»).
Mach tojbilic chaʼan maʼ cʼʌn jiñi página jw.org. Cheʼ jaʼel, mach cʼʌñʌlic maʼ chaʼlen a bʌ ti registrar i maʼañic mi caj a cʼajtibentel a cʼabaʼ o yan tac bʌ.
