Jiñi wen yujil bʌ eʼtel maʼañic miʼ bʌcʼñan jiñi eʼtel. Miʼ wen mulan jiñi eʼtel chaʼan miʼ mʌcʼlan i bʌ yicʼot chaʼan miʼ coltan yambʌlob, anquese mach wen ñuquic jiñi i yeʼtel.

Anquese mi lac mulan o maʼañic, ili ora cabʌl chuqui yom mi lac mel. Pero cheʼ wen la cujil eʼtel miʼ coltañonla, come cabʌl lac piʼʌlob maʼañic miʼ mulañob i mel jiñi tsʌts bʌ eʼtel (Eclesiastés 3:13).

«Cheʼ bʌ mic wen chaʼlen eʼtel, tijicña mi cubin c bʌ. Jin chaʼan, mic wen mulan jiñi eʼtel. Cheʼ jaʼel, cheʼ mic ñʌmtesan c bʌ chaʼan mic mel ti wen jiñi queʼtel miʼ qʼueloñob ti ñuc» (Ricky).

PRINCIPIO AM BɅ TI BIBLIA: «Pejtel eʼtel muʼ bʌ lac mel miʼ yʌcʼ i chobejtʌbal» (Proverbios 14:23).

Ili ticʼojel tac mi caj i coltañet chaʼan wen maʼ qʼuel jiñi a weʼtel.

Cʌñʌ a mel ti wen jiñi a weʼtel. Xucʼchocon a pensar ti jiñi woli bʌ a mel, mach yʌlʌyic mi jumpʼejl eʼtel ti a wotot, mi woli a mel a tarea o yambʌ eʼtel. Mi a wujilix melol sʌclan bajcheʼ miʼ mejlel a mel ti ñumen wen o ti orajach. Mi cheʼʌch maʼ mel ñumen tijicña mi caj a wubin a bʌ.

PRINCIPIO AM BɅ TI BIBLIA: «¿A cʌñʌ ba juntiquil bʌx bʌ ti eʼtel? Mi caj i yʌqʼuentel ñuc bʌ i yeʼtel tiʼ tojlel yumʌlob. Maʼanic mi caj i melbeñob i yeʼtel jini chʼoʼchʼocoʼ bʌ» (Proverbios 22:29).

Ñaʼtan yambʌlob. Lʌcʼʌ tiʼ pejtelel ora, cheʼ bʌ mucʼʌch a mel jiñi am bʌ ti a wenta miʼ coltan yambʌlob. Jumpʼejl ejemplo, mi mucʼʌch a mel jiñi eʼtel tac muʼ bʌ a subentel ti a wotot, mi caj a coltan jiñi a familia chaʼan mach cabʌlobic i yeʼtel.

PRINCIPIO AM BɅ TI BIBLIA: «Ñumen an tijicñʌyel cheʼ mi la cʌcʼ i mach jiñic cheʼ mi lac chʼʌm» (Hechos 20:35).

Mach jasʌlic yom maʼ wubin cheʼ mucʼʌch a mel jiñi muʼ bʌ a subentel. Mach cojach yom maʼ mel jiñi muʼ bʌ a cʼajtibentel, ñumen meleto. Cheʼ bajcheʼ jiñi, jatetʌch woli a ñaʼtan yom bʌ maʼ mel ti a cuxtʌlel. I sujmʌch chaʼan ñumento mi a cajel ti eʼtel, pero chaʼan cheʼʌch a wom, mach chaʼañic xicʼbilet (Mateo 5:41).

PRINCIPIO AM BɅ TI BIBLIA: «Mach xicʼbiletic maʼ mel iliyi, com bʌ jiñʌch cheʼ bajñel loqʼuem ti a pusicʼal» (Filemón 14).

Pʼisbil jach yom maʼ qʼuel jiñi a weʼtel. Weñʌch cheʼ wen yom la cujil eʼtel. Pero mach yomic i yʌl chaʼan yom mi lac tsʌnsan lac bʌ ti eʼtel yom pʼisbil jach mi laj qʼuel, mi lac ñusan lac bʌ ti jiñi la queʼtel yicʼot mi laj cʼaj la co.

PRINCIPIO AM BɅ TI BIBLIA: «Utsʼat mi lac tsʼitaʼ cʼaj la co. Mach utsʼatic mi lac chʌn bajben eʼtel chaʼan jach lac woʼlel ti chubʌʼañʌl. Toʼol icʼ jach woli la cʌsin cheʼ jini» (Eclesiastés 4:6).