1, 2. ¿Chucoch ñuc i cʼʌjñibal cheʼ wen jach miʼ xojob i pislel jiñi i testigojob Jehová? (Qʼuele jiñi foto am bʌ tiʼ tejchibal).

JUMPʼEJL periódico ti Holanda tsiʼ yʌlʌ bajcheʼ yilalob i pislel jiñi ñaxañoʼ bʌ ti jumpʼejl ñopbalʌl cheʼ bʌ tsajñiyob tiʼ tempa bʌ. Tsiʼ yʌlʌ chaʼan bajcheʼ jach yilal i pislelob tsiʼ lʌpʌyob majlel come wen an ticwal. Jiñi periódico tsiʼ yʌlʌ jaʼel chaʼan jiñi i testigojob Jehová wen jach bajcheʼ yilal i pislelob cheʼ bʌ tsajñiyob tiʼ colem tempa bʌ. Tsiʼ yʌlʌ chaʼan jiñi alobob yicʼot wiñicob miʼ cʼʌñob corbata yicʼot saco. Jiñi xʼixicob yicʼot xchʼocob baqui jach bʌ i pislel miʼ cʼʌñob, pero wen jach i tamlel. Jiñi i testigojob Jehová wen chuqui miʼ yʌjlel tiʼ tojlelob. Jiñi apóstol Pablo tsiʼ sube jiñi xñoptʼañob chaʼan jiñi i wiñicob Dios ‹pʼisbil jach yom miʼ chʼʌlob i bʌ› (1 Timoteo 2:9, 10). Ili ticʼojel tsaʼ ajqʼui tiʼ tojlel xʼixicob, pero miʼ cʼʌjñibʌyel i chaʼañob jaʼel jiñi wiñicob.

² Jiñi i wiñicob Dios ñuc i cʼʌjñibal miʼ qʼuelob cheʼ wen jach bajcheʼ yilal miʼ xojob i pislel come cheʼʌch miʼ qʼuel Dios jaʼel (Génesis 3:21). Jehová jiñʌch jiñi Yumʌl bʌ ti panchan yicʼot ti pañimil. Jiñi Biblia wen tsiquil miʼ yʌl chaʼan an i mandar tac  chaʼan bajcheʼ yilal i pislel yom miʼ xoj jiñi i wiñicob. Jin chaʼan, cheʼ bʌ woli (choncol) lac yajcan lac pislel, mach ti lac bajñelic yom mi lac mulan. Yom mi lac ñaʼtan jeʼel mi mucʼʌch i mulan Jehová, jiñi lac Dios yicʼot lac Rey.

3. ¿Chuqui miʼ cʌntesañonla i Mandar Moisés chaʼan bajcheʼ yilal lac pislel yom mi lac xoj?

³ Jiñi israelob tsaʼ subentiyob yaʼ tiʼ Mandar Moisés chaʼan mach yomic miʼ tsajcʌbeñob jiñi bibiʼ jax bʌ i melbal yan tac bʌ tejclum. Jiñi Mandar tsiʼ yʌlʌ chaʼan Jehová mach utsʼatic miʼ qʼuel jiñi pislelʌl maʼañic bʌ miʼ wen acʼ ti cʌñol mi wiñiconla o xʼixiconla. Ili ora, an cheʼ bʌ miʼ xojob i pislel bajcheʼ jiñi (pejcan Deuteronomio 22:5). Jiñi i Mandar Moisés miʼ cʌntesañonla chaʼan Jehová maʼañic miʼ mulan jiñi pislelʌl muʼ bʌ i yʌcʼ ti cʌñol chaʼan xʼixic juntiquil wiñic, o chaʼan wiñic juntiquil xʼixic, mi jiñic jiñi maʼañic bʌ miʼ wen acʼ ti cʌñol mi wiñic o xʼixic juntiquil quixtañu.

4. ¿Chuqui miʼ mejlel i coltan jiñi xñoptʼan chaʼan miʼ ñaʼtan bajcheʼ yilal i pislel mi caj i xoj?

