1, 2. a) ¿Chuqui woliʼ ñusan cabʌlob ili ora, i chuqui miʼ mejlel ti ujtel? b) ¿Chuqui miʼ yʌqʼueñonla laj cʌn Isaías 41:10, 13?

JUNTIQUIL precursora regular ñujpuñem bʌ yicʼot juntiquil anciano miʼ yʌl: «Anquese wen bʌxon tiʼ chaʼan bʌ Dios, añix ora maʼañic miʼ mejlel j cʌy jiñi cʌlʌx pensal. Maʼañic mic wen mejlel ti wʌyel, an j cʼamʌjel i an i tajol mach weñic bajcheʼ mic mel tiʼ tojlel yañoʼ bʌ. An i tajol maʼañix chuqui com».

² ¿Muʼ ba i mejlel lac ñaʼtan bajcheʼ yubil miʼ yubin i bʌ ili hermana? Tiʼ sujm, chumulonla tiʼ pañimil (mulawil) Satanás. Jin chaʼan cabʌl jax chuqui miʼ tilel ti lac tojlel. Jiñi muʼ tac bʌ laj cʼojoʼtan miʼ mejlel i yʌqʼueñonla lac chʼijiyemlel o miʼ cʼuñʼesañonla, cheʼ bajcheʼ jumpʼejl carro muʼ bʌ i cʌytʌl ti ocʼol i maʼañic miʼ mejlel ti loqʼuel (Proverbios 12:25). ¿Chuqui miʼ mejlel i yʌcʼonla ti cʌlʌx pensal? Tajol chaʼan tsaʼ chʌmi juntiquil muʼ bʌ lac wen cʼuxbin, tajol wen cʼamonla o an laj contrajintel. O tajol woli (choncol) lac chaʼlen wersa la cʌqʼuen i cʼʌjñibal bʌ i chaʼan lac familia come mach wen añic eʼtel (troñel). Cheʼ cabʌl jax bajcheʼ yubil mi la cubin miʼ mejlel i cʼuñʼesañonla yicʼot i chilbeñonla lac tijicñʌyel. Pero jiñi i Tʼan Dios miʼ yʌqʼueñonla laj qʼuel chaʼan Jehová chajpʌbil chaʼan miʼ yʌqʼueñonla i cʼʌb i miʼ coltañonla (pejcan Isaías 41:10, 13).

3, 4. a) Cheʼ bʌ jiñi Biblia miʼ taj ti tʼan laj cʼʌb, ¿chuqui yom i yʌl? b) ¿Chuqui miʼ mejlel i cʼunʼesan laj cʼʌb?

 ³ Jiñi Biblia cabʌl baqui miʼ taj ti tʼan am bʌ ti lac bʌcʼtal chaʼan miʼ yʌl lac melbal tac o bajcheʼ yilal juntiquil quixtañu. Jumpʼejl ejemplo, cabʌl baqui miʼ taj ti tʼan jiñi laj cʼʌb. Cheʼ bʌ miʼ yʌjlel chaʼan miʼ pʼʌtʼesʌbentel i cʼʌb juntiquil quixtañu, tajol yom i yʌl chaʼan miʼ ñuqʼuesʌbentel i pusicʼal yicʼot miʼ pʼʌtʼesʌntel, i chajpʌbilix chaʼan miʼ mel i yeʼtel. Jumpʼejl ejemplo, jiñi tʼan «pʼʌtʼesa» yicʼot «coltayob» am bʌ ti 1 Samuel 23:16 yicʼot ti Esdras 1:6 tsaʼ ñaxan tsʼijbunti wajali bajcheʼ «i pʼʌtʼesʌntel laj cʼʌb». Miʼ yʌcʼ ti ñaʼtʌntel jaʼel chaʼan wen chuqui miʼ ñaʼtan jiñi quixtañu yicʼot añʌch i pijtaya.

