1, 2. a) Alʌ baqui bʌ wocol tac miʼ yʌjlel yaʼ ti Génesis. b) ¿Chucoch miʼ yʌl jiñi Biblia ili tac?

JIÑI Biblia miʼ yʌl wiñicob xʼixicob (quixtañujob) tsaʼ bʌ i chaʼleyob leto (aʼleya tʼan) yicʼot yañoʼ bʌ. ¿Am baʼ ñaʼta jiñi wocol tac tsaʼ bʌ i ñusayob? An muʼ bʌ i tilel yaʼ ti ñaxan tac bʌ capítulo i chaʼan Génesis. Jumpʼejl ejemplo, Caín tiʼ tsʌnsa i yijtsʼin, jiñi Abel (Génesis 4:3-8). Lamec tiʼ tsʌnsa juntiquil xcolel tiʼ caj tsaʼ jajtsʼi (Génesis 4:23). Jiñi xcʌnta wacaxob i chaʼan Abraham tsiʼ chaʼleyob leto yicʼot i chaʼañoʼ bʌ Lot (Génesis 13:5-7). Agar ñumen ñuc tsiʼ qʼuele i bʌ bajcheʼ Sara, i Sara tsaʼ michʼa yicʼot Abraham (Génesis 16:3-6). Ismael tsaʼ caji i contrajin wiñicob xʼixicob, i tsaʼ caji ti contrajintel jaʼel (Génesis 16:12).

² ¿Chucoch miʼ yʌl jiñi Biblia ili tac? Come an chuqui miʼ mejlel laj cʌn jaʼel ti jiñi tsaʼ bʌ i ñusayob. xMulilonla jaʼel yicʼot miʼ mejlel lac taj wocol tac bajcheʼ jiñi. Cheʼ baʼ ora mi lac taj, laʼ lac tsajcan wen tac bʌ ejemplo am bʌ ti Biblia, i mach jiñic mach bʌ wentaquic (Romanos 15:4). Cheʼi, ñʌchʼʌl mi caj la cajñel yicʼot yañoʼ bʌ.

3. ¿Chuqui mi caj laj qʼuel ti ili temaj?

 ³ Ti ili temaj mi caj laj qʼuel chucoch yom mi lac tojʼesan mi an wocol la quicʼot yambʌlob, i bajcheʼ yom mi lac mel. Mi caj laj qʼuel jeʼel principio tac am bʌ ti Biblia muʼ bʌ caj i coltañonla lac tojʼesan wocol yicʼot chaʼan utsʼat mi la cajñel la quicʼot Jehová yicʼot yañoʼ bʌ.

4. a) ¿Bajcheʼ yilal chuqui miʼ ñaʼtʌntel tiʼ pejtelel pañimil? b) ¿Chuqui an lac taja?

⁴ An tiʼ mul Satanás cheʼ tʼoxol jiñi quixtañujob yicʼot cabʌlob i wocol. Laʼ laj qʼuel chucoch. Yaʼ ti pʌcʼʌbʌl Edén, Satanás tsiʼ yʌlʌ chaʼan ti jujuntiquil miʼ mejlel lac ñaʼtan chuqui wen o mach bʌ weñic, i chaʼan mach yomic mi lac jacʼben i tʼan Dios (Génesis 3:1-5). I cheʼʌch miʼ ñaʼtʌntel tiʼ pejtelel pañimil (mulawil) ili ora. ¿Chuqui an lac taja? Mi laj qʼuel chaʼan mucʼ jach i cʌy wocol. Yonlel miʼ ñaʼtañob chaʼan añob tiʼ wenta miʼ yajcañob chuqui wen yicʼot mach bʌ weñic. I bajñel jach miʼ ñaʼtañob i bʌ yicʼot yomob chaʼan jiñob ñumen ñucoʼ bʌ tiʼ tojlel yañoʼ bʌ. Mach i wentajobic mi tsiʼ lowoyob yañoʼ bʌ cheʼ an chuqui miʼ ñaʼtañob i mel. Ili miʼ tech leto. Pero jiñi Biblia miʼ cʌntesañonla chaʼan mi caj lac taj wocol yicʼot yambʌlob o mi lac chaʼlen mulil mi orajach la cujil michʼan (Proverbios 29:22).

