CHAʼAN JIÑI TATɅLOB
7. Cʌntesañob i pʌsob wem bʌ i melbal
¿CHUQUI YOM I YɅL?
Jiñi wen tac bʌ melbalʌl jiñʌch muʼ bʌ i pʌs juntiquil quixtañu tiʼ cuxtʌlel. ¿Muʼ baʼ chaʼlen wersa chaʼan maʼ mel chuqui utsʼat? Mi cheʼʌchi, mi caj a chaʼlen wersa a pʌsben jiñi a walobilob chaʼan cheʼ miʼ melob jaʼel.
Juntiquil wem bʌ i melbal wen yujil eʼtel, junlajal miʼ qʼuel jiñi lac piʼʌlob yicʼot miʼ chʼʌmob ti ñuc, jiñʌch melbalʌl tac mach bʌ wocolic mi lac taj cheʼ wolito laj colel majlel.
PRINCIPIO AM BɅ TI BIBLIA: «Cʌntesan alʌlob ti jini bij yom bʌ miʼ xʌñob majlel. Cheʼ ñoxobix maʼanic mi caj i cʌyob» (Proverbios 22:6).
¿CHUCOCH ÑUC I CʼɅJÑIBAL?
Ti ili ora cheʼ wen añix jiñi tecnología ñuc i cʼʌjñibal jiñi wen tac bʌ melbalʌl. Juntiquil ñaʼʌl i cʼabaʼ Karyn miʼ yʌl: «Jiñi la calobilob bajcheʼ jach ora miʼ mejlel i cʌñob mach bʌ weñic ti jiñi celular, tableta o yan tac bʌ. Tajol yaʼʌch buchulob ti lac tʼejl pero woliʼ qʼuelob mach bʌ weñic».
PRINCIPIO AM BɅ TI BIBLIA: «Jiñi ñucobix bʌ, [miʼ] wen cʼʌñob jiñi i ñaʼtʌbal, i cheʼ bʌ miʼ melob ili miʼ chajpañob i bʌ chaʼan miʼ cʌñob chuqui wem bʌ yicʼot chuqui mach bʌ weñic» (Hebreos 5:14).
Yom mi lac ñaʼtan jiñi yambʌlob. Jumpʼejl ejemplo, ñuc i cʼʌjñibal mi la cʌl «a wocolic» yicʼot «wocolix a wʌlʌ», i mi lac pʌs chaʼan mi laj qʼuel ti ñuc yambʌlob, come ili ora maʼañix miʼ wen mejlel tiʼ caj yaʼ jax wen añob tiʼ celular o yan tac bʌ.
PRINCIPIO AM BɅ TI BIBLIA: «Cheʼ yom mi laʼ melben yambʌlob cheʼ bajcheʼ laʼ wom mi laʼ melbentel» (Lucas 6:31).
¿CHUQUI MIʼ MEJLEL A MEL?
Jamʌ alʌ chuquiyes muʼ bʌ a mulan yicʼot maʼañic bʌ maʼ mulan. Jumpʼejl ejemplo, an estudio tac muʼ bʌ i pʌs chaʼan jiñi xcolelob wocol chaʼan mi caj i yajlelob ti tsʼiʼlel mi mucʼʌch i cʌntesʌntelob yaʼ tiʼ yotot chaʼan mach weñic cheʼ miʼ melob.
MUʼ BɅ MEJLEL A MEL: Mi woli a qʼuel jumpʼejl noticia cʼʌñʌ chaʼan maʼ wʌl chuquiyes jiñi mach bʌ weñic maʼ qʼuel. Jumpʼejl ejemplo, mi tsaʼ qʼuele chaʼan an lac piʼʌlob muʼ bʌ i tsʼaʼleñob i bʌ, miʼ mejlel a wʌl: «¡Mach cajix! ¿Chucoch an cheʼ bʌ yilalob maʼ wʌl bajcheʼ jiñi?».
«Chaʼan jiñi la calobilob miʼ ñaʼtañob chuqui yom miʼ melob, ñaxan yom yujilob chuqui jiñi wem bʌ yicʼot jiñi mach bʌ weñic» (Brandon).
Cʌntesañob chaʼan miʼ ñaʼtañob yambʌlob. Jiñi alʌlobto bʌ miʼ mejlel i cʌn i yʌlob «a wocolic» yicʼot «wocolix a wʌlʌ», i chaʼan miʼ ñaʼtañob yambʌlob. Jiñi libro Parenting Without Borders (Padres sin fronteras) miʼ yʌl: «Cheʼ bʌ jiñi alobob yujilob chaʼan mach jiñobic jiñi ñumen ñucoʼ bʌ i cʼʌjñibal, yom i yʌl, chaʼan ochemob ti jumpʼejl familia, ti jumpʼejl escuela, ti jumpʼejl comunidad, mi caj i ñumen mulañob i mel chuqui wem bʌ tiʼ tojlel yambʌlob».
MUʼ BɅ MEJLEL A MEL: Aqʼuen chuqui tac miʼ mel jiñi a walobilob chaʼan miʼ cʌñob chaʼan ñuc i cʼʌjñibal mi laj coltan yambʌlob.
«Mi jiñi a walobilob miʼ cʌñob i mel jiñi eʼtel tac yom bʌ melol ti otot, mach wocolic mi caj i yubiñob cheʼ bʌ bajñel chumulobix. Yujilobix bajcheʼ yom miʼ melob jiñi eʼtel tac yom bʌ miʼ melob» (Tara).
