Jiñi expertojob miʼ yʌlob bajcheʼ yubil miʼ yubiñob i bʌ jiñi am bʌ majqui miʼ chʌmelob (sajtelob) i chaʼan, pero mach ti lac pejtelelic junlajal bajcheʼ yubil mi la cubin lac bʌ. ¿Yom ba i yʌl chaʼan an mach bʌ cʌlʌxic miʼ yubiñob i chʼijyemlel o maʼañic bʌ miʼ pʌsob bajcheʼ yubil miʼ yubiñob i bʌ? Mach pejtelel ora cheʼ miʼ yujtel bajcheʼ jiñi. Anquese mucʼʌch i mejlel i coltañet cheʼ bʌ maʼ pʌs a chʼijyemlel, mach junsujmic jach bajcheʼ miʼ mejlel lac ñusan. Jiñi laj cultura, bajcheʼ yilalonla, jiñi ñusʌbil bʌ lac chaʼan yicʼot bajcheʼ tsaʼ chʌmi jiñi cʼuxbibil bʌ lac chaʼan yaʼʌch cʌyʌl jaʼel bajcheʼ mi lac pʌs jiñi lac chʼijyemlel.

Jiñi am bʌ majqui tsaʼ chʌmiyob i chaʼan tajol mach i ñaʼtayobic chuqui tac mi caj i ñusañob. Pero lʌcʼʌl tiʼ pejtelel ora añʌch chuqui tac mi caj i ñusañob. Laʼ laj qʼuel chaʼpʼej uxpʼejl:

Cheʼ cʌlʌxix bajcheʼ mi la cubin lac bʌ. Lʌcʼʌl tiʼ pejtelel ora cheʼ bʌ an majqui miʼ chʌmel lac chaʼan mi la cucʼtan, mi lac ñaʼtan yicʼot cabʌl bajcheʼ mi la cubin lac bʌ. Cheʼ bʌ mi laj cʼajtesan o mi lac ñajlen jiñi tsaʼ bʌ chʌmi lac chaʼan ñumento miʼ mejlel la cubin lac chʼijyemlel. Tajol toj sajtel a pusicʼal ti ñaxan i maʼañic miʼ mejlel a ñop tsaʼ bʌ ujti. Tina miʼ yʌl bajcheʼ yubil tsiʼ yubi i bʌ cheʼ bʌ mach pijtʌbilic i chaʼan tsaʼ chʌmi jiñi i ñoxiʼal: «Tsaʼ toj sajti c pusicʼal. Ti ñaxan maʼañic tsaʼ mejliyon ti uqʼuel. Wocol tsaʼ cubi chaʼan mic mejlel c jap icʼ come tsaʼ wen cajiyon ti pensar. Maʼañic tsaʼ mejli c ñop woli (choncol) bʌ ti ujtel».

Cʌlʌx pensar, michʼajel i a mul maʼ wubin. Iván miʼ yʌl: «Cheʼ bʌ tsaʼ chʌmi jiñi lon calobil, Eric, 24 bʌ i jabilel, joñon quicʼot quijñam, Yolanda, tsaʼ wen michʼayon lojon. Ili tsiʼ yʌcʼʌ ti toj sajtel lon c pusicʼal come mach cheʼoñic lon bajcheʼ jiñi. Cheʼ jaʼel, lon c mul tsaʼ lon cubi i tsaʼ j cʼajtibe lon c bʌ mi añixto chuqui yambʌ tsaʼ mejli lon c mel». Alejandro, tsaʼ bʌ i sʌtʌ i yijñam tiʼ caj jumpʼejl tsʌts bʌ cʼamʌjel cheʼʌch tsiʼ yubi i bʌ jaʼel. Miʼ yʌl: «Ñaxan tsaʼ c ñaʼta chaʼan mi Dios woli (yʌquel) i yʌqʼueñon c ñusan wocol, chaʼañʌch mach wem bʌ quixtañujon. Cheʼ jiñi, mach tijicñayic tsaʼ cubi c bʌ come woli cʌqʼuen tiʼ mul Dios jiñi tsaʼ bʌ ujti». I Kostas, tsaʼ bʌ la cʌlʌ ti jiñi yambʌ tema, miʼ yʌl: «An i tajol mic michʼan quicʼot Sofía chaʼan tsaʼ chʌmi. Cheʼ jiñi mic chaʼ ñaʼtan c bʌ chaʼan jiñi, come mach i mulic cheʼ tsaʼ chʌmi».