⁴ Jiñi Biblia miʼ yʌl jaʼel chaʼan juntiquil quixtañu miʼ cʼunʼan i cʼʌb. Ili yom i yʌl chaʼan chʼijiyem yicʼot maʼañix i pijtaya miʼ yubin (2 Crónicas 15:7; Hebreos 12:12). Mi boʼoyemonla mi la cubin o mach pʼʌtʌlix añonla la quicʼot Jehová, jiñʌch muʼ bʌ mejlel i cʼunʼesan laj cʼʌb. ¿Chuqui miʼ mejlel i yʌqʼueñonla lac pʼʌtʌlel chaʼan mi laj cuch yicʼot chʌn tijicñayonla?

5. a) ¿Bajcheʼ miʼ mejlel la cubin lac bʌ cheʼ bʌ an lac wocol, pero chuqui yom mi laj cʼajtesan? b) ¿Chuqui mi caj laj qʼuel ti ili temaj?

⁵ (Pejcan Sofonías 3:16, 17). Mach yomic mi lac bʌcʼñan o mi laj cʼunʼan cheʼ mi lac taj wocol. Lajalʌch bajcheʼ woli (yʌquel) la cʌcʼ ti cʼunʼan laj cʼʌb. Yom mi laj cʼajtesan chaʼan jiñi lac Tat Jehová miʼ wen cʼuxbiñonla. Yom chaʼan mi laj cʌyben tiʼ cʼʌb tiʼ pejtelel chuqui mi laj cʼojoʼtan (1 Pedro 5:7). Jehová miʼ cʌntañonla cheʼ bajcheʼ tsiʼ mele tiʼ tojlel israelob. Jiñi Biblia miʼ yʌl: «Maʼanic woli ti jilel i pʼʌtʌlel lac Yum. Wen yujil i coltañetla». Ili yom i yʌl chaʼan ti bele ora chajpʌbil chaʼan miʼ coltan jiñi xucʼul bʌ i wiñicob (Isaías 59:1). Ti ili temaj mi caj laj qʼuel uxpʼejl ejemplo am bʌ ti Biblia. Mi caj laj cʌn chaʼan Jehová yom yicʼot mucʼʌch i mejlel i pʼʌtʼesan i wiñicob chaʼan miʼ melob chuqui miʼ mulan anquese añob tsʌts bʌ i wocol. Mi caj laj qʼuel jaʼel bajcheʼ miʼ pʼʌtʼesañonla ili ejemplo tac.

6, 7. ¿Chuqui miʼ mejlel laj cʌn tiʼ tojlel jiñi israelob cheʼ tsiʼ mʌlbeyob jiñi amalecob?

⁶ Cheʼ bʌ maxto jalic tsaʼ locʼsʌntiyob ti Egipto jiñi israelob, jiñi amalecob tsiʼ contrajiyob. Moisés tsiʼ sube Josué chaʼan miʼ chʼʌm tiʼ wenta jiñi israelob cheʼ woliyob ti guerra. Cheʼ jiñi, Moisés tsaʼ letsi yicʼot Aarón yicʼot yambʌ wiñic i cʼabaʼ Hur ti jumpʼejl bujtʌl. Yaʼʌch tsaʼ mejli i ñajti qʼuel baqui woliyob ti guerra. ¿Tsaʼ ba putsʼi tiʼ caj bʌqʼuen? Maʼañic.

⁷ Moisés an chuqui tsiʼ chajpa chaʼan miʼ jisʌntel jiñi amalecob. Tsiʼ chʼʌmʌ i barateʼ yicʼot tsiʼ chʼuyu ti chan. Cheʼ bʌ chʼuyul i chaʼan jiñi barateʼ, Jehová miʼ yʌqʼuen i pʼʌtʌlel jiñi israelob. Pero cheʼ bʌ Moisés miʼ lujbʼan i miʼ juʼsan i cʼʌb, jiñi israelob mach pʼʌtʌlobic. Jin chaʼan Aarón yicʼot Hur ti orajach tsiʼ coltayob Moisés. Jiñi Biblia miʼ yʌl: «Tsiʼ yʌcʼʌyob xajlel chaʼan miʼ buchtan. Aarón yicʼot Hur tsiʼ chʼuybeyob i cʼʌb Moisés, jujuntiquil ti jujunwejl. Cheʼ jini chʌn sʌtsʼʌl tsaʼ cʌle i cʼʌb cʼʌlʌl tsaʼ bʌjli qʼuin». Jiñi israelob tsaʼʌch i mʌlʌyob (jotoyob) come Dios tsiʼ yʌqʼueyob i pʼʌtʌlel (Éxodo 17:8-13).