⁴ Jiñi principio tac am bʌ ti Biblia miʼ coltañonla lac ñaʼtan ti wen bajcheʼ yilal jiñi lac pislel muʼ bʌ caj lac lʌp. Ili principio tac miʼ coltañonla jaʼel anquese wen qʼuexel baqui chumulonla o jiñi laj cultura. Mach cʼʌñʌlic mi lac subentel bajcheʼ tac yilal lac pislel yom bʌ mi lac lʌp o mach bʌ yomic. Yom jach mi lac jacʼ jiñi principio tac am bʌ ti Biblia, come maʼañic miʼ mʌctañonla chaʼan mi lac xoj muʼ bʌ lac mulan. Laʼ laj qʼuel chaʼpʼejl uxpʼejl principio chaʼan mi laj cʌn jiñi «wen tac bʌ yicʼot tsʼʌcʌl tac bʌ» tiʼ wut Dios cheʼ bʌ woli (yʌquel) lac ñaʼtan bajcheʼ yilal lac pislel muʼ bʌ caj lac xoj (Romanos 12:1, 2).

5, 6. Mi weñʌch lac pislel muʼ bʌ lac xoj, ¿chuqui miʼ mejlel ti ujtel tiʼ tojlel yambʌlob?

⁵ Jehová tsiʼ cʼʌñʌ jiñi apóstol Pablo chaʼan miʼ tsʼijbun jiñi ñuc bʌ principio am bʌ yaʼ ti 2 Corintios 6:4 (pejcan). Jiñi lac pislel miʼ yʌcʼ ti cʌñol majquiyonla yicʼot cabʌl chuqui miʼ yʌcʼ ti ñaʼtʌntel ti lac tojlel (1 Samuel 16:7). Come i wiñiconla Dios, mach yomic lac xoj lac pislel chaʼan jach cheʼ yilal mi lac mulan o chaʼan jach wen mi la cubin. Jiñi principio tac am bʌ ti Biblia miʼ coltañonla chaʼan maʼañic mi lac lʌp tsʌts ñʌpʼʌl bʌ o muqʼuix bʌ i yʌcʼ ti qʼuelol lac bʌcʼtal. Maʼañic majqui yom miʼ quisñin i bʌ o miʼ yʌn i wut tiʼ caj bajcheʼ yilal lac pislel.

⁶ Jiñi wiñicob xʼixicob (quixtañujob) tajol mi caj i ñumen qʼueloñobla ti ñuc yicʼot jiñi i yorganización Jehová, mi mucʼʌch lac xoj wem bʌ yicʼot sʌc bʌ lac pislel. Tajol mi caj i ñumen ñʌchʼtañob jiñi wen tʼan chaʼan miʼ cʌñob jiñi Dios woli bʌ lac chʼujutesan.

7, 8. ¿Baqui ora ñuc i cʼʌjñibal mi lac xoj wen jach bʌ lac pislel?

⁷ Jiñi lac pislel yom miʼ yʌqʼuen i ñuclel Jehová yicʼot jiñi wen tʼan come mi laj qʼuel ti ñuc Dios, la quermañojob yicʼot yambʌ quixtañujob (Romanos 13:8-10). Wen ñuc i cʼʌjñibal cheʼ mi lac xoj wem bʌ lac pislel, ñumento cheʼ mi lac majlel ti tempa bʌ o ti subtʼan. Cheʼ jaʼel, yom miʼ yʌcʼ ti cʌñol chaʼan mi lac chʼujutesan Dios (1 Timoteo 2:10). Anquese weñʌch ti qʼuelol bajcheʼ yilal muʼ bʌ lac lʌp yaʼ baqui chumulonla, an baqui mach weñic ti qʼuelol. Jin chaʼan, pʼisbil jach bajcheʼ yilal lac pislel yom bʌ mi lac lʌp chaʼan mach lecojic miʼ qʼuel yañoʼ bʌ, mach yʌlʌyic baqui chumulonla.

 ⁸ (Pejcan 1 Corintios 10:31). Yom mi lac xoj wem bʌ lac pislel cheʼ mi lac majlel ti colem tempa bʌ tac. Mach yomic ñumeñix ti pʼis bajcheʼ yilal muʼ bʌ lac lʌp, lajal bajcheʼ miʼ mel yambʌlob. Cheʼ bʌ muʼto i cajel jiñi colem tempa bʌ o cheʼ tsaʼix ujti, mach yomic mi lac xoj baqui jach bʌ lac pislel, mi jiñic to yaʼ baqui mi caj laj cʌytʌl o cheʼ bʌ muqʼuix caj lac sujtel. Mi mucʼʌch lac jacʼ, tijicña mi caj la cʌl chaʼan i testigojonla Jehová yicʼot chajpʌbilonla chaʼan bajcheʼ jach ora mi lac chaʼlen subtʼan.

