1, 2. a) ¿Chuqui miʼ mejlel i cʼajtibeñob i bʌ jiñi xcolelob woli bʌ i melbeñob i yeʼtel Jehová? b) ¿Chuqui miʼ yʌl jiñi i Tʼan Dios?

TI GRAN BRETAÑA, juntiquil hermana tsaʼ subenti tiʼ piʼʌl ti clase: «Sojquemet come maʼ ñop Dios». Juntiquil hermano ti Alemania tiʼ tsʼijbu: «Jiñi c maestrojob miʼ yʌlob chaʼan cuento jach cheʼ miʼ yʌjlel chaʼan Dios tsiʼ mele chuqui tac an i miʼ ñaʼtañob chaʼan jiñi xqʼueljuñob miʼ ñopob jiñi evolución». Ti Francia, juntiquil hermana tsiʼ yʌlʌ: «Toj sajtel i pusicʼal jiñi maestrojob cheʼ bʌ miʼ qʼuelob chaʼan anto xqʼueljuñob muʼ bʌ i ñopob jiñi Biblia».

² Ili ora, cabʌl quixtañu maʼañic miʼ ñopob chaʼan jiñʌch Dios tsaʼ bʌ i meleyonla. Mi xcolelet to i woli (choncol) a melben i yeʼtel Jehová o wolito a cʌn, tajol maʼ cʼajtiben a bʌ bajcheʼ miʼ mejlel a pʌs chaʼan jiñʌch Jehová tsaʼ bʌ i Meleyonla. Jiñi Biblia miʼ coltañonla chaʼan mi lac wen ñaʼtan muʼ bʌ lac pejcan yicʼot muʼ bʌ lac ñʌchʼtan, yicʼot chaʼan miʼ mejlel laj qʼuel ti lac bajñelil bajcheʼ an i sujmlel. Jiñi i Tʼan Dios miʼ yʌl: «Mi caj a cʌntʌntel chaʼan wen bʌ a pusicʼal». ¿Bajcheʼ mi caj i cʌntañet? Maʼañic mi caj a ñop mach bʌ isujmic yicʼot mi caj a pʼʌtʼesan a chʼujbiya ti Jehová (pejcan Proverbios 2:10-12).

3. ¿Chuqui mi caj laj qʼuel ti ili temaj?

³ Yom mi lac wen cʌn Jehová chaʼan pʼʌtʌl lac ñopoñel (chʼujbiya) tiʼ tojlel (1 Timoteo 2:4). Jin chaʼan, cheʼ bʌ maʼ pejcan jiñi Biblia yicʼot jiñi jun tac loqʼuem bʌ yaʼi, yom maʼ wen ñaʼtan. Chaʼlen wersa  chaʼan maʼ chʼʌmben isujm woli (yʌquel) bʌ a pejcan (Mateo 13:23). Ti ili temaj mi caj laj qʼuel chaʼan mi cheʼʌch maʼ mel, mi caj a cʼotel a cʌn chaʼan jiñʌch Jehová tsaʼ bʌ i Meleyonla yicʼot tsaʼ bʌ i yʌcʼʌ ti tsʼijbuntel jiñi Biblia (Hebreos 11:1).

4. a) ¿Chucoch lʌcʼʌ lajal i ñopol jiñi evolución bajcheʼ i ñopol chaʼan an majqui tsiʼ meleyonla? b) ¿Chuqui yom mi lac mel ti lac pejtelel?