Wocol mi la cubin chaʼan toj mi lac chaʼlen pensar. An i tajol mach junsujmic chuqui mi lac pensarin o maʼañic i sujmlel. Jumpʼejl ejemplo, tajol juntiquil miʼ yubin chaʼan wolito i ñʌchʼtʌben i tʼan jiñi tsaʼ bʌ chʌmi i chaʼan, chaʼan yaʼto an yicʼot o chaʼan woliʼ qʼuel. O tajol wocol miʼ yubin chaʼan miʼ xucʼchocon i pensar o miʼ wen ñajʌyel. Tina miʼ yʌl: «An i tajol an majqui woliyon ti tʼan quicʼot i yambʌ baqui an c pensar. Mic wen ñaʼtan pejtelel chuqui tsaʼ ujti cheʼ bʌ Timo tsaʼ chʌmi. Maʼañic miʼ mejlel c xucʼchocon c pensar, i jiñi miʼ yʌqʼueñon c chʼijyemlel».

Lac bajñel la com ajñel. Cheʼ bʌ juntiquil an majqui tsaʼ chʌmi i chaʼan tajol michʼ o mach tijicñayic miʼ yubin i bʌ cheʼ yaʼan yicʼot yambʌlob. Kostas miʼ yʌl: «Cheʼ bʌ yaʼañon quicʼotob jiñi ñujpuñemoʼ bʌ mach tijicñayoñic mi cubin c bʌ quicʼotob. Pero cheʼ bʌ yaʼañon quicʼotob jiñi i bajñelobto bʌ lajal jach mi cubin c bʌ jaʼel». Yolanda, jiñi i yijñam Iván, miʼ yʌl: «Wocol tsaʼ cubi cheʼ bʌ yaʼañon quicʼotob jiñi muʼ bʌ i yʌlob chaʼan cʼojyemobix chaʼañob i wocol, pero mach wen ñuquic jiñi i wocolob cheʼ bajcheʼ lon c chaʼan. Yambʌlob miʼ subeñon lojon chaʼan wen añob jiñi i yalobilob. Tijicñayon chaʼañob, pero cheʼ jaʼel wocol mi cubin chaʼan mic ñʌchʼtañob. Cujil lojon chaʼan jiñi yambʌlob woli jach i yʌlob bajcheʼ yilal chumulob, pero mach comic cubin lojon».

Mi laj cʼamʼan. An i tajol mach la comic laj cʼux lac waj, mi lac yajʼan i mach la comic wʌyel. Aarón miʼ yʌl chuqui tsiʼ chaʼle cheʼ bʌ an jaxto jumpʼejl jab tsaʼ  chʌmi i papá: «Ñoj wocol tsaʼ cubi chaʼan mic mejlel ti wʌyel. Tiʼ pejtelel ora mic tejchel ti acʼʌlel ti jin jach bʌ hora i mic ñaʼtan jiñi c papá».

Alejandro miʼ yʌl chaʼan mach yujilic chucoch, pero tsaʼ caji ti wen cʼamʼan. Miʼ yʌl: «Mach junyajlic jach tsajñon ti doctor, i tiʼ subeyon chaʼan cʼocʼoñʌch. Tsaʼ caji c ñaʼtan chaʼan jiñi woli bʌ i cʼamʼesañon jiñʌch jiñi chʼijyemlel». Anquese Alejandro xucʼu xucʼul tsaʼ caji ti chaʼ cʼocʼan, weñʌch cheʼ tsajñi ti doctor. Jiñi chʼijyemlel miʼ mejlel i cʼuñʼesañonla, miʼ ñumen tsʌtsʼesan jumpʼejl laj cʼamʼan o miʼ yʌqʼueñonla yambʌ.

Wocol mi la cubin chaʼan mi lac mel eʼtel (troñel) tac ñuc bʌ i cʼʌjñibal. Iván miʼ yʌl: «Cheʼ bʌ tsaʼ chʌmi Eric, mach cojach tsaʼ caji lon c suben jiñi lon c familia yicʼot lon camigojob, yicʼotʌch jiñi yambʌ lac piʼʌlob, bajcheʼ jiñi i yum ti eʼtel yicʼot jiñi i yum jiñi otot baqui tsiʼ chaʼle renta. Tsaʼ caji lon j qʼuel cabʌl jun. Cheʼ jaʼel tsaʼ caji lon j qʼuel jiñi i chubʌʼan tac Eric. Yomʌch mi lon c mel pejtelel iliyi, pero wen lujboñix lojon, chʼijyemon lojon yicʼot maʼañix chuqui com lon c pensarin».

