1. ¿Chuqui miʼ yʌqʼueñonla lac mel Jehová?

JEHOVÁ miʼ yʌqʼueñonla lac yajcan chuqui la com lac mel (chaʼlen) ti laj cuxtʌlel. Miʼ cʌntesañonla chaʼan mi lac wen ñaʼtan chuqui mi lac yajcan yicʼot miʼ coltañonla lac tajben i wenlel cheʼ utsʼat miʼ qʼuel jiñi muʼ bʌ lac yajcan lac mel (Sal. 119:173). Cheʼ mi laj cʼʌn ti laj cuxtʌlel jiñi ticʼojel tac am bʌ ti Biblia miʼ coltañonla laj yajcan chuqui wen (He. 5:14).

2. ¿Chuqui wocol mi la cubin cheʼ bʌ añix chuqui tsaʼ lac yajca?

² Anquese weñʌch chuqui tsaʼ lac yajca lac mel, tajol yomʌch mi lac chaʼlen wersa la cujtesan tsaʼ bʌ lac teche. Laʼ laj qʼuel ili ejemplo tac. Juntiquil xcolel miʼ ñaʼtan i pejcan tiʼ pejtelel jiñi Biblia. Miʼ mel chaʼpʼejl uxpʼejl semana, i ti wiʼil miʼ cʌy i mel. Juntiquil hermana tsaʼix i ñaʼta ochel bajcheʼ precursora, pero miʼ bej cʌy ti wiʼil chaʼan miʼ butʼ jiñi solicitud. Junmojt ancianojob miʼ ñaʼtañob chaʼan miʼ ñumen julaʼtañob jiñi hermanojob, pero miʼ ñumel cabʌl uw i maʼañic miʼ melob. Ili ejemplo tac mach lajalic, pero jiñi hermanojob an chuqui tsiʼ ñaʼtayob chaʼan yom miʼ melob i maʼañic tiʼ tsʼʌctesayob. Jiñi xñoptʼañob ti Corinto cheʼ ti ñaxam bʌ siglo lʌcʼʌ lajal tsiʼ meleyob. Laʼ lac wen ñaʼtan chuqui miʼ mejlel laj cʌn tiʼ tojlelob.

3. ¿Chuqui tsiʼ ñaʼtayob i mel jiñi xñoptʼañob ti Corinto, pero chuqui tsaʼ ujti?

³ Cheʼ bʌ ti jabil 55, jiñi añoʼ bʌ ti Corinto añʌch chuqui ñuc bʌ i cʼʌjñibal tsiʼ ñaʼtayob i mel. Tsiʼ yubiyob chaʼan jiñi hermanojob ti Jerusalén yicʼot ti Judea añob cabʌl i pʼumpʼuñiyel, i chaʼan jiñi yambʌ congregación tac tsiʼ tempayob taqʼuin chaʼan miʼ coltañob. Tiʼ yutslelob i pusicʼal, tsiʼ ñaʼta i yʌcʼob taqʼuin i tsiʼ cʼajtibeyob Pablo bajcheʼ yom miʼ melob. Pablo tsaʼʌch i tsictesʌbeyob i tsiʼ chocbeyob majlel Tito chaʼan miʼ coltañob (1 Co. 16:1; 2 Co. 8:6). Pero cheʼ bʌ tsaʼix ñumi chaʼpʼejl uxpʼejl uw, jiñi Pablo tsiʼ  yubi chaʼan maʼañic chuqui melbilob i chaʼan. Jin chaʼan, tajol jiñi taqʼuin muʼ bʌ caj i yʌcʼob maxto tempʌbilic chaʼan miʼ chʼʌjmel majlel ti Jerusalén yicʼot jiñi tsaʼix bʌ i yʌcʼʌ jiñi yambʌ congregación tac (2 Co. 9:4, 5).

4. Cheʼ bajcheʼ miʼ yʌl 2 Corintios 8:7, 10, 11, ¿chuqui jiñi tsaʼ bʌ i subeyob Pablo chaʼan yom miʼ melob jiñi xñoptʼañob ti Corinto?

