1. ¿Chuqui yom miʼ mel juntiquil quixtañu mi yom i pejcan jiñi rey ti Persia?

LAʼCU lac ñaʼtan chaʼan chumulonla ti wajali yaʼ ti Persia. La com lac pejcan jiñi rey, jin chaʼan mi lac majlel laj qʼuel yaʼ baqui chumul, ti Susa. Pero mach lac ñaʼtayic ochel yaʼ baqui an jiñi rey cheʼ mach subebiloñicla i chaʼan come mi lac mejlel ti tsʌnsʌntel mi tsaʼ lac mele (chaʼle) (Est. 4:11).

2. ¿Bajcheʼ yom Jehová chaʼan mi lac pejcan?

² Tiʼ sujm, mi lac wen taj lac tijicñʌyel cheʼ Jehová mach lajalic bajcheʼ jiñi reyob ti Persia. Anquese Jehová ñumen ñuc cheʼ bajcheʼ jiñi yumʌlob ti pañimil (mulawil), mucʼʌch i mejlel lac pejcan ti oración bajcheʼ jach i yorajlel. Yom chaʼan maʼañic mi lac bʌcʼñan lac pejcan. I sujmʌch chaʼan miʼ subentel bajcheʼ: Jiñi tsaʼ bʌ i meleyonla, jiñi mach bʌ añic i pʼisol i pʼʌtʌlel yicʼot jiñi yumʌl bʌ ti panchan yicʼot ila ti pañimil. Pero yom chaʼan mi lac pejcan bajcheʼ lac «Tat» (Mt. 6:9). Mi lac wen ubin lac tijicñʌyel cheʼ bʌ Jehová yom chaʼan lʌcʼʌl mi la cajñel tiʼ tojlel.

3. ¿Chucoch miʼ mejlel lac pejcan Jehová bajcheʼ lac «Tat», i chuqui mi caj laj qʼuel ti ili estudio?

³ Miʼ mejlel lac pejcan ti lac «Tat» jiñi Jehová come jin tsiʼ yʌqʼueyonla laj cuxtʌlel (Sal. 36:9). Come jiñʌch lac Tat, yom mi lac jacʼben i tʼan. Mi mucʼʌch lac mel chuqui miʼ subeñonla, mi caj lac taj utsʼatax bʌ bendición tac (He. 12:9). Junchajp jiñʌch jiñi laj cuxtʌlel mach bʌ añic miʼ jilel, mach yʌlʌlic mi ti panchan o ila ti pañimil. Pero miʼ mejlel lac taj cabʌl bendición ili ora. Ti ili estudio, mi caj laj qʼuel bajcheʼ miʼ pʌsbeñonla Jehová chaʼan juntiquilʌch Tatʌl wen am bʌ i cʼuxbiya yicʼot chucoch  miʼ mejlel lac ñop chaʼan maʼañic mi caj i cʌyonla. Pero laʼ lac ñaxan qʼuel chucoch miʼ mejlel lac ñop chaʼan jiñi lac Tat am bʌ ti panchan miʼ wen cʼuxbiñonla yicʼot miʼ cʌntañonla.

4. ¿Chucoch an wocol bʌ miʼ qʼuelob Jehová bajcheʼ juntiquil Tatʌl?

⁴ ¿Wocol ba mi laj qʼuel Jehová bajcheʼ lac Tat? Tajol an muʼ bʌ i yubiñob i bʌ chaʼan maʼañic i cʼʌjñibalob ti Dios. Maʼañic miʼ wen ñopob chaʼan jiñi mach bʌ añic i pʼisol i pʼʌtʌlel miʼ cʼojoʼtañonla ti jujuntiquil. Pero jiñi lac Tat muʼ bʌ i cʼuxbiñonla mach yomic chaʼan cheʼ mi la cubin lac bʌ bajcheʼ jiñi. Tsiʼ yʌqʼueyonla laj cuxtʌlel i yom chaʼan mi lac sʌclan yicʼot mi lac taj. Cheʼ bʌ Pablo tiʼ tsictesa ili tʼan ti Atenas, tiʼ sube jiñi woli bʌ i ñʌchʼtañob chaʼan «mach ñajtic an Dios ti lac tojlel ti jujuntiquilonla» (Hch. 17:24-29). Dios yom chaʼan ti lac pejtelel mi lac lʌcʼtesan lac bʌ tiʼ tojlel cheʼ bajcheʼ miʼ mel juntiquil alʌl tiʼ tojlel jiñi cʼuxbibil bʌ i tat.

