1. ¿Chuqui miʼ yʌqʼueñonla lac ñop chaʼan añoñixla tiʼ yujtibal «jini cojix bʌ qʼuin tac»?

MI TSAʼ chʼocʼayonla cheʼ ñumeñix jiñi jab 1914, an lac ñusa pejtelel laj cuxtʌlel ti jiñi «cojix bʌ qʼuin tac» chaʼan ili pañimil (2 Ti. 3:1). Ti lac pejtelel an la cubi ti noticia tac bajcheʼ woliʼ tsʼʌctiyel jiñi tsaʼ bʌ i yʌlʌ Jesús chaʼan chuqui mi caj i yujtel ili ora: Jiñi guerra tac, wiʼñal, i yujquel lum, cʼamʌjel muʼ bʌ i pam pujquel, i pʼojlel jontolil yicʼot i contrajintel i wiñicob Dios (Mt. 24:3, 7-9, 12; Lc. 21:10-12). An laj qʼuele jaʼel jiñi i melbal (chaʼlebal) jiñi wiñicob xʼixicob (quixtañujob) tsaʼ bʌ i yʌlʌ jiñi apóstol Pablo (qʼuele jiñi recuadro « ¿Bajcheʼ yilal i melbal jiñi quixtañujob ili ora?»). Jiñi i wiñiconbʌla Jehová mi lac ñop chaʼan chumuloñixla tiʼ yujtibal «jini cojix bʌ qʼuin tac» (Mi. 4:1).

2. ¿Chuqui ti cʼajtiya tac yom mi la cʌqʼuen i jacʼbal?

² Come tsaʼix ñumi cabʌl jab cʼʌlʌl ti 1914, ili ora jiñix i yujtibal «jini cojix bʌ qʼuin tac». Lʌcʼʌlix i jilibal ili pañimil, jin chaʼan yom mi la cʌqʼuen i jacʼbal ili chaʼpʼejl cʼajtiya: ¿Chuqui mi caj i yujtel tiʼ yujtibal «jini cojix bʌ qʼuin tac»? I ¿chuqui miʼ pijtan Jehová chaʼan mi lac mel?

3. Cheʼ bajcheʼ mi yʌl 1 Tesalonicenses 5:1-3, ¿chuqui mi caj i yʌlob jiñi yumʌlob?

³ (Pejcan 1 Tesalonicenses 5:1-3). Pablo miʼ taj ti tʼan «i qʼuiñilel lac Yum» Jehová. Ti ili texto, jiñi tʼan yom i yʌl jiñi i yorajlel muʼ bʌ caj i ñumel cʼʌlʌl cheʼ miʼ tejchel i contrajintel jiñi «Ñuc bʌ Babilonia», pejtelel ñopbalʌl mach bʌ i sujmic am bʌ tiʼ pejtelel pañimil, i mi caj i yujtel ti Armagedón (Ap. 16:14, 16;  17:5). Cheʼ mach jalix yom chaʼan miʼ tejchel i «qʼuiñilel lac Yum», jiñi yumʌlob mi caj i yʌlob chaʼan «ñʌchʼʌlix pañimil» yicʼot «maʼanic tsiquil bʌbʌqʼuen bʌ». Lʌcʼʌ lajal bʌ tʼan miʼ cʼʌñob jiñi yumʌlob tiʼ pejtelel pañimil cheʼ bʌ miʼ yʌlob chaʼan an chuqui yom miʼ melob chaʼan wen miʼ yajñelob yicʼot yambʌ tejclum tac. * Pero muʼ bʌ i yʌl jiñi Biblia chaʼan mi caj ti ajlel, yʌñʌlʌch. ¿Chucoch? Come cheʼ mi caj ti ajlel jiñi, cabʌl quixtañu mi caj i ñopob chaʼan jiñi yumʌlob tsaʼix i mejli i melob chaʼan ili pañimil maʼañix chuqui bʌbʌqʼuen. Pero tiʼ sujm, jiñi yumʌlob jiñʌch muʼ bʌ caj i bʌcʼ jisʌntelob ti jiñi ñuc bʌ wocol (Mt. 24:21).

4. a) ¿Chuqui mach laj cʌñʌyic chaʼan cheʼ mi caj i yʌjlel chaʼan «ñʌchʼʌlix pañimil» yicʼot maʼañix chuqui «bʌbʌqʼuen bʌ»? b) ¿Chuqui jiñi laj cʌñʌyix bʌ?