⁴ Jiñi xñoptʼañob ti Corinto weñʌch chuqui tsiʼ ñaʼtayob i mel, jin chaʼan Pablo tsiʼ yʌqʼueyob wocolix i yʌlʌ chaʼan jiñi pʼʌtʌl bʌ i ñopoñelob yicʼot chaʼan miʼ tʼoxob chuqui an i chaʼañob. Pero cheʼ jaʼel, tsaʼʌch i subeyob chaʼan yom miʼ yujtesañob jiñi tsaʼ bʌ i ñaʼtayob i mel (pejcan 2 Corintios 8:7, 10, 11). Jiñi tsaʼ bʌ i ñusayob miʼ cʌntesañonla chaʼan jiñi xucʼul bʌ xñoptʼañob yom miʼ chaʼleñob wersa chaʼan miʼ tsʼʌctesañob jiñi tsaʼ bʌ i ñaʼtayob i mel.

5. ¿Baqui bʌ cʼajtiya tac mi caj lac jacʼ?

⁵ Cheʼ bajcheʼ jiñi xñoptʼañob ti Corinto, tajol wocolʌch mi la cubin chaʼan mi lac mel jiñi tsaʼ bʌ lac ñaʼta come xmulilonla yicʼot mi laj cʌy ti wiʼil jiñi yom bʌ mi lac mel. Cheʼ jeʼel, jiñi muʼ bʌ i mejlel ti waʼ ujtel miʼ mʌctañonla chaʼan maʼañic miʼ cʼotel lac mel jiñi tsaʼ bʌ lac ñaʼta (Ec. 9:11, 12; Ro. 7:18). Ti ili temaj mi caj lac jacʼ ili cʼajtiya tac: ¿Bajcheʼ miʼ mejlel lac yajcan chuqui wem bʌ mi lac mel? ¿Chuqui miʼ mejlel lac mel chaʼan mi lac tsajin jiñi tsaʼ bʌ lac yajca lac mel ti wajali cheʼ añʌch i cʼʌjñibal? Yicʼot ¿chuqui miʼ coltañonla la cujtesan jiñi tsaʼ bʌ lac teche lac mel?

6. ¿Baqui ora miʼ mejlel laj qʼuextan jiñi muʼ bʌ lac yajcan?

⁶ An tsaʼ bʌ lac yajca lac mel i mach bʌ añic miʼ mejlel laj qʼuextan. Jumpʼejl ejemplo, mach la comic laj cʌy lac melben i yeʼtel (troñel) Jehová, i chʌn xucʼulonla la com ajñel la quicʼot jiñi la quijñam o lac ñoxiʼal (Mt. 16:24; 19:6). Pero an tacʌch mucʼʌch bʌ i mejlel laj qʼuextan come añʌch chuqui miʼ mejlel tiʼ qʼuextʌyel ti lac tojlel. ¿Chuqui mi caj i coltañonla chaʼan mi lac yajcan ti wen muʼ bʌ lac mel?

7. ¿Chuqui yom mi laj cʼajtiben Dios, i chucoch?

⁷ Laʼ laj cʼajtiben Dios jiñi lac ñaʼtʌbal. Jehová tsiʼ yʌqʼue tiʼ ñaʼtʌbal Santiago chaʼan miʼ tsʼijbun iliyi: «Mi anto yom laʼ ñaʼtʌbal cʼajtibenla Dios muʼ bʌ i pʼewbeñob pejtelel winicob». (Stg. 1:5). Come yomto lac ñaʼtʌbal cheʼ an chuqui yom mi lac mel, laʼ lac ñop Jehová cheʼ bʌ an chuqui mi lac yajcan lac mel yicʼot cheʼ mi lac chaʼ tsajin. Cheʼ jiñi, Jehová mi caj i coltañonla lac yajcan la com bʌ lac mel.

8. ¿Chuqui yom mi lac ñaxan mel cheʼ an chuqui mi caj lac yajcan?

⁸ Laʼ lac ñumen sʌclan chuqui yom mi lac mel. Laʼ lac pejcan jiñi i Tʼan Dios, jiñi jun tac muʼ bʌ i yʌcʼ i yorganización Jehová yicʼot laʼ laj cʼajtiben juntiquil mejl bʌ i coltañonla (Pr. 20:18). I cʼʌjñibalʌch mi lac mel pejtelel iliyi cheʼ woli (choncol) lac ñaʼtan laj qʼuex jiñi la queʼtel, lac majlel ti chumtʌl ti yambʌ parte o chuqui ti eʼtel mi caj laj cʌn chaʼan miʼ mejlel lac mʌcʼlan lac bʌ i mi lac chʌn melben i yeʼtel Jehová.

