1, 2. Cheʼ mi lac pejcan Mateo 24:14, ¿chuqui ti cʼajtiya miʼ mejlel lac mel?

JESÚS tsiʼ wʌn alʌ chaʼan jiñi wen tʼan chaʼan Yumʌntel mi caj i sujbel tiʼ petol pañimil (mulawil) ti jiñi cojix bʌ qʼuin (Mateo 24:14). Ti ili ora, jiñi i testigojonbʌla Jehová cʌmbilonla chaʼan lac subtʼan tiʼ pejtelel pañimil. An muʼ bʌ i mulañob jiñi muʼ bʌ lac tsictesan. An yañoʼ bʌ maʼañic miʼ mulañob, pero miʼ qʼuelob ti ñuc woli (choncol) bʌ lac mel. ¿Muʼ ba mejlel la cʌl chaʼan cojach jiñi Testigojonbʌla woli (yʌquel) lac mel jiñi eʼtel (troñel) tsaʼ bʌ i wʌn alʌ Jesús? ¿Chucoch mucʼʌch lac ñop?

² Yonlel ñopbalʌl miʼ yʌlob chaʼan woliʼ subob jiñi tʼan tsaʼ bʌ i tsictesa Jesús. Miʼ ñaʼtañob chaʼan jiñi subtʼan jiñʌch cheʼ miʼ yʌcʼob jumpʼejl cʌntesa ti iglesia, ti televisión o ti Internet. Yambʌlob miʼ yʌlob chaʼan jiñʌch cheʼ miʼ subeñob yañoʼ bʌ bajcheʼ tsiʼ cʌñʌyob Jesús. Yicʼot an muʼ bʌ i yʌlob chaʼan jiñʌch cheʼ miʼ coltañob yambʌlob, bajcheʼ eʼtel ti doctor, enfermerojob o maestrojob. Pero ¿cheʼ ba tsiʼ yʌlʌ Jesús chaʼan cheʼ yom miʼ chaʼleñob subtʼan jiñi xcʌntʼañob i chaʼan?

3. Cheʼ bajcheʼ miʼ yʌl Mateo 28:19, 20, ¿chuqui jiñi chʌnchajp yom bʌ miʼ melob jiñi xcʌntʼañob i chaʼan Jesús?

 ³ ¿Yom ba Jesús chaʼan jiñi xcʌntʼañob i chaʼan miʼ buchtʌl i pijtañob chan miʼ majlelob ti qʼuejlel? Maʼañic, cheʼ bʌ chaʼ tejchemix, tsiʼ sube jiñi xcʌntʼañob i chaʼan: «Cucula cheʼ jini. Sutqʼuiñob ti xcʌntʼañob winicob xʼixicob tiʼ pejtelel pañimil. Aqʼuenla chʼʌmjaʼ [...]. Cʌntesanla chaʼan miʼ laj chʼujbiñob pejtelel chuqui tac tsac subeyetla» (Mateo 28:19, 20). Cheʼ bajcheʼ mi laj qʼuel, jiñi xñoptʼañob yom miʼ sutqʼuiñob ti xcʌntʼan, miʼ yʌcʼob ti chʼʌmjaʼ yicʼot miʼ cʌntesañob jiñi wiñicob xʼixicob (quixtañujob). Pero ñaxan yom miʼ majlel i sʌclañob. Juntiquil wen yujil bʌ tsiʼ yʌlʌ chaʼan jiñi xñoptʼañob yom miʼ majlelob i sʌclan jiñi quixtañujob anquese tajol yom miʼ chaʼleñob ñajt bʌ xʌmbal o maʼañic (Mateo 10:7; Lucas 10:3).

4. ¿Chuqui yom chaʼan miʼ sujtelob ti «xchuc chʌy» jiñi xcʌntʼañob?