⁴ Tajol an majqui miʼ subeñet: «Joñon mucʼʌch c ñop jiñi evolución come jiñi científicojob miʼ yʌlob chaʼan isujmʌch. ¿Chucoch maʼ ñop Dios cheʼ maʼañic majqui qʼuelbil i chaʼan?». Cabʌl wiñicob xʼixicob (quixtañujob) miʼ ñaʼtañob bajcheʼ jiñi. Isujmʌch, maʼañic qʼuelbil lac chaʼan Dios mi jiñic to bajcheʼ tsaʼ mejli chuqui tac an (Juan 1:18). Pero jiñi muʼ bʌ i ñopob chaʼan evolución maʼañic chuqui qʼuelbil i chaʼañob jaʼel. ¿Chucoch? Come mi juntiquilic científico o yambʌ quixtañu qʼuelbil i chaʼan bajcheʼ miʼ qʼuextʌyel juncojt añimal. Jumpʼejl ejemplo, maʼan majqui qʼuelbil i chaʼan miʼ sujtel ti wiñic juncojt batsʼ (Job 38:1, 4). Ti lac pejtelel yom mi lac tsajin chuqui tac ujtem, mi lac wen ñaʼtan yicʼot miʼ cʼotel lac bajñel chʼʌmben isujm. Cabʌl quixtañu an i qʼuele chuqui tac an, jin chaʼan miʼ cʼotel i ñaʼtañob chaʼan añʌch Dios. Cheʼ bajcheʼ miʼ yʌl jiñi Biblia, an i qʼueleyob chaʼan Dios tsiʼ mele tiʼ pejtelel chuqui an, wen pʼʌtʌl yicʼot utsʼatax bajcheʼ yilal i melbal (Romanos 1:20).

5. ¿Chuqui tac miʼ mejlel i coltañonla chaʼan mi lac ñumen cʌn jiñi melbil tac bʌ?

⁵ Cheʼ mi lac wen qʼuel yicʼot mi lac ñaʼtan chuqui an ti pañimil (mulawil), tsiquil chaʼan wen utsʼatax bajcheʼ melbil tac. Mi lac ñop chaʼan añʌch majqui tsiʼ Meleyonla, anquese maʼañic mi laj qʼuel. Jiñi tsaʼ bʌ i Meleyonla wen an i ñaʼtʌbal yicʼot utsʼatax bajcheʼ yilal (Hebreos 11:3, 27). Miʼ mejlel lac ñumen cʌn jiñi melbil tac bʌ i chaʼan cheʼ mi laj cʌn chuqui tajbil i chaʼan jiñi científicojob. Chaʼan maʼ cʌn, miʼ mejlel a qʼuel jiñi video Las maravillas de la creación, jiñi folleto Obra de un Creador, El origen de la vida yicʼot I jacʼbal 10 cʼajtiya tac i chaʼan xcolelob (cʼajtiya 9). Jiñi revista ¡Despertad! miʼ chʼʌm tilel jaʼel entrevista tac muʼ bʌ i melbentel jiñi científicojob yicʼot yambʌ quixtañujob muʼ bʌ i yʌlob chucoch muqʼuix i ñopob Dios. Yaʼ ti sección «¿Casualidad o diseño?» cabʌl chuqui miʼ tsictesan chaʼan jiñi añimal tac yicʼot yan tac bʌ, i miʼ tsictesan bajcheʼ jiñi científicojob yom i lajiñob tiʼ yeʼtel (troñel).

6. ¿Bajcheʼ miʼ mejlel i coltañet jiñi jun tac loqʼuem bʌ ti Biblia?

