1-3. a) ¿Chuqui tac tajol wocol mi la cubin tiʼ cʌyol cheʼ bʌ tsaʼix lac chʼʌmʌ jaʼ? b) Mi ñumen wocol mi la cubin bajcheʼ tsaʼ lac lon ñaʼta, ¿chuqui miʼ mejlel laj cʼajtiben lac bʌ? (Qʼuele jiñi foto tac am bʌ tiʼ tejchibal).

CHEʼ bʌ Kevin maxto i testigojic Jehová, tsiʼ wen mulaj alas tiʼ caj taqʼuin, ñucʼ cʼujts, cʌlʌx jap lembal yicʼot i cʼʌn droga tac ^[1] (qʼuele jiñi nota am bʌ tiʼ yujtibal ili temaj). Tsaʼ cʼoti i cʌn Jehová, i tsiʼ mulaj sujtel tiʼ yamigo. Pero cabʌl chuqui tsiʼ ñaxan mele tiʼ cuxtʌlel chaʼan miʼ mejlel ti chʼʌmjaʼ. Tiʼ coltaya Jehová yicʼot i Tʼan, jiñi Biblia, tsaʼʌch mejli ti qʼuextʌyel (Hebreos 4:12).

² Chaʼan Kevin miʼ sujtel ti ñumen wem bʌ xñoptʼan, anto chuqui tac tsaʼ caji i bej tojʼesan majlel cheʼ bʌ chʼʌmbilix i chaʼan jaʼ (Efesios 4:31, 32). Toj sajtel i pusicʼal cheʼ bʌ tsiʼ qʼuele chaʼan wocol to miʼ yubin chaʼan miʼ ticʼ i bʌ, come ti orajach miʼ michʼan. Miʼ yʌl chaʼan ñumen wocol bʌ tsiʼ yubi jiñʌch cheʼ ñʌchʼʌl jach miʼ yajñel, i jiñi yambʌ tac tsaʼ bʌ i cʌyʌ cheʼ muʼto i cajel ti chʼʌmjaʼ, mach cheʼic tsiʼ yubi. Jin chaʼan, tsiʼ cʼajtibe i coltaya Jehová  yicʼot tsaʼ caji i pejcan ti xucʼul jiñi Biblia. Cheʼʌch tsaʼ mejli i qʼuextan i bʌ.

³ Cheʼ bʌ maxto lac chaʼle chʼʌmjaʼ, cabʌlonla am bʌ chuqui tsaʼ lac mele jaʼel. Cheʼʌch tsaʼ lac tsʼʌctesa muʼ bʌ i yʌl jiñi Biblia. Pero tajol mi laj qʼuel chaʼan anto baqui yom mi lac bej chaʼlen wersa ti tojʼan chaʼan mi lac ñumen lajin Dios yicʼot Cristo (Efesios 5:1, 2; 1 Pedro 2:21). Jumpʼejl ejemplo, tajol maxto añic mi laj cʼʌlʌl mulan cheʼ an chuqui mi lac subentel o mi lac tech tʼan tiʼ tojlel yambʌlob. O tajol muʼto lac bʌcʼñan lac mel chuqui toj come mi lac bʌcʼñan chuqui miʼ yʌl yambʌlob. Tajol muʼto lac chʌn yajlel tiʼ melol muʼ bʌ lac mel wajali anquese cabʌlix jab i cajel lac ñop laj cʌy. I tajol mi laj cʼajtiben lac bʌ: «¿Chucoch wen wocol mi cubin tiʼ cʌyol? ¿Chuqui yom mic mel chaʼan mic bej tojʼan majlel bajcheʼ yilalon cheʼ bajcheʼ miʼ yʌl jiñi Biblia?».

4. ¿Chucoch maʼañic miʼ mejlel lac mel tiʼ pejtelel bajcheʼ miʼ mulan Jehová?

