1, 2. Tiʼ pejtelel i wiñiconbʌla Dios, ¿chuqui an lac chaʼle wersa lac mʌlben?

CʼΛLΛL cheʼ tiʼ yorajlel Abel, jiñi i wiñiconbʌla Dios an lac chaʼle wersa chaʼan chʌn xucʼul mi la cajñel. Jiñi apóstol Pablo tsiʼ sube jiñi xñoptʼañob hebreojoʼ bʌ chaʼan tsaʼʌch i chaʼleyob wersa tiʼ cuchol cabʌl wocol chaʼan utsʼat miʼ qʼuejlelob ti Jehová i miʼ yʌqʼuentelob bendición (Hebreos 10:32-34). Pablo tsiʼ yʌlʌ chaʼan jiñi xñoptʼañob lajalobʌch bajcheʼ jiñi xʼajñelob yicʼot xjatsʼob ti Grecia mucʼoʼ bʌ ti wersa chaʼan miʼ mʌlob (jotob) (Hebreos 12:1, 4). Jiñi xñoptʼañonbʌla jaʼel woliyonla (choncolonla) ti ajñel chaʼan mi lac taj laj cuxtʌlel maʼañic bʌ miʼ jilel. Pero an yomoʼ bʌ chaʼan mi lac yajlel i mi lac sʌt lac tijicñʌyel yicʼot jiñi lac pijtaya subebil bʌ i chaʼañonla Jehová.

² Jiñi ñumen tsʌts bʌ jiñʌch cheʼ woliyonla (yʌquelonla) ti jatsʼ la quicʼot Satanás yicʼot i pañimil (mulawil) (Efesios 6:12).  Mach yomic mi laj cʌy chaʼan jiñi i cʌntesa, i ñaʼtʌbal yicʼot i tsucu melbal ili pañimil, bajcheʼ jiñi tsʼiʼlel, cʼujts, lembal yicʼot droga tac, miʼ ticʼlañonla. Cheʼ jaʼel, yom mi lac chaʼlen wersa chaʼan maʼañic miʼ mʌlbeñonla i cʼunlel lac pusicʼal o yan tac bʌ laj cʼunlel (2 Corintios 10:3-6; Colosenses 3:5-9).

3. ¿Bajcheʼ miʼ chajpañonla Jehová chaʼan mi lac mʌlben laj contrajob?

³ Pero ¿muʼ ba i mejlel lac mʌlben jiñi pʼʌtʌl bʌ laj contrajob? Mucʼʌch, pero ili mach cʼuñic. Pablo tsiʼ yʌlʌ chaʼan lajalʌch bajcheʼ juntiquil xjatsʼ: «Mach cheʼic jach mucʼon bajcheʼ mic lolon sʌcʌ jatsʼ icʼ pero mucʼon ti wersa jatsʼ yubil cheʼ mucʼon ti wersa ti i troñel lac Yum» (1 Corintios 9:26, Jini wen bʌ tʼan). Cheʼ bajcheʼ juntiquil xjatsʼ, yom mi lac chaʼlen wersa lac mʌlbeñob, i Jehová miʼ coltañonla yicʼot miʼ chajpañonla. ¿Bajcheʼ miʼ mel? Miʼ cʼʌn jiñi Biblia, jiñi jun tac loqʼuem bʌ yaʼi, jiñi tempa bʌ yicʼot colem tempa bʌ tac. ¿Mucʼʌch ba laj cʼʌn tiʼ pejtelel iliyi? Mi mach cheʼiqui, maʼañic woli lac chaʼlen wersa chaʼan mi lac mʌlben laj contrajob. Lajalonla yubil bajcheʼ juntiquil xjatsʼ cheʼ jach bʌ miʼ toʼol jʌmtsʼun i cʼʌb.

4. ¿Chuqui yom mi lac mel chaʼan maʼañic miʼ mʌlbeñonla jiñi jontolil?

⁴ Yom mi lac chʌcʌ qʼuel lac bʌ. ¿Chucoch? Come cheʼ mach yʌxʌlic laj co o cʼuñonla, jiñi laj contrajob miʼ mejlel i bajbeñoñobla. Jiñi Biblia miʼ subeñonla: «Mach a wʌcʼ a bʌ tiʼ jacʼol jontolil. Mele chuqui wen chaʼan miʼ mʌjlel a chaʼan» (Romanos 12:21). Ili tʼan yom i yʌl chaʼan mucʼʌch i mejlel lac mʌl cheʼ mi lac chʌn chaʼlen wersa. Pero jiñi Satanás, i pañimil yicʼot laj cʼunlel miʼ mejlel i mʌlbeñonla mi tsaʼ lac juʼsa lac bʌ yicʼot mi laj cʌy jatsʼ. Jin chaʼan, mach yomic mi lac boʼoyel. Mach la cubin lac chʼijiyemlel mi yomic mi lac lujbʼan (1 Pedro 5:9).