⁶ Ti Estados Unidos, juntiquil hermano am bʌ 19 i jabilel tsiʼ taja ti tʼan jiñi folleto tac tsaʼ bʌ la cʌlʌ: «Wen coltʌbil i chaʼañon. Mach junsujtelic jach pejcʌbil c chaʼan». Juntiquil hermana chʼoyol bʌ ti Francia tsiʼ yʌlʌ: «Mic wen mulan muʼ bʌ i tilel yaʼ ti sección ‹¿Casualidad o Diseño?›. Miʼ pʌs chaʼan tiʼ pejtelel muʼ bʌ i ñop i lajiñob jiñi melbil tac bʌ i chaʼan Jehová maʼañic miʼ mejlelob». Ti Sudáfrica, jiñi i tat i ñaʼ juntiquil xchʼoc am bʌ 15 i jabilel, tsiʼ yʌlʌyob: «Jiñi lon j quixicʼal (quixicpʼeñal), ñaxan miʼ pejcan jiñi sección ‹Entrevista› muʼ bʌ i tilel yaʼ ti ¡Despertad!». Tiʼ pejtelel iliyi miʼ mejlel i coltañet jaʼel. ¿Bajcheʼ? Mi caj a qʼuel chaʼan añʌch juntiquil tsaʼ bʌ i Meleyonla yicʼot mi caj i  coltañet a cʌn jiñi cʌntesa tac mach bʌ isujmic chaʼan maʼañic maʼ jacʼ. Cheʼ jaʼel, jiñi a ñopoñel mi caj i ñumen colel bajcheʼ juntejc teʼ tam bʌ i wiʼ ti lum maʼañic bʌ miʼ yʌnsan tsʌts bʌ icʼ (Jeremías 17:5-8).

7. ¿Chucoch yom Dios chaʼan maʼ wen cʼʌn a pensar?

⁷ Mach lecojic cheʼ maʼ cʼajtiben a bʌ: «¿Chucoch yom mic ñop muʼ bʌ i yʌl jiñi Biblia?». Jehová mach yomic chaʼan an chuqui maʼ ñop tiʼ caj jach miʼ ñop yambʌlob. Chaʼan maʼ cʌn muʼ bʌ i yʌl jiñi Biblia yicʼot maʼ qʼuel chaʼan jiñʌch tsaʼ bʌ i yʌcʼʌ ti tsʼijbuntel, yom maʼ cʼʌn a pensar. ¿Chucoch cheʼ yom Jehová chaʼan maʼ mel? Come cheʼ maʼ ñumen cʌn, mi caj i ñumen pʼʌtʼan a ñopoñel ti Biblia (pejcan Romanos 12:1, 2 yicʼot 1 Timoteo 2:4). Chaʼan maʼ cʌn jiñi Biblia qʼuele jiñi temaj tac a wom bʌ a ñumen ñaʼtan.

8, 9. a) ¿Chuqui miʼ mulañob i ñaʼtan jiñi quixtañu? b) ¿Baqui bʌ wenlel an i tajayob cheʼ bʌ miʼ ñaʼtañob woli bʌ i pejcañob?

⁸ An muʼ bʌ i mulañob i ñaʼtan chaʼan bʌ profecía tac. Yambʌlob miʼ mulañob i lajin muʼ bʌ i yʌl jiñi Biblia yicʼot muʼ bʌ i yʌlob jiñi wen yujiloʼ bʌ chaʼan historia, ciencia yicʼot arqueología. Jumpʼejl ejemplo, ñaʼtancu muʼ bʌ i yʌl Génesis 3:15. Jehová tsiʼ yʌcʼʌ ili profecía cheʼ bʌ Adán yicʼot Eva tsiʼ ñusʌbeyob i tʼan yicʼot tsiʼ cʌyʌyob i qʼuel bajcheʼ yumʌl. Ili jiñʌch jiñi ñaxam bʌ profecía muʼ bʌ i coltañonla lac chʼʌmben isujm bajcheʼ mi caj i pʌs jiñi Yumʌntel chaʼan Dios weñʌch bajcheʼ miʼ chaʼlen yumʌl yicʼot mi caj i jisan jiñi ilaya wocol. ¿Bajcheʼ miʼ mejlel a wen qʼuel jiñi profecía? Tsʼijbun jiñi versículo tac muʼ bʌ i ñumen pʌs bajcheʼ miʼ tsʼʌctiyel ili profecía. Qʼuele jaʼel jalix tsaʼ tsʼijbunti jiñi versículo tac yicʼot tsʼijbun bajcheʼ quepecña tsaʼ ujti majlel. Mi caj a qʼuel chaʼan mach lajalic i yorajlel tsaʼ chumleyob jiñi tsaʼ bʌ i tsʼijbuyob, pero tsaʼʌch i luʼ chaʼleyob coltaya chaʼan xucʼu xucʼul miʼ tsictiyel jiñi profecía. Ili mi caj i coltañet a pʌs chaʼan Jehová tsiʼ colta ti chʼujul bʌ i yespíritu jiñi tsaʼ bʌ i tsʼijbuyob jiñi Biblia (2 Pedro 1:21).