5. ¿Chuqui mi laj cʌn tiʼ tojlel juntiquil hermana?

⁵ An yambʌ i sujmlel cheʼ jiñi lac piʼʌlob wocol miʼ qʼuelob Jehová bajcheʼ i Tatob. ¿Baqui bʌ? Come jiñi i tatob tsʼitaʼ jach tsiʼ pʌsbeyob cʼuxbiya o maʼañic tsiʼ wis pʌsbeyob. Juntiquil hermana tsiʼ yʌlʌ: «Jiñi c tat tsiʼ subeñon tsucul tʼan tac. Cheʼ bʌ tsaʼ caji c chʼʌm estudio, wocol tsaʼ cubi chaʼan mic lʌcʼtesan c bʌ tiʼ tojlel jiñi lac Tat am bʌ ti panchan. Pero tsaʼ qʼuextʌyi cheʼ tsaʼ caji j cʌn Jehová». ¿Cheʼ ba woli (choncol) la cujtel jaʼel? Mi cheʼʌchi, miʼ mejlel lac ñop chaʼan mejlʌch i cʼotel laj qʼuel Jehová bajcheʼ jiñi ñumen wem bʌ lac Tat.

6. Cheʼ bajcheʼ miʼ yʌl Mateo 11:27, ¿bajcheʼ an i coltayonla Jehová chaʼan mi laj qʼuel bajcheʼ juntiquil Tatʌl muʼ bʌ i cʼuxbiñonla?

⁶ ¿Bajcheʼ an i coltayonla Jehová chaʼan mi laj qʼuel bajcheʼ juntiquil Tatʌl muʼ bʌ i cʼuxbiñonla? Junchajp jiñʌch cheʼ tsiʼ yʌcʼʌ ti tsʼijbuntel yaʼ ti Biblia jiñi tʼan tac tsaʼ bʌ i yʌlʌ Jesús yicʼot tsaʼ bʌ i mele (pejcan Mateo 11:27). Jesús tsaʼʌch i wen lajibe i melbal jiñi i Tat, jin chaʼan tsiʼ yʌlʌ: «Jini tsaʼ bʌ i qʼueleyon, tsaʼix i qʼuele c Tat» (Jn. 14:9). Ti jiñi chʌmpʼejl Evangelio miʼ pʌs chaʼan Jesús tsiʼ cʼʌñʌ cheʼ bʌ 165 jiñi tʼan «Tat» tiʼ tojlel Jehová. ¿Chucoch Jesús tsiʼ wen taja ti tʼan Jehová? Come yom chaʼan jiñi lac piʼʌlob miʼ cʼotel i cʌñob chaʼan Jehová jiñʌch juntiquil lac Tat muʼ bʌ i cʼuxbiñonla (Jn. 17:25, 26).

7. ¿Chuqui mi laj cʌn tiʼ tojlel Jehová cheʼ bʌ mi lac tsajin tsaʼ bʌ i mele tiʼ tojlel i Yalobil?

⁷ Laʼ laj qʼuel chuqui tsiʼ mele Jehová tiʼ tojlel Jesús i chuqui miʼ laj cʌn tiʼ tojlel. Ti bele ora Dios tsiʼ ñʌchʼtʌbe i yoración i Yalobil yicʼot tsiʼ jacʼbe (Jn. 11:41, 42). Jesús ti bele ora tsiʼ yubibe i cʼuxbiya yicʼot i coltaya i Tat ti chuqui jach tsiʼ ñusa (Lc. 22:42, 43).