5. ¿Baqui bʌ ticʼojel tsiʼ yʌcʼʌ Jesús chaʼan miʼ tojʼesʌntel leto?

⁵ Ti jiñi i Cʌntesa yaʼ ti Bujtʌl, Jesús tsiʼ sube chaʼan jiñi xcʌntʼañob i chaʼan yom utsʼat miʼ yajñelob yicʼot yañoʼ bʌ anquese tajol maʼañic mi caj i tajob i wenlel yilal. Tsiʼ yʌqʼueyob ticʼojel tac chaʼan miʼ tojʼesañob jiñi leto. Jumpʼejl ejemplo, tsiʼ subeyob chaʼan yom utsob, chaʼan miʼ yajñelob ti ñʌchʼtʌlel yicʼot yañoʼ bʌ, chaʼan maʼañic miʼ michʼañob, chaʼan ti ora yom miʼ tojʼesañob i wocol yicʼot miʼ cʼuxbiñob i contra (Mateo 5:5, 9, 22, 25, 44).

6, 7. a) ¿Chucoch ñuc i cʼʌjñibal cheʼ ti ora mi lac tojʼesan lac wocol yicʼot yañoʼ bʌ? b) ¿Baqui bʌ cʼajtiya tac yom mi lac melben lac bʌ i wiñiconbʌla Jehová?

⁶ Cheʼ mi lac chaʼlen oración, mi lac majlel ti subtʼan yicʼot ti tempa bʌ, mi lac chʼujutesan Jehová. Maʼañic mi caj i chʼʌm lac chʼujutesaya mi woliyonla (choncolonla) ti leto la quicʼot la quermañojob (Marcos 11:25). Mi la com sujtel tiʼ yamigo Jehová, yom mi lac ñusʌben i mul yañoʼ bʌ (pejcan Lucas 11:4 yicʼot Efesios 4:32).

⁷ Jehová yom chaʼan mi lac ñusʌben i mul yañoʼ bʌ yicʼot chaʼan añonla ti ñʌchʼtʌlel. Jin chaʼan yom mi laj cʼajtiben lac bʌ: «¿Wocol ba mi cubin chaʼan mic ñusʌben i mul quermañojob? ¿Muʼ ba c mulan cajñel quicʼotob?». Mi tsaʼ laj qʼuele chaʼan wocolʌch mi la cubin, laʼ laj cʼajtiben i coltaya Jehová ti lac pecʼlel, i mi caj i jacʼ la coración (1 Juan 5:14, 15).

8, 9. ¿Chuqui yom mi lac mel mi an majqui miʼ mel mach bʌ weñic ti lac tojlel?

⁸ I tilelʌch cheʼ an i tajol miʼ yʌlob o miʼ melob mach bʌ weñic ti lac tojlel come luʼ xmulilonla (Eclesiastés 7:20; Mateo 18:7). ¿Bajcheʼ mi caj lac jacʼ? Laʼ laj qʼuel jumpʼejl ejemplo muʼ bʌ i cʌntesañonla wen ñuc bʌ i cʼʌjñibal. Ti jumpʼejl bʌ qʼuin, chaʼtiquil hermanojob woliyob (yʌquelob) ti tʼan cheʼ bʌ juntiquil hermana tsaʼ cʼoti i pejcañob. Pero juntiquil tsaʼ michʼa chaʼan bajcheʼ tsaʼ cʼotiyob ti pejcʌntel. Cheʼ bʌ tsaʼ sujti jiñi hermana, jiñi hermano mach weñic tsaʼ caji ti tʼan tiʼ tojlel. Cheʼ jiñi, jiñi yambʌ tsiʼ cʼajtesʌbe chaʼan jiñi  hermana ñumeñix ti 40 jab i cajel i melben i yeʼtel (troñel) Jehová anquese an i ñusa cabʌl wocol. Tsiʼ sube chaʼan jiñi hermana mach yʌlolic i chaʼan. ¿Bajcheʼ tsiʼ jacʼʌ jiñi hermano? Wen tsiʼ jacʼʌ i tsiʼ ñajʌtesa tsaʼ bʌ ujti.