⁹ Juntiquil hermano chʼoyol bʌ ti Alemania tsaʼ cʼoti i cʌn chaʼan jujumpʼejl libro am bʌ ti Biblia miʼ taj ti tʼan chaʼan jiñi Yumʌntel anquese 40 wiñicob tiʼ tsʼijbuyob. Cheʼ jaʼel, mach lajalic i yorajlel tsaʼ chumleyob yicʼot maʼañic tsiʼ cʌñʌyob i bʌ. Juntiquil hermana ti Australia tsiʼ pejca jumpʼejl temaj am bʌ yaʼ ti Lac Tsictesʌbentel. Tsaʼ cʼoti i cʌn bajcheʼ miʼ taj i bʌ jiñi Pascua, Génesis 3:15 yicʼot jiñi Mesías ^[1] (qʼuele jiñi nota am bʌ tiʼ yujtibal ili temaj). Jiñi hermana tiʼ tsʼijbu: «Cheʼ bʌ tsaʼ c pejca jiñi temaj, tsaʼ cʼoti j cʌn chaʼan Jehová wen utsʼatax. Tsaʼ c wen mulaj cheʼ bʌ tsiʼ ñaʼta i suben jiñi israelob chaʼan miʼ melob jiñi Pascua i chaʼan ti wiʼil tsaʼ tsʼʌctiyi ti Jesús. Tsaʼ cʌqʼue i yorajlel chaʼan mic wen ñaʼtan chuqui yom i yʌl jiñi profecía chaʼan Pascua». ¿Chucoch cheʼ tsiʼ yubi i bʌ bajcheʼ jiñi? Come tsiʼ wen ñaʼta tsaʼ bʌ i pejca yicʼot tsaʼ cʼoti i chʼʌmben isujm. Ili tsiʼ colta chaʼan miʼ pʼʌtʼesan i ñopoñel yicʼot miʼ ñumen lʌcʼtesan i bʌ ti Jehová (Mateo 13:23).

10. ¿Chuqui yambʌ mi caj i coltañet a ñumen ñop muʼ bʌ i yʌl jiñi Biblia?

¹⁰ ¿Chuqui yambʌ mi caj i coltañet a ñumen ñop muʼ bʌ i yʌl jiñi Biblia? Jiñʌch cheʼ maʼ ñaʼtan chaʼan jiñi tsaʼ bʌ i tsʼijbuyob tsiʼ pʌsʌyob i chʼejlel yicʼot tsiʼ chʌn alʌyob i sujmlel. Ti jiñi bʌ ora, cabʌl xtsʼijbayajob cojach tsiʼ yʌlʌyob chuqui tac wen tsiʼ meleyob i tejclum yicʼot i yumob. Pero jiñi xʼaltʼañob i chaʼan Jehová mach cojach tsiʼ yʌlʌyob chuqui wem bʌ tsiʼ mele jiñi israelob yicʼot i reyob, tsiʼ yʌlʌyob jaʼel jiñi mach bʌ weñic tsiʼ meleyob (2 Crónicas 16:9, 10; 24:18-22). Cheʼ jaʼel, tsiʼ chaʼ alʌyob i bajñel sajtemalob yicʼot mach bʌ weñic tsiʼ mele yambʌ i wiñicob Dios (2 Samuel 12:1-14; Marcos 14:50). Juntiquil hermano chʼoyol bʌ ti  Gran Bretaña tsiʼ yʌlʌ: «Mach cabʌlobic muʼ bʌ i yʌlob i sujmlel bajcheʼ iliyi. Ili miʼ coltañon c ñumen ñop chaʼan chʼoyolʌch ti Jehová jiñi Biblia».