⁴ ¿Tsaʼ ba i ñaʼta Jesús chaʼan i bajñel miʼ chaʼleñob subtʼan jiñi xcʌntʼañob i chaʼan? ¿O yom tsiʼ ñaʼta chaʼan wen chajpʌbil bajcheʼ miʼ chaʼleñob subtʼan? Tsiquil chaʼan juntiquil xñoptʼan mach bajñel mejlic ti subtʼan «tiʼ pejtelel pañimil». Jin chaʼan wen chajpʌbil yom miʼ melob. Jiñʌch tsiʼ taja ti tʼan Jesús cheʼ bʌ tsiʼ yʌlʌ chaʼan jiñi xcʌntʼañob i chaʼan mi caj i sujtelob ti «xchuc winicob» (pejcan Mateo 4:18-22). ¿Chuqui yom i yʌl? Maʼañic tsiʼ taja ti tʼan chaʼan lajalob bajcheʼ juntiquil wiñic i bajñel jach bʌ miʼ cajel ti chuc chʌy yicʼot miʼ pijtan chaʼan miʼ bajñel tilel. Jesús tsiʼ taja ti tʼan jiñi xchuc chʌyob muʼ bʌ i cʼʌñob chimob chʌy. Ti ili chuc chʌy cʼʌñʌl cabʌlob chaʼan miʼ chaʼleñob tsʌts bʌ eʼtel, temel miʼ melob yicʼot wen chajpʌbilob (Lucas 5:1-11).

5. ¿Baqui bʌ jiñi chʌmpʼejl cʼajtiya yom bʌ mi lac jacʼ, chucoch?

⁵ Mi la com lac ñaʼtan majqui woliʼ subob jiñi wen tʼan chaʼan Yumʌntel, yom mi lac jacʼ ili cʼajtiya tac:

• ¿Baqui bʌ tʼan yom miʼ subob jiñi xñoptʼañob?

• ¿Chuquiyes yom bʌ miʼ ñijcañob ti subtʼan?

• ¿Bajcheʼ yom miʼ chaʼleñob subtʼan?

• ¿Baqui jaxʌl yom miʼ cʼotel jiñi subtʼan, yicʼot bajcheʼ cʼamel yom miʼ jalʼan?

Jiñi i jacʼbal tac mi caj i coltañonla lac ñaʼtan majqui woliʼ melob ili eʼtel muʼ bʌ mejlel i yʌqʼueñob i cuxtʌlel jiñi quixtañujob. Yicʼot mi caj i chʌn ñijcañonla ti subtʼan (1 Timoteo 4:16).

6. ¿Chucoch mi lac ñop chaʼan jiñi i testigojob Jehová miʼ subob jiñi wen tʼan tsaʼ bʌ i yʌlʌ Jesús?

⁶ (Pejcan Lucas 4:43). Jesús tsiʼ subu «jini wen tʼan chaʼan i yumʌntel Dios». I yom chaʼan miʼ subob jaʼel jiñi xcʌntʼañob i chaʼan. ¿Baqui bʌ jiñi cojach bʌ ñopbalʌl choncol i suben tiʼ pejtelel quixtañu jiñi wen tʼan? Jiñʌch i testigojob Jehová. Jinto jiñi mach bʌ yomic i qʼueloñobla lajal miʼ yʌlob. Laʼ laj qʼuel chuqui tsiʼ yʌlʌ juntiquil xmotomaj cheʼ bʌ tsiʼ pejca juntiquil Testigo. Tsiʼ sube chaʼan tsaʼ chumle ti cabʌl país yicʼot chaʼan cheʼ miʼ taj jiñi Testigojob miʼ cʼajtibeñob chuqui woliʼ tsictesañob. Jiñi wiñic tsiʼ yʌlʌ: «Wen tontojob jax come junlajal miʼ jacʼob: ‹Jiñi wen tʼan chaʼan bʌ Yumʌntel›». Tsaʼ bʌ i yʌlʌ jiñi wiñic miʼ pʌs chaʼan mach tontojoñicla, miʼ pʌs chaʼan temel añonla come isujm bʌ xñoptʼañonla (1 Corintios 1:10). Muʼ bʌ i ñumen tsictesan jaʼel ili revista jiñʌch i Yumʌntel Dios. I cʼabaʼ ti tsʼʌcʌl jiñʌch Lac Tsictesʌbentel chaʼan i Yumʌntel Jehová. Miʼ pujquel ti 254 tʼan tac,  i cheʼ bʌ 59 millón miʼ chaʼlentel ti imprimir. Jiñi revista Lac Tsictesʌbentel jiñʌch ñumen pucbil bʌ.