8. ¿Bajcheʼ tsiʼ cʌnta Jehová jiñi i Yalobil?

⁸ Jesús tsaʼʌch cʼoti i cʌn chaʼan Jehová tsiʼ yʌqʼue i cuxtʌlel yicʼot tsiʼ yʌqʼue i cʼʌjñibal bʌ i chaʼan chaʼan wen chumul o bej cuxul come tsiʼ yʌlʌ: «An j cuxtʌlel tic Tat» (Jn. 6:57). Jesús tsiʼ wen ñopo chaʼan Jehová mi caj i coltan, i Jehová tsiʼ yʌqʼue chuqui i cʼʌjñibal i chaʼan tiʼ cuxtʌlel. Pero jiñi ñuc bʌ i cʼʌjñibal jiñʌch cheʼ tsiʼ yʌqʼue jiñi chʼujul bʌ bʌlñʌcʼʌl (Mt. 4:4).

9. ¿Bajcheʼ tsiʼ pʌsʌ Jehová chaʼan mucʼʌch i cʼuxbin Jesús?

⁹ Jehová tsiʼ pʌsʌ chaʼan juntiquilʌch Tatʌl am bʌ i cʼuxbiya come tsiʼ yʌqʼue i ñaʼtan Jesús chaʼan wolʌch i coltan (Mt. 26:53; Jn. 8:16). I sujmʌch chaʼan maʼañic tsiʼ locʼsa tiʼ pejtelel jiñi wocol tsaʼ bʌ i ñusa, pero tsaʼʌch i colta i cuch. Jesús yujil chaʼan ñumel jach tiʼ tojlel pejtelel chuqui miʼ mejlel i tʌcʼlan (He. 12:2). Jehová tsiʼ pʌsʌ chaʼan tsaʼʌch i cʌnta jiñi i Yalobil cheʼ bʌ tsiʼ ñʌchʼtʌbe i yoración, tsiʼ yʌqʼue  chuqui i cʼʌjñibal i chaʼan, tsiʼ cʌntesa yicʼot tsiʼ colta (Jn. 5:20; 8:28). Wʌle mi caj laj qʼuel bajcheʼ jiñi lac Tat am bʌ ti panchan miʼ cʌntañonla bajcheʼ tsiʼ cʌnta i Yalobil.

10. Cheʼ bajcheʼ miʼ yʌl Salmo 66:19, 20, ¿bajcheʼ miʼ pʌsbeñonla Jehová jiñi i cʼuxbiya?

¹⁰ Jehová miʼ ñʌchʼtan la coración (pejcan Salmo 66:19, 20). Maʼañic miʼ subeñonla jayajl yom mi lac mel oración, chuqui mi la cʌl yicʼot bajcheʼ cʼamel. Miʼ subeñonla chaʼan ti bele ora yom mi lac pejcan ti oración (1 Ts. 5:17). Cheʼ jaʼel, mach yʌlʌyic baqui añonla yicʼot bajcheʼ ora, miʼ mejlel lac pejcan. Anquese cabʌl chuqui miʼ mel, mucʼʌch i ñʌchʼtan la coración. Cheʼ mi lac chʼʌmben i sujm chaʼan Jehová miʼ ñʌchʼtan jiñi la coración, mi caj lac ñumen cʼuxbin. Juntiquil xtsʼijbaya i chaʼan salmo tsiʼ yʌlʌ: «Mij cʼuxbin c Yum come tsiʼ yubibeyon coración» (Sal. 116:1).

11. ¿Bajcheʼ miʼ jacʼbeñonla la coración Jehová?

