1, 2. a) ¿Bajcheʼ yilal mi laj qʼuel jiñi Biblia jiñi i testigojonbʌla Jehová? b) ¿Baqui bʌ jiñi muʼ bʌ a ñumen mulan yaʼ ti Biblia?

JIÑI i testigojonbʌla Jehová mi laj qʼuel ti ñuc jiñi Biblia. Miʼ yʌqʼueñonla i pʼʌtʼesʌntel lac pusicʼal, lac pijtaya yicʼot miʼ tojʼesañonla baqui yom mi lac majlel (Romanos 15:4). Maʼañic miʼ chʼʌm tilel i ñaʼtʌbal wiñicob. I «tʼañʌch Dios» (1 Tesalonicenses 2:13).

² ¿Baqui bʌ jiñi muʼ bʌ lac wen mulan yaʼ ti Biblia? Tiʼ sujm, ti lac pejtelel añʌch baqui bʌ. An muʼ bʌ i mulañob jiñi libro i chaʼan Mateo, Marcos, Lucas yicʼot Juan, come jiñi muʼ bʌ i yʌjlel tiʼ tojlel Jesús miʼ coltañob i cʌn jiñi utsʼatax bʌ i melbal Jehová (Juan 14:9). Yambʌlob miʼ mulañob jiñi libro bajcheʼ i chaʼan Apocalipsis, muʼ bʌ i chʼʌm tilel profecía tac baqui miʼ yʌl ‹chuqui tac mach jalix miʼ caj ti ujtel› (Apocalipsis 1:1). Yañoʼ bʌ miʼ pʼʌtʼesañob i pusicʼal ti jiñi libro i chaʼan Salmo, yambʌlob miʼ wen mulañob ticʼojel muʼ bʌ i chʼʌm tilel jiñi libro i chaʼan Proverbios. Wen tsiquil chaʼan jumpʼejlʌch libro melbil bʌ chaʼan tiʼ pejtelel wiñicob xʼixicob (quixtañujob).

3, 4. a) ¿Bajcheʼ yilal mi laj qʼuel jiñi jun tac loqʼuem bʌ ti Biblia? b) ¿Chuqui tac ti jun an lac chaʼan muʼ bʌ i coltan majqui jach bʌ quixtañu?

³ Come mi lon j qʼuel ti ñuc jiñi Biblia, mi lon j qʼuel ti ñuc jaʼel  jiñi jun tac muʼ bʌ lon c chʼʌm, come yaʼ loqʼuem tac ti Biblia. Jiñi libro, folleto, revista yicʼot yambʌ jun tac jiñʌch chʼujul bʌ bʌlñʌcʼʌl muʼ bʌ i yʌqʼueñonla Jehová (qʼuele jiñi recuadro «¿Chuqui yom i yʌl?»). Miʼ coltañonla lac sujtel ti wen bʌ i yamigo Dios yicʼot mi pʼʌtʼesan lac ñopoñel (chʼujbiya) (Tito 2:2).

⁴ Cabʌl jun tac melbil chaʼan tiʼ pejtelel i testigojob Jehová. An yambʌ tac wen ñaʼtʌbil jach majqui i chaʼan, bajcheʼ i chaʼan xcolelob o tatʌlob. Cabʌl temaj yicʼot video tac am bʌ yaʼ ti lac página i chaʼan Internet ñaʼtʌbil chaʼan jiñi mach bʌ Testigojobic. Tiʼ pejtelel iliyi miʼ pʌs chaʼan añʌch i tsʼʌctesa i tʼan Jehová chaʼan miʼ yʌqʼuen chʼujul bʌ bʌlñʌcʼʌl tiʼ pejtelel quixtañujob (Isaías 25:6).

5. ¿Chuqui miʼ mejlel lac ñop tiʼ tojlel Jehová?

