CHAʼAN JIÑI ÑUJPUÑEMOʼ BɅ
1. Yom mi laj qʼuel ti ñuc jiñi lac ñujpuñel
¿CHUQUI YOM I YɅL?
Jiñi wiñic yicʼot xʼixic muʼ bʌ i qʼuelob ti ñuc i ñujpuñel yujilob chaʼan jiñi i ñujpuñelob chaʼañʌch tiʼ pejtelel ora, i jiñi miʼ coltañob chaʼan wen miʼ yajñelob. Maʼañic miʼ ñaʼtañob i waʼ cʌyob i bʌ cheʼ an chuqui miʼ yujtel.
An xñujpuñelob maʼañic bʌ miʼ cʌyob i bʌ tiʼ caj i familia o i yamigojob miʼ wersa xicʼbeñob. Pero ñumen wen cheʼ chʌn temel miʼ yajñelob come mucʼʌch i cʼuxbiñob i bʌ i miʼ qʼuelob i bʌ ti ñuc.
PRINCIPIO AM BɅ TI BIBLIA: «Jiñi wiñic mach yomic miʼ cʌy i yijñam» (1 Corintios 7:11).
«Mi mucʼʌch a qʼuel ti ñuc a ñujpuñel mach ti orajic mi caj a michʼan. Cheʼ jaʼel, mach wocolic mi caj a wubin chaʼan maʼ ñusʌben yicʼot chaʼan maʼ cʼajtin i ñusʌntel a mul, i mi tsaʼ ujti jumpʼejl wocol ti laʼ tojlel, mach jiñic jach mi laʼ waʼ ñaʼtan jiñi cʌy bʌ» (Michael). a
¿CHUCOCH ÑUC I CʼɅJÑIBAL?
Mi jiñi wiñic yicʼot xʼixic maʼañic miʼ qʼuelob ti ñuc i ñujpuñel, tajol cheʼ bʌ miʼ yujtel jumpʼejl wocol, mi caj i ñaʼtañob chaʼan mach i chaʼañobic i bʌ i miʼ sʌclañob bajcheʼ miʼ mejlel i cʌyob i bʌ.
«Cabʌlob miʼ ñujpuñelob come yujilob chaʼan miʼ mejlel i cʌyob i bʌ mi an chuqui miʼ yujtel. Mi cheʼ maʼ ñaʼtan jaʼel bajcheʼ iliyi, yom i yʌl chaʼan maʼañic maʼ wis qʼuel ti ñuc jiñi ñujpuñel» (Emily).
¿CHUQUI MIʼ MEJLEL A MEL?
ÑAʼTAN ILIYI
¿Chuqui maʼ mel cheʼ bʌ mi laʼ wʌʼlen laʼ bʌ?
-
¿Muʼ baʼ ñaʼtan chaʼan maʼañic tsaʼ ñujpuñiyet yomic?
-
¿Muʼ baʼ ñaʼtan bajcheʼ yilal chumulet cheʼ yambʌyic majqui tsaʼ ñujpuñi a wicʼot?
-
¿Muʼ baʼ suben jiñi a piʼʌl «mi caj cʌyet» o «mi caj c sʌclan yambʌ mucʼʌch bʌ i qʼuelon ti ñuc»?
Mi an tsaʼ bʌ a jacʼʌ chaʼan cheʼʌchi, yom maʼ chaʼlen wersa chaʼan maʼ tech a qʼuel ti ñuc jiñi a ñujpuñel.
TEM ALɅLA
-
¿Maʼañix ba woli lac wen qʼuel ti ñuc jiñi lac ñujpuñel? Mi maʼañiqui, ¿chucoch?
-
¿Chuqui miʼ mejlel lac mel chaʼan mi lac ñumen qʼuel ti ñuc jiñi lac ñujpuñel?
MUʼ BɅ MEJLEL LAC MEL
-
Tsʼijbuben jumpʼejl alʌ jun jiñi a piʼʌl baqui maʼ suben chaʼan maʼ cʼuxbin.
-
Yom an a wicʼot i foto a piʼʌl yaʼ baqui muqʼuet ti eʼtel.
-
Chʌcʌ pejcan jiñi a piʼʌl cheʼ bʌ añet ti a weʼtel o cheʼ bʌ ñajt añetla.
PRINCIPIO AM BɅ TI BIBLIA: «Jiñi tsaʼ bʌ i teme Dios mach i tʼox mi juntiquilic wiñic» (Mateo 19:6).
a An cʼabaʼʌl tac tsaʼ bʌ qʼuextʌyi.