9, 10. ¿Bajcheʼ miʼ coltañonla Filipenses 2:4 chaʼan mi lac yajcan wem bʌ lac pislel?

⁹ (Pejcan Filipenses 2:4). ¿Chucoch yom mi la cʌcʼ ti ñuc bajcheʼ yilal miʼ qʼuelob lac pislel jiñi la quermañojob? Junchajp, come jiñi i wiñicob Dios miʼ chaʼleñob wersa i jacʼob ili ticʼojel: «Junyajlel chocola pejtelel i chaʼan bʌ pañimil am bʌ ti laʼ pusicʼal: laʼ tsʼiʼlel, laʼ bibiʼlel, laʼ jontolil» (Colosenses 3:2, 5). An la quermañojob tsaʼ bʌ i meleyob tsʼiʼlel cheʼ bʌ maxto i testigojobic Jehová, i tajol woliyob ti wersa chaʼan maʼañic miʼ chʌn yajlelob.  Mi maʼañic mi laj cʌntan bajcheʼ yilal lac pislel, tajol wocol mi caj i yubiñob chaʼan miʼ jacʼob jiñi ticʼojel tac am bʌ ti Biblia i miʼ chaʼ yajlelob (1 Corintios 6:9-11). Mach la comic cheʼ miʼ yujtel jiñi, ¿ñomach?

¹⁰ Cheʼ bʌ la quicʼot la quermañojob, utsʼat baqui añonla yicʼot maʼañic wocol chaʼan mi lac yajlel ti tsʼiʼlel. Cheʼ wen jach lac pislel, chʌn utsʼat mi caj la cajñel la quicʼot la quermañojob yaʼ tiʼ Yotlel Tempa bʌ o baqui jach añonla. Tiʼ sujm, ti jujuntiquil mi lac yajcan bajcheʼ yilal lac pislel mi caj lac xoj. Pero la cujil jaʼel chaʼan cheʼ bʌ jiñi yambʌlob miʼ qʼuelob lac pislel, yom miʼ ñaʼtañob, miʼ yʌlob yicʼot miʼ melob chuqui wen tiʼ wut Dios (1 Pedro 1:15, 16). Jiñi yujil bʌ cʼuxbiya «mach lecojic i melbal. Maʼanic miʼ sajcan chuqui yom tiʼ bajñel pusicʼal» (1 Corintios 13:4, 5).

11, 12. ¿Bajcheʼ miʼ coltañonla Eclesiastés 3:1, 17 chaʼan mi lac ñaʼtan baqui bʌ lac pislel yom mi lac xoj?

¹¹ Cheʼ bʌ mi caj lac yajcan bajcheʼ yilal muʼ bʌ caj lac xoj, la cujil chaʼan «pejtel chuqui yom melol [...] añʌch i yorajlel» (Eclesiastés 3:1, 17). Tajol mi laj qʼuextan bajcheʼ yilal lac pislel miʼ yorajlel ticwal, tsʌñal o yan tac bʌ. Pero i mandar tac Jehová maʼañic baʼ ora miʼ qʼuextʌyel (Malaquías 3:6).

¹² An país tac baqui wen wocol ti yajcʌntel wem bʌ lac pislel muʼ bʌ caj lac lʌp tiʼ caj ticwal. Jiñi la quermañojob miʼ qʼuelob ti ñuc cheʼ maʼañic mi lac lʌp wen tsʌts bʌ la quicʼot o ajpan tsiquilix bʌ miʼ yʌcʼonla ti qʼuejlel (Job 31:1). Wen jach yom lac pislel muʼ bʌ laj cʼʌn jaʼel cheʼ bʌ an baqui mi lac majlel ti tsʼʌmel (Proverbios 11:2, 20). Cabʌl muʼ bʌ i lʌpob wen lecojax bʌ ti qʼuelol, pero joñonla yom mi laj qʼuel mi mucʼʌch i yʌqʼuen i ñuclel Jehová.

13. ¿Chucoch yom mi laj cʼajtesan muʼ bʌ i yʌl 1 Corintios 10:32, 33 cheʼ bʌ mi lac yajcan lac pislel?

