1. ¿Chucoch jin jach Jehová yom bʌ mi lac chʼujutesan?

JIN jach yom mi lac chʼujutesan Jehová come jin tsiʼ meleyonla (pʌtʌyonla) yicʼot tsiʼ yʌqʼueyonla laj cuxtʌlel (Ap. 4:11). Pero, anquese mucʼʌch laj cʼuxbin Jehová i mi laj qʼuel ti ñuc, an tac chuqui miʼ mejlel lac mulan i miʼ mʌctañonla chaʼan jin jach mi lac chʼujutesan. Chaʼan mach cheʼic mi la cujtel, yom mi lac chʼʌmben i sujm bajcheʼ mi cʼotel ti ujtel iliyi. Pero laʼ lac ñaxan qʼuel chuqui yom i yʌl cheʼ jin jach Dios yom mi lac chʼujutesan.

2. Cheʼ bajcheʼ miʼ yʌl Éxodo 34:14, ¿chuqui maʼañic mi caj lac mel mi jin jach mi lac chʼujutesan Jehová?

² Jiñi Biblia miʼ yʌl chaʼan jiñi laj cʼuxbiya ti Jehová mi taj i bʌ yicʼot cheʼ jin jach mi lac chʼujutesan. I cheʼ jin jach yom mi lac chʼujutesan, yom i yʌl chaʼan cojach tiʼ tojlel. Maʼañic mi la cʌcʼ chaʼan chuqui jach o majqui jach mi la cʌcʼ ti ñaxan (Pejcan Éxodo 34:14).

3. ¿Baqui chucul cheʼ jin jach mi lac chʼujutesan Jehová?

³ Jiñi lac chʼujutesaya ti Jehová yaʼʌch chucul ti jiñi chuqui cʌmbil lac chaʼan ti tojlel. An cʼoti lac mulʌben jiñi utsʼatax bʌ i melbal tac. La cujil chuqui mi mulan yicʼot chuqui maʼañic, i mi la cʌl chaʼan i sujmʌch. Mi lac chʼʌmben i sujm chuqui woli (choncol) i chajpan ti lac tojlel yicʼot mi laj coltan cheʼ mi lac jacʼben i mandar. Mi la cubin lac tijicñʌyel cheʼ miʼ yʌcʼonla sujtel tiʼ yamigo (Sal. 25:14). Pejtelel chuqui mi laj cʌn tiʼ tojlel jiñi tsaʼ bʌ i meleyonla miʼ lʌcʼtesañonla tiʼ tojlel (Stg. 4:8).

4. a) ¿Chuqui miʼ cʼʌn jiñi Diablo chaʼan mach jin jach mi lac chʼujutesan Jehová? b) ¿Chuqui mi caj laj qʼuel ti ili temaj?

 ⁴ Ili pañimil (mulawil) an tiʼ cʼʌb Satanás i miʼ cʼʌn chaʼan an chuqui miʼ yʌqʼueñonla lac mulan yicʼot chaʼan mi lac jacʼben laj cʼunlel (Ef. 2:1-3; 1 Jn. 5:19). Yom chaʼan chuqui jach miʼ cʼotel laj cʼuxbin chaʼan mach jin jach mi lac chʼujutesan Jehová. Mi caj laj qʼuel chaʼchajp muʼ bʌ i cʼʌn chaʼan miʼ mʌjlel i chaʼan. Ñaxam bʌ, miʼ ñijcañonla chaʼan mi lac taj cabʌl chubʌʼan. I chaʼpʼejlel, miʼ sʌclan bajcheʼ miʼ mel ti lac tojlel chaʼan mi laj yajcan mach bʌ weñic ñusaqʼuin.

5. ¿Chucoch yom mi laj cʌntan lac bʌ chaʼan maʼañic miʼ cʼotel laj cʼuxbin taqʼuin?

