Mi woli (choncol) a sʌclan bajcheʼ miʼ mejlel a ñusan majlel jiñi a chʼijyemlel, mi caj a taj cabʌl ticʼojel, pero añʌch ñumen wen tac bʌ. Come cheʼ bajcheʼ tsaʼix laj qʼuele, jiñi lac piʼʌlob mach junlajalic bajcheʼ miʼ yubiñob i bʌ cheʼ bʌ an majqui miʼ chʌmel (sajtel) i chaʼañob. Jin chaʼan, mach junlajalic jiñi muʼ bʌ mejlel i coltañonla.

Pero añʌch wen tac bʌ ticʼojel am bʌ i colta cabʌlob. Jiñi especialistajob miʼ yʌcʼob ticʼojel tac muʼ bʌ i tajtʌl ti tʼan yaʼ ti Biblia am bʌ i colta cabʌl lac piʼʌlob cʼʌlʌl ti wajali.

• An especialistajob muʼ bʌ i yʌlob chaʼan iliyi jiñʌch ñumen ñuc bʌ i cʼʌjñibal chaʼan miʼ mejlel lac ñusan majlel jiñi chʼijyemlel. Pero an i tajol a bajñel a wom ajñel maʼ wubin i tajol maʼ michʼan cheʼ bʌ an majqui miʼ ñop i coltañet. Ili i tilelʌch.

• Mach a ñaʼtan chaʼan tiʼ pejtelel ora an majqui yom an a wicʼot, pero mach a ñajtʼesan a bʌ jaʼel tiʼ tojlel jiñi yambʌlob. Tajol mucʼʌch caj i cʼʌjñibʌyel a chaʼan cheʼ miʼ coltañetob jiñi yambʌlob. Subeñob chuqui i cʼʌjñibal bʌ a chaʼan yicʼot jiñi maʼañic bʌ, pero yom uts jach maʼ mel.

• An i tajol a wom ajñel a wicʼot yambʌlob i an i tajol a bajñel jach a wom ajñel, mele cheʼʌch bajcheʼ i cʼʌjñibal a chaʼan.

PRINCIPIO AM BɅ TI BIBLIA: «Cheʼ ti lac bajñel, tsʼitaʼ jach miʼ mejlel lac mel. Cheʼ chaʼtiquilonla cabʌl miʼ mejlel. Mi tsaʼ yajli juntiquil miʼ tech letsel i piʼʌl» (Eclesiastés 4:9, 10).

• Cheʼ wen jach maʼ cʼux a waj mi caj i coltañet chaʼan maʼ ñusan majlel jiñi a chʼijyemlel. Cʼuxu fruta, verdura yicʼot mach bʌ wen an taquic i lewil.

• Wen japʌ jaʼ yicʼot yan tac bʌ.

• Mi mach wen wiʼñaletic, sʌclan chuqui maʼ tsʼitaʼ cʼux tac ti jujumujcʼ. Cheʼ jaʼel, miʼ mejlel a cʼajtiben jiñi a doctor chaʼan miʼ yʌqʼueñet jumpʼejl suplemento alimenticio. *

• Jiñi orajach bʌ xʌmbal yicʼot yan tac bʌ ejercicio miʼ mejlel i coltañet chaʼan maʼ cʌy a ñaʼtan jiñi mach tac bʌ weñic. An muʼ bʌ i cʼʌñob jiñi i yorajlel cheʼ miʼ melob ejercicio chaʼan miʼ ñaʼtañob jiñi tsaʼ bʌ chʌmi i an muʼ bʌ i cʼʌñob chaʼan maʼañix miʼ chʌn ñaʼtañob.

PRINCIPIO AM BɅ TI BIBLIA: «Maʼanic winic muʼ bʌ i tsʼaʼlen i bʌcʼtal. Miʼ weʼesan, miʼ cʌntan ti utsʼat» (Efesios 5:29, I tʼan Dios).

• Tiʼ pejtelel ora ñuc i cʼʌjñibal cheʼ wen mi lac wʌyel, pero ñumen ñucto i cʼʌjñibal tiʼ tojlelob jiñi am bʌ majqui tsaʼ chʌmiyob i chaʼan, come jiñi chʼijyemlel miʼ wen lujbʼesañob.

• Wen cʌntan a bʌ chaʼan maʼañic maʼ jap am bʌ i chaʼan cafeína yicʼot jiñi lembal, come miʼ mejlel i ticʼlañet chaʼan maʼañic maʼ wen wʌyel.

PRINCIPIO AM BɅ TI BIBLIA: «Utsʼat mi lac tsʼitaʼ cʼaj la co [...]. Mach utsʼatic mi lac chʌn bajben eʼtel chaʼan jach lac woʼlel ti chubʌʼañʌl. Toʼol icʼ jach woli la cʌsin cheʼ jini» (Eclesiastés 4:6).

• Mach junlajalic bajcheʼ yubil mi la cubin cheʼ an majqui miʼ chʌmel lac chaʼan, jatet maʼ ñaʼtan chuqui ñumen wem bʌ chaʼañet.

