1, 2. a) ¿Chucoch wocolʌch chaʼan jiñi tatʌlob miʼ cʌntesañob i yalobil chaʼan miʼ ñopob Jehová? b) ¿Bajcheʼ miʼ mejlel i coltañob i yalobil jiñi tatʌlob chaʼan miʼ ñopob Jehová? c) ¿Baqui bʌ jiñi chʌmpʼejl coltʌntel mi caj laj qʼuel?

JUMPʼEJL xñujpuñel chʼoyol bʌ ti Francia tsiʼ yʌlʌ: «Mic ñop lojon Jehová, pero mach yomic i yʌl chaʼan mucʼʌch caj i ñopob jaʼel jiñi lon calobilob. Maʼañic majqui miʼ mejlel i yʌqʼueñob jiñi i ñopoñel (chʼujbiya) ti Dios, xucʼu xucʼul miʼ bajñel tajob». Juntiquil hermano chʼoyol bʌ ti Australia tiʼ tsʼijbu chaʼan jiñi ñumen wocol bʌ tiʼ tojlel tatʌlob jiñʌch cheʼ miʼ coltan i yalobilob chaʼan miʼ xucʼchocoñob tiʼ pusicʼal muʼ bʌ i ñopob. Tiʼ tsʼijbu jaʼel: «Tajol maʼ ñaʼtan chaʼan tsaʼʌch i mulaj bajcheʼ tsaʼ jacʼbe i cʼajtiya, pero mach yʌxʌlic a wo, ti wiʼil miʼ chaʼ melbeñet jiñi cʼajtiya. Tajol jiñi tsaʼ bʌ a sube mach jalic miʼ ñajʌyel i chaʼan. Jin chaʼan, mach junyajl jach yom maʼ suben». Cabʌl tatʌlob wen miʼ qʼuelob cheʼ miʼ chʌcʌ tsictesʌbeñob chuqui yom i ñaʼtan i yalobilob cheʼ bʌ woli (choncol) i ñumen colelob majlel, pero yom miʼ ñumen tsictesʌbeñob. Utsʼat miʼ qʼuelob jaʼel cheʼ miʼ sʌclañob ti chajp ti chajp bajcheʼ yom miʼ cʌntesañob i cʼuxbin Jehová.

² ¿Am baʼ walobilob? Tajol maʼ cʼajtiben a bʌ mi mucʼʌch caj a mejlel a cʌntesañob i cʼuxbin Jehová i chaʼan tiʼ pejtelel ora miʼ melbeñob i yeʼtel (troñel). Tiʼ sujm, maʼañic majqui miʼ mejlel i mel tiʼ bajñelil  (Jeremías 10:23). Cojach miʼ mejlelob mi mucʼʌch i sʌclañob i coltʌntel ti Jehová. An cabʌl ticʼojel acʼbil bʌ i chaʼan tiʼ tojlel jiñi tatʌlob. ¿Bajcheʼ miʼ mejlel a coltan a walobilob? Ti ili temaj mi caj laj qʼuel chʌmpʼejl coltʌntel. Ñaxam bʌ, wen cʌñʌyob. I chaʼpʼejlel, acʼʌ ti a pusicʼal jaʼel jiñi woli (yʌquel) bʌ a cʌntesʌbeñob. I yuxpʼejlel, cʼʌñʌ lajiya tac. I chʌmpʼejlel, cʼajtiben chʼujul bʌ i yespíritu Jehová yicʼot yom a wujil pijt.

3. ¿Bajcheʼ miʼ mejlel i mel jiñi tatʌlob cheʼ bajcheʼ tsiʼ cʌntesa Jesús jiñi xcʌntʼañob i chaʼan?