¹¹ Jiñi lac Tat mach cojach miʼ ñʌchʼtan jiñi la coración, mucʼʌch i jacʼ. Jiñi apóstol Juan cheʼʌch tsiʼ yʌlʌ: «Come la cujil miʼ yubibeñonla chuqui jach mi laj cʼajtiben cheʼ bajcheʼ yom i pusicʼal» (1 Jn. 5:14, 15). Tiʼ sujm, tajol Jehová cabʌl bajcheʼ miʼ mejlel i jacʼbeñonla i mach cheʼic bajcheʼ la com. Come yujil chuqui jiñi ñumen wem bʌ ti lac tojlel, an i tajol maʼañic mi caj i yʌqʼueñonla chuqui mi laj cʼajtiben o yomto chaʼan mi lac pijtan (2 Co. 12:7-9).

12, 13. ¿Bajcheʼ miʼ mel Jehová chaʼan miʼ yʌqʼueñonla jiñi i cʼʌjñibal bʌ lac chaʼan?

¹² Jehová miʼ yʌqʼueñonla i cʼʌjñibal bʌ lac chaʼan. Lajal miʼ mel bajcheʼ miʼ suben i mel jiñi tatʌlob (1 Ti. 5:8). Miʼ yʌqʼuen chuqui i cʼʌjñibal bʌ i chaʼan jiñi i yalobilob. Mach yomic chaʼan mi laj cʼojoʼtan chuqui mi laj cʼux, jiñi lac pislel o baqui mi lac chumtʌl (Mt. 6:32, 33; 7:11). Come miʼ cʼuxbiñonla, an i chajpa chaʼan ti talto bʌ qʼuin mi lac taj pejtelel chuqui i cʼʌjñibal bʌ lac chaʼan.

¹³ Pero ñumen ñuc bʌ i cʼʌjñibal jiñʌch cheʼ miʼ yʌqʼueñonla jiñi chʼujul bʌ bʌlñʌcʼʌl. Yaʼ ti Biblia, an i subeyonla majqui, bajcheʼ yom miʼ yajñel pejtelel chuqui an i mele, chucoch tsiʼ meleyonla (pʌtʌyonla) yicʼot chuqui mi caj i yujtel ti jiñi talto bʌ qʼuin. Tsiʼ chʼʌmʌyonla ti ñuc cheʼ tsaʼ laj cʌñʌ jiñi i sujmlel yicʼot tsiʼ cʼʌñʌ jiñi lac tat lac ñaʼ o yambʌ hermanojob chaʼan miʼ cʼotel laj cʌn. I woli (yʌquel) i bej coltañonla tiʼ tojlel jiñi ancianojob ti congregación yicʼot añobix bʌ i colel tiʼ chaʼan bʌ Dios. Cheʼ jaʼel, miʼ cʌntesañonla yaʼ ti tempa bʌ tac, baqui mi lac tem cʌn tiʼ tojlel yicʼot la quermañujob. Cheʼ bajcheʼ iliyi yicʼot yan tac bʌ, miʼ pʌs chaʼan juntiquilʌch Tatʌl muʼ bʌ i qʼuelonla ti ñuc (Sal. 32:8).

14. ¿Chucoch miʼ cʌntesañonla Jehová, i bajcheʼ miʼ mel?

¹⁴ Jehová miʼ cʌntesañonla. Jesús mach xmulilic bajcheʼ joñonla. Jin chaʼan, cheʼ bʌ miʼ cʌntesañonla, jiñi cʼuxbibil bʌ lac Tat miʼ tojʼesañonla cheʼ i cʼʌjñibal miʼ qʼuel. Jiñi i Tʼan miʼ cʼajtesʌbeñonla chaʼan Jehová «miʼ juʼsʌben i pusicʼal majqui jach miʼ cʼuxbin» (He. 12:6, 7). Cabʌl bajcheʼ miʼ mel. Jumpʼejl ejemplo, tajol cheʼ mi lac pejcan jiñi lac Biblia o an chuqui mi lac ñʌchʼtan yaʼ ti tempa bʌ miʼ cʼotel lac ñaʼtan chaʼan an chuqui yom mi lac qʼuextan ti lac tojlel. O tajol jiñi coltaya i cʼʌjñibal bʌ lac chaʼan miʼ tilel tiʼ tojlel jiñi ancianojob. Mach yʌlʌyic bajcheʼ, Jehová miʼ ticʼonla come miʼ cʼuxbiñonla (Jer. 30:11).