11. ¿Chuqui miʼ coltañonla lac ñaʼtan chaʼan chʼoyolʌch ti Dios jiñi Biblia?

¹¹ Cheʼ mi laj cʌy chaʼan jiñi Biblia miʼ tojʼesañonla, mucʼʌch lac tajben i wenlel. I jiñʌch miʼ ñumen aqʼueñonla lac ñaʼtan chaʼan chʼoyolʌch ti Dios (pejcan Salmo 19:7-11). Juntiquil xcʼalʌl chʼoyol bʌ ti Japón tiʼ tsʼijbu: «Tijicña tiʼ sujmlel jiñi c familia come miʼ jacʼob muʼ bʌ i yʌl jiñi Biblia. Temel añon lon, an ñʌchʼtʌlel yicʼot cʼuxbiya». Cabʌl quixtañu cʼotem i qʼuel yaʼ ti Biblia chaʼan mach isujmic muʼ bʌ i lon ñopob ti ñaxan (Salmo 115:3-8). Cheʼ jaʼel, muqʼuix i ñumen acʼob ti ñuc jiñi Dios mach bʌ añic i pʼisol i pʼʌtʌlel. Pero an mach bʌ añic miʼ ñopob, i miʼ qʼuelob bajcheʼ dios tiʼ pejtelel chuqui an ti pañimil. An muʼ bʌ i yʌlob chaʼan jiñi wiñicob mucʼʌch i mejlel i tojʼesañob ili pañimil. Pero cheʼ mi laj qʼuel bajcheʼ yilal baqui chumulonla, wen tsiquil chaʼan maʼañic miʼ mejlel i jisañob jiñi wocol tac. Cojach jiñi Biblia miʼ mejlel i yʌqʼueñonla wem bʌ lac pijtaya (Salmo 146:3, 4).

12, 13. ¿Chuqui miʼ mejlel a suben jiñi quixtañujob cheʼ bʌ woli a wʌl bajcheʼ tsaʼ mejli chuqui tac an o jiñi Biblia?

¹² Cheʼ bʌ woli a wʌl a wicʼot yambʌ chaʼan chuqui tac melbil o chaʼan jiñi Biblia, ñaxan qʼuele chuqui miʼ ñop. An muʼ bʌ i ñopob jiñi evolución pero miʼ ñopob Dios jaʼel. Miʼ yʌlob chaʼan Dios tsiʼ cʼʌñʌ jiñi evolución chaʼan miʼ pʼojlel chuqui tac cuxul. Yambʌ miʼ yʌlob chaʼan isujmʌch jiñi evolución come miʼ pʌstʌl ti escuela. An maʼañix bʌ miʼ ñopob Dios come maʼañic miʼ mulañob chuqui miʼ yujtel ti ñopbalʌl tac. Jin chaʼan, cheʼ bʌ an majqui woli ti tʼan a wicʼot, ñaxan cʼajtiben chuqui miʼ ñop yicʼot chucoch. Mi mucʼʌch a wen ñʌchʼtan, mi caj i ñʌchʼtañet jaʼel (Tito 3:2).

