Jiñʌch tsaʼ bʌ i yʌlʌ junmojt investigadorob cheʼ bʌ tsiʼ tajayob ti tʼan bajcheʼ woliʼ qʼuextʌyel jiñi clima. Mi mucʼʌch a ñop chaʼan an majqui tsiʼ mele pejtelel chuqui an yicʼot chaʼan i wentajoñʌchla, jiñi tsaʼ bʌ i yʌlʌ jiñi invetigadorob mi caj i yʌqʼueñet a ñaʼtan pejtelel tsaʼ bʌ i chajpa Dios chaʼan ili Lum miʼ bajñel sʌqʼuesan i bʌ.

Pero jiñi Lum maʼañix miʼ mejlel i bajñel i sʌqʼuesan i bʌ tiʼ caj an i wen bibʼesa jiñi wiñicob. ¿Chucoch miʼ mejlel lac ñop chaʼan Dios maʼañic mi caj i yʌcʼ ti jisʌntel jiñi Lum yicʼot pejtelel chuqui am bʌ?

Jiñi texto tac am bʌ ti recuadro miʼ pʌsbeñonla chucoch maʼañic mi caj i jilel ili Lum yicʼot tiʼ pejtelel ora miʼ cajel cuxtʌlel.

• Dios tsiʼ mele jiñi Pañimil. «Cheʼ tiʼ cajibal tsiʼ mele Dios jini panchan yicʼot pañimil» (Génesis 1:1).

• Jiñi Pañimil i chaʼañʌch Dios. «Jini pañimil i chaʼañʌch lac Yum [Jehová] a yicʼot pejtel i bʌl» (Salmo 24:1).

• Dios tsiʼ mele jiñi Lum chaʼan miʼ yajñel tiʼ pejtelel ora. «Tsaʼix a waʼchoco jini pañimil tiʼ cʼʌclib chaʼan maʼanic miʼ yajlel tiʼ pejtelel ora» (Salmo 104:5).

• Dios miʼ yʌl chaʼan maʼañic baʼ ora mi caj i jilel cuxtʌlel ila ti Lum. «Lac Yum, jiñʌch Dios. Tsiʼ mele [ . . . ] pañimil [ . . . ]. Mach lolomic tsiʼ mele pañimil. Tsiʼ mele chaʼan i chumlib winicob» (Isaías 45:18).

• Dios miʼ yʌl chaʼan tiʼ pejtelel ora mi caj lac chumtʌl ila ti Lum. «Mi caj i yʌqʼuentelob jini pañimil jini tojoʼ bʌ. Mi caj i yajñelob tiʼ pejtelel ora» (Salmo 37:29).

Ili Lum maʼañic chuqui miʼ mejlel i chaʼlen come Dios wen utsʼatax bajcheʼ tsiʼ chajpa chaʼan wen miʼ yajñel. Pero joñonla jaʼel yomʌch mi laj cʌntan pejtelel chuqui am bʌ ilayi. Jiñi profecía tac miʼ yʌl chaʼan Dios tsaʼix i waʼchoco jumpʼejl qʼuin chaʼan miʼ jisan pejtelel woli bʌ i yʌsin ili Lum (Apocalipsis 11:18).

Jiñi Biblia miʼ yʌl chaʼan cheʼ bʌ miʼ tsʼʌctiyel iliyi, Dios mi caj i tojʼesan jiñi Lum. Mi caj i sujtesan ti jumpʼejl paraíso i miʼ caj i yʌqʼueñonla pejtelel chuqui la com come Dios mach xchʌquic (Salmo 145:16).