³ Jesús ti bele ora tsiʼ cʼajtibe jiñi xcʌntʼañob i chaʼan bajcheʼ yilal miʼ qʼuelob woli bʌ i yʌl (Mateo 16:13-15). Cheʼʌch miʼ mejlel a mel jaʼel. ¿Bajcheʼ? Cʼajtibeñob bajcheʼ yilal miʼ qʼuelob woli bʌ a subeñob o cheʼ bʌ an chuqui woli a mel a wicʼotob, i la i subeñetob chuqui miʼ ñaʼtañob. An i tajol maʼañic miʼ wen chʼʌmbeñob isujm. Juntiquil hermano am bʌ 15 i jabilel, chʼoyol bʌ ti Australia, tsiʼ yʌlʌ: «Jiñi c papá miʼ wen chaʼlen tʼan yicʼoton chaʼan jiñi c chʼujbiya i miʼ coltañon c chʼʌmben isujm. Miʼ cʼajtibeñon ‹¿chuqui miʼ yʌl jiñi Biblia?›, ‹¿muʼ baʼ ñop?› i ‹¿chucoch?›. Miʼ subeñon chaʼan mach jiñic jach mic chaʼ suben jiñi subebil bʌ i chaʼañoñob». Tsiʼ yʌlʌ jaʼel chaʼan yom to miʼ ñumen tsictesʌben i tat cheʼ bʌ wolix i bej colel majlel.

4. Alʌ jumpʼejl ejemplo chaʼan maʼ tsictesan chucoch i cʼʌjñibalʌch cheʼ a wujil pijt yicʼot chaʼan maʼ tsictesʌben i cʼajtiya tac a walobilob.

⁴ Mi an jumpʼejl cʌntesʌntel chaʼan Biblia maʼañic bʌ miʼ wen ñop jiñi a walobilob, yom a wujil pijt. Mi an maʼañic bʌ miʼ wen ñaʼtañob, coltañob. Juntiquil tatʌl tsiʼ yʌlʌ: «Chʼʌmʌ ti ñuc chuqui miʼ cʼajtibeñetob. Ñʌchʼtan chuqui miʼ subeñetob anquese mach wen ñuquic i cʼʌjñibal yilal o maʼañic maʼ mulan». Utsʼatʌch cheʼ miʼ melbeñetob cʼajtiya jiñi a walobilob, come yom i yʌl chaʼan yomobʌch i cʌn. Jesús tsiʼ mele cʼajtiya tac jeʼel cheʼ bʌ chut to (pejcan Lucas 2:46). Ti Dinamarca, juntiquil xcolel tsiʼ yʌlʌ chaʼan jiñi i tatob maʼañic tsaʼ bʌcʼ michʼayob cheʼ bʌ tsiʼ yʌlʌ chaʼan maʼañic miʼ wen ñop mi añobʌch tiʼ sujm bʌ ñopbalʌl, anquese tsaʼʌch cajiyob ti pensal. Tsiʼ yʌlʌ jaʼel: «Tsiʼ cʼʌñʌyob jiñi Biblia chaʼan miʼ jacʼob tiʼ pejtelel j cʼajtiya».

5. Anquese jiñi a walobilob añobʌch i ñopoñel ti Jehová yilal, ¿chuqui yom maʼ mel?

⁵ Wen cʌñʌ jiñi a walobilob. Anquese miʼ majlelob ti subtʼan yicʼot ti tempa bʌ tac a wicʼotob, mach yomic i yʌl chaʼan añobʌchix i ñopoñel ti Jehová. Cʼajtiben a bʌ: «¿Chuqui jiñi muʼ bʌ i ñopob chaʼan Jehová yicʼot jiñi Biblia?». Chaʼlen wersa chaʼan maʼ ñaʼtan mi an chuqui miʼ mʌctañob chaʼan xucʼulob ti Jehová. Subeñob ti jujumpʼejl qʼuin i chaʼan bʌ Dios. Tajayob ti oración cheʼ bʌ yaʼañob a wicʼot yicʼot cheʼ a bajñel jach.

6. ¿Chucoch i cʼʌjñibalʌch miʼ ñumen cʌñob i chaʼan Jehová yicʼot Biblia jiñi tatʌlob?