8. a) ¿Chuqui tsiʼ mele jiñi rey Asa cheʼ bʌ jiñi etiopejob tsiʼ contraji Judá? b) ¿Bajcheʼ miʼ mejlel lac lajin i melbal jiñi rey Asa?

⁸ Cheʼ tiʼ yorajlel jiñi rey Asa (Asá), Jehová tsiʼ cʼʌñʌ i pʼʌtʌlel yicʼot tsiʼ colta i tejclum. Asa yom miʼ chaʼlen guerra tiʼ contra jiñi etíope i cʼabaʼ Zera, i jiñʌch ñumen on bʌ i wiñicob. An jumpʼejl millón i soldadojob yicʼot wen chajpʌbilob, lʌcʼʌ chaʼyajl to i ñumelal bajcheʼ i chaʼan Asa. ¿Chuqui tsiʼ mele? ¿Tsaʼ ba i wen taja i  chʼijiyemlel o tsiʼ chaʼle bʌqʼuen? ¿Tsaʼ ba i cʼunʼesa i bʌ? Maʼañic. Ti ora jach tsiʼ cʼajtibe i coltaya Jehová. Yambʌyic soldadojob, tajol tsiʼ ñaʼtayob chaʼan mach mejlic i mʌlob. Pero jiñi Biblia miʼ yʌl chaʼan «Dios miʼ mejlel i mel tiʼ pejtelel» (Mateo 19:26). Dios tsiʼ cʼʌñʌ jiñi ñuc bʌ i pʼʌtʌlel i «tsiʼ jisa jini etiopejob tiʼ tojlel Asa». Tiʼ pejtelel ora, Asa ti jumpʼejl i pusicʼal tsiʼ melbe i yeʼtel Jehová (2 Crónicas 14:8-13; 1 Reyes 15:14).

9. a) ¿Chuqui tsiʼ qʼuele Nehemías cheʼ bʌ tsaʼ cʼoti yaʼ ti Jerusalén, i chuqui tsiʼ mele? b) ¿Bajcheʼ tsiʼ jacʼbe Jehová i yoración Nehemías?

⁹ Wʌle laʼ laj qʼuel tiʼ tojlel Nehemías. Cheʼ bʌ tsaʼ majli ti Jerusalén, jiñi yan tac bʌ país woliʼ bʌcʼtesan jiñi judíojob chaʼan miʼ cʌy i melob i tsʼajquil Jerusalén. Jiñi tejclum maʼañic bajcheʼ mʌcʌl, i jiñi judíojob maʼañix chuqui yomob. ¿Bajcheʼ yubil tsiʼ yubi i bʌ Nehemías? ¿Tsaʼ ba i taja i chʼijiyemlel yicʼot tsiʼ cʼunʼesa i bʌ? Maʼañic. Tsiʼ cʼajtibe i coltaya Jehová cheʼ bajcheʼ ñʌmʌl i mel, cheʼ bajcheʼ tsiʼ mele Moisés, Asa yicʼot yambʌlob. Nehemías tsaʼʌch i sʌcla i coltʌntel ti Jehová. Tsiʼ pejca ti oración, i tsaʼʌch jacʼbenti. ¿Bajcheʼ? Jehová tsiʼ cʼʌñʌ ‹ñuc bʌ i pʼʌtʌlel› chaʼan miʼ pʼʌtʼesan jiñi judíojob (pejcan Nehemías 1:10; 2:17-20; 6:9). Ixcu joñonla, ¿muʼ ba lac ñop chaʼan Jehová miʼ pʼʌtʼesañonla ti jiñi ‹ñuc bʌ i pʼʌtʌlel›?

10, 11. a) ¿Chuqui miʼ mel Satanás chaʼan mi laj cʼunʼan? b) ¿Bajcheʼ miʼ pʼʌtʼesañonla Jehová? c) Alʌ bajcheʼ coltʌbil i chaʼañet jiñi cʌmbil bʌ a chaʼan ti Jehová.