⁵ Ti lac pejtelel la com chaʼan añʌch chuqui mi laj cʼux, utsʼat bʌ lac pislel yicʼot wem bʌ la cotot. Pero yom mi laj cʌntan lac bʌ chaʼan maʼañic miʼ cʼotel laj cʼuxbin jiñi taqʼuin. Wʌle bʌ ora, cabʌlob miʼ wen «mulañob taqʼuin» yicʼot chaʼan chuqui miʼ mejlel i mʌñob (2 Ti. 3:2). Jesús yujil chaʼan jiñi xñoptʼañob i chaʼan miʼ mejlel i cʼotel i mulañob jiñi taqʼuin, jin chaʼan tsiʼ yʌlʌ: «Maʼanic xʼeʼtel muʼ bʌ mejlel i yuman chaʼtiquil yumʌl. Miʼ tsʼaʼlen juntiquil yumʌl, miʼ cʼuxbin yambʌ. Miʼ jacʼben i tʼan juntiquil, miʼ ñusʌben i tʼan yambʌ. Mach mejlic laʼ yuman Dios cheʼ woli laʼ yuman chubʌʼañʌl» (Mt. 6:24). Jiñi muʼ bʌ i chʼujutesan Dios i cheʼ jiñi miʼ yʌqʼuen i yorajlel yicʼot miʼ chaʼlen wersa i taj cabʌl taqʼuin, lajal bajcheʼ woli (yʌquel) i melben i yeʼtel chaʼtiquil yumʌl. Mach jin jach Jehová woliʼ chʼujutesan.

6. ¿Chuqui mi laj cʌn chaʼan tsaʼ bʌ i sube Jesús jiñi congregación am bʌ ti Laodicea?

⁶ Cheʼ tiʼ yujtibal jiñi ñaxam bʌ siglo, jiñi xñoptʼañob ti Laodicea miʼ yʌlob chaʼan añob cabʌl i taqʼuin, chaʼan cabʌlob i chubʌʼan yicʼot chaʼan maʼañix chuqui anto yom  i chaʼañob. Pero tiʼ wut Jehová yicʼot Jesús maʼañic wen chumulob, cʼax pʼumpʼuñob, maʼañobic i chubʌʼan, xpotsʼob yicʼot pitsʼilob. Jesús maʼañic tsiʼ tiqʼuiyob chaʼan cabʌlob i taqʼuin, chaʼañʌch woliʼ ticʼlañob bajcheʼ añob tiʼ tojlel Jehová tiʼ caj i cʼuxbintel chubʌʼañʌl (Ap. 3:14-17). Mi tsaʼ cʼoti laj qʼuel chaʼan ti lac pusicʼal woli lac tech lac mulan lac taj cabʌl chubʌʼañʌl, an tacʌch chuqui yom mi lac mel chaʼan mi lac tojʼesan lac bʌ (1 Ti. 6:7, 8). Mi maʼañic mi lac mel, chaʼchajp jax lac pusicʼal yubil i jiñi Jehová maʼañic mi caj i chʼʌm lac chʼujutesaya come ‹tsʌytsʌyña i pusicʼal cheʼ mi laj cʌy› o jin jach miʼ cʼajtin chaʼan mi lac chʼujutesan (Dt. 4:24). ¿Chuqui miʼ mejlel i yʌcʼ chaʼan mi lac ñumen qʼuel ti ñuc jiñi taqʼuin?

7-9. ¿Chuqui miʼ mejlel laj cʌn tiʼ tojlel David?

⁷ Laʼ laj cʌn tiʼ tojlel David, juntiquil anciano am bʌ i pʼipʼlel chumul bʌ ti Estados Unidos. Miʼ yʌl chaʼan juntiquilʌch wen yujil bʌ eʼtel (troñel). Ti jiñi empresa baqui tsiʼ chaʼle eʼtel, tsaʼ cʼʌjquesʌnti tiʼ yeʼtel, cheʼto jaʼel tsaʼ cʼoti ti cʌjñel chaʼan juntiquilʌch wem bʌ xʼeʼtel chaʼan chuqui miʼ mel yaʼ ti país. Miʼ yʌl: «Ti jimbʌ ora tsaʼ c ñaʼta chaʼan jiñʌch c wenlel woli bʌ c taj tiʼ tojlel Jehová». Pero ¿i sujm ba jiñi?