⁶ Jiñi wiñicob xʼixicob (quixtañujob) tsiʼ qʼueleyob chaʼan Jesús mucʼʌch i cʼuxbiñob yicʼot miʼ cʼuxbin Jehová, i chaʼan wen i cʌñʌyʌch jiñi Tsʼijbujel tac. Jiñi chaʼan tsiʼ wen ñʌchʼtayob (Lucas 24:32; Juan 7:46). Cheʼ bʌ jiñi a walobilob miʼ qʼuelob chaʼan mucʼʌch a cʼuxbin Jehová jaʼel, cheʼʌch mi caj i melob bajcheʼet (pejcan Deuteronomio 6:5-8; Lucas 6:45). Jin chaʼan, mach a cʌy a pejcan a Biblia yicʼot jiñi jun tac loqʼuem bʌ yaʼi. Ñumen cʌñʌ chuqui tac melbil i chaʼan Jehová (Mateo 6:26, 28). Mi cheʼʌch maʼ mel, cabʌl chuqui mi caj a mejlel a suben a walobilob (Lucas 6:40).

7, 8. a) Cheʼ bʌ jajayajl an chuqui maʼ cʌn chaʼan Jehová, ¿chuqui miʼ mejlel a mel? b) ¿Bajcheʼ an i mele lamital tatʌlob?

⁷ Suben a walobilob pejtel chuqui maʼ cʌn chaʼan Jehová. Miʼ mejlel a subeñob ti bajcheʼ jach ora, mach jin jach cheʼ woli laʼ chajpan laʼ bʌ  chaʼan tempa bʌ o cheʼ woli laʼ mel laʼ chʼujutesaya ti familia. Cheʼʌch miʼ mel jumpʼejl xñujpuñel Testigo bʌ ti Estados Unidos. Cheʼ bʌ jajayajl an chuqui utsʼatax miʼ qʼuelob o cheʼ wen sumuc chuqui miʼ cʼuxob, miʼ tajbeñob ti tʼan Jehová i yalobilob. Miʼ yʌlob: «Mij cʼajtesʌben lon calobilob chaʼan tiʼ pejtelel chuqui acʼbil i chaʼan Jehová miʼ pʌs chaʼan miʼ cʼuxbiñonla yicʼot miʼ ñaʼtañonla». Ti Sudáfrica, yambʌ xñujpuñel Testigo bʌ miʼ mulañob i suben jiñi chaʼtiquil i yixicʼalob (yixicpʼeñalob) melbil tac bʌ i chaʼan Jehová cheʼ bʌ woliyob ti troñel baqui pʌcʼʌl i chaʼañob i chʼʌjlil tac i pat otot. Jumpʼejl ejemplo, miʼ mejlel i subeñob bajcheʼ wen utsʼatax miʼ sujtel ti juntejc teʼ jumpʼejl i bʌcʼ teʼ. Miʼ yʌlob: «Mic pʌsben lojon chaʼan yom miʼ qʼuelob ti ñuc tiʼ pejtelel chuqui an yicʼot chaʼan wen utsʼatax bajcheʼ melbil tac».

⁸ Juntiquil tatʌl ti Australia tsiʼ pʌyʌ majlel i yalobil ti jumpʼejl museo, an jax to bʌ 10 i jabilel. Jiñi tatʌl tsiʼ yʌqʼue i cʌn chaʼan jiñʌch Jehová tsaʼ bʌ i mele tiʼ pejtelel chuqui an, i cheʼ bajcheʼ jiñi miʼ pʼʌtʼesʌben i chʼujbiya. Tsiʼ qʼueleyob baqui miʼ pʌstʌl jiñi añimal tac wajalix bʌ tsaʼ jili. Tsiʼ wen mulayob i qʼuel jiñi añimal tac come wen utsʼatax, toj yicʼot tsʼʌcʌl bajcheʼ yilal melbil, lajal bajcheʼ an tac bʌ ili ora. Jiñi tatʌl tsiʼ yʌlʌ: «Mi cheʼ jach tsaʼ toʼol tili jiñi cuxtʌlel, ¿chucoch toj utsʼatix bajcheʼ yilal jiñi añimal tac ti wajali? Iliyi tsaʼ c wen mulaj i tsaʼ c tsictesʌbe jiñi calobil».