⁴ Laʼ cujil chaʼpʼejl uxpʼejl i sujmlel chaʼan cheʼ mi caj i yʌjlel chaʼan «ñʌchʼʌlix pañimil» yicʼot maʼañix chuqui «bʌbʌqʼuen bʌ». Pero mach bʌ laj cʌñʌyic chuqui mi caj i ñijcan chaʼan jiñi yumʌlob miʼ yʌlob jiñi tʼan yicʼot bajcheʼ mi caj i melob. Mach laj cujilic jaʼel mi junyajl jach mi caj i yʌlob o chaʼyajl uxyajl. Pero añʌch chuqui la cujil: Mach yomic mi la cʌcʼ lac bʌ ti lotintel yicʼot mach yomic mi lac ñop chaʼan jiñi yumʌlob tsaʼix mejli i tajob ñʌchʼtʌlel tiʼ pejtelel pañimil. Ili tʼan jiñʌch woli (choncol) bʌ lac pijtan chaʼan miʼ yʌjlel, i jin muʼ bʌ caj i yʌcʼ ti ñaʼtʌntel chaʼan muqʼuix caj i tejchel «i qʼuiñilel lac Yum».

5. ¿Bajcheʼ miʼ coltañonla 1 Tesalonicenses 5:4-6 chaʼan chajpʌbilonla mi la cajñel cheʼ miʼ tilel i «qʼuiñilel» Jehová?

⁵ (Pejcan 1 Tesalonicenses 5:4-6). Pablo miʼ subeñonla chuqui yom mi lac mel chaʼan chajpʌbilonla mi la cajñel cheʼ miʼ tilel i «qʼuiñilel lac Yum». Mach yomic mi lac wʌyel «cheʼ bajcheʼ yañoʼ bʌ», yom pʼixilonla yicʼot yʌxʌl la co. Jumpʼejl ejemplo, yom yʌxʌl la co chaʼan maʼañic mi la cotsan lac bʌ ti política. Mi muqʼuic lac mel, miʼ mejlel lac sujtel tiʼ chaʼan bʌ pañimil (Jn. 15:19). La cujil chaʼan cojach i Yumʌntel Dios mi caj i chʼʌm tilel ñʌchʼtʌlel tiʼ pejtelel pañimil.

6. ¿Chuqui ti coltaya la com la cʌqʼuen jiñi quixtañujob, i chucoch?

⁶ Yom pʼixilonla, pero la com laj coltan yambʌ quixtañujob chaʼan «pʼixil» miʼ yajñelob jaʼel, yom i yʌl, mi laj coltañob i cʌn chuqui miʼ yʌl jiñi Biblia chaʼan muʼ bʌ caj i yujtel ila ti pañimil. Yom mi laj cʼajtesan chaʼan cheʼ bʌ miʼ tejchel jiñi ñuc bʌ wocol, mach i yorajlelix chaʼan mi sʌclañob Jehová. Jin chaʼan, wen ñuc i cʼʌjñibal cheʼ mi lac chaʼlen subtʼan ili ora. *

7. ¿Chuqui yom Jehová chaʼan mi lac mel ili ora?

⁷ Mach jalix yom chaʼan miʼ tilel «i qʼuiñilel lac Yum», jin chaʼan Jehová yom chaʼan mi lac chʌn chaʼlen subtʼan. Yom mi laj qʼuel mi bʌxoñʌchla tiʼ melol «i yeʼtel lac Yum» (1 Co. 15:58).  Cheʼ bʌ Jesús tsiʼ taja ti tʼan pejtelel chuqui tac mi caj i yujtel ti jiñi cojix bʌ qʼuin tac, tsiʼ wʌn alʌ muʼ bʌ caj i mel jiñi i wiñicob Dios. Tsiʼ yʌlʌ: «Wersa miʼ ñaxan subentelob jini wen tʼan tiʼ pejtelel lum» (Mr. 13:4, 8, 10; Mt. 24:14). Laʼcu lac ñaʼtan iliyi: Cheʼ bʌ jajayajl mi lac loqʼuel ti subtʼan, woli (yʌquel) la cʌcʼ laj coltaya tiʼ tsʼʌctesʌntel jiñi profecía tsaʼ bʌ i yʌlʌ Jesús.

8. ¿Bajcheʼ la cujil chaʼan jiñi subtʼan wolʌch i yʌcʼ i wut?

⁸ Ti jujumpʼejl jab, cabʌl quixtañujob miʼ ñʌchʼtañob jiñi wen tʼan chaʼan i Yumʌntel Dios. Laʼ laj qʼuel bajcheʼ an pʼojli jiñi xsubtʼañob tiʼ pejtelel pañimil ti ili cojix bʌ qʼuin tac. Ti 1914 an jaxto 5,155 xsubtʼañob ti 43 país. Ti wʌle bʌ ora, añobix 8 millón 500 mil xsubtʼañob ti 240 país yicʼot ti yan tac bʌ tejclum. Pero ili eʼtel (troñel) maxto ujtemic. Yomʌch mi lac bej sub chaʼan cojach jiñi i Yumʌntel Dios mi caj i tojʼesan jiñi wocol tac muʼ bʌ i ñusan jiñi quixtañujob (Sal. 145:11-13).