⁹ ¿Chuqui miʼ cʌntesañonla iliyi? Chaʼan cheʼ bʌ an majqui miʼ yʌl o miʼ mel mach bʌ weñic ti lac tojlel, joñonla la cujil bajcheʼ mi caj lac jacʼ. Mi añʌch laj cʼuxbiya, mi caj lac ñusan (pejcan Proverbios 10:12 yicʼot 1 Pedro 4:8). Jehová miʼ mulan cheʼ mi lac ñusʌben i mul yañoʼ bʌ (Proverbios 19:11; Eclesiastés 7:9). Jin chaʼan, baqui ora an majqui miʼ mel o miʼ yʌl maʼañic bʌ mi lac mulan, laʼ laj cʼajtiben lac bʌ: «¿Muʼ ba i mejlel c ñusʌben yicʼot c ñajʌtesan? ¿An to ba i cʼʌjñibal cheʼ mic chʌn cʼajtesan?».

10. a) ¿Bajcheʼ tsiʼ yubi i bʌ juntiquil hermana cheʼ tsiʼ ñaʼta chaʼan woli ti lecoj subentel? b) ¿Baqui bʌ ticʼojel am bʌ ti Biblia tsiʼ colta i taj i ñʌchʼtʌlel?

¹⁰ Mi an majqui miʼ yʌl mach bʌ weñic ti lac tojlel, tajol wocolʌch mi caj lac ñusʌben yicʼot mi lac ñajʌtesan. Cheʼʌch tsiʼ ñusa juntiquil precursora. Wen cʼux tsiʼ yubi cheʼ bʌ an hermanojob tsaʼ bʌ cajiyob ti lecoj bʌ tʼan chaʼan bajcheʼ mucʼ ti subtʼan yicʼot bajcheʼ yilal miʼ cʼʌn jiñi ora am bʌ i chaʼan. Jin chaʼan, tsiʼ pejca hermanojob wen añobix bʌ i ñaʼtʌbal yicʼot tsiʼ cʼajti ticʼojel. Jiñi hermanojob tsiʼ cʼʌñʌyob Biblia chaʼan miʼ coltañob i yʌcʼ i pensar ti Jehová, i mach jiñic miʼ wen ñaʼtan muʼ bʌ i yʌjlel tiʼ tojlel. Tsiʼ wen colta cheʼ tsiʼ pejca Mateo 6:1-4 (pejcan). Ili versículo tac tsiʼ cʼajtesʌbe chaʼan ñumen ñuc cheʼ miʼ tijicñesan Jehová. Jin chaʼan, maʼañic tsaʼ chʌn caji i yʌcʼ ti ñuc jiñi lecoj bʌ miʼ yʌjlel tiʼ tojlel. Ili ora, mi an majqui lecoj miʼ yʌl chaʼan i subtʼan, maʼañic miʼ bʌcʼ michʼan yicʼot chʌn tijicña. ¿Chucoch? Come yujil chaʼan woliʼ mel muʼ bʌ i mulan Jehová.

11, 12. a) ¿Chuqui yom mi lac mel mi juntiquil hermano an i wocol ti lac tojlel mi la cubin? b) ¿Chuqui mi laj cʌn chaʼan bajcheʼ tsiʼ lajmesa jumpʼejl wocol jiñi Abraham? (Qʼuele jiñi dibujo am bʌ tiʼ tejchibal).