7. ¿Chucoch mi la cʌl chaʼan mach tojic chuqui miʼ subob jiñi mach bʌ isujmic ñopbalʌl?

⁷ Jiñi ñaxañoʼ bʌ miʼ yʌcʼob i bʌ ti ñopbalʌl tac maʼañic miʼ subob i Yumʌntel Dios. Cheʼ bʌ miʼ tajob ti tʼan, cabʌl miʼ yʌlob chaʼan jiñi Yumʌntel an ti lac pusicʼal. Maʼañic miʼ pʌsob chaʼan jiñʌch jumpʼejl yumʌntel am bʌ ti panchan yicʼot chaʼan jiñi Rey chaʼan jiñi yumʌntel jiñʌch Jesucristo. Cojach miʼ tajob ti tʼan Jesús ti Navidad o ti Qʼuin Santo. Maʼañic miʼ pʌsob chaʼan jiñi Yumʌntel mi caj i jisan wocol ti pañimil yicʼot chaʼan lʌcʼʌlix mi caj i jisan jiñi jontolil (Apocalipsis 19:11-21). Mach yujilobic chuqui mi caj i mel Jesús bajcheʼ Rey tiʼ Yumʌntel Dios. Come maʼañic miʼ chʼʌmbeñob isujm baqui bʌ jiñi tʼan tsaʼ bʌ i tsictesa Jesús, maʼañic miʼ ñaʼtañob chucoch yom miʼ subob.

8. ¿Chuquiyes mach bʌ yomic miʼ ñijcañonla ti subtʼan?

⁸ Jiñi xcʌntʼañob i chaʼan Jesús mach yomic chaʼan jach miʼ tajob taqʼuin o miʼ melob utsʼatax bʌ i yototob cheʼ miʼ chaʼleñob subtʼan. Jesús tsiʼ yʌcʼʌ ili ticʼojel: «Majtan jach tsaʼ aqʼuentiyetla. I majtan jach mi laʼ wʌqʼueñob jaʼel» (Mateo 10:8). Jiñi subtʼan mach yomic chaʼan jach mi lac taj taqʼuin (2 Corintios 2:17). Jiñi xcʌntʼañob i chaʼan Jesús mach yomic miʼ cʼajtiñob i tojol ti subtʼan (pejcan Hechos 20:33-35). Anquese jiñi i ticʼojel Jesús jamʌ tsiquil, yonlel ñopbalʌl tac mucʼ jach i cʼajtiñob taqʼuin chaʼan maʼañic miʼ ñupʼob jiñi iglesia yicʼot chaʼan miʼ tojob jiñi ñaxañoʼ bʌ ti ñopbalʌl yicʼot yambʌ xʼeʼtelob. Cheʼʌch bajcheʼ an i wen tajayob i taqʼuin jiñi ñaxañoʼ bʌ ti ñopbalʌl (Apocalipsis 17:4, 5).

9. ¿Bajcheʼ miʼ pʌsob chaʼan weñʌch i sujmlel cheʼ mucʼob ti subtʼan jiñi i testigojob Jehová?