15. ¿Bajcheʼ miʼ cʌntañonla Jehová?

¹⁵ Jehová miʼ coltañonla lac lʌtʼ jiñi wocol tac. Jiñi lac Tat am bʌ ti panchan miʼ cʌntañonla cheʼ woli lac ñusan wocol tac, cheʼ bajcheʼ miʼ mel juntiquil tatʌl muʼ bʌ i cʼuxbin i yalobilob. Miʼ cʼʌn jiñi chʼujul bʌ i yespíritu chaʼan maʼañic  chuqui miʼ jem bajcheʼ añonla la quicʼot (Lc. 11:13). Cheʼ jaʼel, miʼ coltañonla cheʼ baqui ora cʼuñonla. Jumpʼejl ejemplo, miʼ yʌqʼueñonla utsʼatax bʌ lac pijtaya ti talto bʌ qʼuin muʼ bʌ i coltañonla lac lʌtʼ jiñi wocol tac. Laʼ lac ñaʼtan iliyi: Mach yʌlʌyic chuqui mach bʌ weñic mi lac ñusan, jiñi lac Tat am bʌ i cʼuxbiya mi caj i laj tojʼesan. Jiñi wocol tac mucʼ jach i ñumel, pero jiñi bendición tac muʼ bʌ caj i yʌqʼueñonla Jehová mi caj i yajñel tiʼ pejtelel ora (2 Co. 4:16-18).

16. ¿Chuqui tsaʼ ujti cheʼ bʌ Adán tsiʼ ñusʌbe i tʼan i Tat?

¹⁶ Junchajp muʼ bʌ i pʌsbeñonla chaʼan Jehová miʼ cʼuxbiñonla jiñʌch tsaʼ bʌ i mele cheʼ bʌ Adán tsiʼ ñusʌbe i tʼan. Tiʼ caj i ñusatʼan, jiñi Adán yicʼot i pʼolbal maʼañix tsaʼ ajñiyob bajcheʼ i familia Dios (Ro. 5:12; 7:14). Pero Jehová añʌch chuqui tsiʼ mele.

17. ¿Chuqui tsiʼ mele ti ora Jehová cheʼ bʌ Adán tsiʼ ñusʌbe i tʼan?

¹⁷ Jehová tsiʼ yʌqʼue i toj i mul jiñi Adán, pero añʌch chuqui tsiʼ mele chaʼan miʼ coltʌben jiñi i pʼolbal. Ti jiñi jach bʌ ora, tsiʼ yʌlʌ chaʼan jiñi muʼ bʌ i jacʼbeñob i tʼan mi caj i chaʼ sujtelob tiʼ familia (Gn. 3:15; Ro. 8:20, 21). Tsaʼʌch mejli i mel come tsiʼ yʌcʼʌ i cuxtʌlel jiñi i Yalobil, Jesús. Cheʼ bʌ tsiʼ yʌcʼʌ ti lac tojlel, tsiʼ pʌsʌ chaʼan mucʼʌch i wen cʼuxbiñonla (Jn. 3:16).