¹¹ Santiago 3:2 miʼ yʌl chaʼan «ti lac pejtelel cabʌl mi lac taj lac sajtemal». Laʼ lac ñaʼtan chaʼan juntiquil hermano michʼ yicʼotonla come an chuqui tsaʼ la cʌlʌ o tsaʼ lac melbe. ¿Chuqui yom mi lac mel? Jesús tsiʼ yʌlʌ: «Cheʼ wolaʼ wʌqʼuen i majtan Dios tiʼ yajñib, mi tsaʼ cʼajtiyi a chaʼan an chuqui tsaʼ chaʼle tiʼ contra a piʼʌl, cʌyʌ i majtan Dios tiʼ tʼejl i yajñib. Cucu, ñaxan mele a bʌ a wicʼot a piʼʌl. Ti wiʼil laʼ aqʼuen i majtan Dios tiʼ yajñib» (Mateo 5:23, 24). Jin chaʼan, mi an lac wocol yicʼot juntiquil hermano, yom mi lac pejcan. Pero yom mi laj cʌn chuqui tsaʼ bʌ lac mele i maʼañic mi laj cʌl chaʼan jin i mul jiñi hermano. La com bʌ jiñʌch mi lac chaʼ utsʼan la quicʼot. Wen ñuc i cʼʌjñibal cheʼ ñʌchʼʌl añonla quicʼot la quermañojob.

¹² Jiñi Biblia miʼ cʌntesañonla bajcheʼ miʼ mejlel lac taj lac ñʌchʼtʌlel cheʼ bʌ an wocol la quicʼot yambʌ hermano. Laʼ laj qʼuel tsaʼ bʌ ujti tiʼ tojlel Abraham yicʼot i sobrino Lot. Wen añob i wacax, pero jiñi xcʌnta wacaxob i chaʼan tsaʼ laja cajiyob ti leto come mach wen ñuquic jiñi lum. Come Abraham mach yomic leto yicʼot i sobrino, tsiʼ yʌqʼue i yajcan baqui bʌ lum yom (Génesis 13:1, 2, 5-9). Tiʼ sujm, wen chuqui tsiʼ pʌsbeyonla cʌytʌl Abraham. Pero ¿maʼañic ba chuqui tsiʼ taja ti caj i yutslel? Mach cheʼiqui, Jehová tsiʼ yʌlʌ chaʼan ñumen chuqui mi caj i yʌqʼuen come tsiʼ pʌsʌ wem bʌ i melbal (Génesis 13:14-17). ¿Chuqui mi laj cʌn tiʼ tojlel? Chaʼan Jehová mi caj i yʌqʼueñonla i bendición mi mucʼʌch lac lajmesan jiñi wocol yicʼot cʼuxbiya, anquese maʼañic chuqui mi lac taj yilal ^[1] (Qʼuele jiñi nota am bʌ tiʼ yujtibal ili temaj).

13. a) ¿Bajcheʼ tsiʼ jacʼʌ juntiquil hermano cheʼ bʌ mach weñic tsaʼ jacʼbenti i tʼan? b) ¿Chuqui miʼ mejlel laj cʌn ti ili ejemplo?

