CHAʼAN JIÑI XCOLELOB
9. Cʌñʌ majquiyet
¿CHUQUI YOM I YɅL?
Muʼ bʌ i yʌcʼ ti cʌñol majquiyet mach jiñic jach a cʼabaʼ o bajcheʼ yilal a ñiʼ a wut, jiñʌch jiñi wem bʌ a melbal, jiñi ñopol bʌ a chaʼan yicʼot bajcheʼ yilalet.
¿CHUCOCH ÑUC I CʼɅJÑIBAL?
Cheʼ bʌ wen laj cʌñʌyʌch lac bʌ maʼañic mi la cʌcʼ chaʼan yambʌ majqui miʼ tilel i subeñonla chuqui yom mi lac mel.
«Cabʌl lac piʼʌlob lajalob bajcheʼ jumpʼejl muñeco, mach jiñobic miʼ yʌlob chuqui yom miʼ lʌpob» (Adrian).
«An j cʌñʌ j coltan chuqui wem bʌ anquese an i tajol wocolʌch mi cubin. Cujil majquiyob jiñi camigojob tiʼ sujm cheʼ bʌ mij qʼuel bajcheʼ yilalob yicʼot chaʼan bajcheʼ yilalon cheʼ yaʼan quicʼotob» (Carolina).
PRINCIPIO AM BɅ TI BIBLIA: «Cʌyʌ laʼ tsajcʌben i melbal jiñi quixtañujob ti ili pañimil, tsijibtesan laʼ ñaʼtʌbal chaʼan mi laʼ qʼuextan laʼ bʌ» (Romanos 12:2).
¿CHUQUI MIʼ MEJLEL A MEL?
Chaʼan maʼ ñaʼtan majquiyet ili ora yicʼot majqui a wom sujtel, wen ñaʼtan chuqui muqʼuix bʌ i mejlel a mel yicʼot jiñi wocolto bʌ maʼ wubin. Miʼ mejlel a melben a bʌ ili cʼajtiya tac.
Muqʼuix bʌ i mejlel a mel: «¿Chuqui tac cujilix bʌ melol? ¿Baqui bʌ jiñi ñumen cujil bʌ melol? ¿Cujil ba ticʼol bajcheʼ yubil mi cubin c bʌ? ¿Puntualon ba, xʼeʼtelon ba o muʼ ba c pʌs cutslel? ¿Chuqui tac wem bʌ mic mel?».
MUʼ BɅ MEJLEL A MEL: Mi wocol maʼ wubin chaʼan maʼ cʌn baqui bʌ jiñi wen tac bʌ a melbal, cʼajtiben i coltaya a tat a ñaʼ o juntiquil wem bʌ a wamigo.
PRINCIPIO AM BɅ TI BIBLIA: «Jujuntiquil yom miʼ bajñel tsajin i melbal, i cheʼ bajcheʼ jiñi añʌch chucoch tijicña mi caj i yubin i bʌ chaʼan jiñi tsaʼ bʌ i mele, i mach cʼʌñʌlic miʼ laj i bʌ yicʼot yambʌ» (Gálatas 6:4).
Wocol bʌ maʼ wubin: «¿Baquito yom mic ñumen tojʼesan c bʌ? ¿Jalaqui ñumen com c mel mach bʌ weñic mi cubin? ¿Jalaqui yom mic ñumen ticʼ c bʌ chaʼan bajcheʼ yubil mi cubin c bʌ?».
PRINCIPIO AM BɅ TI BIBLIA: «Mi tsaʼ la cʌlʌ chaʼan ‹Maʼañic lac mul›, woli lac bajñel lotin lac bʌ» (1 Juan 1:8).
Ñopol bʌ a chaʼan: «¿Chuqui ti melbalʌl tac mic pʌs tij cuxtʌlel, i chucoch? ¿Muʼ ba c ñop Dios? ¿Bajcheʼ mic ñaʼtan chaʼan añʌch Dios? ¿Chuqui tac mach tojic mij qʼuel, i chucoch? ¿Bajcheʼ yilal mij qʼuel jiñi talto bʌ qʼuin?».
PRINCIPIO AM BɅ TI BIBLIA: «Mi caj a cʌntʌntel chaʼan wen bʌ a pusicʼal, chaʼan tsaʼ chʼʌmbe isujm» (Proverbios 2:11).
Miʼ mejlel a qʼuel jaʼel iliyi
I JACʼBAL 10 CʼAJTIYA TAC I CHAʼAN XCOLELOB
¿Majquiyon tiʼ sujm?
Cheʼ a cʌñʌ chuqui tac maʼ mel ti wen, baqui bʌ jiñi a cʼunlel, chuqui a wom a mel yicʼot chuqui muʼ bʌ a wʌcʼ ti ñuc, mi caj i coltañet a ñaʼtan chuqui yom maʼ mel cheʼ bʌ añet ti wocol.
