¿Am ba cʼamʼayet? Tajol ñajʌyi a chaʼan come ora tsaʼ cʼocʼayet. Pero mach lajalic jiñi i cʼuxel muʼ bʌ la cubin cheʼ an majqui miʼ chʌmel (sajtel). Jiñi doctor Alan Wolfelt miʼ yʌl tiʼ libro Healing a Spouse’s Grieving Heart (Coltʌntel cheʼ miʼ chʌmel i piʼʌl juntiquil ñujpuñem bʌ): «Jiñi i cʼuxel maʼañic miʼ jilel. [...] Pero xucʼu xucʼul miʼ ñumel lac chaʼan cheʼ bʌ miʼ ñumel majlel jiñi ora yicʼot tiʼ coltaya yambʌlob».

Laʼ laj qʼuel bajcheʼ tsiʼ ñusa Abraham cheʼ bʌ tsaʼ chʌmi i yijñam, i cʼabaʼ Sara. Jiñi Biblia miʼ yʌl chaʼan wen cʼux tsiʼ yubi yicʼot tsiʼ wen chaʼle uqʼuel, mach ti orajic tsaʼ ñajʌyi i chaʼan. * Yambʌ jiñʌch Jacob, tsaʼ subenti chaʼan juncojt jontol bʌ bʌteʼel tsiʼ cʼuxbe i yalobil, i cʼabaʼ José. «Cabʌl qʼuin» tsiʼ yubi i chʼijiyemlel, i jiñi i familia maʼañic tsaʼ mejli i coltan. Anquese ñumeñix cabʌl jab, tsiʼ chʌn ubi i chʼijiyemlel chaʼan José (Génesis 23:2; 37:34, 35; 42:36; 45:28).

Yonlel cheʼ miʼ yujtelob jeʼel cheʼ bʌ miʼ sʌtob juntiquil tiʼ familia o i yamigojob. Ñaʼtan ili muʼ bʌ caj la cʌl:

• «Jiñi c ñoxiʼal Robert tsaʼ chʌmi ti jumpʼejl accidente cheʼ ti 9 i chaʼan julio, 2008. Maʼañic bajcheʼ yilal cheʼ ti sʌcʼan. Cheʼ tsaʼ ujtiyon lojon ti uchʼel, tsiʼ tsʼujtsʼuyon, tsiʼ meqʼueyon yicʼot tsiʼ subeyon ‹mij cʼuxbiñet›, cheʼʌch bajcheʼ ti jujumpʼejl qʼuin. Ñumeñix wʌcpʼejl jab, pero cʼux to mi cubin. Mach cujilic mi muqʼuix to caj i ñajʌyel c chaʼan» (Gail, am bʌ 60 i jabilel).

• «Anquese añix 18 jab i chʌmel quijñam, muʼto c chʌn ñaʼtan yicʼot cʼux mi cubin cheʼ maʼañic wʌʼan quicʼot. Cheʼ bʌ an chuqui wen utsʼatax mic taj j qʼuel, mij cʼajtesan quijñam, maʼañic mij cʌy c ñaʼtan chaʼan wen tijicñayon cheʼ muqʼuic c chaʼ qʼuel» (Etienne, am bʌ 84 i jabilel).

I tilelʌch cheʼ cabʌl ora chʌn cʼux mi la cubin. Mach junlajalic bajcheʼ yilal mi lac pʌs chaʼan cʼux mi la cubin chuqui tsaʼ ujti. Jin chaʼan, mach weñic cheʼ an chuqui mi la cʌl chaʼan bajcheʼ yilal woli (choncol) i mel juntiquil am bʌ jaʼel ti jiñi wocol. Cheʼ jaʼel, mach yomic mi lac ñaʼtan chaʼan ñumeñix ti pʼis bajcheʼ yubil woli (yʌquel) la cubin, i yaʼ jach mi lac lot ti lac pusicʼal. Pero ¿am ba chuqui miʼ mejlel i coltañonla?