9. a) ¿Chucoch wen cheʼ maʼ cʼʌn lajiya tac chaʼan maʼ cʌntesan a walobilob? b) ¿Chuqui ti lajiya tsiʼ cʼʌñʌ juntiquil ñaʼʌl?

⁹ Jesús tsiʼ wen cʼʌñʌ historia yicʼot lajiya tac chaʼan miʼ yʌcʼ ti cʌjñel ñuc tac bʌ i cʼʌjñibal (Mateo 13:34, 35). Mi cheʼʌch maʼ mel jaʼel, mi caj a coltan chaʼan jiñi a walobilob miʼ cʼʌñob i jol. Ili mi caj i coltañob i ñaʼtan, i chʼʌmbeñob isujm yicʼot chaʼan miʼ cʼajtesañob muʼ bʌ i cʌñob. Cheʼ jaʼel, mi caj i wen mulañob i cʌn. Jumpʼejl ejemplo, juntiquil ñaʼʌl ti Japón tsiʼ ñaʼta i pʌsben i yalobilob chaʼan cheʼ bajcheʼ tsiʼ mele Jehová jiñi icʼ, miʼ pʌs chaʼan miʼ wen cʼuxbiñonla. Come juntiquil an jaxto 8 i jabilel i jiñi yambʌ 10, tsiʼ cʼʌñʌ jumpʼejl lajiya mach bʌ wocolic miʼ chʼʌmbeñob isujm. Tsiʼ yʌqʼueyob leche, azúcar yicʼot cajpeʼ. Cheʼ jiñi, tsiʼ subeyob chaʼan ti jujuntiquil miʼ melbeñob i cajpeʼ. Tsiʼ yʌlʌ: «Tsiʼ chaʼleyob wersa chaʼan wen miʼ melob, i cheʼ bʌ tsaʼ j cʼajtibeyob chucoch, tsiʼ yʌlʌyob chaʼan cheʼʌch yom i melob cheʼ bajcheʼ mic mulan. Cheʼ jiñi, tsaʼ c subeyob chaʼan lʌcʼʌ lajal tsiʼ mele Dios cheʼ bʌ tsiʼ xʌbʌ gas tac yaʼ ti icʼ chaʼan cuxul mi la cajñel». Jiñi alobob tsiʼ wen mulaj i cʌñob, i maʼañic tsaʼ wis ñajʌyi i chaʼañob.

10, 11. a) ¿Baqui bʌ lajiya miʼ mejlel a cʼʌn chaʼan maʼ pʌsben a walobilob chaʼan añʌch juntiquil tsaʼ bʌ i Mele chuqui tac an? (Qʼuele jiñi foto am bʌ tiʼ tejchibal). b) ¿Chuqui ti lajiya tac an a pʌsbe a walobilob?

¹⁰ ¿Baqui bʌ lajiya miʼ mejlel a cʼʌn chaʼan maʼ pʌsben a walobilob chaʼan añʌch majqui tsiʼ Meleyonla? Miʼ mejlel laʼ comol mel tamal. Subeñob chucoch ñuc i cʼʌjñibal cheʼ miʼ wen qʼuelob jiñi jun baqui miʼ yʌl bajcheʼ yom melol. Cheʼ jiñi  chʼʌmʌ jumpʼejl manzana o yambʌ i wut teʼ i cʼajtibeñob: «¿Laʼ wujil ba chaʼan ili manzana añʌch cheʼ bajcheʼ jumpʼejl i juñilel jaʼel chaʼan bajcheʼ miʼ mejlel?». Tsepe tiʼ yojlil i pʌsbeñob jiñi i bʌcʼ. Subeñob chaʼan jiñi i bʌcʼ lajalʌch bajcheʼ jumpʼejl jun baqui miʼ yʌl bajcheʼ yom miʼ mejlel. Subeñob jaʼel chaʼan ñumen wocol tiʼ melol jumpʼejl manzana, i mach lajalic bajcheʼ mel tamal. Cheʼ jiñi cʼajtibeñob: «Mi an majqui tiʼ tsʼijbu bajcheʼ miʼ mejlel jumpʼejl tamal, ¿majqui tiʼ tsʼijbu bajcheʼ yom miʼ mejlel jumpʼejl manzana?». Mi jiñi a walobilob añobix i jabilel, miʼ mejlel a tsictesʌbeñob chaʼan jiñi ADN am bʌ yaʼ tiʼ bʌcʼ, yaʼʌch miʼ yʌl bajcheʼ melbil jiñi manzana yicʼot i teʼel. Miʼ mejlel a pʌsbeñob jaʼel jiñi dibujo yicʼot ejemplo tac am bʌ yaʼ tiʼ yopol 10 cʼʌlʌ ti 20 chaʼan jiñi folleto El origen de la vida.

