1. a) ¿Baqui tac bʌ mandar miʼ chʼʌm tilel jiñi Biblia? b) ¿Bajcheʼ mi coltañonla cheʼ mi lac jacʼ?

JEHOVÁ an i yʌcʼʌ tsiquil tac bʌ i mandar yaʼ ti Biblia chaʼan mi lac ñaʼtan chuqui yom mi lac mel. Jumpʼejl ejemplo, mach yomic mi lac chʼujutesan diosteʼ tac, mi lac chaʼlen xujchʼ, yʌcʼʌjel yicʼot tsʼiʼlel (1 Corintios 6:9, 10). Cheʼ jaʼel, Jesús tsiʼ yʌqʼue jiñi xcʌntʼañob i chaʼan ili mandar: «Cucula cheʼ jini. Sutqʼuiñob ti xcʌntʼañob winicob xʼixicob tiʼ pejtelel pañimil. Aqʼuenla chʼʌmjaʼ tiʼ cʼabaʼ lac Tat, tiʼ cʼabaʼ i Yalobil, tiʼ cʼabaʼ Chʼujul bʌ Espíritu. Cʌntesanla chaʼan miʼ laj chʼujbiñob pejtelel chuqui tac tsac subeyetla. Awilan, añon quicʼotetla tiʼ pejtelel ora cʼʌlʌl tiʼ jilibal pañimil» (Mateo 28:19, 20). Ti jacʼol i mandar Jehová yicʼot i Yalobil cabʌl bajcheʼ miʼ coltañonla. I mandar tac Dios miʼ cʌntesañonla laj cʌntan lac bʌ yicʼot lac familia chaʼan laj cʼocʼlel yicʼot tijicña mi la cajñel. Pero cheʼ mi lac jacʼben i mandar tac Jehová bajcheʼ jiñi subtʼan, jiñʌch ñumen ñuc bʌ, i tijicña mi caj i qʼuelonla yicʼot mi caj i yʌqʼueñonla i bendición.

2, 3. a) ¿Chucoch jiñi Biblia maʼañic miʼ yʌl ti jujunchajp bajcheʼ yomonla ti laj cuxtʌlel? b) ¿Chuqui tac mi caj i jajqʼuel ti ili temaj? (Qʼuele jiñi foto am bʌ tiʼ tejchibal).

² Isujm, jiñi Biblia maʼañic miʼ yʌl ti jujunchajp bajcheʼ yomonla ti  laj cuxtʌlel. Jumpʼejl ejemplo, maʼañic miʼ yʌl bajcheʼ yilal bʌ pislel yom mi lac lʌp (xoj) yicʼot mach bʌ yomic. Ili miʼ pʌs chaʼan wen an i ñaʼtʌbal Jehová. ¿Chucoch? Come jiñi wiñicob xʼixicob (quixtañujob) tiʼ pejtelel pañimil (mulawil) qʼuexel tac bajcheʼ miʼ xojob i pislel. Cheʼ jaʼel, miʼ qʼuextʌyel majlel bajcheʼ tac yilal melbil jiñi pisil. Pero maʼañic miʼ wis qʼuextʌyel muʼ bʌ i yʌl jiñi Biblia chaʼan bajcheʼ yom lac pislel. Maʼañic miʼ tsol al jaʼel jiñi Biblia baqui tac bʌ eʼtel (troñel) o tsʼac yom bʌ mi lac chʼʌm, o baqui tac bʌ ñusaqʼuin yom mi lac mel. Jehová miʼ cʌy chaʼan ti jujuntiquilonla yicʼot chaʼan jin i jol jiñi familia miʼ ñaʼtan chuqui mi caj i mel.

³ Tajol an chuqui wen ñuc bʌ woli (choncol) lac ñaʼtan mach bʌ jamʌ tsiquilic miʼ yʌl yaʼ ti Biblia yom bʌ mi lac mel. Jin chaʼan, tajol mi laj cʼajtiben lac bʌ: «¿I wenta ba Jehová muʼ bʌ i cʼotel yajcan? Chaʼan maʼañic mic ñusan ti pʼis jumpʼejl mandar am bʌ ti Biblia, ¿mach ba yʌlʌlic chuqui jach mic waʼ ñaʼtan c mel? ¿Bajcheʼ miʼ mejlel c ñaʼtan chaʼan tijicñayʌch mi caj i yubin Jehová chaʼan muʼ bʌ c yajcan c mel?». Ili cʼajtiya tac mi caj lac jacʼ ti ili temaj.

