An cabʌl ticʼojel, pero mach tiʼ pejtelelic miʼ cʼʌjñibʌyel. Tajol an muʼ bʌ i subeñetob chaʼan maʼañic maʼ chaʼlen uqʼuel yicʼot maʼañic maʼ wʌl bajcheʼ yubil maʼ wubin, pero yañoʼ bʌ mi caj i subeñetob chaʼan mach yomic maʼ muc. Pero jiñi Biblia pʼisbil jach chuqui miʼ subeñonla yicʼot an melbil estudio tac baqui miʼ pʌs chaʼan cheʼʌchi.

An cultura tac baqui mach weñic miʼ qʼuejlel cheʼ miʼ chaʼleñob uqʼuel wiñic. Pero ¿yom ba mi laj quisñin uqʼuel? An wen yujiloʼ bʌ chaʼan i cʼocʼlel lac jol, miʼ yʌlob chaʼan jiñi uqʼuel jiñʌch junchajp bajcheʼ mi lac pʌs chuqui cʼux mi la cubin. Jin chaʼan, mi mucʼʌch lac ñusan tiʼ pejtelel muʼ bʌ i yʌqʼueñonla la cubin jiñi i cʼuxel lac pusicʼal, miʼ coltañonla laj cuch cheʼ bʌ an majqui mi lac sʌt. Pero mi tsaʼ jach a loto i cʼuxel miʼ mejlel i ñumen ticʼlañet. Maʼañic baqui miʼ yʌl yaʼ ti Biblia chaʼan mach weñic miʼ chaʼlen uqʼuel jiñi wiñicob o chaʼan mach yomic miʼ melob. Ñaʼtan tsaʼ bʌ i ñusa Jesús. Cheʼ bʌ tsaʼ chʌmi i yamigo, i cʼabaʼ Lázaro, tsiʼ chaʼle uqʼuel i maʼañic tsiʼ  quisñi, anquese añʌch i pʼʌtʌlel chaʼan miʼ chaʼ tejchesan (Juan 11:33-35).

An i tajol mi lac wen pʌs lac michʼajel cheʼ an chuqui cʼux ti lac pusicʼal, ñumento cheʼ mach wis pijtʌbilic lac chaʼan majqui miʼ chʌmel. Juntiquil quixtañu cabʌl chucoch miʼ mejlel ti michʼan, jumpʼejl ejemplo jiñʌch cheʼ bʌ an majqui mi lac lon qʼuel ti ñuc i miʼ yʌl mach bʌ weñic ti lac tojlel. Juntiquil chʼoyol bʌ ti Sudáfrica i cʼabaʼ Mike, miʼ yʌl: «An jaxto 14 c jabilel cheʼ bʌ tsaʼ chʌmi c tat. Cheʼ muqʼuix caj i mujquel, juntiquil pastor tsiʼ yʌlʌ chaʼan Dios yom jiñi utsoʼ bʌ yaʼ ti panchan, jin chaʼan miʼ pʌyob majlel. * Tsiʼ wen michʼesayon tsaʼ bʌ i yʌlʌ, come jiñi c tat wen i cʼʌjñibal c chaʼan lojon. Anquese ñumeñix cheʼ bʌ 60 jab, cʼux to mi cubin tsaʼ bʌ i yʌlʌ».

¿Ixcu mi jatet an a mul mi a wubin? Cheʼ bʌ juntiquil mach pijtʌbilic i chaʼan majqui miʼ chʌmel, tajol miʼ ñaʼtan: «Maʼañic tsaʼ chʌmi wʌle cheʼ tsaʼic to c mele iliyi o ili yambʌ». O tajol ñumen an a mul maʼ wubin a bʌ come tajol tsaʼ laʼ chaʼle leto (aʼleya tʼan) cheʼ bʌ cojachix tsaʼ laʼ chaʼle tʼan.