¹¹ Cabʌl tatʌl miʼ comol pejcañob yicʼot i yalobilob jiñi sección «¿Casualidad o diseño?», yaʼ ti revista ¡Despertad! Mi chutob to i yalobil, miʼ mejlel i cʼʌñob tʼan tac mach bʌ wocolic ti chʼʌmbentel isujm chaʼan miʼ tsictesʌbeñob. Jumpʼejl ejemplo, jumpʼejl xñujpuñel ti Dinamarca tsiʼ yʌlʌ: «Jiñi avión tac lajal bajcheʼ xteʼlemut, pero ¿muʼ ba i mejlel ti tun jiñi avión chaʼan miʼ loqʼuel yambʌ alʌ avión tac? Ixcu xteʼlemut, ¿cʼʌñʌl ba an baqui miʼ jubelob bajcheʼ jiñi avión? ¿Baqui bʌ maʼ wen mulan? ¿Jimba cheʼ miʼ sub i bʌ jumpʼejl avión, o jin cheʼ miʼ chaʼlen cʼay jiñi xteʼlemut? Cheʼ jiñi, ¿majqui wen an i ñaʼtʌbal maʼ wʌl? ¿Jimba tsaʼ bʌ i Mele jiñi xteʼlemut, o jimba muʼ bʌ i mel avión tac?». Cheʼ bʌ maʼ wen aqʼueñob i cʌn yicʼot maʼ melben cʼajtiya tac, miʼ coltañob chaʼan miʼ cʼʌñob i ñaʼtʌbal yicʼot miʼ pʼʌtʼesañob i ñopoñel ti Jehová (Proverbios 2:10-12).

12. ¿Bajcheʼ miʼ mejlel a cʼʌn lajiya tac chaʼan maʼ cʌntesan a walobilob chaʼan isujmʌch tiʼ pejtelel chuqui miʼ yʌl jiñi Biblia?

¹² Miʼ mejlel a cʼʌn lajiya tac chaʼan maʼ cʌntesan a walobilob chaʼan isujmʌch tiʼ pejtelel chuqui miʼ yʌl jiñi Biblia. Jumpʼejl ejemplo, miʼ mejlel a pejcʌbeñob Job 26:7 (pejcan). Pero mach cojach yom maʼ suben chaʼan jiñʌch Jehová tsaʼ bʌ i tsictesʌbe Job. Coltañob chaʼan miʼ cʼʌñob i jol. Miʼ mejlel a subeñob chaʼan ti jiñi bʌ ora tajol maʼañic miʼ ñopob chaʼan jiñi Pañimil maʼañic bajcheʼ chucul. Tsiʼ ñaʼtayob chaʼan añʌch i cʼʌclib tiʼ pejtelel chuqui an. Ti jiñi bʌ ora maʼañic majqui tsiʼ pʌsʌ chaʼan cheʼ jach wolocña jiñi Pañimil, come maxto añic bajcheʼ miʼ taj i qʼuelob miʼ añic bajcheʼ miʼ mejlelob ti cʼotel ti panchan. ¿Chuqui mi laj cʌn? Chaʼan isujmʌch tiʼ pejtelel chuqui miʼ yʌl jiñi Biblia, anquese cabʌlix jab tsaʼ tsʼijbunti, come jiñʌch Jehová tsaʼ bʌ i yʌcʼʌ ti mejlel (Nehemías 9:6).