• An muʼ bʌ i wen coltañob cheʼ miʼ subob bajcheʼ yubil woli (yʌquel) i yubiñob i bʌ, pero an maʼañic bʌ miʼ melob. Jiñi especialistajob mach junlajalic chuqui miʼ yʌlob chucoch ñuc i cʼʌjñibal cheʼ mi lac sub bajcheʼ yubil mi la cubin lac bʌ cheʼ an majqui miʼ chʌmel lac chaʼan. Mi jatet wocol maʼ wubin chaʼan maʼ sub bajcheʼ yubil maʼ wubin a bʌ, ¿ixcu cheʼ muqʼuic a tech a cʼunteʼ suben juntiquil a wamigo a wen cʌñʌ bʌ?

• An i cʼʌjñibal bʌ i chaʼañob chaʼan miʼ chaʼleñob uqʼuel, pero an mach bʌ cheʼiqui i tsʼitaʼ jach miʼ chaʼleñob uqʼuel.

PRINCIPIO AM BɅ TI BIBLIA: «Lac bajñel jach mi laj cʌn i wocol lac pusicʼal» (Proverbios 14:10).

• An muʼ bʌ i cʌlʌx japob lembal yicʼot miʼ cʼʌñob droga tac chaʼan maʼañic miʼ yubiñob i chʼijyemlel. Iliyi mach weñic. Anquese mucʼʌch i coltañonla yilal, jumucʼ jach i miʼ ticʼlañonla. Qʼuele chuqui tac yambʌ miʼ mejlel a mel chaʼan maʼ lajmesan a chʼijyemlel, pero mach bʌ añic miʼ ticʼlañet.

PRINCIPIO AM BɅ TI BIBLIA: «Laʼ lac sʌqʼuesan lac bʌ tiʼ pejtelel muʼ bʌ i bibʼesan lac bʌcʼtal» (2 Corintios 7:1).

• Cabʌlob an i coltayob chaʼan maʼañic miʼ wen ñaʼtañob jiñi tsaʼ bʌ ujti cheʼ bʌ an tac chuqui miʼ melob.

• Miʼ mejlel i tsʼitaʼ coltañet cheʼ maʼ sʌclan tsijiʼ bʌ a wamigojob o cheʼ bʌ maʼ ñumen lʌcʼtesan a bʌ tiʼ tojlelob jiñi a wamigojobix bʌ, cheʼ maʼ cʌn tsijib eʼtel tac o maʼ mel jumpʼejl a ñusaqʼuin.

• Cʼunteʼ cʼunteʼ mi caj i qʼuextʌyel majlel jiñi muʼ bʌ a qʼuel ti ñuc. Tajol mi caj a qʼuel chaʼan maʼañix maʼ wen pʌs jiñi chʼijyemlel i muqʼuix a ñumen aqʼuen i yorajlel chaʼan maʼ mel yan tac bʌ eʼtel (troñel). Ili wen tsiquil miʼ pʌs chaʼan wolix i ñumel a chaʼan.

PRINCIPIO AM BɅ TI BIBLIA: «Tiʼ pejtelel chuqui mi lac mel añʌch i yorajlel [...]: An i yorajlel mi lac chaʼlen uqʼuel. An i yorajlel mi lac chaʼlen tseʼñal» (Eclesiastés 3:1-8).

• Chaʼ mele jiñi ñʌmʌl bʌ a mel ti ñaxan.

• Mi maʼ wʌqʼuen i yorajlel chaʼan bajcheʼ ora mi caj a wʌyel, chaʼan maʼ chaʼlen eʼtel yicʼot maʼ mel yan tac bʌ i cheʼʌch maʼ mel, xucʼu xucʼul chaʼ weñix mi caj a wubin a bʌ.

• Cheʼ maʼ mel jiñi muʼ tac bʌ a mulan mi caj i coltañet chaʼan maʼañix maʼ wubin a chʼijyemlel.

PRINCIPIO AM BɅ TI BIBLIA: «Cheʼ jini mach cabʌlic mi lac mel lac pusicʼal anquese xñumelonla ti pañimil, come Dios miʼ butʼ lac pusicʼal ti tijicña bʌ» (Eclesiastés 5:20).

• Cabʌlob ti orajach miʼ waʼ ñaʼtañob chuqui tac mi caj i melob cheʼ bʌ maxto jali an majqui tsaʼ chʌmi i chaʼañob.

• Mi mucʼʌch i mejlel, pijtʌben i yorajlel chaʼan maʼ qʼuextan baqui mi caj a chumtʌl o jiñi a weʼtel, o chaʼan mi caj a qʼuel chuqui mi caj a tumben i chubʌʼan tac jiñi tsaʼ bʌ chʌmi.