⁸ David tsaʼ caji i qʼuel chaʼan jiñi i yeʼtel woliʼ ticʼlan bajcheʼ an yicʼot Jehová. Miʼ tsictesan: «Cheʼ yaʼañon ti tempa bʌ yicʼot ti subtʼan jin jach mic ñaʼtan jiñi wocol tac chaʼan bʌ queʼtel. Mic taj cabʌl taqʼuin, pero ti jujumpʼejl qʼuin wen lujbeñon mi cubin c bʌ yicʼot tsaʼ caji c taj wocol tic ñujpuñel».

⁹ Cheʼ jiñi, David tsaʼ cʼoti i qʼuel chaʼan yom miʼ qʼuextan chuqui miʼ yʌcʼ ti ñaxan. Miʼ yʌl: «Tsaʼ c ñaʼta c tojʼesan bajcheʼ añon». Jin chaʼan, tsaʼ caji i qʼuextan jaypʼejl ora yom i chaʼlen eʼtel i tsiʼ yʌqʼue i ñaʼtan jiñi i yum chuqui yom i mel. Pero tsaʼ chojqui loqʼuel tiʼ yeʼtel. ¿I chuqui tsiʼ mele? Miʼ yʌl: «Cheʼ tiʼ yijcʼʌlel,  tsaʼ c butʼu jin jun chaʼan mi cochel bajcheʼ precursor auxiliar». Chaʼan miʼ mʌcʼlañob i bʌ, David yicʼot i yijñam tsaʼ caji i sujcuñob ototʌl tac. Cheʼ tsʼitaʼ ñumeñix ora, David tsaʼ caji i tech eʼtel bajcheʼ precursor regular, i ti wiʼil jiñi i yijñam tsaʼ ochi bajcheʼ precursora jaʼel. Tiʼ sʌclayob jumpʼejl eʼtel maʼañic bʌ miʼ wen mulʌntel, pero mach jiñic ñuc bʌ i cʼʌjñibal tiʼ tojlelob. Anquese tsʼitaʼ jach miʼ tojtʌlob bajcheʼ ti ñaxam bʌ i yeʼtel, ti jujumpʼejl uw miʼ tajol chuqui i cʼʌjñibal bʌ i chaʼañob. Yomob i yʌcʼ ti ñaxan Jehová, i an i qʼueleyob chaʼan miʼ cʌntan jiñi muʼ bʌ i sʌclʌbeñob i Yumʌntel (Mt. 6:31-33).

10. ¿Bajcheʼ miʼ mejlel laj cʌntan lac pusicʼal?

¹⁰ Mi tsʼitaʼ jach o cabʌl chuqui an lac chaʼan, yomʌch mi laj cʌntan lac pusicʼal. ¿Bajcheʼ? Jiñʌch cheʼ maʼañic miʼ cʼotel laj cʼuxbin jiñi chubʌʼañʌl yicʼot cheʼ maʼañic mi la cʌcʼ chaʼan jiñi la queʼtel ñumen ñuc i cʼʌjñibal bajcheʼ tiʼ melbentel i yeʼtel Jehová. Chaʼan miʼ cʼotel lac ñaʼtan mi cheʼ woli la cujtel bajcheʼ ili, laʼ laj cʼajtiben lac bʌ: «¿Jin jach ba mic ñaʼtan jiñi queʼtel cheʼ yaʼañon ti tempa bʌ o subtʼan? ¿Muʼ ba cʼojoʼtan ti bele ora bajcheʼ mi caj cajñel ti taqʼuin ti talto bʌ qʼuin? ¿Am ba c wocol tic ñujpuñel tiʼ caj taqʼuin yicʼot chubʌʼañʌl tac? ¿Muʼ ba caj c chʼʌm jumpʼejl eʼtel maʼañic bʌ mi wen mulʌntel chaʼan mic ñumen melben i yeʼtel Jehová?» (1 Ti. 6:9-12). Cheʼ miʼ cʼotel lac ñaʼtan bajcheʼ añonla chaʼan iliyi, laʼ laj cʼajtesan chaʼan Jehová miʼ cʼuxbiñonla yicʼot chaʼan miʼ yʌqʼuen ili tʼan jiñi muʼ bʌ i melben i yeʼtel ti jumpʼejl i pusicʼal: «Maʼanic mi caj a cʌytʌl ti mebaʼ. Maʼanic mi caj j cʌyet». Jin chaʼan, jiñi apóstol Pablo tsiʼ yʌcʼʌ ili ticʼojel : «Mach mi laʼ tsʌjyun taqʼuin» (He. 13:5, 6).