¹⁰ La cujil chaʼan Satanás mi caj i chʌn ñop i cʼuñʼesañonla. Chaʼan miʼ waʼchocoñonla, mi caj i cʼʌn jiñi lot yicʼot yumʌlob, jiñi ñaxañoʼ bʌ ti ñopbalʌl yicʼot jiñi muʼ bʌ i cʌy i ñopob isujm bʌ Dios. ¿Chucoch? Come yom chaʼan mi laj cʌy lac sub jiñi wen tʼan. Pero Jehová yom yicʼot miʼ mejlel i coltañonla. Miʼ pʼʌtʼesañonla ti chʼujul bʌ i yespíritu (1 Crónicas 29:12). Mi la com lac mʌlben jiñi Satanás yicʼot i pañimil, ñuc i cʼʌjñibal cheʼ mi laj cʼajtiben chʼujul bʌ i yespíritu Dios (Salmo 18:39; 1 Corintios 10:13). Jehová miʼ cʼʌn i Tʼan chaʼan miʼ pʼʌtʼesañonla jaʼel, i mi la cʌqʼuen wocolix i yʌlʌ. Laʼ cu lac ñaʼtan tiʼ pejtelel chuqui mi laj cʌn ti jujumpʼejl uw. Laʼ laj cʼajtesan jaʼel muʼ bʌ i yʌl Zacarías 8:9, 13 (pejcan). Ili tʼan tsaʼ ajli cheʼ bʌ wolito i mejlel jiñi templo yaʼ ti Jerusalén, pero miʼ mejlel i ñuqʼuesan lac pusicʼal.

¹¹ Jehová miʼ pʼʌtʼesañonla jaʼel yaʼ ti tempa bʌ tac, ti colem tempa bʌ tac yicʼot ti cʌntesʌntel tac muʼ bʌ i chajpʌntel. Jiñi muʼ bʌ laj cʌn miʼ coltañonla chaʼan tiʼ wenlel lac pusicʼal mi lac melben i yeʼtel Dios, mi lac taj chuqui la com yicʼot mi lac mel jiñi eʼtel aqʼuebilon bʌ la ti Dios (Salmo 119:32). ¿Wen la com ba laj cʼʌn lac pʼʌtʌlel muʼ bʌ i yʌqʼueñonla Jehová cheʼ miʼ cʌntesañonla?

12. ¿Chuqui yom mi lac mel chaʼan chʌn pʼʌtʌlonla?

¹² Tsaʼix laj qʼuele chaʼan Jehová tsiʼ colta i wiñicob tiʼ tojlel amalecob yicʼot etiopejob. Cheʼ jaʼel, tsiʼ pʼʌtʼesa Nehemías yicʼot jiñi judíojob chaʼan miʼ chaʼ melbeñob i tsʼajquil Jerusalén. Jehová mucʼʌch caj i yʌqʼueñonla lac pʼʌtʌlel jaʼel chaʼan mi lac chʌn chaʼlen subtʼan anquese an wocol, laj contrajintel o mach wen yomobic i ñʌchʼtan jiñi wen tʼan (1 Pedro 5:10). Isujm, Jehová maʼañic mi caj i jisan lac wocol tac ti jumpʼejl milagro. Añʌch chuqui yom mi lac mel jaʼel mi pʼʌtʌl la com ajñel. ¿Chuquiyes? Yom mi lac pejcan jiñi Biblia ti jujumpʼejl qʼuin, mi lac chajpan lac bʌ yicʼot mi lac majlel ti tempa bʌ ti jujumpʼejl semana, mi lac bajñel pejcan lac Biblia, mi lac mel lac chʼujutesaya ti familia yicʼot mi laj cʼajtiben i coltaya Jehová. Mach laj cʌy chaʼan chuqui jach miʼ mʌctañonla tiʼ cʼʌñol pejtelel muʼ bʌ i  yʌqʼueñonla Jehová chaʼan miʼ pʼʌtʼesañonla. Mi an baqui woli lac jubel mi la cubin, laʼ laj cʼajtiben i coltaya Jehová. Cheʼʌch mi caj laj qʼuel bajcheʼ miʼ pʼʌtʼesañonla i yespíritu yicʼot miʼ ñijcañonla chaʼan mi lac mel muʼ bʌ i subeñonla (Filipenses 2:13). Ixcu joñonla, ¿muʼ ba i mejlel lac pʼʌtʼesʌben i cʼʌb yambʌlob?

