COLTɅNTEL CHAʼAN AM BɅ MAJQUI TSAʼ CHɅMI I CHAʼAN

Wem bʌ coltaya chaʼan jiñi chʼijyemoʼ bʌ

JAMΛ TI

TI JIÑI JABIL TAC TSAʼIX BɅ ÑUMI, AN WEN QʼUEJLI CHUQUI TAC MIʼ MEJLEL I COLTAÑONLA CHEʼ AN MAJQUI MIʼ CHɅMEL LAC CHAʼAN. Pero cheʼ bajcheʼ tsaʼix laj qʼuele, jiñi ticʼojel tac muʼ bʌ i yʌcʼob jiñi expertojob miʼ taj i bʌ yicʼot muʼ bʌ i yʌl jiñi Biblia. Ili miʼ pʌs chaʼan jiñi ticʼojel tac am bʌ ti Biblia bej añʌch i cʼʌjñibal. Pero yaʼ ti Biblia mach cojach mi lac taj wen tac bʌ ticʼojel. Cheʼ jaʼel, an chuqui tac yambʌ miʼ subeñonla maʼañic bʌ baqui yambʌ miʼ mejlel lac taj, i miʼ wen ñuqʼuesʌben i pusicʼal jiñi am bʌ majqui chʌmeñob i chaʼan.

Jiñi Biblia miʼ yʌl chaʼan jiñi tsaʼ bʌ chʌmiyob lac chaʼan maʼañic woliʼ yubiñob wocol.

Jiñi Biblia miʼ yʌl ti Eclesiastés 9:5 chaʼan jiñi chʌmeñoʼ bʌ «maʼanix chuqui yujilob». Maʼañix chuqui miʼ ñaʼtañob (Salmo 146:4). Jin chaʼan, jiñi Biblia miʼ lajeʼ jiñi chʌmel bajcheʼ wʌyel (Juan 11:11).
Miʼ ñuqʼuesan lac pusicʼal cheʼ la cujil chaʼan an juntiquil Dios muʼ bʌ i cʼuxbiñonla.

Jiñi Biblia miʼ yʌl: «Jiñi i wut Jehová * yaʼan tiʼ tojlel jiñi tojoʼ bʌ i miʼ ñʌchʼtʌbeñob jiñi i yoración muʼ bʌ i melob ti wocol tʼan» (1 Pedro 3:12). Cheʼ mi lac suben Dios ti oración bajcheʼ yubil mi la cubin lac bʌ mach lajal jach bajcheʼ woli (choncol) lac pejcan juntiquil lac piʼʌl i mach chaʼan jach mi laj cʼʌn lac tojʼesan lac pensar. Tiʼ sujm, miʼ coltañonla chaʼan mi lac ñumen lʌcʼtesan lac bʌ tiʼ tojlel jiñi tsaʼ bʌ i meleyonla (pʌtʌyonla), muʼ bʌ i mejlel i cʼʌn i pʼʌtʌlel chaʼan miʼ ñuqʼuesan lac pusicʼal.
Miʼ yʌl chaʼan weñix mi caj lac chumtʌl ti talto bʌ qʼuin.

Jiñi Biblia miʼ wen taj ti tʼan jiñi qʼuin cheʼ bʌ jiñi chʌmeñobix bʌ mi caj i chaʼ chʼojyelob. Jumpʼejl ejemplo, cheʼ bʌ miʼ yʌl bajcheʼ yilal mi caj lac chumtʌl ila ti Lum ti talto bʌ qʼuin, miʼ yʌl chaʼan Dios «mi caj i sujcubeñob i yaʼlel i wut [pejtelel lac piʼʌlob], maʼañix miʼ cajel chʌmel, mi muqʼuicto i cajel chʼijyemlel, uqʼuel yicʼot cʼuxyajiyel» (Apocalipsis 21:3, 4). ¡Ñaʼtancu bajcheʼ yilal miʼ cajel!

Cabʌl lac piʼʌlob muʼ bʌ i ñopob Jehová, jiñi Dios muʼ bʌ i yʌl jiñi Biblia, añob i pʼʌtʌlel chaʼan miʼ cuchob jiñi chʼijyemlel come añob i pijtaya chaʼan mi caj i chaʼ qʼuelob jiñi tsaʼ bʌ chʌmiyob i chaʼan. Jumpʼejl ejemplo, Ann, tsaʼ bʌ chʌmi i ñoxiʼal cheʼ bʌ añix 65 jab i ñujpuñelob, miʼ yʌl: «Jiñi Biblia miʼ yʌl chaʼan jiñi tsaʼix bʌ chʌmiyob lac chaʼan maʼañic woli (yʌquel) i yubiñob wocol i chaʼan Dios mi caj i chaʼ chʼojyesan pejtelel jiñi añoʼ bʌ tiʼ ñaʼtʌbal. Jiñʌch muʼ bʌ c chʌcʌ cʼajtesan cheʼ bʌ mic ñaʼtan jiñi c ñoxiʼal, i cheʼ bajcheʼ jiñi miʼ mejlel c lʌtʼ ili wocol».

Tina, tsaʼix bʌ la cʌlʌ ti ñaxan, miʼ yʌl: «Cʼʌlʌl cheʼ bʌ tsaʼ chʌmi jiñi Timo, an j qʼuele bajcheʼ miʼ coltañon Dios. An cubi chaʼan jiñi i pʼʌtʌlel Jehová miʼ coltañon cheʼ bʌ wen wocol woli c ñusan. Mic wen ñop muʼ bʌ i yʌl jiñi Biblia chaʼan mi caj i chaʼ chʼojyel jiñi chʌmeñoʼ bʌ i miʼ yʌqʼueñon c pʼʌtʌlel chaʼan mic bej chaʼlen wersa jinto mic chaʼ qʼuel jiñi Timo».

Ili tʼan tac miʼ pʌs bajcheʼ yubil miʼ yubiñob i bʌ jiñi yonlel lac piʼʌlob muʼ bʌ i ñopob muʼ bʌ i yʌl jiñi Biblia. Mi jatet maʼ ñaʼtan chaʼan toʼol tʼan jach muʼ bʌ i yʌl jiñi Biblia, ¿ixcu cheʼ muqʼuic a wen qʼuel pejtelel muʼ bʌ i pʌs chaʼan tojʌch jiñi ticʼojel tac muʼ bʌ i yʌcʼ yicʼot chaʼan mi caj i tsʼʌctiyel muʼ bʌ i yʌl? Mi caj a qʼuel chaʼan jiñi Biblia jiñʌch muʼ bʌ mejlel i wen coltan jiñi am bʌ majqui tsaʼ chʌmi i chaʼan.