13, 14. ¿Bajcheʼ miʼ mejlel i cʌntesañob i yalobil jiñi tatʌlob chaʼan miʼ jacʼob muʼ bʌ i yʌl jiñi Biblia?

¹³ Ñuc i cʼʌjñibal jaʼel cheʼ maʼ pʌsben a walobilob chaʼan ñumen tijicña mi caj i yajñelob mi mucʼʌch i jacʼob muʼ bʌ i yʌl jiñi Biblia (pejcan Salmo 1:1-3). Jumpʼejl ejemplo, subeñob chaʼan laʼ i ñaʼtañob chaʼan mi caj i majlelob ti chumtʌl ti jumpʼejl isla i miʼ mejlel i yajcañob majqui yomob chumtʌl yicʼot. Cheʼ jiñi cʼajtibeñob: «¿Bajcheʼ yilal muʼ bʌ caj a yajcañob chaʼan utsʼat maʼ chumtʌl a wicʼotob?». Miʼ mejlel a pejcʌbeñob Gálatas 5:19-23 chaʼan miʼ ñaʼtañob bajcheʼ yilal yom Jehová jiñi muʼ bʌ caj i chumtʌlob yaʼ ti tsijiʼ bʌ pañimil (mulawil).

¹⁴ Cheʼ bajcheʼ ili miʼ mejlel a cʌntesʌbeñob chaʼchajp ñuc bʌ i cʼʌjñibal. Ñaxam bʌ, chaʼan Jehová woliʼ cʌntesañonla bajcheʼ yom mi lac chumtʌl ti tijicña la quicʼot yambʌlob ili ora. I chaʼpʼejlel, chaʼan woliʼ cʌntesañonla bajcheʼ mi caj lac chumtʌl yaʼ ti tsijiʼ bʌ pañimil (Isaías 54:13; Juan 17:3). Miʼ mejlel a pʌsbeñob bajcheʼ coltʌbil i chaʼan yambʌ hermanojob jiñi Biblia. ¿Bajcheʼ? Sʌclan ujtem bʌ tiʼ tojlelob yaʼ ti lac jun tac, bajcheʼ jiñi sección «Jiñi Biblia tsiʼ qʼuextʌbeyob i pensar», muʼ bʌ i tilel yaʼ ti Lac Tsictesʌbentel.  O suben yambʌ hermanojob chaʼan miʼ tsictesʌben a walobilob bajcheʼ coltʌbil i chaʼañob jiñi Biblia chaʼan miʼ mejlel i melbeñob i yeʼtel Jehová (Hebreos 4:12).

15. ¿Chuqui miʼ mejlel i coltañet a cʌntesan a walobilob?

¹⁵ Mi mucʼʌch a wen ñaʼtan chuqui yom maʼ mel, jiñi a walobilob mi caj i chʼʌmob ti ñuc yicʼot mi caj i mulañob jiñi a wom bʌ a pʌsbeñob. Ñaʼtan chuqui tac miʼ mejlel a mel tiʼ tojlelob chaʼan miʼ ñumen mulañob i cʌn i chaʼan bʌ Jehová yicʼot miʼ sujtelob ti wem bʌ i yamigo. Chʌn mele majlel anquese woliʼ colelob. Juntiquil tatʌl tsiʼ yʌlʌ: «Mach lujbʼaquet a sʌclan chuqui tac yom maʼ mel chaʼan maʼ chaʼ tsictesʌbeñob albilix bʌ laʼ chaʼan».

16. a) Cheʼ maʼ cʌntesan a walobilob, ¿chucoch yom a wujil pijt? b) ¿Bajcheʼ an i pʌsʌ lamital tatʌlob?