13, 14. a) ¿Chuqui tsiʼ pʼʌtʼesa juntiquil hermano cheʼ bʌ tsaʼ chʌmi i yijñam? b) ¿Chuqui miʼ mejlel lac mel chaʼan mi lac pʼʌtʼesan yambʌlob?

¹³ Tiʼ pejtelel pañimil, Jehová miʼ yʌqʼueñonla yonlel hermanojob muʼ bʌ i yʌcʼoñobla ti ñuc yicʼot miʼ ñuqʼuesañob lac pusicʼal. Jiñi apóstol Pablo tsiʼ yʌlʌ: «Pʼʌtʼesan cʼun bʌ laʼ cʼʌb. Pʼʌtʼesan cʼun bʌ laʼ pix. Pʌtʌ toj bʌ bij» (Hebreos 12:12, 13). Jiñi ñaxam bʌ xñoptʼañob ti wajali an cabʌl tsaʼ bʌ i tajayob i coltʌntel ti yambʌ hermanojob. Cheʼʌch miʼ yujtel jaʼel ili ora. Laʼ laj qʼuel tsaʼ bʌ i mele juntiquil hermano tsaʼ bʌ chʌmi i yijñam yicʼot tsiʼ ñusa yambʌ wocol tac. Tsiʼ yʌlʌ: «Tsaʼ j cʌñʌ chaʼan maʼañic miʼ mejlel lac yajcan bajcheʼ yilal bʌ wocol la com, mi muqʼuic i mejlel la cʌl jala yicʼot jaysujtel yom miʼ yujtel. Mi cʌl chaʼan jiñi oración yicʼot cheʼ mi lac bajñel pejcan jiñi Biblia lajalʌch bajcheʼ jumpʼejl laj coltʌjib chaʼan maʼañic mi lac sujpʼel ti jaʼ. Cheʼ jaʼel, jiñi hermanojob an i wen aqʼueyoñob c tijicñʌyel cheʼ miʼ coltañoñob». I tsiʼ yʌlʌ: «Cʼotemix c ñaʼtan chaʼan yom utsʼat añon quicʼot Jehová cheʼ maxto c taja wocol».

¹⁴ Aarón yicʼot Hur tsiʼ chucbeyob i cʼʌb Moisés cheʼ woliyob ti guerra tiʼ contra amalecob, i cheʼʌch tsiʼ pʼʌtʼesayob. Joñonla miʼ mejlel lac sʌclan bajcheʼ miʼ mejlel lac pʼʌtʼesʌben i cʼʌb  yambʌlob jaʼel. Miʼ mejlel laj coltan juntiquil hermano woli bʌ i ñusan wocol tiʼ caj i jabilel, tiʼ caj cʼamʌjel, contrajintel tiʼ familia, tajol i bajñel jach miʼ yubin i bʌ o tsaʼ chʌmi juntiquil tiʼ familia. Miʼ mejlel lac pʼʌtʼesan xcolelob come ti bele ora miʼ subentelob i mel mach bʌ weñic o chaʼan miʼ tajob chuqui an ti pañimil (1 Tesalonicenses 3:1-3, 5:11, 14). Laʼ lac sʌclan bajcheʼ mi lac pʌsbeñob chaʼan mucʼʌch la cʌcʼob ti ñuc cheʼ bʌ yaʼañonla tiʼ Yotlel Tempa bʌ, cheʼ añonla ti subtʼan, cheʼ bʌ woliyonla ti tem uchʼel o cheʼ mi lac pejcañob ti teléfono.

15. ¿Chuqui miʼ mejlel ti ujtel mi wen chuqui mi lac suben la quermañojob?