⁴ Joñonla mi laj cʼuxbin Dios yicʼot ti jumpʼejl lac pusicʼal com lac mel muʼ bʌ i mulan. Pero mach tiʼ pejtelelic ora mi lac mejlel come xmulilonla. Tajol cheʼʌch mi la cubin lac bʌ bajcheʼ jiñi apóstol Pablo tsaʼ bʌ i yʌlʌ chaʼan mach tiʼ pejtelelic ora miʼ mejlel i mel chuqui toj bʌ anquese lon yom i mel (Romanos 7:18; Santiago 3:2).

5. a) ¿Chuqui tsaʼ laj cʌyʌ chaʼan mi lac mejlel ti chʼʌmjaʼ? b) ¿Chuqui ti wocol miʼ chʌn aqʼueñonla jiñi mulil?

⁵ Chaʼan mi lac chaʼlen chʼʌmjaʼ yicʼot mi lac sujtel tiʼ testigo Jehová, tsaʼ laj cʌyʌ lac mel muʼ bʌ i tsʼaʼlen (1 Corintios 6:9, 10). Pero muʼto lac chʌn taj lac sajtemal come xmulilontola, anquese añix ora lac chʼʌmʌ jaʼ (Colosenses 3:9, 10). An i tajol miʼ mejlel lac mulan lac mel mach bʌ weñic o miʼ tilel lecoj bʌ ti lac pusicʼal, o tajol an bajcheʼ yilalonla baqui maʼañic miʼ mejlel lac ticʼ lac bʌ. Cheʼ jeʼel, tajol an wajalix bʌ i cajel lac ñop laj cʌy.

6, 7. a) Anquese xmulilonla, ¿chucoch mi lac mejlel ti ajñel bajcheʼ i yamigo Jehová? b) ¿Chucoch yom mi lac chʌn cʼajtiben Jehová chaʼan miʼ ñusʌbeñonla?

⁶ Anquese xmulilonla, mucʼʌch lac mejlel ti sujtel tiʼ yamigo Jehová yicʼot lac melben i yeʼtel. Yom mi laj cʼajtesan chaʼan an chuqui wem bʌ tsiʼ qʼuele ti lac tojlel yicʼot tsiʼ mulaj chaʼan mi laj cʌn, jin chaʼan i yamigojonla (Juan 6:44). Yujil chaʼan xmulilonla, i jin chaʼan miʼ mejlel lac taj lac sajtemal. Pero Jehová tsiʼ mulaj chaʼan mi lac sujtel tiʼ yamigo.

⁷ Jehová tsiʼ yʌqʼueyonla wen ñuc bʌ majtañʌl come wen ñuc i cʼuxbiya ti lac tojlel. Tsiʼ choco tilel i Yalobil chaʼan miʼ yʌcʼ i cuxtʌlel yicʼot miʼ toj lac mul (Juan 3:16). Miʼ mejlel laj cʼajtiben Jehová chaʼan miʼ ñusʌbeñonla mi tsaʼ lac mele mach bʌ weñic. Dios miʼ ñusʌbeñonla tiʼ coltaya i cuxtʌlel tsaʼ bʌ i yʌcʼʌ Jesús, yicʼot miʼ cʌy chaʼan chʌn i yamigojonla (Romanos 7:24, 25; 1 Juan 2:1, 2). Mach lac ñajʌtesan chaʼan Jesús tsaʼ chʌmi tiʼ wenta xmulilob muʼ bʌ i cʌyob i mul. Jin chaʼan, mi tsʌtsʌch mi laj qʼuel jiñi tsaʼ bʌ lac mele, laʼ lac chʌn cʼajtin lac ñusʌbentel ti Jehová. Mi maʼañic mi laj cʼajtiben, lajal bajcheʼ mach la comic lac poc laj cʼʌb cheʼ bʌ bibiʼ. Anquese xmulilonla, Jehová miʼ cʌy chaʼan chʌn i yamigojonla, ¿mach ba muqʼuic i yʌqʼueñonla lac tijicñʌyel jiñi? (Pejcan 1 Timoteo 1:15).

8. ¿Chucoch yom mi lac chaʼlen wersa lac tojʼesan mach bʌ weñic ti lac tojlel?