⁹ ¿Ixcu jiñi i testigojob Jehová? ¿Muʼ ba i cʼajtiñob taqʼuin yaʼ tiʼ Yotlel Tempa bʌ o ti Colem Tempa bʌ? Maʼañic. Jiñi eʼtel chucul ti taqʼuin loqʼuem bʌ tiʼ pusicʼal miʼ yʌcʼob (2 Corintios 9:7). Ti jiñi jabil tsaʼix bʌ ñumi tsiʼ chaʼleyob subtʼan 2,000 millón hora yicʼot ñumen ti 9 millón quixtañu tsiʼ cʌntesayob chaʼan Biblia ti jujumpʼejl uw, anquese maʼañic miʼ tojtʌlob. Ti jumpʼejlob i pusicʼal miʼ cʼʌñob i bajñel taqʼuin chaʼan miʼ melob ili eʼtel. Juntiquil wiñic tsiʼ yʌlʌ chaʼan jiñi subtʼan yicʼot cʌntesa jiñʌch ñumen ñuc bʌ miʼ qʼuel jiñi Testigojob. Tsiʼ yʌlʌ  chaʼan maʼañic majqui wen ñuc i yeʼtel muʼ bʌ i cʼajtin i tojol. Pero mi mach tiʼ cajic taqʼuin miʼ chaʼleñob subtʼan, ¿chucoch miʼ melob? Come miʼ cʼuxbiñob Jehová yicʼot jiñi quixtañujob. Cheʼʌch miʼ tsʼʌctiyel jiñi profecía am bʌ ti Salmo 110:3 (pejcan).

10. ¿Bajcheʼ tsiʼ chaʼleyob subtʼan Jesús yicʼot xcʌntʼañob i chaʼan?

¹⁰ ¿Bajcheʼ tsiʼ chaʼleyob subtʼan Jesús yicʼot jiñi xcʌntʼañob i chaʼan? Miʼ majlelob baqui jach an quixtañujob. Jumpʼejl ejemplo, tsiʼ chaʼleyob subtʼan ti bij yicʼot ti mercado tac. Tsajñiyob ti jujumpʼejl otot jeʼel (Mateo 10:11; Lucas 8:1; Hechos 5:42; 20:20). Cheʼ bʌ tsiʼ meleyob bajcheʼ jiñi, majqui jach bʌ quixtañu tsaʼ mejli i tajob.

11, 12. Cheʼ mi lac lajeʼ chuqui an i meleyob chaʼan subtʼan jiñi Testigojob yicʼot jiñi mach bʌ isujmic ñopbalʌl, ¿chuqui mach bʌ lajalic mi lac taj?

¹¹ ¿I chuqui miʼ melob jiñi añoʼ bʌ ti mach bʌ isujmic ñopbalʌl? ¿Muʼ baʼ i subob bajcheʼ Jesús jiñi wen tʼan chaʼan jiñi Yumʌntel? Cabʌl mucʼob jach ti tojoñel chaʼan yambʌ miʼ chaʼlen cʌntesa. Pero mach chaʼañic yomob i sutqʼuin ti xcʌntʼan yambʌlob cheʼ miʼ melob. Chaʼan jach mach yomobic i sʌt i wiñicob. Añʌch i ñopoyob i suben i wiñicob chaʼan miʼ chaʼleñob subtʼan. Jumpʼejl ejemplo, cheʼ ti 2001, jiñi papa Juan Pablo II tsiʼ sube jiñi católicojob chaʼan yom miʼ chaʼleñob subtʼan bajcheʼ jiñi apóstol Pablo, tsaʼ bʌ i yʌlʌ: «¡Mi caj c taj wocol mi maʼañic mic sub jiñi Evangelio!». Tsiʼ yʌlʌ jaʼel chaʼan tiʼ pejtelel jiñi católicojob yom miʼ chaʼleñob subtʼan, mach jin jach jiñi «wen yujiloʼ bʌ». Pero maʼañic majqui tsiʼ wen jacʼʌ.