 ¹³ Laʼ laj qʼuel jumpʼejl ejemplo chaʼan bʌ ili ora. Juntiquil hermano tsaʼ jaxto tsijib aqʼuenti tiʼ wenta jumpʼejl eʼtel ti colem tempa bʌ. Jin chaʼan, tsiʼ pejca yambʌ hermano chaʼan miʼ cʼajtiben mi mucʼʌch mejlel i coltan ti jiñi eʼtel. Pero jiñi hermano michʼ tsiʼ jacʼʌ tʼan yicʼot tsiʼ yʌpʌ i teléfono. Cʼʌlʌl michʼ to come tsaʼ michʼa yicʼot jiñi ñaxam bʌ hermano am bʌ tiʼ wenta jiñi eʼtel. Jiñi tsijib hermano waʼchocobil bʌ maʼañic tsaʼ michʼa, pero mach cheʼ jach tsiʼ ñusa jiñi wocol. Cheʼ jumpʼejl jaxto ora i ñumel jiñi, tsiʼ chaʼ pejca jiñi hermano yicʼot tsiʼ cʼajtibe mi mucʼʌch mejlel i pejcan. Cheʼ ñumeñix jumpʼejl semana tsiʼ tempayob i bʌ tiʼ Yotlel Tempa bʌ. Tsiʼ tem chaʼleyob oración yicʼot jumpʼejl ora tsiʼ chaʼleyob tʼan. Jiñi hermano tiʼ tsictesa chuqui ti wocol tsaʼ ujti yicʼot jiñi yambʌ. Jiñi tsijib hermano waʼchocobil bʌ tsiʼ wen ñʌchʼta yicʼot tsiʼ pejcʌbe texto tac mejl bʌ i coltan. Ti wiʼil, tijicña tsaʼ ajñiyob yicʼot temel tsiʼ chaʼleyob troñel ti jiñi colem tempa bʌ. Jiñi hermano tsiʼ yʌqʼue wocolix yʌlʌ jiñi yambʌ chaʼan uts tsiʼ pejca.

14, 15. a) ¿Baqui ora miʼ mejlel lac mel bajcheʼ miʼ yʌl ti Mateo 18:15-17? b) ¿Baqui bʌ jiñi uxchajp tsaʼ bʌ i yʌlʌ Jesús? c) ¿Baqui bʌ i sujmlel yom cheʼ mi lac mel ili uxchajp?

¹⁴ Cheʼ chaʼtiquil hermano añob i wocol, tiʼ bajñelob jach miʼ mejlel i tojʼesañob, i cheʼʌch yom melol. Pero mach tiʼ pejtelelic ora miʼ mejlel. Jesús tsiʼ yʌlʌ chaʼan an i tajol yom i coltaya yañoʼ bʌ (pejcan Mateo 18:15-17). ¿Baqui ora miʼ mejlel ti tsajcʌntel i ticʼojel Jesús? Mach jiñic tsiʼ taja ti tʼan jiñi tsʼitaʼ tʼan muʼ bʌ i waʼ tejchel tac. ¿Bajcheʼ la cujil? Come tsiʼ yʌlʌ chaʼan mi jiñi am bʌ i mul maʼañic miʼ cʌy  i mul cheʼ tsaʼix lon pejcʌnti ti jiñi yambʌ hermano, tsaʼix pejcʌnti yicʼot yambʌ juntiquil o chaʼtiquil hermanojob yicʼot tiʼ tojlel ancianojob, yom miʼ qʼuejlel «bajcheʼ gentil» o bajcheʼ juntiquil «xchʼʌm tojoñel». Ili ora, yom i yʌl chaʼan miʼ chaʼlentel ti expulsar yaʼ ti congregación. Jin chaʼan, cheʼ bʌ Jesús tsiʼ yʌlʌ chaʼan jumpʼejl «mulil», tsiʼ taja ti tʼan bajcheʼ jiñi lot chaʼan jach bʌ mi lac locʼsʌben i wenlel o jiñi jopʼtʼan jaʼel. Pero maʼañic tsiʼ taja ti tʼan jiñi wen tsʌts bʌ mulil tac bajcheʼ jiñi muʼ bʌ i piʼlen yambʌ mach bʌ jiñic ñujpuñem yicʼot, jin jach bʌ miʼ chaʼ wʌlʌc piʼleñob i bʌ, muʼ bʌ i cʌyob i ñop jiñi i sujmlel yicʼot i chʼujutesʌntel diosteʼ. ¿Chucoch? Come ili mulil tac cojach yom miʼ qʼuejlel ti ancianojob.