11. ¿Bajcheʼ miʼ mejlel i ticʼlañonla jiñi ñusaqʼuin?

¹¹ Jehová yom chaʼan tijicña mi lac ñusan laj cuxtʌlel, i miʼ mejlel i coltañonla jiñi ñusaqʼuin. Jin chaʼan, jiñi Biblia miʼ yʌl: «Yom mi lac chaʼlen weʼel yicʼot uchʼel. Yom miʼ ñucʼan lac pusicʼal ti la queʼtel» (Ec. 2:24). Pero tiʼ pejtelel jiñi ñusaqʼuin muʼ bʌ i pʌsbeñonla ili pañimil mach weñic come miʼ soc jiñi wem bʌ lac melbal i miʼ xicʼben jiñi wiñicob xʼixicob (quixtañujob) chaʼan miʼ chʼujbiñob yicʼot miʼ cʼuxbiñob tsʼaʼlebil bʌ tiʼ Tʼan Dios.

12. Cheʼ bajcheʼ miʼ yʌl 1 Corintios 10:21, 22, ¿chucoch yom mi lac yajcan ti wen jiñi ñusaqʼuin?

¹² Joñonla cojach la com lac chʼujutesan Jehová, jin chaʼan maʼañic miʼ mejlel lac chaʼlen uchʼel «tiʼ mesa lac Yum» i cheʼ jaʼel mi lac chaʼlen uchʼel «tiʼ mesa xibajob» (pejcan 1 Corintios 10:21, 22). Ti bele ora, cheʼ an majqui  mi lac piʼlen ti uchʼel, la camigojʌch. Cheʼ mi lac yajcan ñusaqʼuin tac baqui miʼ pʌstʌl jiñi jatsʼ, jiñi tsʌnsa, i pejcʌntel xibajob, chaʼan bʌ tsʼiʼlel, i mulʌntel mach bʌ weñic yicʼot yan tac bʌ i chaʼan bʌ pañimil, lajal bajcheʼ woli lac chaʼlen uchʼel yicʼot i contrajob Dios i mi laj cʼux muʼ bʌ i chajpañob. Mi cheʼ mi lac mel, mi lac bajñel ticʼlan lac bʌ yicʼot bajcheʼ añonla la quicʼot Jehová.

13, 14. a) ¿Chucoch miʼ mejlel lac lajin jiñi ñusaqʼuin tac yicʼot jiñi bʌlñʌcʼʌl? b) Cheʼ mi lac ñaʼtan muʼ bʌ yʌl Santiago 1:14, 15, ¿chucoch mach yomic mi la cʌcʼ ti colel ti lac pensar mach tac bʌ weñic.

¹³ ¿Chucoch miʼ mejlel lac lajin jiñi ñusaqʼuin tac yicʼot jiñi bʌlñʌcʼʌl? Cheʼ mi lac chaʼlen uchʼel, mi lac ñaʼtan bajcheʼ cʼamel chuqui mi caj laj cʼux. Pero cheʼ tsaʼix lac bucʼu, jiñi lac bʌcʼtal ti ora miʼ tech i cʼʌn chuqui mi caj i cʼʌjñibʌyel i chaʼan. Mi weñʌch chuqui mi laj cʼux, mi coltañonla chaʼan cʼocʼonla, pero mi mach cheʼiqui mi laj cʼamʼan. Tajol mach ti orajic mi cʼotel laj qʼuel pero mucʼʌch caj i ticʼlañonla.