9. ¿Bajcheʼ mi lac taj lac wenlel cheʼ wen chuqui mi lac ñaʼtan lac mel?

⁹ Laʼ lac tsajin chuqui miʼ ñijcañonla chaʼan mi lac mel. Jehová ñuc i cʼʌjñibal i chaʼan jiñi muʼ bʌ i ñijcañonla chaʼan com bʌ lac mel (Pr. 16:2). Miʼ pijtan chaʼan wen mi lac mel ti chuqui jach. Jin chaʼan, yom mi laj cʌn lac bʌ chaʼan chuqui miʼ mejlel lac mel i mi la cʌqʼuen i ñaʼtan jiñi yambʌlob cheʼ bʌ an chuqui mi lac yajcan lac mel. Mi mach cheʼic mi lac mel, tajol wocol mi caj la cubin chaʼan mi la cujtesan jiñi tsaʼ bʌ lac teche. Laʼ la cʌl juntiquil xcolel muʼ bʌ i ñaʼtan ochel bajcheʼ precursor, pero maʼañic miʼ tsʼʌctesan jiñi ora i mach tijicñayic miʼ ñusan ti subtʼan. Tajol tsiʼ ñaʼta ochel bajcheʼ precursor chaʼan yom i tijicñesʌben i pusicʼal Jehová. Pero, tajol tsaʼ jach ochi ti precursor  chaʼan wen miʼ qʼuejlel tiʼ tat i ñaʼ o juntiquil muʼ bʌ i qʼuel ti ñuc.

10. ¿Chuqui ñuc i cʼʌjñibal cheʼ an chuqui yom mi laj qʼuextan?

¹⁰ Laʼ laj qʼuel yambʌ ejemplo: Juntiquil woli bʌ i cʌn chaʼan Biblia miʼ ñaʼtan i cʌy i ñucʼ cʼujts. Ti ñaxan, miʼ wen chaʼlen wersa i miʼ cʌy i ñucʼ chaʼpʼejl semana, pero miʼ chaʼ cʼotel i mel. Tiʼ wiʼil mucʼʌch i ñoj cʌy. Jiñi i cʼuxbiya ti Jehová yicʼot chaʼan yom i yʌqʼuen i tijicñʌyel an i colta chaʼan miʼ mʌlben (jotben) (Col. 1:10; 3:23).

11. ¿Chucoch yom mi lac wen ñaʼtan chuqui mi caj lac mel?

¹¹ Laʼ lac wen ñaʼtan chuqui la com lac mel. Ili mi caj i coltañonla lac tsʼʌctesan jiñi tsaʼ bʌ lac teche. Jumpʼejl ejemplo, mi tsaʼ lac ñaʼta lac pejcan ti bele ora jiñi Biblia, pero maʼañic lac chaʼan jumpʼejl programa, tajol maʼañic mi caj i mejlel lac mel. * Yambʌ ejemplo: Jiñi ancianojob ti congregación miʼ ñaʼtañob i ñumen julaʼtan jiñi hermanojob, pero miʼ ñumel i yorajlel i maʼañic majqui miʼ julaʼtañob. Mejl bʌ i coltañob jiñʌch cheʼ cʼajtibeñob i bʌ iliyi: «¿Am ba lac ñaʼta majqui bʌ hermanojob yom miʼ julaʼtʌntelob? ¿Tsaʼix ba lac chajpa jumpʼejl i yorajlel chaʼan mi lac julaʼtañob?»

12. ¿Chuqui tajol mi caj lac mel, i chucoch?

¹² Laʼ lac ñaʼtan chaʼan mach luʼ mejlic lac mel. Maʼañic majqui wen an i yorajlel i chaʼan, i chubʌʼan yicʼot i pʼʌtʌlel chaʼan miʼ mel pejtelel chuqui yom. Jin chaʼan, yom mi lac ñaʼtan chuqui mucʼʌch bʌ i mejlel lac mel. An i tajol yom mi laj qʼuextan jiñi tsaʼix bʌ lac yajca lac mel come mach mejlic lac tsʼʌctesan (Ec. 3:6). Pero mi tsaʼ lac tsaji jiñi tsaʼix bʌ la yajca lac mel, mi laj qʼuextan chuqui yom melol i mi lac pensalin chaʼan mejlʌch lac tsʼʌctesan, ¿chuqui mi caj i coltañonla la cujtesan jiñi tsaʼix bʌ lac teche? Laʼ laj qʼuel joʼchajp mejl bʌ lac mel.