⁵ Cabʌlonla mi lac lon mulan cheʼ ñumen añic i yorajlel lac chaʼan tiʼ pejcʌntel jiñi Biblia yicʼot yambʌ lac jun tac. Tajol mach junlajalic miʼ mejlel laj cʌqʼuen i yorajlel tiʼ pejcʌntel tiʼ pejtelel lac jun tac. Pero tijicñayʌch miʼ yubin Jehová chaʼañonla mi utsʼatʌch mi laj cʼʌn i yorajlel am bʌ lac chaʼan tiʼ pejcʌntel yicʼot i wen chajpʌntel jiñi Biblia yicʼot lac jun tac (Efesios 5:15, 16). Pero an jumpʼejl wocol baqui yom mi laj cʌntan lac bʌ. Laʼ laj qʼuel.

6. ¿Chuqui miʼ mejlel i mʌctañonla lac locʼsʌben i wenlel tiʼ pejtelel bʌlñʌcʼʌl muʼ bʌ i yʌqʼueñonla Jehová?

⁶ Mi maʼañic mi laj cʌntan lac bʌ, miʼ mejlel lac ñaʼtan chaʼan an muʼ bʌ i yʌl jiñi Biblia o jiñi lac jun tac maʼañic bʌ chuqui miʼ cʌntesañonla. Jumpʼejl ejemplo, mi an junchajp yaʼ ti Biblia mach bʌ wis lajalic bajcheʼ woli (choncol) ti ujtel ti lac tojlel, ¿chuqui mi caj lac mel? ¿O chuqui mi caj lac mel mi mach chaʼañoñicla muʼ bʌ i yʌl jumpʼejl lac jun? ¿Toʼol cheʼ jach ba mi caj lac pejcan? ¿O maʼañix mi caj lac tsʼitaʼ pejcan? Mi cheʼi, mi caj lac sʌt wen ñuc tac bʌ i cʼʌjñibal muʼ bʌ i mejlel i coltañonla. ¿Chuqui yom mi lac mel? Laʼ laj cʼajtesan tiʼ pejtelel cʌntesa aqʼuebil bʌ i chaʼañonla Jehová. Jiñi Biblia miʼ yʌl: «Joñon a Yumon, a Dioson muʼ bʌ j cʌntesañet chaʼan maʼ taj chuqui wen» (Isaías 48:17). Ila mi caj laj cʌn uxchajp muʼ bʌ caj i coltañonla lac wen locʼsʌben i wenlel ti tsʼʌcʌl jiñi Biblia. Cheʼ jaʼel, mi caj laj qʼuel bajcheʼ mi lac locʼsʌben i wenlel tiʼ pejtelel jiñi chʼujul bʌ bʌlñʌcʼʌl muʼ bʌ i yʌqʼueñonla Jehová.

7. ¿Chucoch yom mi lac wen jam lac pensar cheʼ mi caj lac pejcan Biblia?

⁷ Yom wen jamʌl lac pensar cheʼ mi caj lac pejcan. Tiʼ sujm, añʌch tsaʼ bʌ yajcʌnti majqui jach tiʼ tojlelob woli (yʌquel) i subentel jiñi tsaʼ bʌ tsʼijbunti tac yaʼ ti Biblia. Pero 2 Timoteo 3:16 wen tsiquil miʼ yʌl chaʼan «chʼoyol ti Dios pejtelel i Tsʼijbujel. An i cʼʌjñibal». Jin chaʼan yom wen jamʌl lac pensar cheʼ mi lac pejcan Biblia (qʼuele jiñi recuadro «¿Chuqui yom i yʌl?»). Jumpʼejl ejemplo, juntiquil hermano miʼ yʌl chaʼan miʼ ñop i cʼajtesan chaʼan cabʌl chuqui miʼ mejlel i cʌn ti junchajp muʼ bʌ i chʼʌm tilel jiñi Biblia. Jiñʌch muʼ bʌ i coltan i taj cʌntesʌntel tac mach bʌ ajpan tsiquilic. Jin chaʼan, cheʼ maxto lac teche lac pejcan lac Biblia, laʼ laj cʼajtiben Jehová chaʼan miʼ coltañonla lac jam lac pensar yicʼot chaʼan miʼ coltañonla laj qʼuel chuqui tac yom i cʌntesañonla (Esdras 7:10; pejcan Santiago 1:5).