⁸ I sujm, mach cheʼ jach yom mi lac toʼol ñusan mi an bajcheʼ yilalonla. Jehová albil i chaʼan bajcheʼ yilal yom jiñi muʼ bʌ i yajcan tiʼ yamigo (Salmo 15:1-5). Jin chaʼan, yom mi lac chaʼlen wersa lac lajin bajcheʼ yilal i melbal  Dios yicʼot i Yalobil mi la com sujtel tiʼ yamigo. Mi an mach bʌ weñic miʼ tilel ti lac pusicʼal jeʼel, yom mi lac chaʼlen wersa lac ticʼ lac bʌ yicʼot mi lac locʼsan jiñi muʼ bʌ lac mejlel. Yom mi lac chʌn weñʼesan majlel bajcheʼ yilal bʌ xñoptʼañonla, anquese cabʌlix jab lac chaʼle chʼʌmjaʼ (2 Corintios 13:11).

9. ¿Bajcheʼ mi lac ñaʼtan chaʼan mucʼʌch lac mejlel ti bej qʼuextʌyel majlel?

⁹ Pablo tsiʼ yʌcʼʌ ili ticʼojel: «Mach mi laʼ lotin laʼ piʼʌlob, come tsaʼix laʼ choco jini tsucul bʌ laʼ pusicʼal yicʼot i melbal. Tsaʼix laʼ xojo jini tsijiʼ bʌ laʼ pusicʼal tsaʼ bʌ i mele Dios chaʼan mi laʼ qʼuextʌyel majlel tiʼ yejtal Dios yicʼot tsijiʼ bʌ laʼ ñaʼtʌbal» (Colosenses 3:9, 10). Jiñi tʼan «qʼuextʌyel majlel» yom i yʌl chaʼan yom mi lac chʌn chaʼlen wersa ti weñʼan majlel bajcheʼ xñoptʼan. Jin chaʼan, mach yʌlʌlic jalix tsaʼ lac teche i yeʼtel Jehová, añʌch chuqui miʼ mejlel lac chʌn cʌn chaʼan bajcheʼ yilal. Jiñi Biblia miʼ mejlel i coltañonla chaʼan mi lac ñumen lajin majlel bajcheʼ yilal Jehová.

10. a) ¿Chuqui yom mi lac mel chaʼan miʼ chʌn coltañonla tiʼ tojʼan jiñi Biblia? b) ¿Chuqui miʼ mejlel laj cʼajtiben lac bʌ?

¹⁰ Ti lac pejtelel la com lac jacʼ muʼ bʌ i yʌl jiñi Biblia. Pero yom mi lac chaʼlen wersa mi la com ñumen tojʼan majlel. ¿Chucoch yom mi lac chaʼlen wersa? ¿Maʼañic ba miʼ mejlel i mel Jehová chaʼan mach wocolic mi la cubin tiʼ melol chuqui wen?

11-13. ¿Chucoch miʼ pijtan Jehová chaʼan miʼ mʌjlel lac chaʼan i cʼunlel tac lac pusicʼal?

¹¹ Cheʼ mi lac ñaʼtan tiʼ pejtelel chuqui melbil i chaʼan Jehová, ti isujm mi lac ñop chaʼan añʌch i pʼʌtʌlel tiʼ melol chuqui jach. Laʼ lac ñaʼtan chaʼan jiñi Qʼuin. Ti jujumujcʼ cʌlʌxix miʼ choc loqʼuel i pʼʌtʌlel. Ila ti Lum cheʼ jach alʌ wistʌl miʼ julel i pʼʌtʌlel, pero jasʌl jach jiñi  chaʼan chʌn cuxulonla mi la cajñel (Salmo 74:16; Isaías 40:26). Jehová miʼ yʌqʼuen i pʼʌtʌlel i wiñicob jaʼel cheʼ bʌ i cʼʌjñibal i chaʼañob (Isaías 40:29). Jin chaʼan, tajol an majqui miʼ cʼajtiben i bʌ chucoch maʼañic chuqui miʼ mel chaʼan mach wocolic mi la cubin ti locʼsʌntel mach bʌ weñic miʼ tilel ti lac pusicʼal.