¹⁶ Jiñi a walobilob miʼ mejlel ti ñumen pʼʌtʼan i ñopoñelob tiʼ coltaya jiñi chʼujul bʌ i yespíritu Jehová (Gálatas 5:22, 23). Pero mach ti orajic miʼ mejlel. Jin chaʼan yom a wujil pijt yicʼot maʼañic maʼ cʌy a cʌntesañob. Juntiquil tatʌl ti Japón am bʌ chaʼtiquil i yalobil, tsiʼ yʌlʌ: «Mic wen tʼoxben i yorajlel quicʼot quijñam. Cheʼ bʌ chutob to, ti jujumpʼejl qʼuin mi lon c chaʼlen estudio 15 minuto, cojach cheʼ bʌ an tempa bʌ maʼañic mi lon c mel, i jiñi 15 minuto mach cʌlʌx oñic chaʼañon lojon mi jiñic chaʼan lon calobilob». Juntiquil superintendente i chaʼan circuito tiʼ tsʼijbu: «Cheʼ bʌ xcolelon to an cabʌl j cʼajtiya. An tsaʼ bʌ c tajbe i jacʼbal ti tempa bʌ tac, cheʼ mic pejcan Biblia o cheʼ mic chajpan c bʌ quicʼot c familia. Jin chaʼan, wen i cʼʌjñibal cheʼ maʼañic miʼ cʌy i cʌntesañob i yalobil jiñi tatʌlob».

17. a) ¿Chucoch yomʌch miʼ pʼʌtʼesañob i ñopoñel jiñi tatʌlob? b) ¿Bajcheʼ miʼ coltan i yixicpʼeñal jumpʼejl xñujpuñel yaʼ ti islas Bermudas chaʼan miʼ yʌcʼob i ñopoñel ti Jehová?

¹⁷ Cheʼ bʌ jiñi a walobilob miʼ qʼuelob chaʼan pʼʌtʌlʌch a ñopoñel ti Jehová, cabʌl chuqui mi caj i cʌñob. Mi caj i qʼuelob chuqui maʼ mel. Jin chaʼan, bej pʼʌtʼesan a ñopoñel yicʼot laʼ i qʼuelob chaʼan cuxulʌch maʼ qʼuel Jehová. Qʼuele bajcheʼ miʼ mel jumpʼejl xñujpuñel yaʼ ti islas Bermudas. Cheʼ bʌ an chuqui miʼ wen cʼojoʼtañob, miʼ cʼajtibeñob i coltaya Jehová temel yicʼot i yixicpʼeñalob. Miʼ subeñob jaʼel chaʼan yom miʼ pejcañob Jehová ti oración. Cheʼ jaʼel, miʼ subeñob jiñi ñuquix bʌ i yixicpʼeñal chaʼan laʼ i ñop Jehová ti jumpʼejl i pusicʼal, miʼ chʌn acʼ i bʌ tiʼ melol jiñi eʼtel chaʼan bʌ Yumʌntel i maʼañic miʼ cʌlʌx cʼojoʼtan i bʌ. I tsiʼ yʌlʌyob chucoch: «Cheʼ bʌ miʼ qʼuelben i wenlel, miʼ cʼotel i ñaʼtan chaʼan Jehová woliyʌch i coltañon lojon. Ili an i wen pʼʌtʼesa i ñopoñel ti Dios yicʼot ti Biblia».

18. ¿Chuqui yom miʼ cʼajtesan jiñi tatʌlob?

¹⁸ Tatʌlob, yom mi la cʼajtesan chaʼan maʼañic miʼ mejlel laʼ wersa xicʼ la walobilob chaʼan miʼ tajob i ñopoñel. Miʼ mejlel laʼ pʌcʼ yicʼot laʼ mul i ñichteʼ, pero cojach Jehová miʼ mejlel i yʌcʼ ti colel (1 Corintios 3:6). Jin chaʼan, cʌntesan laʼ walobilob tiʼ chaʼan bʌ Dios i cʼajtibenla chʼujul bʌ i yespíritu Jehová. Ñaʼtanla ti jumpʼejl laʼ pusicʼal chaʼan Jehová mi caj i yʌqʼueñetla i bendición cheʼ mucʼʌch laʼ chaʼlen wersa (Efesios 6:4).