4, 5. ¿Bajcheʼ miʼ mejlel i ticʼlan yambʌlob yicʼot joñonla chuqui mi lac ñaʼtan lac mel?

⁴ An majqui miʼ ñaʼtañob chaʼan miʼ mejlelob i mel chuqui jach. Pero joñonla la com lac mel muʼ bʌ i yʌqʼuen i tijicñʌyel Jehová. Jin chaʼan, yom mi lac ñaxan ñaʼtan chuqui miʼ yʌl jiñi Biblia yicʼot mi lac jacʼ cheʼ an chuqui woli (yʌquel) lac ñaʼtan lac mel. Jumpʼejl ejemplo, jiñi Biblia miʼ yʌl bajcheʼ yilal miʼ qʼuel Jehová jiñi chʼichʼ. I joñonla mi laj cʌcʼ ti ñuc (Génesis 9:4; Hechos 15:28, 29). Miʼ mejlel laj cʼajtiben i coltaya Jehová chaʼan mi lac mel muʼ bʌ i mulan.

⁵ Muʼ bʌ lac ñaʼtan lac mel miʼ mejlel i coltañonla o maʼañic. Wem bʌ i yamigojonla Jehová mi wen chuqui mi lac yajcan. Mi mach cheʼiqui, tajol mach utsʼatic mi caj i yajñel laj quicʼot. Cheʼ jaʼel, añʌch chuqui miʼ mel tiʼ tojlel yañoʼ bʌ jiñi muʼ bʌ lac yajcan. Mi mach weñic, miʼ mejlel la cʌqʼuen i chʼijiyemlel la quermañojob o laj cʼunʼesʌbeñob i ñopoñel (chʼujbiya). Mach la comic lac wis mel iliyi. Mi la comic lac tech wocol ti la quermañojob. Wen ñucʌch i cʼʌjñibal cheʼ utsʼat chuqui mi lac ñaʼtan lac mel (pejcan Romanos 14:19 yicʼot Gálatas 6:7).

6. ¿Baqui yom chucul jiñi muʼ bʌ lac ñaʼtan lac mel?

⁶ Mi maʼañic miʼ subeñonla jiñi Biblia chuqui yom bʌ melol, ¿chuqui yom mi lac mel? Laʼ lac wen ñaʼtan yicʼot laʼ lac yajcan lac mel la cujil bʌ chaʼan mucʼʌch i mulan Jehová, i mach lac mel bajcheʼ jach mi lac mulan. Cheʼi, ti jumpʼejl lac pusicʼal mi caj lac ñaʼtan chaʼan mucʼʌch caj i coltañonla lac taj lac wenlel (pejcan Salmo 37:5).

7. Mi maʼañic miʼ jamʌ al jiñi Biblia chuqui yom mi lac mel, ¿bajcheʼ miʼ mejlel lac ñaʼtan chuqui yom Jehová?

⁷ Pero ¿bajcheʼ miʼ mejlel lac ñaʼtan chuqui miʼ mulan Jehová? Efesios 5:17 miʼ yʌl: «Ñaʼtanla chuqui yom lac Yum». Bajcheʼ mi laj qʼuel, mi an junchajp baqui maʼañic miʼ jamʌ al jiñi Biblia chuqui yom mi lac mel, yom mi lac wen cʌn chuqui yom bʌ Dios (qʼuele jiñi recuadro «¿Chuqui yom i yʌl?»). Yom i yʌl, chaʼan mi lac chaʼlen wersa lac chʼʌmben isujm chuqui yom mi lac mel Jehová. ¿Bajcheʼ miʼ mejlel lac ñaʼtan? Jiñʌch cheʼ mi lac melben oración yicʼot mi laj cʌy chaʼan miʼ tojʼesañonla i yespíritu.