¹⁴ Cheʼʌch miʼ yujtel jaʼel, cheʼ bʌ mi lac yajcan jiñi lac ñusaqʼuin mi lac ñaʼtan chuqui miʼ mejlel ti ochel ti lac jol. Pero ti wiʼil, jiñi lac ñusaqʼuin miʼ tech i ticʼlan chuqui mi lac ñaʼtan yicʼot bajcheʼ mi la cubin lac bʌ. Jiñi ñusaqʼuin miʼ mejlel i yʌqʼueñonla lac tijicñʌyel, pero jiñi mach bʌ weñic miʼ ticʼlañonla (pejcan Santiago 1:14, 15). I sujmʌch chaʼan mach ti orajic mi laj qʼuel bajcheʼ miʼ ticʼlañonla, pero xucʼu xucʼul mi caj laj qʼuel. Jin chaʼan, jiñi Biblia miʼ wʌn subeñonla: «Mach mi laʼ wʌcʼ laʼ bʌ ti lotintel. Mach mejlic ti wajlentel Dios. Pejtelel chuqui jach miʼ pʌcʼ winic mi caj i cʼaj. Jini muʼ bʌ i pʌcʼ chuqui tilem bʌ tiʼ tsucul pusicʼal, mi caj i cʼaj toj mulil» (Gá. 6:7, 8). Jin chaʼan, ñuc i cʼʌjñibal chaʼan maʼañic mi laj yajcan jiñi ñusaqʼuin tac muʼ bʌ i tsʼaʼlen Jehová (Sal. 97:10).

15. ¿Chuqui ti majtan aqʼuebilonla i chaʼan Jehová?

¹⁵ Cabʌl i wiñicob Dios miʼ mulan i qʼuelob jiñi JW Broadcasting^®. Juntiquil hermana i cʼabaʼ Marilyn miʼ yʌl: «Ili canal an i coltayon chaʼan mic mʌlben (jotben) chuqui miʼ tilel tic tojlel, i mach wersa mij cʌntan chuqui mij qʼuel. Cheʼ bʌ c bajñel jach mi cubin c bʌ o maʼañic chuqui com, ti bele ora mic taj jumpʼejl discurso o muʼ bʌ i ñumel yaʼ ti chʼujutesaya ti sʌcʼan muʼ bʌ i wen ñuqʼuesan c pusicʼal. Jiñʌch muʼ bʌ i ñumen lʌcʼtesañon ti Jehová yicʼot tiʼ yorganización. Jiñi JW Broadcasting an i wen coltayon». ¿Woli ba laj cʼʌn ili majtañʌl tilem bʌ ti Jehová? Mach cojach miʼ mejlel laj qʼuel jiñi programa tac muʼ bʌ i chajpʌntel ti jujumpʼejl uw cheʼ jaʼel miʼ mejlel laj qʼuel bajcheʼ jach ora cabʌl video tac, yicʼot programa tac ti audio yicʼot lac ñʌchʼtan jiñi cʼay tac muʼ bʌ i pʼʌtʼesañonla.

16, 17. ¿Chucoch yom tsajilonla chaʼan jaypʼejl ora yom mi la cʌqʼuen jiñi ñusaqʼuin, i bajcheʼ miʼ mejlel lac mel?

¹⁶ Mach cojach yom tsajilonla chaʼan chuqui ti ñusaqʼuin tac mi caj lac yajcan. Cheʼ jaʼel, yom mi laj qʼuel jaypʼejl i yorajlel mi la cʌqʼuen, come miʼ maʼañic mi lac mel, miʼ mejlel lac ñumen aqʼuen i yorajlel lac ñusan lac bʌ i mach jiñic chaʼan mi lac melben i yeʼtel Jehová. Cabʌlob wocol miʼ yubiñob chaʼan miʼ ticʼob i bʌ. Jumpʼejl ejemplo, juntiquil hermana am bʌ 18 i jabilel i cʼabaʼ Abigaíl miʼ yʌl: «Cheʼ añix chuqui an c wen mele ti jumpʼejl qʼuin, mij cʼaj co cheʼ mij qʼuel televisión. Pero mi mach tsajaloñic miʼ mejlel c ñusan cabʌl ora tiʼ qʼuelol televisión». I juntiquil xcolel i cʼabaʼ Samuel miʼ yʌl: «An i tajol mic wen qʼuel jiñi video tac mach bʌ wen tamic yaʼ ti Internet. Mic tech ti jumpʼejl, i cheʼ mij cʼotel j qʼuel tsaʼix c ñumi uxpʼejl o chʌmpʼejl ora».