¹⁵ Cheʼ jiñi, ¿bajcheʼ miʼ mejlel lac sajcʌben i ticʼojel Jesús? Ti ñaxan jiñʌch cheʼ mi lac chaʼlen tʼan la quicʼot la quermaño. Tajol mach junyajl jach yom mi lac chaʼlen tʼan la quicʼot. Pero ¿ixcu mi maʼañic miʼ tojʼan jiñi wocol? I chaʼchajplel yom bʌ mi lac mel jiñʌch mi lac chaʼ pejcan yicʼot yambʌ hermano yujil bʌ chuqui woli ti ujtel o muʼ bʌ i mejlel i ñaʼtan mi añʌch chuqui mach weñic tsaʼ ujti. Mi muqʼuix i lajmel jiñi wocol, cheʼ bajcheʼ tsiʼ yʌlʌ Jesús, tsaʼix lac chaʼ taja la quermaño. Pero ¿ixcu mi maʼañic miʼ lajmel anquese tsaʼix lac wen pejca? Cojach bajcheʼ jiñi miʼ mejlel lac mel i yuxchajplel bʌ, mi lac pejcan ancianojob. ¿Baqui bʌ i sujmlel cheʼ mi lac mel? Jesús tsiʼ pʌsʌ chaʼan jiñʌch chaʼan com laj coltan jiñi la quermaño come mi laj cʼuxbin (Mateo 18:12-14).

16. ¿Chucoch wen ñucʌch jiñi uxchajp tsaʼ bʌ i yʌlʌ Jesús yom bʌ mi lac mel?

¹⁶ Mach tiʼ pejtelel ora cʼʌñʌl mi lac mel jiñi i yuxchajplel bʌ muʼ bʌ i yʌl ti Mateo 18:15-17. ¿Chucoch? Come jiñi am bʌ i mul mucʼʌch i chaʼ cʌn tsaʼ bʌ i mele yicʼot miʼ lajmesan, i mach cʼʌñʌlic miʼ chaʼlentel ti expulsar. Jiñi hermano am bʌ chuqui tsaʼ melbenti yom miʼ ñusʌben jeʼel chaʼan ñʌchʼʌl miʼ yajñelob. Ili miʼ yʌqʼueñonla lac tijicñʌyel. I ticʼojel Jesús chaʼan mach ti orajic yom mi lac pejcan ancianojob cheʼ an chuqui miʼ tsʼitaʼ ujtel, wen ñucʌch. Cojach miʼ mejlel laj cʼajtibeñob i coltaya mi tsaʼix lac mele jiñi ñaxam bʌ chaʼchajp tsaʼ bʌ i yʌlʌ Jesús yicʼot mi añʌch bajcheʼ mi lac pʌs chaʼan mach weñic tsaʼ bʌ melbentiyonla.

17. ¿Chuqui mi caj lac taj mi mucʼʌch lac chaʼlen wersa chaʼan maʼañic mi lac tech leto quicʼot la quermañojob?

¹⁷ Jiñi xcʌntʼan Santiago tsiʼ yʌlʌ: «Majqui jach puro utsʼat i tʼan tiʼ tojlel yañoʼ bʌ, utsʼatʌch i pusicʼal jini winic. Yujil i ticʼ i bʌ tiʼ pejtelel chuqui miʼ mel» (Santiago 3:2). Come xmulilontola, ti lac pejtelel miʼ mejlel lac mel o la cʌl maʼañic bʌ miʼ mulan yambʌlob. Mi mach la comic leto, yom mi lac chaʼlen wersa chaʼan chʌn tijicña tem añonla (Salmo 34:14). Mi cheʼʌch mi lac mel, utsʼat mi caj la cajñel la quicʼot la quermañojob yicʼot temel mi caj la cajñel (Salmo 133:1-3). Pero ñumen ñuc bʌ, jin cheʼ utsʼat mi caj la cajñel la quicʼot Jehová, «jini Dios muʼ bʌ i yʌqʼueñonla i ñʌchʼtilel lac pusicʼal» (Romanos 15:33). Mi mucʼʌch lac lajmesan yicʼot cʼuxbiya jiñi leto muʼ bʌ i tejchel tac, chʌn tijicña mi caj la cajñel.