Seth * miʼ yʌl: «Lajal tsaʼ c sʌtʌ queʼtel (c troñel) quicʼot quijñam. Tsaʼ ñumi lon c chaʼan chaʼpʼejl jab come jiñi lon c familia tsiʼ coltayon lon ti taqʼuin yicʼot an i tajol mic taj lojon alʌ eʼtel tac. Come maʼañic lon queʼtel, jiñi quijñam Priscilla tsiʼ wen taja i chʼijiyemlel, i maʼañix j cʼʌjñibal tsaʼ cubi c bʌ.

¿Bajcheʼ tsaʼ mejli lon c ñusan jiñi wocol? Priscilla tsiʼ chʌcʌ cʼajtesa tsaʼ bʌ i yʌlʌ Jesús ti Mateo 6:34, chaʼan mach yomic mi laj cʌlʌx cʼojoʼtan bajcheʼ mi caj lac ñusan tiʼ yijcʼʌlel, come ti jujumpʼejl qʼuin añʌch chuqui yom bʌ mi laj cʼojoʼtan. Jiñi oración tac tsaʼ bʌ i mele ti jumpʼejl i pusicʼal, tsaʼʌch i yʌqʼue i pʼʌtʌlel. Joñon tsiʼ coltayon muʼ bʌ i yʌl Salmo 55:22. Tsaʼ cʌqʼue tiʼ wenta Jehová jiñi j cuch, cheʼ bajcheʼ tsiʼ mele jiñi salmista, i tsaʼʌch cubibe i coltaya. Anquese chaʼ añix queʼtel, maʼañic mi lon c sʌclan cabʌl chubʌʼañʌl come mi lon cʌcʼ ti ñuc i ticʼojel Jesús am bʌ ti Mateo 6:20-22. Jiñi ñumen ñuc bʌ jiñʌch cheʼ ñumen lʌcʼʌl añon quicʼot quijñam i cheʼ jaʼel tiʼ tojlel Dios».

Jonathan miʼ yʌl: «Cheʼ bʌ tsaʼ sʌjli lon calʌ choñoñel, mach tijicñayic tsaʼ cubi. Come maʼañic taqʼuin, mach jalic tsaʼ jili jiñi tempʌbil bʌ lon c chaʼan ti 20 jab eʼtel. Tsaʼ cajiyon ti leto (aʼleya tʼan) quicʼot quijñam tiʼ caj taqʼuin. Maʼañic tsaʼ mejli lon j cʼʌn jiñi tarjeta de crédito come tajol maʼañic miʼ chʼʌjmel.

Pero jiñi Biblia yicʼot jiñi chʼujul bʌ i yespíritu Dios tsiʼ coltayon lon c ñaʼtan chuqui yom melol. Tsaʼ j cʌñʌ chaʼan yom mic jacʼ baqui jach bʌ eʼtel anquese mach letsic mic tojtʌl, i tsaʼ j cʌyʌ lon c toʼol cʼʌn jiñi taqʼuin. Come i testigojon lon Jehová, tsiʼ coltayon lon jaʼel jiñi hermanojob. Tsiʼ pʼʌtʼesayon lojon chaʼan maʼañic mic juʼsan lon c bʌ yicʼot tsiʼ qʼueleyob chuqui i cʼʌjñibal c chaʼan lojon cheʼ bʌ an wocol».

Raquel miʼ cʼajtesan: «Cheʼ bʌ tsiʼ cʌyʌyon c ñoxiʼal, tsaʼ wen michʼayon yicʼot lojwen tsaʼ cubi c bʌ. Tsaʼ wen tili c chʼijiyemlel, pero Dios tsiʼ yʌqʼueyon i tijicñʌyel c pusicʼal come tsaʼ c lʌcʼtesa c bʌ tiʼ tojlel. Ti jujumpʼejl qʼuin tsaʼ c pejca ti oración i tsiʼ yʌqʼueyon i ñʌchʼtʌlel c pusicʼal. Jiñʌch tiʼ tsʼʌcayon yubil.

