Qʼuele ti ñuc yañoʼ bʌ
¿CHUCOCH ÑUC I CʼɅJÑIBAL?
Cheʼ mi laj qʼuel ti ñuc yañoʼ bʌ maʼañic mi la cotsan lac bʌ ti wocol i maʼañic mi caj la cutsi techben i michʼajel yañoʼ bʌ.
-
Jiñi Biblia miʼ yʌl: «Jini uts bʌ tʼan miʼ lajmesʌben i michʼajel winic. Jini tsʌts bʌ tʼan miʼ yutsi techben i michʼajel» (Proverbios 15:1). Mi mach weñic lac melbal o mach weñic bajcheʼ mi lac pejcan yañoʼ bʌ miʼ mejlel i tech wocol i mach weñic chuqui miʼ mejlel ti ujtel.
-
Jesús tsiʼ yʌlʌ: «Ti la quej miʼ loqʼuel chuqui tac an ti lac pusicʼal» (Mateo 12:34). Mi mach weñic bajcheʼ mi lac pejcan jiñi tilemoʼ bʌ ti yambʌ país, ti yambʌ cultura, yujiloʼ bʌ yambʌ tʼan o mach bʌ lajalobic bajcheʼ joñonla woli (choncol) lac pʌs chaʼan tsʼitaʼ an tsʼaʼleya ti lac pusicʼal i yom mi lac tojʼesan jiñi lac melbal.
Tsaʼ mejli jumpʼejl encuesta baqui tsaʼ cʼajtibenti ñumen ti 32 mil lac piʼʌlob ti 28 país bajcheʼ yilal an i qʼueleyob i melbal lac piʼʌlob, cabʌlob tsiʼ yʌlʌyob chaʼan ili ora junyaj maʼañix respeto.
MUʼ BɅ MEJLEL A MEL
Cheʼ bʌ an chuqui woli (yʌquel) a wʌl a wicʼot yambʌ lac piʼʌl, pʌsʌ a wutslel i wen jach bajcheʼ maʼ jacʼben i tʼan anquese mach lajalic miʼ ñaʼtan bajcheʼ jatet. Sʌclan chuqui yambʌ miʼ mejlel laʼ wʌl mach bʌ añic miʼ yʌcʼ ti tejchel wocol i cheʼ bajcheʼ jiñi maʼañic mi caj a wʌl mach bʌ weñic tiʼ tojlel yañoʼ bʌ.
Mele tiʼ tojlel yañoʼ bʌ cheʼʌch bajcheʼ maʼ mulan maʼ melbentel jaʼel. Mi maʼ pʌs a wutslel yicʼot maʼ mel chuqui wen tiʼ tojlel yañoʼ bʌ tajol cheʼʌch mi caj i melob ti a tojlel jaʼel.
Ñusʌben i mul yambʌlob. Cheʼ bʌ an majqui miʼ yʌl o miʼ melbeñet mach bʌ weñic, ñaʼtan chaʼan mach yilolic i chaʼan i ñusʌben.
MUʼ BɅ LON C MEL JIÑI I TESTIGOJONBɅLON JEHOVÁ
Jiñi i testigojonbʌlon Jehová mij qʼuel lojon ti ñuc pejtelel jiñi lac piʼʌlob i mi lon c mulan chaʼan cheʼʌch miʼ melob jaʼel.
Mij coltan lojon lac piʼʌlob chaʼan miʼ ñumen cʌñob jiñi Biblia, pero maʼañic mi lon c xicʼob chaʼan miʼ yochelob bajcheʼ Testigo o chaʼan cheʼ miʼ ñaʼtañob bajcheʼ joñon lojon. Mucʼ jach c sub lojon ñopol bʌ lon c chaʼan pero mic meleʼ lojon yicʼot lon cutslel, cheʼʌch bajcheʼ miʼ yʌl jiñi Biblia (1 Pedro 3:15; 2 Timoteo 2:24).
Junlajal mi lon j qʼuel pejtelel lac piʼʌlob. Cheʼ bʌ an majqui miʼ cʼotel ti jiñi lon c tempa bʌ wen tijicña mi lon cubin i mach jiñic mij qʼuel lojon bajcheʼ yilal o baqui tilem. Mic chaʼlen lojon wersa j qʼuel ti ñuc jiñi lac piʼʌlob anquese qʼuexel tac chuqui miʼ yajcañob i mel (1 Pedro 2:17).
Mi lon j qʼuel ti ñuc jiñi añoʼ bʌ i yeʼtel (Romanos 13:1). Mic jacʼ lojon jiñi ley tac muʼ bʌ i yʌcʼob i mi lon c chaʼlen tojoñel. Maʼañic mi cotsan lon c bʌ tiʼ chaʼan bʌ política, pero maʼañic mic xicʼ lojon yambʌlob chaʼan cheʼ miʼ melob jaʼel come jujuntiquil an tiʼ wenta i yajcan chuqui miʼ mel.