8, 9. a) ¿Baqui bʌ cʼajtiya tac miʼ mejlel lac melben lac bʌ cheʼ mi lac pejcan Biblia? b) ¿Chuqui miʼ cʌntesañonla chaʼan Jehová tiʼ pejtelel jiñi muʼ bʌ i cʼajtibentel jiñi ancianojob ti congregación?

⁸ Laʼ lac mel cʼajtiya tac. Cheʼ woli lac pejcan jiñi Biblia, miʼ mejlel laj cʼajtiben lac bʌ: «¿Chuqui miʼ cʌntesañon chaʼan Jehová? ¿Bajcheʼ miʼ mejlel j cʼʌn tij cuxtʌlel? ¿Bajcheʼ miʼ mejlel j cʼʌn chaʼan mij coltan yambʌlob?». Mi caj lac ñumen tajben i wenlel lac pejcaya Biblia cheʼ mi lac wen  ñaʼtan ili uxpʼejl cʼajtiya. Laʼ laj qʼuel junchajp. Jiñi Biblia miʼ yʌl tiʼ pejtelel bajcheʼ yilal yom jiñi ancianojob ti congregación (pejcan 1 Timoteo 3:2-7). Isujm, mach luʼ ancianojoñicla. Tajol mi lac ñaʼtan chaʼan maʼañic miʼ wen cʼʌjñibʌyel lac chaʼan. Pero laʼ laj cʼʌn ili uxpʼejl cʼajtiya chaʼan mi laj qʼuel bajcheʼ miʼ mejlel i coltañonla ili versículo tac.

⁹ «¿Chuqui miʼ cʌntesañon chaʼan Jehová?». Tiʼ pejtelel ili muʼ bʌ i cʼajtibentel jiñi ancianojob miʼ pʌsbeñonla chaʼan Jehová yom cheʼ miʼ luʼ tsʼʌctesañob. ¿Chucoch? Come wen ñuc miʼ qʼuel jiñi congregación. Jiñi Biblia miʼ yʌl chaʼan Jehová tsiʼ mʌñʌ «tiʼ chʼichʼel i Yalobil» (Hechos 20:28, TNM). Jin chaʼan, Dios yom cheʼ wen bajcheʼ miʼ melob jiñi ancianojob. Cheʼ jaʼel, mi caj i cʼajtibentelob bajcheʼ yilal tsiʼ cʌntayob jiñi congregación. Jehová yom chaʼan cʌntʌbilonla mi laj cubin lac bʌ tiʼ tojlel ancianojob (Isaías 32:1, 2). Cheʼ bajcheʼ mi laj qʼuel, tiʼ pejtelel muʼ bʌ i cʼajtibentel jiñi ancianojob miʼ pʌs chaʼan Jehová miʼ qʼuelonla ti ñuc.

10, 11. a) ¿Bajcheʼ mi lac taj lac wenlel cheʼ mi laj cʼajtesan muʼ bʌ i cʼajtintel tiʼ tojlel ancianojob? b) ¿Bajcheʼ miʼ mejlel laj cʼʌn chaʼan mi laj coltan yambʌlob?

¹⁰ «¿Bajcheʼ miʼ mejlel j cʼʌn tij cuxtʌlel?». Mi ancianojonla ti congregación, ti bele ora yom mi laj cʼajtesan ili muʼ bʌ i cʼajtintel ti lac tojlel yicʼot mi lac chaʼlen wersa ti ñumen tojʼan majlel. Mi mach ancianojoñicla pero la com lac taj, yom mi lac chaʼlen wersa lac tsʼʌctesan ti utsʼat (1 Timoteo 3:1). Pero añʌch chuqui miʼ mejlel laj cʌn ti lac pejtelel. Jumpʼejl ejemplo, Jehová miʼ pijtan chaʼan ti lac pejtelel pʼisbil jach yom mi laj qʼuel jiñi taqʼuin yicʼot chubʌʼañʌl yicʼot mi lac pʌsben la cutslel yambʌlob (1 Timoteo 6:9, 10; Romanos 12:13). Mi weñʌch chuqui miʼ melob jiñi ancianojob ti congregación, jiñi hermanojob añʌch chuqui miʼ cʌñob tiʼ tojlelob yicʼot miʼ lajibeñob i ñopoñel (Hebreos 13:7; 1 Pedro 5:3).