Mi tsaʼ tili a chʼijiyemlel yicʼot michʼ maʼ wubin a bʌ tiʼ caj an a mul maʼ wubin, mach a toʼol ñusan jach. Chaʼlen tʼan a wicʼot juntiquil a wamigo muʼ bʌ i wen ñʌchʼtañet yicʼot miʼ coltañet a ñaʼtan chaʼan cheʼ bʌ an majqui miʼ chʌmel lac chaʼan i tilelʌch cheʼ mi la cubin lac bʌ. Jiñi Biblia miʼ cʼajtesʌbeñonla: «Mi isujm miʼ cʼuxbiñonla laj cʌñʌ bʌ maʼanic miʼ cʌy i cʼuxbiñonla tiʼ pejtelel ora. Junlajalʌch bajcheʼ lac piʼʌl baʼ ora woli la cubin wocol» (Proverbios 17:17).

Ti jiñi bʌ ora, jiñi ñumen wem bʌ la camigo jiñʌch Jehová, tsaʼ bʌ i Meleyonla. Suben chuqui an ti a pusicʼal come jiñʌch woli (choncol) i ‹cʌntañet› (1 Pedro 5:7). Mi cheʼʌch maʼ mel, mi caj a taj ‹i ñʌchʼtʌlel a pusicʼal chʼoyol bʌ ti Dios› (Filipenses 4:6, 7). Cheʼ jaʼel, acʼʌ chaʼan Dios miʼ tijicñesan a pusicʼal tiʼ Tʼan, jiñi Biblia. Cheʼ maʼ tsʼijbun jiñi versículo tac muʼ bʌ i pʼʌtʼesañet yicʼot maʼ cʌy ti a jol, miʼ mejlel i coltañet ( qʼuele jiñi recuadro). Cheʼ maʼ wen ñaʼtan iliyi, miʼ mejlel i ñumen coltañet cheʼ ti acʼʌlel, cheʼ bʌ a bajñel jach yicʼot cheʼ maʼañic maʼ mejlel ti wʌyel (Isaías 57:15).

Maxto wen jali, juntiquil wiñic am bʌ 40 i jabilel, muʼ bʌ caj la cʌl chaʼan Jack i cʼabaʼ, tsaʼ chʌmi i yijñam tiʼ caj cáncer. An i tajol wen i bajñel miʼ yubin i bʌ, pero jiñi oración an i wen colta. Tsiʼ yʌlʌ: «Cheʼ mic chaʼlen tʼan yicʼot Jehová, mach c bajñelic mi cubin c bʌ. Ti bele ora mic pʼixel ti acʼʌlel i maʼañic mic mejlel ti wʌyel. Mic tsʼitaʼ pejcan jiñi Biblia yicʼot mic wen ñaʼtan muʼ bʌ i yʌl, i cheʼ mi cujtel c suben Dios bajcheʼ yubil mij cubin c bʌ, mic taj c ñʌchʼtʌlel. Mic chaʼ ubin c ñʌchʼtʌlel tic pensar yicʼot tic pusicʼal, cheʼ jiñi mic mejlel ti wʌyel».

Juntiquil xchʼoc i cʼabaʼ Vanessa, tsaʼ bʌ chʌmi i ñaʼ ti jumpʼejl cʼamʌjel, an i taja i coltaya jeʼel ti oración. Miʼ yʌl: «Cheʼ bʌ wen tsʌts woli (yʌquel) c ñusan, cʌlʌx mic chaʼlen uqʼuel yicʼot mach junyajl jach mij cʌlben i cʼabaʼ Dios. Jehová tsiʼ yubi coración i tiʼ pejtelel ora tsiʼ coltayon».

Jiñi wen yujiloʼ bʌ, miʼ yʌlob chaʼan jiñi woli bʌ i ñusañob ili wocol, yom miʼ yʌcʼob i yorajlel chaʼan miʼ coltañob yañoʼ bʌ, jumpʼejl ejemplo, jiñʌch cheʼ mi chaʼleñob coltaya ti jumpʼejl eʼtel (troñel) yom bʌ melol tiʼ lumal. Cheʼʌch miʼ mejlelob ti pʼʌtʼan yicʼot miʼ ñumel i chaʼañob i cʼuxel (Hechos 20:35). Cabʌl xñoptʼañob am bʌ i ñusayob iliyi, miʼ yʌlob chaʼan chaʼ tajbilob i chaʼan i tijicñʌyel cheʼ miʼ coltañob yañoʼ bʌ (2 Corintios 1:3, 4).