¹² Jehová libre cʌybil i chaʼañonla chaʼan mi lac yajcan chuqui com lac mel. Miʼ cʌy chaʼan joñonla mi lac ñaʼtan mi la com lac melben i yeʼtel o maʼañic. Mi tsaʼ lac yajca lac jacʼben i tʼan yicʼot mi lac mel muʼ bʌ i mulan, mi lac pʌs chaʼan mi laj cʼuxbin yicʼot chaʼan utsʼat la com miʼ qʼuelonla. Satanás miʼ yʌl chaʼan maʼañic tiʼ wenta Jehová chaʼan miʼ yumañonla. Pero cheʼ mi lac jacʼben i tʼan Dios, mi lac pʌs chaʼan jiñʌch la com miʼ yumañonla. I wen ñuc miʼ qʼuel cheʼ mucʼʌch lac chaʼlen wersa (Job 2:3-5; Proverbios 27:11). Come Jehová maʼañic miʼ cʼunʼesan jiñi mulil tac wocol bʌ mi la cubin, cheʼ mi lac chaʼlen wersa tiʼ cʌyol, mi lac pʌsben lac xucʼtʌlel yicʼot chaʼan jiñʌch laj com miʼ yumañonla.

¹³ Jehová miʼ yʌl chaʼan yom mi lac chaʼlen wersa lac lajiben i melbal (Colosenses 3:12; pejcan 2 Pedro 1:5-7). Yom chaʼan mi lac chaʼlen wersa lac tojʼesan chuqui mi lac ñaʼtan yicʼot am bʌ ti lac pusicʼal (Romanos 8:5; 12:9). Mi mucʼʌch lac chaʼlen wersa laj qʼuextan lac bʌ, tijicña mi caj la cubin.

14, 15. ¿Chuqui miʼ mejlel lac mel chaʼan mi lac taj wem bʌ lac melbal muʼ bʌ i mulan Jehová? (Qʼuele jiñi recuadro « Jiñi Biblia yicʼot oración tsiʼ coltayob ti qʼuextʌyel»).

¹⁴ ¿Chuqui yom mi lac mel chaʼan mi lac taj lac melbal muʼ bʌ i mulan Jehová? Mach yomic mi lac ñaʼtan ti lac bajñelil baqui yom mi lac tojʼesan lac bʌ. Laʼ laj cʌy chaʼan miʼ tojʼesañonla Jehová. Romanos 12:2 miʼ yʌl: «Mach mi laʼ mel bajcheʼ miʼ melob jini añoʼ bʌ ti pañimil. Laʼ qʼuextiyic laʼ pusicʼal ti tsijib chaʼan mi laʼ cʌn chuqui yom Dios. Jiñʌch wen tac bʌ yicʼot tsʼʌcʌl tac bʌ muʼ bʌ i mulan». Chaʼan mi lac ñaʼtan chuqui miʼ mulan Jehová, yom mi laj cʼʌn muʼ bʌ i yʌcʼ chaʼan miʼ coltañonla. Yom mi lac pejcan ti jujumpʼejl qʼuin jiñi Biblia, mi lac wen ñaʼtan muʼ bʌ lac pejcan yicʼot mi laj cʼajtiben chʼujul bʌ i yespíritu (Lucas 11:13; Gálatas 5:22, 23). Mi cheʼʌch mi lac mel, mi caj i coltañonla lac ñaʼtan chuqui miʼ mulan yicʼot mi caj lac ñaʼtan cheʼ bajcheʼ miʼ ñaʼtan. Cheʼ jiñi, Jehová mi caj i ñumen mulan jiñi muʼ bʌ lac ñaʼtan, chuqui mi la cʌl yicʼot mi lac mel. Pero yomʌch mi lac chʌn chaʼlen wersa laj cʌntan lac bʌ (Proverbios 4:23).