Tsaʼ mejli c lajmesan jiñi c michʼajel tiʼ coltaya i Tʼan, jiñi Biblia. Joñoñʌch woli (choncol) c subentel tsaʼ cubi muʼ bʌ i yʌl yaʼ ti Romanos 12:21: ‹Mach a wʌcʼ a bʌ tiʼ jacʼol jontolil. Mele chuqui wen chaʼan miʼ mʌjlel a chaʼan›.

Juntiquil camigo tsiʼ subeyon chaʼan yom mic ñajʌtesan tsaʼ bʌ ujti. Tsiʼ pejcʌbeyon Eclesiastés 3:6 i tsiʼ subeyon chaʼan ‹an i yorajlel mi lac sʌt›. Wocolʌch tsaʼ cubi chaʼan mi cʌcʼ ti ñuc jiñi ticʼojel, pero jiñʌch i cʼʌjñibal bʌ c chaʼan. Wʌle tsaʼix c ñaʼta chuqui com c mel».

Elizabeth miʼ yʌl: «Cheʼ miʼ jejmel a ñujpuñel yom a coltʌntel. Ti jujumpʼejl qʼuin tsiʼ coltayon juntiquil wem bʌ camiga. Tsiʼ chaʼle uqʼuel yicʼoton, tsiʼ tijicñesayon yicʼot tsiʼ pʌsbeyon i cʼuxbiya, mach c bajñel jach tsaʼ cubi c bʌ. Cujil chaʼan jiñʌch tsaʼ bʌ i cʼʌñʌ Jehová chaʼan miʼ tsʼʌcan i lojweñal c pusicʼal».

Luis, tsaʼ bʌ lac taja ti tʼan yaʼ ti ñaxam bʌ temaj, an tsʌts bʌ i cʼamʌjel tiʼ pusicʼal añix bʌ chaʼsujtel colel i tsʌnsan. Ti jujumpʼejl qʼuin yom miʼ cʼʌn 16 ora jumpʼejl japob icʼ. «Ti bele ora mic pejcan Jehová ti oración, cheʼ jiñi mi cubin bajcheʼ miʼ pʼʌtʼesañon i yespíritu. Miʼ yʌqʼueñon c pʼʌtʌlel chaʼan mic chʌn chaʼlen wersa, come mic ñop Dios yicʼot cujil chaʼan mucʼʌch i yʌcʼon ti ñuc».

Petra, añix bʌ 80 i jabilel, miʼ yʌl: «Cabʌl chuqui com c mel, pero maʼañic mic mejlel. Wen wocol jax cheʼ bʌ  woli (yʌquel) i ñumen jilel majlel jiñi c pʼʌtʌlel. Wen lujbeñon mi cubin yicʼot cuxulon jax ti tsʼac. Cheʼix mic wen ñaʼtan bajcheʼ tsiʼ cʼajtibe Jesús i Tat: ‹Mi cheʼʌch yom, tʌtsʼbeñon ili wocol›. Pero Jehová tsiʼ yʌqʼue i pʼʌtʌlel, i cheʼʌch miʼ mel tic tojlel. Jiñi c tsʼac ti jujumpʼejl qʼuin jiñʌch oración, ñumen tijicña mi cubin cheʼ bʌ mij cujtel c pejcan Dios» (Mateo 26:39).

Julián, añix bʌ 30 jab i chaʼan jiñi cʼamʌjel esclerosis múltiple *, cheʼʌch miʼ ñaʼtan jaʼel. Miʼ yʌl: «Maʼañix mic buchtʌl ti ñuc bʌ queʼtel ti jumpʼejl empresa come añoñix ti jumpʼejl silla de rueda, pero ñumen wen añon come mic mejlel c ñumen coltan yambʌlob. Miʼ ñajʌyel c wocol cheʼ mij coltan yambʌlob, i cheʼ bʌ miʼ yʌl chaʼan Jehová mi caj i pʼʌtʼesañonla ti lac wocol, mucʼʌch i mel. Cheʼ bajcheʼ Pablo, mij cʌl jaʼel chaʼan ‹miʼ mejlel j cuch tiʼ pejtelel chuqui jach wocolix i yʌlʌ jiñi muʼ bʌ i yʌqʼueñon c pʼʌtʌlel›» (Filipenses 4:13, TNM).