5. a) Mi la com chaʼan utsʼat miʼ qʼuelonla Jehová, ¿chuqui yom mi laj cʼajtesan? b) ¿Majquiyob miʼ taj ti tʼan jiñi Biblia?

⁵ Yom mi laj cʼajtesan chaʼan woliyonla ti jatsʼ come la com chaʼan utsʼat miʼ qʼuelonla Dios. Ti Hebreos 11:6 miʼ yʌl: «Majqui jach yom i cʌn Dios, wersa miʼ ñop mi an Dios, come jiñʌch muʼ bʌ i yʌqʼuen i chobejtʌbal majqui jach miʼ tsajcan». Wen tsiquil chaʼan yom mi lac chaʼlen wersa mi la com chaʼan Jehová miʼ yʌqʼueñonla i bendición (Hechos 15:17). Jiñi Biblia miʼ taj ti tʼan cabʌl wiñicob yicʼot xʼixicob tsaʼ bʌ i chaʼleyob wersa ti jumpʼejl i pusicʼal. Tsaʼ bʌ i meleyob bajcheʼ iliyi jiñʌch Jacob, Raquel, José yicʼot Pablo. Tsiʼ tajayob i chʼijiyemlel yicʼot yan tac bʌ wocol. Pero Dios tsiʼ yʌqʼueyob i bendición come tsiʼ chaʼleyob wersa. Ili miʼ pʌsbeñonla chaʼan mi mucʼʌch lac chaʼlen wersa Jehová mi caj i yʌqʼueñonla i bendición. Laʼ laj qʼuel bajcheʼ miʼ mejlel lac tsajcan jiñi wem bʌ i melbalob.

6. a) ¿Chucoch tsiʼ chʌn chaʼle wersa Jacob? b) ¿Chuqui tsiʼ taja? (Qʼuele jiñi dibujo am bʌ tiʼ tejchibal).

⁶ Jacob xucʼul tsaʼ ajñi i tsiʼ chʌn chaʼle wersa. ¿Chucoch? Come tsiʼ cʼuxbi Jehová yicʼot tsiʼ qʼuele ti ñuc cheʼ i yamigo. Ti jumpʼejl i pusicʼal tsiʼ ñopo chaʼan Jehová mi caj i yʌqʼuen i bendición i pʼolbalob (Génesis 28:3, 4). Cheʼ bʌ Jacob añix lʌcʼʌ 100 i jabilel, tsiʼ contraji juntiquil ángel chaʼan miʼ tajben i bendición Jehová (pejcan Génesis 32:24-28). ¿Bajcheʼ tsaʼ mejli i contrajin juntiquil ángel? Mach chaʼañic  wen pʼʌtʌl. Tsaʼ mejli i mel come tsiʼ yʌlʌ tiʼ pusicʼal chaʼan miʼ chaʼlen wersa i tajben i bendición Jehová. I Jehová tsaʼʌch i yʌqʼue. Jin chaʼan, tsiʼ yotsʌbe i cʼabaʼ ti Israel, ili yom i yʌl «Muʼ bʌ i chaʼlen wersa tiʼ tojlel Dios». Jehová tsiʼ qʼuele ti utsʼat i tsiʼ yʌqʼue i bendición, i jiñʌch la com bʌ lac taj jaʼel.

7. a) ¿Chuqui tsiʼ ñusa Raquel? b) ¿Chuqui tsiʼ mele, i chuqui tsiʼ taja?