8. Alʌ jumpʼejl ejemplo chaʼan maʼ tsictesan chucoch tsaʼ mejli i cʌn Jesús chuqui yom bʌ Jehová.

⁸ Jesús tsiʼ chʌn chaʼle wersa i ñaʼtan chuqui yom Jehová chaʼan miʼ mel. Jumpʼejl ejemplo, cheʼ bʌ chaʼyajl tsiʼ yʌqʼue i bʌl i ñʌcʼ quixtañujob, tiʼ chaʼyajlel tsiʼ ñaxan mele oración (Mateo 14:17-20; 15:34-37). Pero cheʼ bʌ jumpʼejl bʌ qʼuin jiñi Diablo tsiʼ ñopo chaʼan miʼ sujtesan ti caxlan waj jiñi xajlel (tun) tac, maʼañic tsiʼ jacʼʌ  i mel (pejcan Mateo 4:2-4). ¿Chucoch? Come wen i cʌñʌ i Tat yicʼot yujil chaʼan maʼañic miʼ mulan mi chaʼan jach i bajñel wenlel miʼ cʼʌn jiñi i pʼʌtʌlel. Wen yujil chaʼan Dios mi caj i coltan yicʼot i yʌqʼuen i bʌl i ñʌcʼ cheʼ bʌ yomʌch.

9, 10. ¿Chuqui mi caj i coltañonla lac yajcan wem bʌ yom melol? Alʌ jumpʼejl ejemplo.

⁹ Miʼ cheʼ mi lac mel bajcheʼ Jesús yicʼot mi lac ñop i coltaya Jehová, wen chuqui mi caj lac ñaʼtan lac mel. Jiñi Biblia miʼ yʌl: «Ñopo lac Yum tiʼ pejtelel a pusicʼal. Mach a bajñel ñaʼtan bajcheʼ jach a wom maʼ mel. Tiʼ pejtelel chuqui maʼ mel ñaʼtan lac Yum. Cheʼ jini mux caj i chajpʌbeñet a bijlel. Mach yomic maʼ chañʼesan a bʌ ti a bajñel ñaʼtʌbal. Bʌcʼñan lac Yum, cʌyʌ jontolil» (Proverbios 3:5-7). Cheʼ mi laj pejcan jiñi Biblia yicʼot mi laj cʌn chuqui miʼ ñaʼtan Jehová, miʼ mejlel lac ñaʼtan chuqui yom chaʼan mi lac mel. I mach ñumen wocolic mi caj lac ñaʼtan chuqui miʼ mulan mi tsaʼ lac ñumen cʌñʌ bajcheʼ yilal i pensar. Cheʼ jaʼel, ti jumpʼejl lac pusicʼal mi caj lac jacʼ muʼ bʌ i subeñonla (Ezequiel 11:19).

¹⁰ Laʼ cu lac ñaʼtan chaʼan juntiquil xʼixic woli ti mʌñoñel i miʼ taj i qʼuel jumpʼejl zapato wen utsʼatax bʌ, pero wen letsem bʌ i tojol. Anquese mach yicʼotic i ñoxiʼal, pero yujil chuqui mi caj i yʌl mi tsiʼ wen jisa i taqʼuin. ¿Chucoch la cujil? Come añix ora ñujpuñemob yicʼot yujil chuqui miʼ yʌl i ñoxiʼal chaʼan bajcheʼ yom miʼ cʼʌñob jiñi taqʼuin. Lajal joñonla, cheʼ mi laj cʌn chuqui miʼ ñaʼtan Jehová yicʼot melbil bʌ i chaʼan ti wajali, miʼ mejlel lac ñaʼtan chuqui yom mi lac mel tiʼ pejtelel chuqui la com.

11. ¿Chuqui tac miʼ mejlel laj cʼajtiben lac bʌ cheʼ choncol lac pejcan lac Biblia? (Qʼuele jiñi recuadro « Cheʼ bʌ maʼ pejcan a Biblia, cʼajtiben a bʌ»).