¹² Cojach i testigojob Jehová miʼ subob chaʼan Jesús tsiʼ teche yumʌntel bajcheʼ Rey cʼʌlʌl ti 1914. Jiñi subtʼan jiñʌch ñumen ñuc bʌ tiʼ tojlelob, cheʼʌch bajcheʼ tsiʼ yʌlʌ Jesús (Marcos 13:10). Jumpʼejl libro muʼ bʌ i yʌl chaʼan ñopbalʌl tac tsiʼ yʌlʌ chaʼan jiñi i testigojob Jehová wen ñuc miʼ qʼuelob jiñi subtʼan. Tsiʼ yʌlʌ chaʼan miʼ ñop i coltañob jiñi añoʼ bʌ i wiʼñal, i bajñeloʼ bʌ o cʼamoʼ bʌ, pero chʌn cʼajal i chaʼañob chaʼan jiñi ñumen ñuc bʌ eʼtel jiñʌch i tsictesʌntel chaʼan i jilibal ili pañimil, i chuqui yom melol chaʼan mi lac taj laj coltʌntel. Cheʼʌchi. Jiñi Testigojonbʌla woli lac chʌn sub ili tʼan yicʼot cheʼʌch mi lac mel bajcheʼ tsiʼ mele Jesús yicʼot xcʌntʼañob i chaʼan.

13. ¿Baqui jaxʌl yom miʼ cʼotel jiñi subtʼan?

¹³ Jesús tsiʼ yʌlʌ chaʼan jiñi xcʌntʼañob i chaʼan miʼ cajelob ti subtʼan yicʼot cʌntesa chaʼan jiñi wen tʼan chaʼan bʌ Yumʌntel «tiʼ pejtelel pañimil». Tsiʼ subeyob jaʼel chaʼan miʼ sutqʼuiñob ti xcʌntʼan wiñicob xʼixicob tiʼ pejtelel pañimil (Mateo 24:14; 28:19, 20). Ili yom i yʌl chaʼan jiñi wen tʼan mi caj i sujbel tiʼ pejtelel pañimil (qʼuele jiñi recuadro «¿Chuqui yom i yʌl?»).

14, 15. ¿Chucoch miʼ mejlel la cʌl chaʼan i subtʼan jiñi Testigojob miʼ tsʼʌctesan ili profecía? (Qʼuele jiñi foto tac am bʌ tiʼ tejchibal).

¹⁴ Cheʼ bajcheʼ tsaʼ laj qʼuele, Jesús tsiʼ wʌn alʌ chaʼan mi caj i sujbel tiʼ pejtelel pañimil jiñi wen tʼan chaʼan Yumʌntel. ¿Chucoch miʼ mejlel la cʌl chaʼan i subtʼan jiñi Testigojob miʼ tsʼʌctesan ili profecía? Ti Estados Unidos, an cheʼ bʌ 600 mil ñaxañoʼ bʌ miʼ yʌcʼob i bʌ ti ñopbalʌl. Pero ti ili país an cheʼ bʌ jumpʼejl millón 200 mil Testigojob woliyoʼ bʌ ti subtʼan. I tiʼ pejtelel mulawil an cheʼ bʌ 400 mil motomaj católicojoʼ bʌ, pero ñumen ti 8 millón Testigojob woliyoʼ bʌ ti subtʼan ti 240 país yicʼot tejclum tac. Wen tsiquil chaʼan i testigojob Jehová woliyob ti  subtʼan tiʼ pejtelel Pañimil. Ili mucʼʌch i wen aqʼuen i ñuclel Jehová (Salmo 34:1; 51:15).

¹⁵ Jiñi i testigojonbʌla Jehová la com lac subeñob jiñi wen tʼan yonlel quixtañu cheʼ maxto julemic i jilibal. Chaʼan miʼ mejlel, an lac chaʼle ti traducir yicʼot i pucol cabʌl millón libro tac, revista, tratado yicʼot yambʌ alʌ jun tac ñumen ti 700 tʼan tac. I maʼañic mi laj cʼajtin i tojol muʼ bʌ lac puc. Ti yambʌ jabil tsaʼ lac pucu 4,500 millón jun tac loqʼuem bʌ ti Biblia. An lac pucu jeʼel ñumen ti 200 millón jiñi Traducción del Nuevo Mundo de las Santas Escrituras añix bʌ ñumen ti 130 tʼan tac. I añix cabʌl chuqui letsʌbil yaʼ ti lac página chaʼan Internet ñumen ti 750 tʼan tac. Cojach joñonla woli bʌ lac mel ili wen ñuc bʌ troñel.