Antonio miʼ yʌl: «Maʼañic tsaʼ mejli c ñop cheʼ bʌ tsaʼ subentiyon chaʼan c papá tsaʼ chʌmi (sajti) cheʼ bʌ tsaʼ jajtsʼi ti carro. Mach cheʼic yom tsaʼ j qʼuele come ñumel jach mucʼ. Pero maʼañic chuqui tsaʼ mejli c mel. Joʼpʼejl qʼuin maʼañic tsaʼ mejli i ñijcan i bʌ, i cheʼ jiñi tsaʼ chʌmi. Tsaʼ c chaʼle wersa chaʼan maʼañic mic chaʼlen uqʼuel cheʼ bʌ yaʼañon quicʼot c mamá, pero mic wen chaʼlen uqʼuel cheʼ c bajñel jach. Mach junsujtel jach tsaʼ j cʼajtibe c bʌ: ‹¿Chucoch? ¿Chucoch?›.

Cheʼ bʌ tsaʼ c ñusa jiñi wocol, tsaʼ c chʌn cʼajtibe Jehová chaʼan miʼ yʌqʼueñon c ñʌchʼtʌlel yicʼot chaʼan maʼañic mic wen taj c chʼijiyemlel. Xucʼu xucʼul tsaʼ c taja majlel c ñʌchʼtʌlel. Tsaʼ j cʼajtesa chaʼan jiñi Biblia miʼ yʌl chaʼan maʼañic majqui yujil baqui ora mi caj i chujquel ti wocol. Mic wen ñop chaʼan mi caj c chaʼ qʼuel c tat cheʼ bʌ miʼ chaʼ chʼojyel come Dios mach yujilic lot» (Eclesiastés 9:11, TNM; Juan 11:25; Tito 1:2).

Robert, tsaʼ bʌ lac taja ti tʼan jaʼel yaʼ ti ñaxam bʌ temaj, miʼ yʌl: «Cheʼ bʌ tsaʼ c mele oración quicʼot quijñam, Maribel, tsaʼ lon cubi jiñi ñʌchʼtʌlel cheʼ bajcheʼ miʼ yʌl Filipenses 4:6, 7. Jiñi ñʌchʼtʌlel ti lon c pusicʼal tsiʼ coltayon lon chaʼan mi lon c suben jiñi periodistajob jiñi pijtaya chaʼan bʌ chaʼ chʼojyel. Anquese tsaʼ chʌmi lon calobil cheʼ tsaʼ yajli jiñi avión, wen cʼajalto c chaʼan lon jiñi wen tac bʌ tsaʼ lon c ñusa. I yaʼʌch mi cʌcʼ lon c pensar.

Cheʼ bʌ jiñi yambʌ Testigojob tsiʼ subeyon lon chaʼan wen jach bajcheʼ tsaʼ lon c tsictesa ti televisión jiñi ñopol bʌ lon c chaʼan, tsaʼ lon c subeyob chaʼan jiñʌch tiʼ coltaya jiñi oración tac tsaʼ bʌ i meleyob ti lon c tojlel. Mic ñop chaʼan Jehová tsiʼ cʼʌñʌ jiñi hermanojob chaʼan miʼ tijicñesan lon c pusicʼal come tsiʼ chocbeyon lon cʼotel cabʌl mensaje».

Jiñi tsaʼ bʌ ujti laj qʼuel miʼ pʌs chaʼan Dios miʼ mejlel i tijicñesʌben i pusicʼal jiñi woli bʌ i ñusañob baqui jach bʌ wocol. ¿Muʼ ba caj i tijicñesan a pusicʼal jeʼel? Mucʼʌch. Mach yʌlʌlic chuqui ti wocol woli a ñusan, miʼ mejlel a taj a coltʌntel jaʼel. * Jin chaʼan, sʌclan Jehová, jiñi Dios «muʼ bʌ i ñuqʼuesan lac pusicʼal» (2 Corintios 1:3).