Cheʼ bʌ an majqui miʼ chʌmel (sajtel) juntiquil muʼ bʌ i wen cʼuxbin, ¿am baʼ wubi chaʼan maʼañic maʼ ñaʼtan bajcheʼ yom maʼ coltan? Tajol maʼañic maʼ ñaʼtan chuqui yom maʼ wʌl o maʼ mel, i cheʼ jach miʼ ñumel. Pero añʌch bajcheʼ miʼ mejlel a coltan.

An i tajol, jasʌl cheʼ yaʼan la quicʼot yicʼot mi lac suben chaʼan chʼijiyem mi la cubin jeʼel. Chaʼan miʼ pʌsob bajcheʼ yubil miʼ yubiñob, ti cabʌl cultura miʼ wol mecʼob o miʼ chucbeñob i cʼʌb jiñi quixtañu. Mi yom tʼan, miʼ wen ñʌchʼtañob. O ñumen wen cheʼ an chuqui wem bʌ maʼ mel tiʼ tojlel jiñi familia, bajcheʼ mel bʌlñʌcʼʌl o maʼ cʌntan alʌlob, o mi cheʼ yomob, coltañob tiʼ chajpʌntel i mujquel jiñi tsaʼ bʌ chʌmi. Ili ñumen an i pʼʌtʌlel cheʼ bajcheʼ lac tʼan.

Tajol xucʼu xucʼul mi caj i mulan i yʌl chaʼan jiñi tsaʼ bʌ chʌmi i chaʼan, miʼ mejlel i chaʼ cʼajtesan bajcheʼ yilal i melbal cheʼ cuxulto o jiñi wen tac bʌ tsiʼ ñusa. Añʌch i wenlel jiñi tʼan cheʼ bʌ bajcheʼ jiñi, tajol miʼ yʌqʼuen i yubin i tijicñʌyel. Cheʼʌch tsaʼ ujti tiʼ tojlel Pam, añix bʌ wʌcpʼejl jab i chʌmel i ñoxiʼal i cʼabaʼ Ian. Tsiʼ yʌlʌ: «Cabʌl majqui miʼ subeñon chuqui wen tac bʌ tsiʼ mele c ñoxiʼal mach bʌ cujilic tac, i miʼ yʌqʼueñon c tijicñʌyel cheʼ mi cubin».

An wen chajpʌbiloʼ bʌ, miʼ yʌlob chaʼan jiñi woli (choncol) bʌ i ñusañob jiñi wocol cojach miʼ coltʌntelob tiʼ tejchibal, pero ti wiʼil, jiñi i yamigojob miʼ ñajʌyelob chaʼan yomʌch miʼ chʌn coltʌntel. Jin chaʼan, chʌn pejcan jiñi am bʌ majqui tsaʼ chʌmi i chaʼan. * An cabʌlob yomoʼ bʌ i yʌl bajcheʼ yubil miʼ yubiñob i bʌ ti wiʼil, miʼ yʌcʼob wocolix yʌlʌ cheʼ miʼ wen ñʌchʼtʌntelob.

Qʼuele tsaʼ bʌ ujti tiʼ tojlel Kaori, juntiquil xchʼoc ti Japón wen chʼijiyem bʌ tsaʼ cʌyle cheʼ bʌ tsaʼ chʌmi i ñaʼ, i cheʼ 15 uw jaxto i ñumel, tsaʼ chʌmi i chich. Pero tsiʼ taja i coltʌntel ti wem bʌ i yamigojob. Juntiquil i yamiga i cʼabaʼ Ritsuko, ñumen añix bʌ i jabilel, tsiʼ yʌcʼʌ i bʌ chaʼan miʼ cʌntan bajcheʼ i yalʌ chʼoc. Kaori miʼ yʌl: «Tiʼ sujm, maʼañic tsaʼ c mulaj. Maʼañic majqui yambʌ com bʌ miʼ sujtel tic ñaʼ, juntiquil jach c ñaʼ. Pero tsaʼ wen ñʌmʼa quicʼot come utsʼat tsiʼ wen qʼueleyon, i tsaʼ cʼoti c wen qʼuel ti ñuc. Temel mic majlel lojon ti subtʼan ti jujumpʼejl semana yicʼot ti tempa bʌ tac. Miʼ pʌyon majlel ti jap té, miʼ chʼʌmbeñon tilel i bʌl c ñʌcʼ yicʼot miʼ tsʼijbubeñon majlel jun tac. Cheʼ wen bajcheʼ tsiʼ qʼueleyon Ritsuko, jiñi ‹c ñaʼ›, tsiʼ wen coltayon».