16. ¿Chucoch la cujil chaʼan i testigojob Jehová añobʌch i chaʼan jiñi i yespíritu Dios?

¹⁶ ¿Bajcheʼ cʼamel mi caj i jalʼan jiñi subtʼan tsaʼ bʌ i yʌlʌ Jesús? Jinto miʼ tilel i jilibal (Mateo 24:14). I testigojonbʌla Jehová woli lac chʌn chaʼlen subtʼan ti ili cojix bʌ qʼuin come an lac chaʼan chʼujul bʌ i yespíritu Dios (Hechos 1:8; 1 Pedro 4:14). An majqui miʼ yʌlob jeʼel ochemoʼ bʌ ti yambʌ ñopbalʌl chaʼan añob i chaʼan jiñi chʼujul bʌ espíritu. Pero ¿muʼ ba i mejlel i melob bajcheʼ choncol i melob i testigojob Jehová ti ili cojix bʌ qʼuin? An ñopbil bʌ i chaʼañob subtʼan bajcheʼ joñonla, pero maʼañic miʼ mejlelob. Yañoʼ bʌ yomobʌch loqʼuel ti subtʼan, pero mach tiʼ pejtelelic ora. Yambʌlob miʼ majlelob ti jujumpʼejl otot, pero maʼañic miʼ subob chaʼan jiñi Yumʌntel. Jin chaʼan, maʼañic choncol i melob jiñi eʼtel tsaʼ bʌ i teche Jesús.

17, 18. a) ¿Chucoch mi lac ñop chaʼan woli bʌ i subob jiñi wen tʼan chaʼan Yumʌntel jiñobʌch i testigojob Jehová? b) ¿Bajcheʼ miʼ mejlel lac mel ili eʼtel?

¹⁷ Ti tsʼitaʼ bʌ tʼan, ¿majqui choncol i subob ili ora jiñi wen tʼan chaʼan bʌ Yumʌntel? Cojach i testigojob Jehová. ¿Chucoch mucʼʌch lac wen ñop? Ñaxan, come tojʌch jiñi tʼan choncol bʌ lac sub, jiñʌch chaʼan bʌ jiñi Yumʌntel. I chaʼpʼejlel, come weñʌch bajcheʼ woli lac mel, miʼ majlel lac sʌclan jiñi quixtañujob. I yuxpʼejlel, come weñʌch muʼ bʌ i ñijcañonla, jiñʌch laj cʼuxbiya ti Jehová yicʼot ti quixtañujob. I chʌmpʼejlel, come jiñi la queʼtel wen pujquem, mi lac chaʼlen subtʼan tiʼ pejtelel pañimil yicʼot ti cabʌl tʼan tac. I joʼpʼejlel, come mi caj lac chʌn chaʼlen subtʼan jinto miʼ tilel i jilibal.

¹⁸ Wen utsʼatax ti qʼuelol tiʼ pejtelel melbil bʌ i chaʼan i tejclum Jehová tiʼ subol jiñi wen tʼan chaʼan bʌ Yumʌntel ti ili cojix bʌ qʼuin. ¿Bajcheʼ miʼ mejlel lac mel? Jiñi apóstol Pablo tsiʼ yʌlʌ chaʼan Dios miʼ coltañonla, miʼ ñijcan lac pusicʼal yicʼot miʼ yʌqʼueñonla lac pʼʌtʌlel tiʼ melol (Filipenses 2:13). Jin chaʼan, mi laj cʼajtiben lac pʼʌtʌlel Jehová chaʼan mi lac chʌn chaʼlen wersa ti subtʼan (2 Timoteo 4:5).