PRINCIPIO AM BɅ TI BIBLIA: «Jini bʌx bʌ ti eʼtel muʼ bʌ i ñaʼtan chuqui yom i mel miʼ yʌcʼ ti pʼojlel i chubʌʼan. Pero pejtel muʼ bʌ i ñaʼtañob i toʼol tajob i chubʌʼan [«orajach bʌ chuqui miʼ mel», TNM] mi caj i yochelob ti pobre» (Proverbios 21:5).

• Yonlelob miʼ coltañob cheʼ an chuqui tac miʼ melob chaʼan miʼ cʼajtesañob jiñi tsaʼ bʌ chʌmi.

• Yom an a chaʼan i fotojlel yicʼot yan tac bʌ muʼ bʌ i coltañet a cʼajtesan o tsʼijbun chuqui utsʼatax bʌ tsaʼ ñusa a wicʼot. Ili mi caj i coltañet chaʼan maʼ ñusan majlel jiñi chʼijyemlel.

• Loto muʼ bʌ i coltañet a cʼajtesan chuqui utsʼatax bʌ tsaʼ laʼ ñusa i qʼuele cheʼ bʌ weñix maʼ wubin a bʌ.

PRINCIPIO AM BɅ TI BIBLIA: «Ñaʼtanla bajcheʼ añetla ti wajali» (Deuteronomio 32:7).

• Chʼʌmʌ chaʼpʼej uxpʼejl qʼuin chaʼan maʼ cʼaj a wo.

• Mi maʼañic maʼ mejlel ti loqʼuel cabʌl qʼuin, tajol miʼ mejlel a chʼʌm jumpʼejl o chaʼpʼejl qʼuin chaʼan maʼ loqʼuel ti xʌmbal, maʼ majlel a julaʼtan jumpʼejl museo o an baqui maʼ jumucʼ loqʼuel majlel.

• Cheʼ maʼ jumucʼ cʌy a mel jiñi ñʌmʌl bʌ a mel miʼ mejlel i coltañet chaʼan maʼ ñusan majlel jiñi chʼijyemlel.

PRINCIPIO AM BɅ TI BIBLIA: «Laʼla, conla baqui mi lac mejlel ti bajñel ajñel chaʼan mi laʼ tsʼitaʼ cʼaj laʼ wo» (Marcos 6:31).

• Cʼajtesan chaʼan cheʼ maʼ coltan yambʌlob jatet wen mi caj a wubin a bʌ jaʼel.

• Miʼ mejlel a tech a coltan jiñi chʼijyemoʼ bʌ jaʼel chaʼan an majqui tsaʼ chʌmiyob i chaʼan, bajcheʼ jiñi a wamigojob o yambʌlob ti a familia. Tajol an majqui yom i subeñob jaʼel bajcheʼ yubil miʼ yubiñob i bʌ.

• Cheʼ maʼ coltan yicʼot maʼ ñuqʼuesʌben i pusicʼal yambʌlob miʼ mejlel i coltañet a chaʼ ubin a tijicñʌyel yicʼot chaʼan maʼ wubin chaʼan bej añʌch i sujmlel jiñi a cuxtʌlel.

PRINCIPIO AM BɅ TI BIBLIA: «Ñumen an tijicñʌyel cheʼ mi la cʌcʼ i mach jiñic cheʼ mi lac chʼʌm» (Hechos 20:35).

• Jiñi chʼijyemlel miʼ mejlel i coltañet a wen qʼuel chuquiyes jiñi ñumen ñuc bʌ i cʼʌjñibal.

• Aqʼuen i yorajlel chaʼan maʼ wen qʼuel bajcheʼ woli a cʼʌn jiñi a cuxtʌlel.

• Mi cheʼʌch yom maʼ qʼuel, qʼuextan jiñi muʼ bʌ a ñumen qʼuel ti ñuc.

PRINCIPIO AM BɅ TI BIBLIA: «Utsʼat mi lac chaʼlen julaʼ tiʼ yotot baʼ tsaʼ chʌmi juntiquil lac piʼʌl. Lolom jach mi lac julaʼtan xqʼuiñijelob, come jujuntiquil winic mi caj i yucʼtʌntel jaʼel. Come mi caj lac chʌmel ti pejtelonla. Yom mi lac pʼis ti lac wenta cheʼ cuxulon tola» (Eclesiastés 7:2).

 Cheʼ toj mi la cʌl, maʼañic chuqui mi caj i junyajl jisan jiñi lac chʼijyemlel. Pero cabʌlob am bʌ majqui chʌmeñob i chaʼan miʼ yʌlob chaʼan cheʼ miʼ melob chuqui wen tac bʌ bajcheʼ muʼ bʌ i yʌjlel ti ili tema an i coltayob chaʼan maʼañic miʼ wen ubiñob i chʼijyemlel. Tiʼ sujm, ili ticʼojel tac mach cojach muʼ bʌ i mejlel i coltañonla chaʼan jiñi lac chʼijyemlel. Pero mi mucʼʌch a jacʼ, mi caj a qʼuel chaʼan mucʼʌch mejlel i tsʼitaʼ coltañet chaʼan maʼañix maʼ wen ubin a chʼijyemlel.