⁷ Raquel jiñʌch i yijñam Jacob. Tsiʼ mulaj i qʼuel jaʼel bajcheʼ mi caj i tsʼʌctesan i tʼan Jehová tiʼ tojlel i ñoxiʼal. Pero an jumpʼejl wocol. Raquel maʼañic miʼ mejlel i taj i yalobil, i chʼijiyemtic jax cheʼ bʌ añob bajcheʼ jiñi. ¿Chuqui tsiʼ mele Raquel? Maʼañic tsiʼ liji i bʌ. Tsiʼ chʌn pejca Jehová ti oración. Jehová tsaʼʌch i ñʌchʼta, i ti wiʼil tsiʼ yʌqʼue i taj i yalobilob. Jin chaʼan, ti jumpʼejl bʌ qʼuin tsiʼ yʌlʌ chaʼan tsiʼ chaʼle wersa tiʼ pejtelel i pʼʌtʌlel. Tsiʼ yʌlʌ: «Tsaʼ mʌjli c chaʼan» (Génesis 30:8, 20-24).

8. a) ¿Chuqui tsiʼ ñusa José? b) ¿Chuqui mi laj cʌn tiʼ tojlel?

⁸ Cheʼ bajcheʼ tsiʼ mele Jacob yicʼot Raquel tsaʼʌch i colta José cheʼ bʌ tsiʼ taja wocol tac. Cheʼ bʌ José 17 i jabilel, jiñi i yerañob tsiʼ choñoyob bajcheʼ mozo come tsiʼ michʼ qʼueleyob. Ti wiʼil, cabʌl jabil tsaʼ otsʌnti ti cárcel yaʼ ti Egipto anquese maʼañic i mul (Génesis 37:23-28; 39:7-9, 20, 21). Pero maʼañic tsiʼ yubi i chʼijiyemlel, maʼañic tsaʼ michʼa yicʼot maʼañic tsiʼ ñaʼta i sutqʼuin tsaʼ bʌ melbenti. ¿Chucoch? Come tsiʼ yʌcʼʌ i ñaʼtʌbal ti Jehová  (Levítico 19:18; Romanos 12:17-21). Cheʼ bajcheʼ tsiʼ mele José mi laj cʌn chaʼan yom mi lac chʌn chaʼlen wersa anquese wocol tsaʼ lac ñusa cheʼ bʌ alobontola o maʼañix i tsʼʌcal lac wocol mi laj qʼuel. Pero miʼ mejlel la cʌcʼ ti lac pusicʼal chaʼan Jehová mi caj i yʌqʼueñonla i bendición cheʼ mi lac chʌn chaʼlen wersa (pejcan Génesis 39:21-23).

9. ¿Bajcheʼ miʼ mejlel lac lajin Jacob, Raquel yicʼot José?

⁹ Tajol an tsʌts tac bʌ wocol yom bʌ mi laj cuch jaʼel. Tajol an lac ticʼlʌntel, la cʌjlel, lac wajlentel o laj contrajintel. Pero mach lac taj lac chʼijiyemlel. Laʼ laj cʼajtesan chuqui tsiʼ colta Jacob, Raquel yicʼot José chaʼan tijicña miʼ chʌn melbeñob i yeʼtel (troñel) Jehová. Tsiʼ wen qʼueleyob ti ñuc Jehová bajcheʼ i yamigo, i tsaʼʌch aqʼuentiyob i pʼʌtʌlel yicʼot bendición. Tsiʼ chʌn chaʼleyob wersa yicʼot tsiʼ chʌn meleyob cheʼ bajcheʼ tsiʼ cʼajtiyob ti oración. Chumuloñixla tiʼ yujtibal qʼuin, jin chaʼan yom chʌn pʼʌtʌl jiñi lac pijtaya chaʼan ti talto bʌ qʼuin. ¿Mucʼʌch ba lac chaʼlen wersa ti jumpʼejl lac pusicʼal chaʼan mi lac tajben i bendición Jehová?

10, 11. a) ¿Chucoch yom mi lac chaʼlen wersa chaʼan mi lac tajben i bendición Dios? b) ¿Chuqui mi caj i coltañonla chaʼan mi lac mel chuqui tac wen?

¹⁰ ¿Chucoch yom mi lac chaʼlen wersa chaʼan mi lac tajben i bendición Dios? An cabʌl chucoch. An xñoptʼañob woliyoʼ bʌ ti wersa chaʼan maʼañic miʼ ñaʼtañob mach tac bʌ weñic, chaʼan ñumen wen miʼ qʼuelob jiñi subtʼan, i an chaʼan bʌ tiʼ caj cʼamʌjel o chaʼan i bajñel jach miʼ yubiñob i bʌ. Cheʼ jaʼel, an wocol bʌ miʼ yubiñob chaʼan miʼ ñusʌbeñob i mul yambʌlob. Anquese añix jabil cajel lac melben i yeʼtel Jehová o maxto, yom mi lac chaʼlen wersa laj cʌy jiñi muʼ bʌ i yʌqʼueñonla wocol tiʼ melol i yeʼtel Jehová. Laʼ laj cʼajtesan chaʼan Jehová miʼ yʌqʼuen bendición jiñi xucʼul bʌ.