¹⁵ Cheʼ bʌ Asa tsiʼ jisa jiñi etiopejob, jiñi xʼaltʼan Azarías tsiʼ sube Asa yicʼot jiñi tejclum: «Yom chʼejletla. Mach mi laʼ lujbʼan tiʼ melol chuqui utsʼat, come mi caj i yʌqʼueñetla ñuc bʌ laʼ chobejtʌbal chaʼan pejtelel laʼ weʼtel» (2 Crónicas 15:7). Tsaʼ bʌ i yʌlʌ Azarías tsiʼ ñijcʌbe i pusicʼal Asa chaʼan miʼ coltan jiñi tejclum chaʼan wen bajcheʼ miʼ melbeñob i yeʼtel Jehová. Cheʼ wen chuqui mi la cʌl jaʼel, miʼ mejlel i ñijcʌben i pusicʼal jiñi yambʌlob chaʼan miʼ chʌn melbeñob i yeʼtel Jehová (Proverbios 15:23). Mach yomic miʼ ñajʌyel lac chaʼan, cheʼ wen chuqui mi la cʌl ti laj comentario yaʼ ti tempa bʌ miʼ mejlel i pʼʌtʼesan jiñi hermanojob.

16. a) ¿Bajcheʼ miʼ mejlel i lajiñob Nehemías jiñi ancianojob? b) Alʌ bajcheʼ coltʌbilet i chaʼan yambʌ hermanojob.

¹⁶ Yicʼot i coltaya Jehová, Nehemías yicʼot jiñi judíojob tsiʼ pʼʌtʼesayob i cʼʌb chaʼan miʼ melob i yeʼtel. Ti 52 qʼuin tsaʼ ujti i melob i tsʼajquil Jerusalén (Nehemías 2:18; 6:15, 16). Pero Nehemías mach cheʼ jach tsiʼ qʼuele jiñi eʼtel. Tsaʼʌch i chaʼle eʼtel jaʼel (Nehemías 5:16). Ili ora, cabʌl ancianojob miʼ melob bajcheʼ Nehemías cheʼ miʼ chaʼleñob eʼtel tiʼ melol o tiʼ sʌqʼuesʌntel yicʼot tiʼ tojʼesʌntel i Yotlel Tempa bʌ. Ili hermanojob miʼ pʼʌtʼesan jiñi yambʌlob cheʼ bʌ miʼ julaʼtañob o miʼ majlelob ti subtʼan yicʼotob, come mucʼʌch i cʼuxbiñob (pejcan Isaías 35:3, 4).

17, 18. ¿Chuqui miʼ mejlel lac ñop cheʼ ba ora mi lac ñusan wocol o cheʼ boʼoyemonla mi la cubin lac bʌ?

¹⁷ Cheʼ mi lac chaʼlen eʼtel yicʼot la quermañojob miʼ lʌcʼtesañonla tiʼ tojlelob yicʼot utsʼat mi la cajñel yicʼotob tiʼ pejtelel ora. Miʼ coltañonla jaʼel chaʼan mi lac ñumen ñop muʼ bʌ caj i chʼʌm tilel jiñi i Yumʌntel Dios. Cheʼ mi lac pʼʌtʼesan yañoʼ bʌ mi laj coltañob chaʼan miʼ cuchob wocol yicʼot wen miʼ qʼuelob jiñi talto bʌ qʼuin. Cheʼ jaʼel mi lac pʼʌtʼesan lac bʌ yicʼot miʼ coltañonla chaʼan cojach mi laj qʼuel jiñi talto bʌ qʼuin.

¹⁸ Cheʼ mi lac ñaʼtan bajcheʼ tsiʼ colta yicʼot tsiʼ cʌnta Jehová i wiñicob ti wajali, miʼ pʼʌtʼan lac ñopoñel (chʼujbiya) tiʼ tojlel. Jin chaʼan, cheʼ bʌ mi lac taj wocol yicʼot boʼoyemonla mi la cubin lac bʌ, mach cʼunʼaconla. Miʼ mejlel lac ñop chaʼan cheʼ mi laj cʼajtiben i coltaya Jehová, mucʼʌch caj i pʼʌtʼesañonla yicʼot mi caj i yʌqʼueñonla laj qʼuel jiñi bendición tac chaʼan Yumʌntel (Salmo 73:23, 24).