18. Anquese tsaʼ laj cʌyʌ Jehová, ¿chucoch miʼ mejlel lac ñop chaʼan yom mi lac chaʼ sujtel tiʼ yalobil?

¹⁸ Anquese xmulilonla, Jehová yom chaʼan mi la cochel tiʼ familia i maʼañic miʼ qʼuelonla bajcheʼ jumpʼejl i cuch. Tajol miʼ mejlel la cʌqʼuen i yubin i chʼijiyemlel o cheʼ mi lac jumucʼ cʌy, pero ti bele ora mi caj i pijtañonla. Jesús tsiʼ cʼʌñʌ jiñi relato chaʼan jiñi chʼiton tsaʼ bʌ chaʼ sujti tiʼ yotot chaʼan miʼ pʌs bajcheʼ cʼamel miʼ cʼuxbiñonla Jehová (Lc. 15:11-32). Jiñi tatʌl  muʼ bʌ i yʌjlel ti jiñi relato ti bele ora tsiʼ pijta chaʼan miʼ chaʼ sujtel jiñi i yalobil. I cheʼ baqui ora tsaʼ chaʼ sujti, jiñi i tat tsiʼ wen ubi i tijicñʌyel. Mi tsaʼ laj cʌyʌ Jehová pero tsaʼix laj cʌyʌ lac mul, miʼ mejlel lac ñop chaʼan jiñi lac Tat mi caj chaʼ pʌyonla.

19. ¿Chuqui mi caj i mel Jehová chaʼan miʼ tojʼesan jiñi wocol tsaʼ bʌ i yotsa Adán?

¹⁹ Jiñi lac Tat mi caj i luʼ tojʼesan jiñi wocol tsaʼ bʌ i yotsa Adán. Cheʼ bʌ Adán tsiʼ ñusa tʼan, Jehová tsiʼ ñaʼta i pʌy bajcheʼ i yalobil 144 mil wiñicob xʼixicob (quixtañu) muʼ bʌ i caj i yochelob bajcheʼ rey yicʼot ti motomaj yaʼ ti panchan, i mi caj i tem chaʼleñob eʼtel (troñel) yicʼot i Yalobil. Jesús yicʼot jiñi muʼ bʌ caj i chaʼleñob yumʌntel mi caj i coltañob jiñi muʼ bʌ i jacʼob tʼan chaʼan miʼ sujtelob ti toj yaʼ tsijiʼ bʌ pañimil. Mi mucʼʌch i jacʼob tʼan cheʼ ti cojix bʌ i yilʌntel i pusicʼalob, Dios mi caj i yʌqʼueñob jiñi cuxtʌlel mach bʌ añic miʼ jilel. Jiñi lac Tat mi caj i yubin i tijicñʌyel cheʼ bʌ miʼ qʼuel chaʼan mi caj i bujtʼel ili Pañimil ti toj bʌ i yalobilob. ¿Mach ba wen utsʼatic chuqui mi caj i yujtel?

20. ¿Bajcheʼ an i pʌsbeyonla Jehová chaʼan mucʼʌch i wen cʼuxbiñonla, i chuqui mi caj laj qʼuel yaʼ ti yambʌ estudio?

²⁰ Jehová an i pʌsʌ chaʼan mucʼʌch i wen cʼuxbiñonla. Jiñʌch ñumen wem bʌ lac Tat am bʌ lac chaʼan. Miʼ ñʌchʼtan la coración yicʼot miʼ yʌqʼueñonla i cʼʌjñibal bʌ lac chaʼan yicʼot jiñi chʼujul bʌ bʌlñʌcʼʌl. Miʼ cʌntesañonla yicʼot miʼ coltañonla. An i chajpa utsʼatax bʌ bendición tac ti lac tojlel. Tiʼ sujm, tijicña mi la cubin lac bʌ cheʼ la cujil chaʼan jiñi lac Tat miʼ cʼuxbiñonla yicʼot miʼ cʌntañonla. Ti jiñi yambʌ estudio mi caj i tsajintel chuqui miʼ mejlel lac mel, bajcheʼ i yalobilonla, chaʼan mi la cʌqʼuen wocolix i yʌlʌ cheʼ miʼ cʼuxbiñonla.