¹¹ Tiʼ sujm, wocolʌch cheʼ xñoptʼañonla yicʼot chaʼan mi lac mel chuqui wen, ñumento mi woliyonla ti wersa chaʼan mi lac locʼsan chuqui bibiʼ ti lac pusicʼal (Jeremías 17:9). Mi cheʼ añonla bajcheʼ jiñi, laʼ laj cʼajtiben chʼujul bʌ i yespíritu Jehová. Jiñi oración yicʼot jiñi chʼujul bʌ espíritu miʼ mejlel i coltañonla chaʼan mi lac mel chuqui wen. Cheʼʌch miʼ mejlel lac tajben i bendición Dios. Yom mi la cʌl ti lac pusicʼal chaʼan cheʼʌch mi caj lac mel cheʼ bajcheʼ mi laj cʼajtin ti oración. Laʼ lac chaʼlen wersa chaʼan ti jujumpʼejl qʼuin mi lac pejcan lac Biblia, i laʼ lac locʼsʌben i yorajlel chaʼan mi lac pejcan ti lac bajñelil yicʼot mi lac mel lac chʼujutesaya ti familia (pejcan Salmo 119:32).

12, 13. ¿Chuqui tsiʼ colta chaʼtiquil xñoptʼañob chaʼan miʼ mejlel i ticʼob bʌ?

¹² Yicʼot i coltaya jiñi Biblia, jiñi jun tac loqʼuem bʌ yaʼi yicʼot jiñi chʼujul bʌ espíritu, an cabʌl hermanojob tsaʼix bʌ mejli i cʌyob mach bʌ wentaquic. Juntiquil xcolel tsiʼ pejca jiñi temaj «¿Bajcheʼ miʼ mejlel a locʼsan ti a pensar jiñi mach bʌ weñic?» yaʼ ti ¡Despertad! 8 i chaʼan diciembre, 2003. ¿Chuqui tsiʼ mele? Tsiʼ yʌlʌ: «Mic chaʼlen wersa chaʼan maʼañic mi cʌcʼ ti ochel chuqui mach bʌ wentaquic tic pensar. Cheʼ bʌ mic taj c pejcan chaʼan ‹an cabʌl wocol bʌ miʼ yubiñob tiʼ cʌyol mach bʌ wentaquic›, mach c bajñelic mi cubin c bʌ». Tsiʼ taja ti tʼan jaʼel jiñi temaj «¿Utsʼat ba miʼ qʼuel Dios cheʼ mi laj  qʼuextan majquiyonla?», tsaʼ bʌ loqʼui yaʼ ti ¡Despertad! 8 i chaʼan octubre, 2003. Ila tsiʼ taja i qʼuel chaʼan cabʌl xñoptʼañob añob i ‹wocol tiʼ bʌcʼtal› ti bele ora (2 Corintios 12:7). Pero tsiʼ qʼuele jaʼel chaʼan woliyob ti wersa chaʼan sʌc miʼ chʌn ajñelob yicʼot miʼ ñaʼtañob chaʼan wen miʼ cajel ti talto bʌ qʼuin. Jiñi xcolel tsiʼ yʌlʌ: «Xucʼulʌch mic mejlel ti ajñel mi cubin ti jujumpʼejl qʼuin. Mic wen aqʼuen wocolix i yʌlʌ Jehová cheʼ miʼ cʼʌn i coltañon i yorganización chaʼan utsʼat mic ñusan ti jujumpʼejl qʼuin ti ili pañimil».

