Cheʼʌch tsiʼ yʌlʌ juntiquil wen i cʌñʌ bʌ jiñi familia, anquese mach lecojic bajcheʼ tsiʼ ñaʼta. Pero tsaʼ jach i ñumen lowo jiñi Bárbara come wen ñʌmʌl yicʼot i tat. Mach junsujtel jach tsiʼ cʼajtibe i bʌ, «¿bajcheʼ qui jiñʌch wem bʌ tiʼ tojlel?». Ti wiʼil, tsiʼ taja ti tʼan ti jumpʼejl libro ili tsaʼ bʌ ujti, i cheʼʌch mi lac ñaʼtan chaʼan maʼañic ñumen jiñi i cʼuxel tiʼ pusicʼal.

Ili miʼ pʌs chaʼan wocolʌch miʼ ñumel i cʼuxel cheʼ bʌ an majqui miʼ chʌmel lac chaʼan, ñumento mi juntiquil ti lac familia. Jin chaʼan, jiñi Biblia miʼ yʌl chaʼan jiñi chʌmel jiñʌch «cojix bʌ laj contra» (1 Corintios 15:26). Cabʌl i pʼʌtʌlel chaʼan miʼ ticʼlañonla, an i tajol mach wis ñaʼtʌbilic lac chaʼan, miʼ tsʌnsan majqui mi lac wen cʼuxbin. Maʼañic majqui miʼ mejlel i putsʼtan. Jin chaʼan, i tilelʌch cheʼ mach la cujilic chuqui yom mi lac mel o bajcheʼ yom mi lac ñusan.

Tajol an a cʼajtibe a bʌ: «¿Bajcheʼ cʼamel mi caj i jalijel quicʼot jiñi i cʼuxel? ¿Chuqui yom mic mel chaʼan mij cuch? ¿Bajcheʼ miʼ mejlel laj coltan jiñi woli (yʌquel) bʌ i ñusañob ili wocol? ¿Anto ba i pijtaya jiñi lac piʼʌlob tsaʼix bʌ chʌiyob?».