¹¹ «¿Bajcheʼ miʼ mejlel j cʼʌn chaʼan mij coltan yambʌlob?». Muʼ bʌ i cʼajtin jiñi Biblia tiʼ tojlel ancianojob miʼ mejlel laj cʼʌn lac tsictesʌben majqui choncol laj cʌntesañob chaʼan Biblia, chaʼan mach lajalobic bajcheʼ yambʌ xcʌntesajob ti ñopbalʌl tac. Miʼ cʼajtesʌbeñonla jaʼel chaʼan jiñi ancianojob tsʌts miʼ chaʼleñob eʼtel (troñel). Mi caj lac ñumen qʼuelob ti ñuc cheʼ mi lac ñaʼtan chaʼan miʼ chaʼleñob wersa i melob i yeʼtel (1 Tesalonicenses 5:12). Cheʼ bʌ mi lac wen qʼuelob ti ñuc, ñumen tijicña mi caj i melob i yeʼtel tiʼ tojlel jiñi congregación (Hebreos 13:17).

12, 13. a) ¿Chuqui tac miʼ mejlel lac sʌclʌben i sujmlel? b) Alʌ jumpʼejl ejemplo baqui miʼ pʌs muʼ bʌ mejlel lac taj cheʼ bʌ mi lac sʌclan chuqui tsaʼ ujti cheʼ bʌ tsaʼ tsʼijbunti jumpʼejl relato.

¹² Laʼ lac ñumen sʌclʌben i sujmlel. Cheʼ woli lac chajpan jiñi Biblia, miʼ mejlel lac sʌclʌben i jacʼbal ili cʼajtiya tac:

• ¿Majqui tiʼ tsʼijbu iliyi?

• ¿Jalix yicʼot baqui tsaʼ tsʼijbunti?

• ¿Chuqui tac tsaʼ ujti cheʼ woli ti tsʼijbuntel?

Cheʼ mi lac sʌclʌben i sujmlel miʼ mejlel lac taj cʌntesʌntel tac chaʼañonla mach bʌ ajpan tsiquil.

¹³ Laʼ laj qʼuel jumpʼejl ejemplo. Ti Ezequiel 14:13, 14, Jehová tsiʼ yʌlʌ chaʼan mi caj i jisan jiñi tejclum muʼ bʌ i chaʼlen mulil tiʼ tojlel yicʼot pejtelel i bʌl i ñʌcʼob yicʼot i yʌlacʼob. Pero tsiʼ chaʼ alʌ: «Wʌʼic chumulob Noé yicʼot Daniel yicʼot Job tiʼ tojlelob, maʼanic i pʼʌtʌlel chaʼan miʼ coltañob. I bajñelob jach miʼ colelob jini tojoʼ bʌ chaʼan ti wen bʌ i melbalob». Cheʼ mi lac ñumen sʌclan, mi caj laj qʼuel chaʼan ili versículo tac tiʼ tsʼijbu Ezequiel cheʼ anto yom 612 jab miʼ tilel Cristo. Anquese cabʌlix jab i chʌmel Noé yicʼot Job, Jehová tsiʼ chʌn cʼajtesayob chaʼan i xucʼtʌlelob. Daniel cuxulto ti jimbʌ qʼuin. Tajol cheʼ bʌ tsiʼ yʌlʌ Jehová chaʼan wen xucʼul bajcheʼ Noé yicʼot Job, an jaxto  20 i jabilel. ¿Chuqui mi laj cʌn? Chaʼan Jehová miʼ qʼuel ti ñuc jiñi xucʼul bʌ i wiñicob, cheʼ to jaʼel jiñi xcolelob (Salmo 148:12-14).

14. a) ¿Bajcheʼ miʼ coltan xcolelob jiñi jun tac muʼ bʌ i mejlel tiʼ tojlelob? b) ¿Bajcheʼ miʼ coltan yambʌlob? (Qʼuele jiñi foto am bʌ tiʼ tejchibal).