13. ¿Bajcheʼ miʼ mejlel lac taj lac pʼʌtʌlel chaʼan mi lac mel jiñi tsaʼ bʌ lac yajca?

¹³ Laʼ laj cʼajtiben Dios jiñi lac pʼʌtʌlel chaʼan mi lac mel. Jehová miʼ mejlel i yʌqʼueñonla jiñi lac pʼʌtʌlel ‹chaʼan mi lac mel› jiñi tsaʼ bʌ lac ñaʼta i mi lac tsʼʌctesan (Fil. 2:13). Jin chaʼan, laʼ laj cʼajtiben jiñi chʼujul bʌ i yespíritu chaʼan mi lac taj lac pʼʌtʌlel i cʼʌjñibal bʌ lac chaʼan. Laʼ lac bej chaʼlen oración anquese mi laj qʼuel chaʼan wolito (yʌquelto) i jalʼan chaʼan miʼ jacʼbeñonla. Jesús tsiʼ yʌlʌ: «[Chʌn] cʼajtinla, mi caj laʼ wʌqʼuentel [chʼujul bʌ espíritu]» (Lc. 11:9, 13).

14. ¿Bajcheʼ miʼ coltañonla Lucas 14:28 chaʼan mi lac tsʼʌctesan jiñi tsaʼ bʌ lac yajca lac mel?

¹⁴ Laʼ lac chajpan muʼ bʌ caj lac mel (pejcan Lucas 14:28). Cheʼ mi caj lac mel jumpʼejl eʼtel, yom mi lac wʌn chajpan i mi lac chʼʌm ti ñuc. Lajal jaʼel, cheʼ bʌ an chuqui tsaʼ lac yajca lac mel, laʼ lac mel jumpʼejl lista chaʼan chuqui tac mi caj lac mel. Cheʼ an lac chaʼan jumpʼejl ñuc bʌ eʼtel i mi lac tsʼitaʼ mel majlel, mi caj i coltañonla laj qʼuel chaʼan wolʌch i mejlel lac chaʼan. Pablo tiʼ sube jiñi xñoptʼañob añoʼ bʌ ti Corinto chaʼan yom miʼ tʼox cʌyob majlel i taqʼuin «ti jini ñaxan bʌ qʼuin ti jujumpʼejl semana», i mach jiñicto miʼ tempañob cheʼ mi caj i cʼotel (1 Co. 16:2). Yambʌ bajcheʼ miʼ coltañonla cheʼ mi lac tsʼitaʼ mel majlel jiñi ñuc tac bʌ eʼtel jiñʌch cheʼ maʼañic mi caj laj cʼojyel.

15. Cheʼ bʌ tsaʼix lac chajpa chuqui mi cajel lac mel, ¿chuqui yambʌ miʼ mejlel lac mel?

¹⁵ Cheʼ mi lac tsʼijbun ti jumpʼejl jun jiñi tsaʼ bʌ lac chajpa lac mel mi caj i coltañonla lac tsʼʌctesan (1 Co. 14:40). Jumpʼejl ejemplo, jiñi junmojt ancianojob miʼ subentelob chaʼan yom miʼ yajcañob juntiquil anciano chaʼan miʼ tsʼijbun majlel jiñi tsaʼ bʌ i ñaʼtayob i mel, majqui mi caj  i mel yicʼot jala yom miʼ yujtesañob. Jiñi ancianojob mucʼʌch bʌ i melob iliyi, miʼ tsʼʌctesañob jiñi tsaʼ bʌ i ñaʼtayob i mel (1 Co. 9:26). Lʌcʼʌ lajal miʼ mejlel lac mel jaʼel. Jumpʼejl ejemplo, ti jujumpʼejl qʼuin miʼ mejlel lac mel jumpʼejl lista chaʼan jiñi eʼtel tac yomto bʌ mi lac mel yicʼot mi lac tsʼijbun majlel chuqui tac ñaxan yom mi lac mel. Ili mach cojach mi caj i coltañonla la cujtesan jiñi tsaʼix bʌ lac teche, mi caj i coltañonla jaʼel chaʼan mi lac mel ti ora yan tac bʌ eʼtel.