¹¹ ¿Bajcheʼ miʼ mejlel lac ñaʼtan chuqui miʼ ñaʼtan Jehová? Cheʼ mi lac wen pejcan tiʼ pejtelel ora jiñi  Biblia jiñʌch ñumen wem bʌ. Cheʼ woliʼ lac mel iliyi, miʼ mejlel laj cʼajtiben lac bʌ: «¿Chuqui miʼ cʌntesañon iliyi tiʼ tojlel Jehová? ¿Chucoch cheʼ tsiʼ mele bajcheʼ ili?». Laʼ lac mel bajcheʼ David yicʼot laʼ laj cʼajtiben i coltaya Jehová chaʼan mi lac ñumen cʌn. David tiʼ tsʼijbu: «C Yum, pʌsbeñon bajcheʼ a wom mic mel. Wen cʌntesañon ti a bijlel. Pʌyʌyon majlel tiʼ sujmlel a tʼan, cʌntesañon. Come c Dioset, caj Coltayajet. Mic pijtañet tiʼ pejtelel qʼuin» (Salmo 25:4, 5). Cheʼ an chuqui mi laj cʌn tiʼ tojlel Jehová, laʼ lac ñaʼtan baqui tac miʼ mejlel laj cʌcʼ ti ñuc jiñi cʌmbil bʌ lac chaʼan. Miʼ mejlel laj cʼajtiben lac bʌ: «¿Bajcheʼ miʼ mejlel j cʼʌn tic familia, tic troñel, ti escuela o tic subtʼan?». Mi tsaʼ lac wen ñaʼta baqui tac miʼ mejlel laj cʼʌn iliyi, mach wocolic mi caj lac ñaʼtan chuqui yom Jehová chaʼan mi lac mel.

12. ¿Bajcheʼ miʼ coltañonla lac jun yicʼot tempa bʌ tac?

¹² ¿Chuqui yambʌ mi caj i coltañonla laj cʌn muʼ bʌ i ñaʼtan Jehová? Jiñʌch cheʼ mi lac wen chʼʌm ti ñuc muʼ bʌ i cʌntesañonla chaʼan Biblia jiñi i yorganización. Jumpʼejl ejemplo, cheʼ bʌ an chuqui woli lac ñaʼtan lac mel, jiñi Guía de estudio para los testigos de Jehová, am bʌ ti español, yicʼot yan tac bʌ baqui miʼ mejlel lac sʌclan chuqui la com, miʼ mejlel i coltañonla lac ñaʼtan chuqui miʼ ñaʼtan Jehová. Yambʌ muʼ bʌ mejlel i coltañonla lac ñaʼtan bajcheʼ Jehová jiñʌch jiñi tempa bʌ tac. Cheʼ wen mi lac ñʌchʼtan, mi laj cʌcʼ laj comentario yicʼot mi lac wen ñaʼtan chuqui miʼ cʌntesañonla, mi caj lac yajcan lac mel chuqui tac miʼ mulan Jehová yicʼot mi caj i yʌqʼueñonla i bendición.

13. Tsictesan yicʼot jumpʼejl ejemplo chaʼan cheʼ mi laj cʌn bajcheʼ yilal i pensar Dios miʼ coltañonla lac yajcan chuqui wem bʌ yom melol.