¹³ Mi an majqui miʼ wajleñet come maʼ ñop Dios, ¿chuqui miʼ mejlel a mel? Jacʼben jach ti wen yicʼot cʼajtiben bajcheʼ tsaʼ tejchi jiñi cuxtʌlel. Mi tsiʼ yʌlʌ chaʼan isujmʌch jiñi evolución, miʼ mejlel a suben chaʼan i wentʌlel tsiʼ bajñel pʼolo i bʌ jiñi ñaxam bʌ tsaʼ bʌ i taja i cuxtʌlel wʌʼ ti Pañimil, bajcheʼ jumpʼejl alʌ célula. Juntiquil maestro chaʼan química tsiʼ yʌlʌ chaʼan an chuqui yom miʼ mʌc o miʼ mos chaʼan maʼañic chuqui miʼ chaʼlen, yom an bajcheʼ miʼ taj i pʼʌtʌlel yicʼot miʼ mejlel i cʼʌn, yom an i chaʼan jiñi ADN yicʼot yom miʼ mejlel i chaʼ pʼojlesan i bʌ. Tsiʼ yʌlʌ jaʼel: «Toj sajtel lac pusicʼal cheʼ mi laj qʼuel chaʼan utsʼatax melbil jaʼel jiñi cheʼ jach bʌ alʌ wistʌl tac». Jin chaʼan, ¿yaʼʌch ba tsaʼ tili laj cuxtʌlel ti evolución?

14. Cheʼ bʌ woli a wʌl chuqui tac melbil, ¿bajcheʼ miʼ mejlel a tsictesan?

¹⁴ Cheʼ bʌ an majqui woli a suben chaʼan chuqui tac melbil, miʼ mejlel a cʼʌn tsaʼ bʌ i yʌlʌ jiñi apóstol Pablo. Tiʼ tsʼijbu: «Ti jujumpʼejl otot añʌch majqui tsiʼ mele. Pero jini tsaʼ bʌ i mele pejtelel chuqui tac an, jiñʌch Dios» (Hebreos 3:4). Jumpʼejl otot maʼañic miʼ bajñel mel i bʌ, añʌch majqui miʼ mel. Tiʼ pejtelel chuqui cuxul ñumen cabʌl bajcheʼ melbil. Jin chaʼan añʌch majqui tsiʼ mele tac. Miʼ mejlel a cʼʌn lac jun tac jaʼel cheʼ woli a taj ti tʼan chuqui tac melbil. Juntiquil hermana tsiʼ pejca juntiquil chʼiton maʼañic bʌ miʼ ñop Dios i tsiʼ yʌqʼue jiñi folleto tac tsaʼ bʌ lac taja ti tʼan yaʼ ti párrafo 5. Cheʼ bʌ jumpʼejl jaxto semana i ñumel, jiñi chʼiton tsiʼ yʌlʌ: «Wʌle muqʼuix c ñop Dios». Jiñi chʼiton tsiʼ jacʼʌ i chʼʌm jumpʼejl estudio i ti wiʼil tsiʼ chʼʌmʌ jaʼ.

15, 16. a) ¿Chuqui yom maʼ mel cheʼ muʼto caj a tsictesʌben juntiquil quixtañu chaʼan chʼoyolʌch ti Dios jiñi Biblia? b) ¿Chuqui yom maʼ chʌn cʼajtesan?

¹⁵ Mi an maʼañic bʌ miʼ wen ñop chaʼan chʼoyol ti Dios jiñi Biblia, ¿bajcheʼ miʼ mejlel a coltan i chʼʌmben isujm? Cheʼ bajcheʼ tsaʼix la cʌlʌ, ñaxan  cʼajtiben chuqui miʼ ñop yicʼot chuqui miʼ mulan i ñaʼtan (Proverbios 18:13). Mi chaʼan ciencia miʼ mulan, miʼ mejlel a pʌs yicʼot ejemplo tac chaʼan mucʼʌch i tsʼʌctiyel muʼ bʌ i yʌl jiñi Biblia chaʼan bʌ ciencia. Mi chaʼan historia miʼ mulan, miʼ mejlel a suben muʼ bʌ i tilel ti yan tac bʌ libro i maʼ suben chaʼan yaʼ ti Biblia wʌn albilix chaʼan cheʼʌch mi caj i yujtel. Tajol an muʼ bʌ caj i ñʌchʼtañetob cheʼ maʼ subeñob bajcheʼ miʼ mejlel i tajob i coltʌntel yaʼ ti Biblia chaʼan ñumen utsʼat miʼ chumtʌlob, miʼ mejlel a subeñob jiñi cʌntesa tac tsaʼ bʌ i yʌlʌ Jesús yaʼ ti Bujtʌl.