¹⁷ ¿Bajcheʼ miʼ mejlel laj cʼʌn ti wen jiñi i yorajlel muʼ bʌ la cʌqʼuen jiñi ñusaqʼuin? Ñaxam bʌ, yom mi laj cʌñeʼ jaypʼejl mi la cʌqʼuen i yorajlel.  Jin chaʼan, miʼ mejlel lac tsʼijbun ti jun jaypʼejl i yorajlel mi la cʌqʼuen ti jumpʼejl semana cheʼ mi laj qʼuel jiñi televisión, mi la cochel ti Internet yicʼot cheʼ mi la cʌsin jiñi lac celular o tableta. Mi tsaʼ cʼoti laj qʼuel chaʼan cʌlʌxix ora mi lac ñusan yaʼi, laʼ lac tsʼijbun jaypʼejl ora mi caj la cʌqʼuen. Laʼ la cʌcʼ ti ñaxan jiñi ñumen ñuc bʌ i cʼʌjñibal i ti wiʼil bajcheʼ cʼamel mi caj la cʌqʼuen i yorajlel jiñi ñusaqʼuin. Cheʼ jiñi, laʼ laj cʼajtiben Jehová chaʼan miʼ coltañonla lac tsʼʌctesan jiñi tsaʼ bʌ lac tsʼijbu. Cheʼ bajcheʼ jiñi, an i yorajlel lac chaʼan yicʼot lac pʼʌtʌlel chaʼan mi lac pejcan jiñi Biblia, mi lac mel jiñi chʼujutesaya ti familia, mi lac majlel ti tempa bʌ tac, mi lac loqʼuel ti subtʼan i mi lac sutqʼuiñob ti xcʌntʼan yambʌlob. Cheʼ jaʼel, tijicña mi caj la cubin lac bʌ ti ñusaqʼuin mi tsaʼix lac ñaxan aqʼue i yorajlel i chaʼan tac bʌ Jehová.

18, 19. ¿Bajcheʼ miʼ mejlel lac pʌs chaʼan jin jach mi lac chʼujutesan Jehová?

¹⁸ Cheʼ bʌ jiñi apóstol Pedro tsaʼix i tsʼijbu chaʼan mi caj i jilel i pañimil Satanás i mi caj i tilel jiñi tsijiʼ pañimil, tsiʼ yʌlʌ: «Cʼuxbibilet bʌ la, cheʼ woli laʼ pijtan jini qʼuin, yom mi laʼ chaʼlen wersa chaʼan mi laʼ wajñel ti chʼujul chaʼan sʌquetla, chaʼan ñʌchʼʌl laʼ pusicʼal cheʼ miʼ tajetla» (2 P. 3:14). Cheʼ mi lac jacʼ ili ticʼojel i mi lac chaʼlen wersa chaʼan mi la cajñel ti sʌc ti lac melbal yicʼot tiʼ chaʼan bʌ Dios, mi lac pʌs chaʼan jin jach mi lac chʼujutesan Jehová.

¹⁹ Satanás yicʼot i pañimil añʌch chuqui mi caj i bej melob chaʼan miʼ qʼuextañob chuqui mi la cʌcʼ ti ñaxan (Lc. 4:13). Pero baqui jach bʌ wocol mi lac taj maʼañic mi caj la cʌcʼ chaʼan an majqui o chuqui miʼ mʌctañonla chaʼan cojach mi laj cʼuxbin Jehová. Ti jumpʼejl la pusicʼal la com la cʌqʼuen jiñi am bʌ tiʼ wenta miʼ chʼʌm: Cheʼ jin jach mi lac chʼujutesan.