¹³ Cheʼ mi laj cʌn chuqui an tiʼ pensar Jehová yicʼot mi lac wen ñaʼtan miʼ coltañonla lac mel chuqui wem bʌ. ¿Bajcheʼ? Laʼ laj cʌl jumpʼejl ejemplo. Laʼ lac ñaʼtan chaʼan la com ochel ti precursor. Tajol tsaʼix lac ñaʼta chuqui mi caj lac mel chaʼan mi lac ñumen tajben i yorajlel subtʼan. Pero muʼto laj cʼajtiben lac bʌ mi tijicñayʌch mi caj lac chumtʌl cheʼ mach wen añic lac taqʼuin yicʼot lac chubʌʼan. Isujm, maʼañic miʼ yʌl jiñi Biblia chaʼan yom mi laj cochel ti precursor chaʼan mi lac melben i yeʼtel Jehová. Miʼ mejlel lac melben i yeʼtel cheʼ xsubtʼañonla. Pero Jesús tsiʼ pʌsʌ chaʼan Jehová miʼ yʌqʼuen i bendición jiñi muʼ bʌ i yʌcʼ i bʌ tiʼ tojlel jiñi Yumʌntel (pejcan Lucas 18:29, 30). Cheʼ jaʼel, jiñi Biblia miʼ yʌl chaʼan Jehová miʼ mulan cheʼ mi lac mel tiʼ pejtelel chuqui jach chaʼan mi lac chʼujutesan. Yom bʌ jiñʌch cheʼ tijicñayonla mi lac melben i yeʼtel (Salmo 119:108; 2 Corintios 9:7). Mi tsaʼ lac chaʼle oración yicʼot mi lac wen ñaʼtan ili tac, mi caj lac yajcan lac mel muʼ bʌ i yʌqʼueñonla lac wenlel i Jehová mi caj i yʌqʼueñonla i bendición.

14. ¿Bajcheʼ miʼ mejlel lac ñaʼtan mi utsʼatʌch miʼ qʼuel Jehová bajcheʼ la com lac chʼʌl lac bʌ?

¹⁴ Yambʌ ejemplo. Laʼ lac ñaʼtan chaʼan an bajcheʼ yilal mi lac wen mulan lac pislel. Pero la cujil mi tsaʼ lac lʌpʌ, tajol lecoj mi caj i qʼuel jiñi hermanojob. Jiñi Biblia maʼañic chuqui miʼ yʌl chaʼan jiñi. Pero ¿bajcheʼ miʼ mejlel lac ñaʼtan chuqui miʼ ñaʼtan Jehová? Jiñi Biblia miʼ subeñonla: «Jini xʼixicob jaʼel laʼ i xojob i pislel bajcheʼ yom, mach chaʼanic miʼ qʼuejlelob ti winicob. I pʼisol jach yom miʼ chʼʌlob i bʌ. Mach yomic ñumen ti pʼis miʼ chʼʌlob i jol. Mach yomic ñumen ti pʼis miʼ chʼʌlob i bʌ ti oro, mi ti cʼax letsem bʌ i tojol ujʌl, mi ti cʼax letsem bʌ i tojol pisil. Pero laʼ i pʌsob wen bʌ i melbal cheʼ bajcheʼ yom, come jiñʌch mero i chʼʌjlil xʼixicob muʼ bʌ i yʌlob ochemob ti Dios» (1 Timoteo 2:9, 10). Ili ticʼojel i cʼʌjñibalʌch i chaʼan jiñi hermanajob yicʼot hermanojob. Miʼ pʼisbiloñʌchla, mi caj lac chʼʌm ti ñuc muʼ bʌ i mejlel i ñaʼtan yañoʼ bʌ chaʼan bajcheʼ mi lac chʼʌl lac bʌ yicʼot mi lac xoj lac pislel. Mi lac chaʼlen wersa chaʼan maʼañic mi lac ticʼlan la quermañojob come mi laj cʼuxbiñob (1 Corintios  10:23, 24; Filipenses 3:17). Cheʼ mi lac wen ñaʼtan muʼ bʌ i yʌl jiñi Biblia yicʼot muʼ bʌ i ñaʼtan Jehová, mi caj lac mel muʼ bʌ i mulan.

15, 16. a) ¿Bajcheʼ yubil miʼ yubin Jehová cheʼ maʼañic mi laj cʌy lac ñaʼtan chuqui bibiʼ? b) ¿Bajcheʼ miʼ mejlel lac ñaʼtan chaʼan mucʼʌch i mulan Jehová jiñi ñusaqʼuin muʼ bʌ lac yajcan? c) ¿Chuqui yom mi lac mel chaʼan mi lac ñaʼtan chuqui mi caj lac mel?