¹³ Laʼ laj qʼuel jaʼel tiʼ tojlel juntiquil hermana chumul bʌ ti Estados Unidos. Tsiʼ yʌlʌ: «Com cʌqʼueñetla wocolix laʼ wʌlʌ come tiʼ yorajlel jach mi laʼ wʌqʼueñon lon i cʼʌjñibal bʌ lon c chaʼan. Tiʼ pejtelel ora mic ñaʼtan chaʼan ili temaj tac tsʼijbubil tic tojlel. Cabʌl jabil tsaʼ c chaʼle wersa chaʼan mic locʼsan tic tojlel muʼ bʌ i tsʼaʼlen Jehová. An i tajol maʼañix chuqui com. Cujil chaʼan Jehová miʼ ñusʌbeñonla come an i yutslel, pero mic ñaʼtan chaʼan maʼañic miʼ mejlel i coltañon come an chuqui mach bʌ weñic tic tojlel i maʼañic mic junyajlel cʌy. Ili añʌch i wen tʌcʼlayon». Pero tsiʼ pejca jiñi temaj «¿Ti jumpʼejl baʼ pusicʼal a wom a cʌn Jehová?», yaʼ ti La Atalaya 15 i chaʼan marzo, 2013. ¿Bajcheʼ yubil tsiʼ yubi i bʌ? Tsiʼ yʌlʌ: «Tsaʼ c chʼʌmbe isujm chaʼan Jehová yomʌch i coltañon».

14. a) ¿Chuqui jiñi yujil bʌ Pablo? b) ¿Bajcheʼ miʼ mejlel lac mʌlben laj cʼunlel?

¹⁴ (Pejcan Romanos 7:21-25). Pablo wen yujil chaʼan wocolʌch tiʼ cʌyol mach bʌ weñic ti lac tojlel yicʼot yan tac bʌ laj cʼunlel. Pero yujil jaʼel chaʼan mucʼʌch i mejlel i mʌl cheʼ miʼ melben oración Jehová, miʼ yʌcʼ ti ñuc i coltaya yicʼot miʼ yʌcʼ i ñopoñel (chʼujbiya) tiʼ cuxtʌlel Jesús. ¿Ixcu joñonla? ¿Muʼ ba mejlel laj cʌy laj cʼunlel tac jaʼel? Mucʼʌch, yom mi lac mel cheʼ bajcheʼ tsiʼ mele Pablo, mi la cʌcʼ ti ñuc i cuxtʌlel tsaʼ bʌ i yʌcʼʌ Jesús yicʼot ti jumpʼejl lac pusicʼal mi lac ñop Jehová i mach ti bajñel lac pʼʌtʌlelic.

15. ¿Bajcheʼ miʼ coltañonla Jehová chaʼan chʌn xucʼul mi la cajñel yicʼot mi laj cuch wocol tac?

¹⁵ An i tajol, Jehová miʼ cʌy chaʼan mi lac pʌsben chaʼan an chuqui mi lac wen cʼojoʼtan. Jumpʼejl ejemplo, ¿chuqui mi caj lac mel mi an majqui wen cʼam ti lac familia o woliʼ toʼol ticʼlʌntel? ¿Chuqui mi caj lac mel mi cheʼ mi la cujtel? Mi ti jumpʼejl lac pusicʼal mi lac ñop Jehová, mi caj lac wen cʼajtiben i coltaya chaʼan chʌn xucʼul mi la cajñel, chʌn tijicñayonla yicʼot utsʼat mi la cajñel la quicʼot (Filipenses 4:13, TNM). An ejemplo tac chaʼan xñoptʼañob ti wajali yicʼot ili ora muʼ bʌ i pʌs chaʼan cheʼ mi laj cʼajtiben Jehová lac pʼʌtʌlel yicʼot lac chʼejlel chaʼan mi laj cuch, mucʼʌch i yʌqʼueñonla.

16, 17. ¿Chuqui yom mi lac chʌn mel?

¹⁶ Satanás yom cheʼ chʼijiyemonla yicʼot cheʼ mi laj cʼunʼesan lac bʌ. Jin chaʼan, ti jumpʼejl lac pusicʼal yom mi la cʌl chaʼan mi lac chʌn mel «chuqui utsʼat» (1 Tesalonicenses 5:21). Jiñi Satanás, jiñi jontol bʌ i pañimil yicʼot jiñi muʼ bʌ lac mulan mach bʌ wentaquic, mucʼʌch i mejlel lac mʌlben. Cheʼ mi lac ñop chaʼan Jehová mi caj i pʼʌtʼesañonla yicʼot mi caj i coltañonla, mucʼʌch caj lac mʌl (2 Corintios 4:7-9; Gálatas 6:9).

¹⁷ Laʼ lac chʌn chaʼlen wersa yicʼot mach yomic mi lac lujbʼan. Miʼ mejlel lac ñop chaʼan Jehová mi caj i yʌqʼueñonla i bendición tiʼ pejtelel ora (Malaquías 3:10).