¹³ An yambʌ principio wen ñuc bʌ i cʼʌjñibal yom bʌ mi la cʌcʼ ti ñuc cheʼ bʌ mi lac yajcan lac pislel. Yom wen tsajilonla chaʼan maʼañic mi lac lowben i conciencia yañoʼ bʌ (pejcan 1 Corintios 10:32, 33). Mach yomic mi lac lʌp lac pislel lecoj bʌ miʼ qʼuel la quermañojob o jiñi mach bʌ xñoptʼañobic. Jiñi apóstol Pablo tiʼ tsʼijbu: «Ti jujuntiquilonla laʼ lac mel chuqui miʼ mulañob lac piʼʌlob chaʼan miʼ pʼʌtʼañob, chaʼan miʼ tajob i wenlel». I tsiʼ yʌlʌ chucoch: «Come Cristo maʼañic tsiʼ mele chuqui yom i bajñel pusicʼal» (Romanos 15:2, 3). Jesús maʼañic tsiʼ bajñel sʌcla i wenlel, ñumen ñuc tsiʼ qʼuele cheʼ miʼ melben i yeʼtel (troñel) Dios yicʼot miʼ coltan yambʌlob. Cheʼʌch yom mi lac mel jaʼel. Maʼañic mi caj lac xoj muʼ bʌ i mejlel i mʌctan yambʌlob chaʼan maʼañic miʼ ñʌchʼtañob jiñi wen tʼan.

14. ¿Bajcheʼ miʼ mejlel i cʌntesan i yalobilob jiñi tatʌlob chaʼan jiñi i pislelob miʼ yʌqʼuen i ñuclel Dios?

¹⁴ Jiñi tatʌlob yom miʼ cʌntesañob i yalobil chaʼan miʼ jacʼob jiñi principio tac. Añob tiʼ wenta miʼ qʼuel jaʼel chaʼan wen jach miʼ xojob i pislel tiʼ pejtelelob chaʼan miʼ tijicñesañob Jehová (Proverbios 22:6; 27:11). ¿Bajcheʼ miʼ mejlel i coltan i yalobilob chaʼan miʼ qʼuelob ti ñuc Dios yicʼot i mandar tac? Jiñʌch cheʼ miʼ pʌsob wem bʌ ejemplo i miʼ cʌntesañob yicʼot cʼuxbiya bajcheʼ yicʼot baqui miʼ mejlel i tajob wem bʌ i pislel. Yom miʼ pʌsbeñob jaʼel chaʼan jiñi pislel muʼ bʌ i mʌñob mucʼʌch i yʌqʼuen i ñuclel Jehová, i mach cojach yom cheʼ bajcheʼ miʼ mulañob.

15. ¿Chuqui yom miʼ coltañonla chaʼan mi lac yajcan ti wen lac pislel?

¹⁵ Jiñi Biblia miʼ coltañonla lac ñaʼtan ti wen bajcheʼ yilal yom jiñi lac pislel muʼ bʌ i yʌqʼuen i ñuclel Dios. Isujmʌch chaʼan mach junlajalic bajcheʼ yilal muʼ bʌ lac mulan. Pero tiʼ pejtelel ora yom wen sʌc, wen cʌntʌbil, pʼisbil jach yicʼot wen jach ti qʼuelol yaʼ baqui añonla ñumel yicʼot baqui chumulonla.

16. ¿Chucoch yom mi lac chaʼlen wersa chaʼan mi lac xoj wem bʌ lac pislel?

¹⁶ An i tajol wocolʌch chaʼan mi lac taj wem bʌ lac pislel. Ti cabʌl tienda cojach miʼ chojñel jiñi tsijib tac bʌ woliʼ loqʼuel. Jin chaʼan, tajol jiñi wiñic o xʼixic yom miʼ ñumen locʼsʌben i yorajlel chaʼan miʼ sʌclan wen jach bʌ ti qʼuelol. Pero weñʌch cheʼ miʼ mel bajcheʼ iliyi. ¿Chucoch? Ñaxam bʌ, come jiñi hermanojob mi caj i qʼuelob ti ñuc cheʼ wen lac pislel muʼ bʌ lac xoj. I chaʼpʼejlel, come mi caj la cʌqʼuen i ñuclel Jehová. Ñumen ñuc jiñi tijicñʌyel muʼ bʌ la cubin cheʼ mi la cʌqʼuen i ñuclel Jehová, i mach jiñic cheʼ mi lac chaʼlen wersa lac xoj wem bʌ lac pislel.