16. Cheʼ bajcheʼ miʼ yʌl Romanos 12:11, ¿chuqui ñuc i cʼʌjñibal yom mi lac mel chaʼan mi lac tsʼʌctesan jiñi tsaʼ bʌ lac ñaʼta?

¹⁶ Laʼ lac chaʼlen wersa. Chaʼan mi lac chʼʌm ti ñuc jiñi tsaʼix bʌ lac chajpa lac mel yicʼot mi la cujtesan jiñi muʼ bʌ lac tech yomʌch mi lac chaʼlen wersa (pejcan Romanos 12:11). Pablo tiʼ sube Timoteo chaʼan yom miʼ chʌn chaʼlen wersa i sujtel ti wem bʌ xcʌntesa i chaʼan mach yomic miʼ cʌy i mel. Jiñi ticʼojel ñuc i cʼʌjñibal cheʼ an chuqui la com lac mel tiʼ chaʼan bʌ Dios (1 Ti. 4:13, 16).

17. ¿Bajcheʼ miʼ coltañonla Efesios 5:15, 16 lac tsʼʌctesan tsaʼix bʌ lac ñaʼta?

¹⁷ Laʼ laj cʼʌn ti wen jiñi ora am bʌ lac chaʼan (pejcan Efesios 5:15, 16). Laʼ lac wen qʼuel jalaqui an chuqui mi caj lac mel i mach laj qʼuextan. Mach lac pijtan chaʼan mi caj lac taj jumpʼejl qʼuin ñumen wem bʌ chaʼan mi lac mel, come tajol maʼañic baqui ora mi caj i cʼotel (Ec. 11:4). Mach la cʌcʼ chaʼan jiñi mach tac bʌ wen añic i cʼʌjñibal miʼ yʌqʼueñonla lac sʌt jiñi lac pʼʌtʌlel yicʼot jiñi i yorajlel am bʌ lac chaʼan chaʼan mi lac mel jiñi ñumen ñuc tac bʌ i cʼʌjñibal (Fil. 1:10). Mi mejlʌch lac mel, laʼ lac sʌclʌben i yorajlel baqui maʼañic chuqui miʼ mejlel i mʌctañonla. Laʼ lac suben yambʌlob chaʼan la com i yorajlel chaʼan chuqui mi caj lac mel. I laʼ lac ñaʼtan lac yʌp jiñi lac celular yicʼot chaʼan wiʼilto mi caj laj qʼuel jiñi laj correo o yan tac bʌ ti Internet. *

18, 19. Cheʼ bʌ añix chuqui wem bʌ tsaʼ lac yajca lac mel, ¿chuqui miʼ mejlel i coltañonla chaʼan maʼañic mi lac cʌy lac mel cheʼ miʼ yujtel wocol?

¹⁸ Laʼ lac ñaʼtan jiñi wenlel tac muʼ bʌ caj lac taj. Miʼ mejlel la lajin jiñi i wenlel tac tsaʼ bʌ lac yajca lac mel yicʼot cheʼ an baqui mi lac majlel. Mi la com cʼotel yaʼ baqui la com, yomʌch mi lac chaʼlen wersa anquese mi lac taj mʌcʌl bʌ bij i mi lac sʌclan yambʌ bij. Cheʼ lajal jaʼel, cheʼ mi lac ñaʼtan jiñi wenlel tac muʼ bʌ caj lac taj chaʼan tsaʼ bʌ lac yajca lac mel, mi caj lac chʌn chaʼlen wersa anquese mi lac taj wocol tac (Gá. 6:9).

¹⁹ Wocolʌch cheʼ an chuqui mi lac yajcan lac mel i mi lac tsʼʌctesan. Pero tiʼ coltaya Jehová miʼ mejlel lac taj jiñi lac ñaʼtʌbal yicʼot lac pʼʌtʌlel ñuc bʌ i cʼʌjñibal chaʼan mi la cujtesan tsaʼ bʌ lac teche.