¹⁴ Jun tac i chaʼan xcolelob. Tsaʼix laj qʼuele chaʼan cabʌl chuqui miʼ mejlel laj cʌn yaʼ ti Biblia ti lac pejtelel. I cheʼ lajal yicʼot jiñi yambʌ lac jun tac. Laʼ laj qʼuel chaʼpʼejl uxpʼejl ejemplo. Ti jiñi jabil tac ñumeñix bʌ, Jehová an i yʌqʼueyonla cabʌl jun tac loqʼuem bʌ ti Biblia chaʼan xcolelob ^[1] (qʼuele jiñi nota am bʌ tiʼ yujtibal ili temaj). Tiʼ pejtelel ili miʼ coltañob i cuch jiñi wocol ti escuela yicʼot cheʼ wolito i tajob i colel. Pero ¿bajcheʼ miʼ mejlel i coltañonla ti lac pejtelel? Mi tsaʼ lac pejca, mi caj i cʼotel lac ñaʼtan jiñi wocol muʼ bʌ i taj jiñi xcolelob, i mi caj lac mejlel laj coltañob yicʼot lac pʼʌtʼesañob.

15. ¿Chucoch yomʌch miʼ qʼuelob ti ñuc jiñi jun tac i chaʼan bʌ xcolelob jiñi ñucobix bʌ xñoptʼan?

¹⁵ Jiñi xñoptʼañob ñucobix bʌ mach yomic miʼ ñaʼtañob chaʼan maʼañic i cʼʌjñibal miʼ pejcañob jiñi jun tac chaʼan bʌ xcolelob. Mi cheʼ miʼ melob, chan woliʼ yubiñob i bʌ. Jiñi ñucobix bʌ mucʼʌch i ñusañob wocol bajcheʼ muʼ bʌ i tilel ti jiñi jun tac. Jumpʼejl ejemplo, ti lac pejtelel yom mi lac tsictesan tiʼ tojlel yambʌlob chaʼan muʼ bʌ lac ñop, mi lac ticʼ lac bʌcʼtal, lac xicʼol ti melol mach bʌ weñic yicʼot i yajcʌntel wem bʌ la camigojob yicʼot lac ñusaqʼuin. Jiñi cʌntesʌntel muʼ bʌ i yʌjqʼuel chaʼan xcolelob chuculʌch ti Biblia jaʼel. Jin chaʼan ti lac pejtelel miʼ mejlel lac taj lac wenlel.

16. ¿Bajcheʼ tac yambʌ miʼ coltan xcolelob jiñi jun tac?

¹⁶ Jiñi jun tac melbil bʌ chaʼan xcolelob, miʼ mejlel i coltañob ti sujtel tiʼ yamigo Jehová jeʼel (pejcan Eclesiastés 12:1, 13). Pero miʼ mejlel i tajob i wenlel jeʼel jiñi ñucobix bʌ. Jumpʼejl ejemplo, jiñi revista ¡Despertad! i chaʼan abril, 2009, tsiʼ chʼʌmʌ tilel jumpʼejl temaj chaʼan xcolelob muʼ bʌ i yʌl «¿Bajcheʼ miʼ mejlel c tajben i wenlel cheʼ mic pejcan Biblia?». Ili temaj tsiʼ chʼʌmʌ tilel cabʌl ticʼojel yicʼot jumpʼejl recuadro muʼ bʌ i mejlel lac setʼ yicʼot lac lot chaʼan mi laj cʼʌn. ¿Tsaʼ ba i colta jiñi ñucobix bʌ jaʼel? ¡Tsaʼ cu! Juntiquil xʼixic ñujpuñem bʌ am bʌ i yalobil tsiʼ yʌlʌ chaʼan wocol miʼ yubin chaʼan miʼ pejcan i Biblia, i tsaʼ caji i mel bajcheʼ tsiʼ yʌlʌ jiñi revista. Ili ora miʼ wen mulan i pejcan jiñi Biblia yicʼot cheʼ miʼ qʼuel bajcheʼ miʼ taj i bʌ jumpʼejl libro yicʼot yambʌ. Ili miʼ coltan i qʼuel ti tsʼʌcʌl bajcheʼ an jiñi Biblia. Miʼ  yʌl: «Maʼañic baqui ora wen mulʌbil c chaʼan cheʼ mic pejcan».