I ñaʼ jiñi Kaori añix 12 jab i sajtel. Wʌle miʼ ñumen aqʼuen i yorajlel yicʼot i ñoxiʼal chaʼan miʼ suben i piʼʌlob ti chumtʌl chuqui miʼ yʌl jiñi Biblia. Kaori miʼ yʌl: «Jiñi ‹c ñaʼ› Ritsuko muʼto i chʌcʌ qʼuelon. Cheʼ bʌ mi cajñel tic lumal baqui tsaʼ coliyon, mic majlel c julaʼtan i wen tijicña mi cubin cheʼ yaʼañon quicʼot».

Juntiquil hermana Testigo bʌ ti Chipre i cʼabaʼ Poli, tsiʼ taja i coltʌntel jaʼel tiʼ tojlel yañoʼ bʌ. Jiñi i ñoxiʼal, i cʼabaʼ Sozos, wen uts yicʼot wem bʌ anciano ti congregación. Miʼ pʌyob ti uchʼel tiʼ yotot jiñi maʼañobic bʌ i tat i ñaʼ yicʼot jiñi hermanajob mebaʼoʼ bʌ chaʼan jumucʼ tijicña miʼ ñusañob (Santiago 1:27). Pero tsaʼ chʌmi cheʼ an jaxto 53 i jabilel tiʼ caj jumpʼejl cʼamʌjel tiʼ sicojc. Poli miʼ yʌl: «Tsaʼix c sʌtʌ jiñi xucʼul bʌ c piʼʌl, tsaʼ bʌ chumle quicʼot 33 jab».

Cheʼ bʌ tsaʼix mujqui, Poli tsaʼ majli ti chumtʌl ti Canadá yicʼot jiñi i yalobil am bʌ 15 i jabilel. Tsaʼ caji i tempañob i bʌ yicʼot i testigojob Jehová añoʼ bʌ yaʼi. «Anquese jiñi hermanojob mach yujilobic jiñi wocol tsaʼ bʌ c ñusa lojon, pero tsiʼ coltayon lojon ti uts bʌ tʼan tac yicʼot ti chuqui tac yom melol. ¡Tsaʼʌch i wen colta calobil jeʼel come miʼ wen ñaʼtan i tat! Jiñi añoʼ bʌ tiʼ wenta congregación tsiʼ wen chʼʌmʌyob ti ñuc jiñi Daniel. An juntiquil muʼ bʌ i wen pʌy majlel yicʼot wem bʌ amigojob chaʼan jumucʼ  tijicña miʼ ñusañob o chaʼan miʼ majlelob ti alas pelota». Ili ora, Poli yicʼot Daniel utsʼat añob yicʼot tijicñayob.

Tiʼ sujm, cabʌl bajcheʼ miʼ mejlel laj coltan yicʼot lac tijicñesʌbeñob i pusicʼal jiñi am bʌ majqui sajtemob i chaʼan. Qʼuele bajcheʼ miʼ yʌqʼueñonla lac tijicñʌyel jiñi Biblia ti jiñi wen tac bʌ tʼan muʼ bʌ i yʌl yicʼot jiñi lac pijtaya ti talto bʌ qʼuin.