¹⁵ Mach cojach jiñi Biblia yom mi lac pejcan ti jujumpʼejl qʼuin, yom mi lac pejcan yicʼot jiñi jun tac loqʼuem bʌ yaʼi, bajcheʼ jiñi revista  Lac Tsictesʌbentel yicʼot ¡Despertad! Cabʌl temaj tac muʼ bʌ i tilel miʼ cʌntesañonla bajcheʼ yom mi lac lajiben i melbal Jehová yicʼot bajcheʼ yom mi lac locʼsan mach bʌ weñic miʼ tilel ti lac pusicʼal. Tajol an temaj tac o texto tac am bʌ ti Biblia lac chaʼañʌch bʌ mi la cubin. Miʼ mejlel lac lot chaʼan mi lac pejcan ti bixetic.

16. ¿Chucoch mach yomic mi la cubin lac chʼijiyemlel mi mach ti orajic woli lac tojʼan majlel?

¹⁶ Machʌch ti orajic miʼ mejlel lac lajiben i melbal Jehová. Jin chaʼan, yom la cujil pijt. Mach la cubin lac chʼijiyemlel mi mach ti orajic woli laj qʼuextʌyel mi la cubin. Tajol yom mi lac tech lac chaʼlen wersa lac mel bajcheʼ miʼ yʌl jiñi Biblia. Pero mi mucʼʌch lac ñumen chaʼlen wersa lac chaʼlen pensar yicʼot mi lac mel bajcheʼ yom Jehová, mach wen wocolic mi caj la cubin chaʼan mi lac ñaʼtan cheʼ bajcheʼ miʼ ñaʼtan yicʼot mi lac mel chuqui toj (Salmo 37:31; Proverbios 23:12; Gálatas 5:16, 17).

17. Mi xucʼulonla ti Jehová, ¿bajcheʼ mi caj la cajñel ti talto bʌ qʼuin?

¹⁷ La comix miʼ cʼotel jiñi qʼuin cheʼ mach xmuliloñixla yicʼot cheʼ tiʼ pejtelel ora mi lac melben i yeʼtel Jehová. Ti jiñi bʌ ora, maʼañix chuqui wocol mi caj la cubin. Mach wocolic mi caj lac chʌn ubin lac lajin Jehová. Pero chaʼan i tojol jiñi mulil, ili ora mucʼʌch i mejlel lac chʼujutesan anquese xmulilontola. Mi mucʼʌch lac chaʼlen wersa ti tojʼan majlel yicʼot tiʼ jacʼol muʼ bʌ i cʌntesañonla Jehová yaʼ ti Biblia, utsʼat mi lac mejlel ti ajñel la quicʼot.

18, 19. ¿Chuqui miʼ pʌs chaʼan añʌch i pʼʌtʌlel jiñi Biblia chaʼan miʼ qʼuextan bajcheʼ yilalonla?

¹⁸ Yaʼ ti ñaxan tac bʌ párrafo tsaʼ la cʌlʌ chaʼan juntiquil hermano wocol bʌ tsiʼ yubi chaʼan miʼ ticʼ i bʌ. Tsiʼ wen ñaʼta tsaʼ bʌ i pejca yaʼ ti Biblia yicʼot tsiʼ chaʼle wersa ti qʼuextʌyel. Cheʼ jaʼel, tsiʼ jacʼʌ jiñi ticʼojel tsaʼ bʌ aqʼuenti ti yambʌ i yermañojob. Anquese tsaʼʌch tsʼitaʼ jalʼa, ti wiʼil tsaʼ sujti ti siervo ministerial. Añix 20 jab i cajel ti eʼtel bajcheʼ anciano yaʼ ti congregación. Pero miʼ yʌl chaʼan yom to miʼ chʌn chaʼlen wersa chaʼan miʼ ñumen weñʼan bajcheʼ yilal.

¹⁹ Joñonla yom mi lac chaʼlen wersa lac ñumen weñʼesan bajcheʼ yilalonla, cheʼ bajcheʼ tsiʼ mele Kevin. Mi cheʼʌch mi lac mel, ñumen wem bʌ i yamigojonla Jehová miʼ cajel (Salmo 25:14). Laʼ lac chaʼlen wersa tiʼ melol muʼ bʌ i mulan, i jiñʌch mi caj i coltañonla. Miʼ mejlel lac ñop chaʼan jiñi Biblia añʌch i pʼʌtʌlel chaʼan miʼ qʼuextan bajcheʼ yilalonla (Salmo 34:8).