17, 18. ¿Bajcheʼ miʼ coltañonla cheʼ mi lac pejcan jiñi chajpʌbil bʌ chaʼan mach bʌ Testigojobic? Acʼʌ jumpʼejl ejemplo.

¹⁷ Jun chaʼan yambʌ quixtañujob. Cheʼ ti 2008 tsaʼ caji ti mejlel jiñi revista Lac Tsictesʌbentel chaʼan bʌ estudio, i chaʼan bʌ i testigojob Jehová. Pero mi lac puc revista tac jaʼel chajpʌbil bʌ chaʼan mach bʌ Testigojobic. ¿Bajcheʼ miʼ mejlel lac locʼsʌben i wenlel? Laʼ lac ñaʼtan chaʼan mi lac pʌy tiʼ Yotlel Tempa bʌ juntiquil quixtañu, i mucʼʌch i jacʼ. Wen tijicña mi la cubin. Cheʼ woli ti ñumel jiñi discurso, tajol mi caj lac ñaʼtan bajcheʼ yubil miʼ yubin i bʌ jiñi quixtañu yicʼot bajcheʼ miʼ mejlel i qʼuextan tiʼ cuxtʌlel jiñi woli bʌ i yubin. Ili muʼto i ñumen coltañonla laj qʼuel ti ñuc jiñi woli bʌ i yʌjlel ti discurso.

¹⁸ Tajol cheʼʌch miʼ yujtel jeʼel cheʼ mi lac pejcan jiñi jun tac chajpʌbil bʌ tiʼ tojlel mach bʌ Testigojobic. Jumpʼejl ejemplo, laʼ lac ñaʼtan jiñi revista Lac Tsictesʌbentel chaʼan bʌ miʼ pujquel ti subtʼan yicʼot yambʌ temaj tac am bʌ yaʼ ti www.pr418.com/es. Mach wocol taquic bajcheʼ miʼ tsictesan am bʌ ti Biblia chaʼan miʼ mejlel i chʼʌmben isujm jiñi quixtañujob. Cheʼ bʌ mi lac pejcan, mi lac ñumen chʼʌmben isujm jiñi cʌntesʌntel tac cʌmbilix bʌ lac chaʼan. I cheʼʌch miʼ ñumen cʼotel laj cʼuxbin. Miʼ cʌntesañonla jaʼel yambʌ tac bajcheʼ miʼ mejlel lac tsictesan ti subtʼan jiñi muʼ bʌ lac ñop. Jiñi revista ¡Despertad! lʌcʼʌ lajal bajcheʼ miʼ coltañonla. Jumpʼejl ejemplo, cabʌl bajcheʼ miʼ ñumen pʌsbeñonla chucoch yom mi lac ñop Dios yicʼot chuqui tac tsiʼ mele, i miʼ cʌntesañonla bajcheʼ miʼ mejlel lac tsictesan jiñi muʼ bʌ lac ñop (pejcan 1 Pedro 3:15).

19. ¿Bajcheʼ miʼ mejlel lac pʌsben wocolix i yʌlʌ Jehová chaʼan jiñi chʼujul bʌ bʌlñʌcʼʌl?

¹⁹ Wen tsiquil chaʼan Jehová an i wen aqʼueyonla chʼujul bʌ bʌlñʌcʼʌl chaʼan lac wenlel (Mateo 5:3). Jin chaʼan, laʼ lac chʌn pejcan yicʼot mi lac jacʼ tiʼ pejtelel i ticʼojel yicʼot i cʌntesa. Mi cheʼʌch mi caj lac mel, utsʼat mi caj lac ñusan yicʼot mi caj lac pʌsben Jehová chaʼan mucʼʌch la cʌqʼuen wocolix i yʌlʌ chaʼan jiñi chʼujul bʌ bʌlñʌcʼʌl miʼ yʌqʼueñonla (Isaías 48:17).