¹⁶ Cheʼ bʌ an majqui woli a pejcan cʼajtesan chaʼan mach la comic lac tech leto (aʼleya tʼan). La com chaʼan wen miʼ chaʼlen tʼan yicʼotonla yicʼot miʼ cʌn muʼ bʌ i yʌl jiñi Biblia. Jin chaʼan, wen jach yom maʼ melben cʼajtiya tac yicʼot ñʌchʼtan jach ti wen. Tsictesʌben ti wen chuqui maʼ ñop, ñumento mi añix i jabilel jiñi woli bʌ a pejcan. Mi cheʼʌch maʼ mel, wen jach mi caj i jacʼbeñet jaʼel. Cheʼ jaʼel, wen chuqui mi caj i ñaʼtan cheʼ miʼ qʼuel chaʼan mucʼʌch a wen chʼʌmben isujm chuqui maʼ ñop anquese xcolelet to. Pero mi an yom jach bʌ leto o yom jach i wajleñet, mach cʼʌñʌlic maʼ wen suben (Proverbios 26:4).

17, 18. a) ¿Chuqui mi caj i coltañet chaʼan miʼ pʼʌtʼan a chʼujbiya ti Biblia? b) ¿Chuqui mi caj laj qʼuel yaʼ ti yambʌ temaj?

¹⁷ Chaʼan miʼ ñumen pʼʌtʼan a chʼujbiya, mach jasʌlic yom maʼ cʌn jiñi ñaxan tac bʌ cʌntesʌntel am bʌ ti Biblia. Yom maʼ sʌclan jiñi ñumen wocol tac bʌ ti chʼʌmbentel isujm, lajal bajcheʼ woli a sʌclan chubʌʼañʌl letsem bʌ i tojol (Proverbios 2:3-6). Yom maʼ pejcan ti tsʼʌcʌl jiñi Biblia chaʼan miʼ pʼʌtʼan a chʼujbiya. Miʼ mejlel a wujtesan a pejcan ti jumpʼejl jab. Cheʼʌch tsiʼ mele juntiquil superintendente i chaʼan circuito cheʼ bʌ xcolel to, tsiʼ yʌlʌ: «Tsaʼ bʌ i coltayon chaʼan mic ñumen ñop chaʼan i tʼañʌch Dios jiñi Biblia jin cheʼ tsaʼ c pejca ti tsʼʌcʌl. Cheʼʌch tsaʼ c chʼʌmbe isujm jiñi historia tac tsaʼ bʌ j cʌñʌ cheʼ alobonto». ¿Chuqui yambʌ miʼ mejlel a mel? Miʼ mejlel a cʼʌn tiʼ pejtelel chuqui an lac chaʼan ili ora chaʼan maʼ ñumen chʼʌmben isujm muʼ bʌ a pejcan. Jumpʼejl ejemplo, miʼ mejlel a cʼʌn jiñi programa Watchtower Library am bʌ ti DVD, jiñi BIBLIOTECA TI INTERNET Watchtower o jiñi Guía de estudio para los testigos de Jehová.

¹⁸ Tatʌlob, jatetla an ti laʼ wenta chaʼan mi laʼ cʌntesan laʼ walobilob tiʼ chaʼan bʌ Jehová. Jin chaʼan, yaʼ ti yambʌ temaj mi caj laj qʼuel bajcheʼ tac miʼ mejlel i coltan i yalobilob jiñi tatʌlob chaʼan pʼʌtʌl i chʼujbiyajob.