17. ¿Chuqui yom miʼ ñaʼtan juntiquil hermano miʼ yom i yʌcʼ ti colel i tsuctiʼ tiʼ xʌcʼtiʼ?

¹⁷ ¿Wem ba cheʼ miʼ cʌy i tsuctiʼ tiʼ xʌcʼtiʼ juntiquil hermano? I Mandar Moisés tsiʼ yʌlʌ chaʼan jiñi wiñicob mach yomic miʼ jujchiñob. Pero ili ora mach wersajix yom mi lac jacʼ jiñi Mandar (Levítico 19:27; 21:5; Gálatas 3:24, 25). An cultura tac baqui mach lecojic miʼ qʼuejlel cheʼ bʌ jiñi hermanojob miʼ cʌyob i tsuctiʼ tiʼ xʌcʼtiʼ, i tajol mucʼʌch i ñʌchʼtʌntelob cheʼ bʌ miʼ ñumelob ti subtʼan. Cheʼ jaʼel, an hermanojob aqʼuebiloʼ bʌ i yeʼtel ti congregación anquese añob i tsuctiʼ. Pero an muʼ bʌ i bajñel ñaʼtañob chaʼan miʼ jujchiñob (1 Corintios 8:9, 13; 10:32). Ti yan tac bʌ cultura mach weñic miʼ qʼuejlel cheʼ jiñi xsubtʼañob miʼ cʌyob i tsuctiʼ tiʼ xʌcʼtiʼ come mach ñʌmʌlic ti qʼuejlel. Mi juntiquil hermano miʼ yʌcʼ ti colel i tsuctiʼ ti jiñi cultura tac, tajol maʼañic choncol i yʌqʼuen i ñuclel Dios yicʼot maʼañic miʼ mejlel i ticʼ i bʌ (1 Timoteo 3:2, 7; Romanos 15:1-3).

18, 19. ¿Bajcheʼ miʼ coltañonla Miqueas 6:8?

¹⁸ Mi la cʌqʼuen wocolix i yʌlʌ Jehová cheʼ maʼañic miʼ subeñonla bajcheʼ yilal lac pislel yom bʌ mi lac xoj. Pero mucʼʌch i yʌqʼueñonla principio tac loqʼuem bʌ ti Biblia chaʼan mi lac yajcan ti wen. Mi cheʼʌch mi lac mel, mi caj lac pʌs chaʼan mi lac peqʼuesan lac bʌ tiʼ tojlel Dios, cheʼ bajcheʼ miʼ yʌl Miqueas 6:8.

¹⁹ Yom pecʼonla yicʼot mi lac ñaʼtan chaʼan Jehová sʌcʌch yicʼot chʼujulʌch, i jiñʌch i mandar tac muʼ bʌ i mejlel i coltañonla. Mi mucʼʌch lac jacʼ, mi caj lac pʌs chaʼan añʌch lac pecʼlel. Cheʼ jaʼel, mi caj i coltañonla chaʼan mi la cʌcʼ ti ñuc chuqui miʼ ñaʼtan yicʼot bajcheʼ yilal miʼ yubin jiñi yambʌlob.

20. ¿Chuqui miʼ yujtel mi weñʌch bajcheʼ yilal lac pislel?

²⁰ Jiñi lac pislel yom miʼ yʌcʼ ti cʌñol chaʼan i wiñiconla Jehová, i mi lac jacʼben i mandar tac Dios yicʼot lac tijicñʌyel. Yom mi la cʌqʼueñob i tijicñʌyel jiñi hermanojob yicʼot hermanajob chaʼan utsʼat bajcheʼ yilalob i pislel yicʼot i melbalob. Miʼ pʌyob tilel jiñi yomoʼ bʌ i cʌn jiñi wen tʼan chaʼan laj cuxtʌlel i miʼ yʌqʼueñob i ñuclel yicʼot i tijicñʌyel Jehová. Mi wen mi lac ñaʼtan bajcheʼ yilal yom lac pislel, mi caj lac chʌn acʼ ti ñuc jiñi Dios am bʌ i ñuclel (Salmo 104:1, 2).