Pero an ñumen wocol bʌ miʼ yubiñob cheʼ bʌ jiñix yom miʼ qʼuelob jiñi muʼ bʌ i mel jiñi tsaʼix bʌ chʌmi. Jiñʌch tsaʼ bʌ ujti tiʼ tojlel Tina. Miʼ yʌl: «Tiʼ pejtelel ora c ñoxiʼal miʼ qʼuel jiñi cuenta tac am bʌ ti banco yicʼot jiñi lon j gasto. Pero wʌle joñoñix yom mic mel, i ñumento miʼ yʌcʼon ti pensar. Tsaʼ j cʼajtibe c bʌ mi mucʼʌch caj c mejlel».

Cheʼ la cujilix chaʼan cheʼ an majqui miʼ chʌmel lac chaʼan cabʌl jax bajcheʼ miʼ mejlel la cubin lac bʌ, mi lac wen chaʼlen pensar yicʼot miʼ cʼamʼesañonla, tajol mi lac ñaʼtan chaʼan mach mejlic laj cuch. Cʼuxʌch cheʼ an majqui miʼ chʌmel lac chaʼan, pero cheʼ la cujilix chuqui ti wocol tac miʼ mejlel lac taj mucʼʌch i coltañonla. Cʼajtesan chaʼan mach tiʼ pejtelelic lac piʼʌlob junlajal bajcheʼ mi caj i yubiñob i bʌ cheʼ an majqui miʼ sʌtob. Cheʼ jaʼel, jiñi am bʌ majqui tsaʼ chʌmiyob i chaʼan miʼ mejlel i ñuqʼuesʌbeñob i pusicʼal cheʼ yujilob chaʼan i tilelʌch cheʼ an bajcheʼ yubil miʼ yubiñob.

Muʼ bʌ caj i yujtel ti a tojlel. Jiñi cʌlʌx chʼijyemlel maʼañic mi caj a wubin tiʼ pejtelel ora. Ili mach yomic i yʌl chaʼan maʼañix mi caj a wis ubin a chʼijyemlel o chaʼan mi caj i ñajʌyel a chaʼan jiñi tsaʼ bʌ chʌmi. Pero jiñi chʼijyemlel woli bʌ a wen ubin ili ora cʼunteʼ cʼunteʼ mi caj i jilel majlel anquese an i tajol mucʼʌch caj a chaʼ wen ubin a chʼijyemlel cheʼ bʌ an chuquiyes maʼ cʼajtesan tiʼ tojlel jiñi tsaʼ bʌ chʌmi. Pero yonlel lac piʼʌlob weñix miʼ chaʼ tech i yubiñob i bʌ yicʼot muqʼuix i mejlel i chaʼ xucʼchocoñob i pensar tiʼ yeʼtelob cheʼ bʌ tsaʼix ñumi majlel jiñi i yorajlel. Chaʼan miʼ mejlel lac mel, ñuc i cʼʌjñibal cheʼ miʼ coltañonla jiñi lac familia yicʼot la camigojob, i cheʼ mi lac chaʼlen wersa chaʼan mi lac mʌlben (jotben) jiñi lac chʼijyemlel.

¿Jal ba mi caj i yajñel lac chʼijyemlel? An muʼ bʌ i ñumelob i chaʼan ti chaʼpʼej uxpʼejl uw. Pero an cabʌlob muʼ bʌ i ñumel jumpʼejl o chaʼpʼejl jab chaʼan weñix miʼ chaʼ ubiñob i bʌ. I an muʼto bʌ i ñumen jalʼañob. * Alejandro miʼ yʌl: «Joñon tsaʼ j cʌyʌ cubin jiñi cʌlʌx chʼijyemlel cheʼ bʌ tsaʼ ñumi uxpʼejl jab».

Yom a wujil pijt. Mele baqui jaxʌl maʼ mejlel. Cʼajtesan chaʼan jiñi a chʼijyemlel maʼañic mi caj i yajñel tiʼ pejtelel ora. Pero ¿am ba chuqui miʼ mejlel a mel chaʼan maʼañix maʼ wen ubin a chʼijyemlel yicʼot chaʼan maʼañic miʼ wen jalʼan?