¹⁵ Jiñi Biblia miʼ pʌs chaʼan chʼijiyem yicʼot cʼux miʼ yubin cheʼ bʌ an majqui mach weñic chuqui miʼ mel o miʼ ñaʼtan (pejcan Génesis 6:5, 6). Tsiquil chaʼan Jehová mach yomic cheʼ mi lac ñaʼtan jiñi tsʼiʼlel. Mi tsaʼ la cotsa ti lac pensar, tajol mucʼʌch lac mel. Jin chaʼan yom cheʼ sʌc yicʼot wen chuqui mi lac ñaʼtan. Jiñi xcʌntʼan Santiago tsiʼ yʌlʌ chaʼan i ñaʼtʌbal Jehová «miʼ pʌs i bʌ tiʼ sʌclel lac pusicʼal yicʼot i yutslel lac tʼan. Miʼ yʌcʼ ti bujtʼel lac pusicʼal ti pʼuntaya chaʼan mi lac mel pejtel chuqui wen tiʼ pejtelel lac pusicʼal. Mach yujilic loʼloya» (Santiago 3:17). Cheʼ bajcheʼ mi laj qʼuel, jiñi Biblia miʼ pʌsbeñonla chaʼan mach yomic mi laj cʌcʼ ti lac pensar o mi lac mulan mach bʌ sʌquic tac. Mi wen la cujil chuqui tac miʼ cʼuxbin Jehová yicʼot miʼ tsʼaʼlen, mach cʼʌñʌlic mi caj laj cʼajtiben yambʌlob chuqui ti libro, película o alas yom mi lac yajcan. Mach wocolic mi caj lac ñaʼtan yom bʌ mi lac yajcan.

¹⁶ Cheʼ bʌ an chuqui com lac mel, tajol cabʌl muʼ bʌ mejlel lac yajcan muʼ bʌ i mulan Jehová. Pero mi wen ñuc woli bʌ lac ñaʼtan, tajol miʼ mejlel laj cʼajtiben ticʼojel juntiquil anciano o yambʌ hermano o hermana añix bʌ i ñaʼtʌbal (Tito 2:3-5; Santiago 5:13-15). Pero maʼañic miʼ cajel laj cʼajtibeñob chaʼan miʼ subeñoñobla chuqui yom mi lac mel. Jiñi apóstol Pablo tsiʼ yʌlʌ: «Come an ti lac wenta lac melbal ti jujuntiquilonla» (Gálatas 6:5). Yom bʌ jiñʌch mi lac wen ñaʼtan muʼ bʌ i cʌntesañonla jiñi Biblia, cheʼ jiñi mi lac yajcan chuqui mi caj lac mel (Hebreos 5:14).

17. Cheʼ mi lac yajcan lac mel muʼ bʌ i mulan Jehová, ¿bajcheʼ miʼ coltañonla?

¹⁷ Cheʼ jiñʌch mi lac yajcan muʼ bʌ i mulan Jehová, wem bʌ i yamigojonla mi lac sujtel, utsʼat miʼ qʼuelonla yicʼot miʼ yʌqʼueñonla i bendición (Santiago 4:8). Ili miʼ ñumen pʼʌtʼesan lac ñopoñel. Jin chaʼan, laʼ lac wen ñaʼtan muʼ bʌ i cʌntesañonla jiñi Biblia chaʼan miʼ lac chʼʌmben isujm chuqui miʼ ñaʼtan Jehová. Isujm, chʌn añʌch chuqui tsijib tac mi caj laj cʌn tiʼ tojlel (Job 26:14). Pero mi caj lac taj lac ñaʼtʌbal yicʼot wen chuqui mi caj lac mel mi mucʼʌch lac chaʼlen wersa lac ñumen cʌn (Proverbios 2:1-5). Jiñi wiñicob xʼixicob miʼ chʌn qʼuextan chuqui miʼ ñaʼtañob, pero Jehová maʼañic baʼ ora miʼ mel. Juntiquil tsaʼ bʌ i tsʼijbu jiñi salmo tsiʼ yʌlʌ chaʼan «chuqui tac miʼ ñaʼtan lac Yum tiʼ pusicʼal» tiʼ pejtelel ora miʼ yajñel (Salmo 33:11). Cheʼ lajal mi lac chaʼlen pensar bajcheʼ Jehová yicʼot mi lac mel muʼ bʌ i mulan, utsʼat chuqui mi caj lac yajcan lac mel.