9. ¿Chucoch yomʌch mi lac bej sub jiñi wen tʼan chaʼan i Yumʌntel Dios?

⁹ Mi caj lac bej chaʼlen subtʼan jinto baʼ jaxʌl miʼ subeñonla Jehová. ¿Jaypʼejlto i yorajlel cʌylem chaʼan jiñi quixtañujob miʼ cʌñob Jehová yicʼot Jesucristo? (Jn. 17:3). Mach la cujilic. La cujil bʌ jiñʌch chaʼan cheʼ bʌ maxto tejchi jiñi ñuc bʌ wocol, pejtelel jiñi wiñicob xʼixicob «yomoʼ bʌ i taj i cuxtʌlel mach bʌ añic miʼ jilel» mejlto i jacʼob jiñi wen tʼan (Hch. 13:48). ¿Bajcheʼ miʼ mejlel laj coltañob jiñi wiñicob xʼixicob cheʼ añixto i yorajlel?

10. ¿Chuqui tac an i yʌqʼueyonla Jehová chaʼan miʼ mejlel lac suben wen tʼan jiñi quixtañujob?

¹⁰ Jehová woliʼ yʌqʼueñonla tiʼ yorganización muʼ bʌ i mejlel laj cʼʌn chaʼan mi lac pʌsben jiñi quixtañujob jiñi i sujmlel. Jumpʼejl ejemplo, ti jujumpʼejl semana miʼ chajpañonla ti jiñi lac tempa bʌ I Subtʼan yicʼot i Melbal jiñi xÑoptʼan baqui miʼ cʌntesañonla bajcheʼ mi lac mel jiñi ñaxam bʌ julaʼ yicʼot revisita, yicʼot bajcheʼ mi la cʌcʼ estudio am bʌ ti Biblia. Jiñi i yorganización Jehová an i yʌqʼueyonla jiñi la queʼtijib chaʼan bʌ cʌntesa. Ili miʼ mejlel i coltañonla chaʼan:

• Mi lac tech tʼan yicʼot jiñi quixtañujob,

• mi laj coltañob i mulan jiñi i sujmlel,

• mi lac ñijcʌbeñob i pusicʼal chaʼan miʼ mulañob i ñumen cʌn jiñi i sujmlel,

• mi laj cʌntesañob i sujmlel cheʼ mi la cʌcʼ estudio yicʼot

• mi lac subeñob chaʼan miʼ yochelob yaʼ ti lac página chaʼan Internet yicʼot ti lac tempa bʌ.

 Tiʼ sujm, añʌch lac chaʼan ili eʼtijib tac pero yomʌch mi laj cʼʌn. * Jumpʼejl ejemplo, mi tsaʼ lac taja juntiquil quixtañu tsaʼ bʌ i mulaj chuqui tsaʼ lac sube i tsaʼ laj cʌybe jumpʼejl tratado o revista, mi caj i mejlel i ñumen pejcan chaʼan jiñi temaj cʼʌlʌlto cheʼ miʼ chaʼ cʼotel lac pejcan. Ti jujuntiquilonla an ti lac wenta chaʼan mi lac wen chaʼlen subtʼan ti jujumpʼejl uw.

11. ¿Chucoch tsaʼ chajpʌnti jiñi estudio loqʼuem bʌ ti Biblia am bʌ ti Internet?

¹¹ Laʼ laj qʼuel yambʌ bajcheʼ woliʼ coltan Jehová jiñi quixtañujob chaʼan miʼ cʌñob i sujmlel. Yaʼ ti jw.org^®, miʼ yʌjqʼuel estudio loqʼuem bʌ ti Biblia ti Internet. * ¿Chucoch tsaʼ chajpʌnti? Ti jujumpʼejl uw, yonlelob tiʼ pejtelel pañimil miʼ sʌclañob estudio loqʼuem bʌ ti Biblia ti Internet. Pero jiñi muʼ bʌ i yʌjqʼuel yaʼ ti lac página i chaʼan Internet miʼ mejlel i coltañob chaʼan miʼ cʌñob jiñi i sujmlel am bʌ tiʼ Tʼan Dios. An lac piʼʌlob mach bʌ wen yomobic i chʼʌm jumpʼejl estudio loqʼuem bʌ ti Biblia cheʼ joñonla mi lac pʌsbeñob. Mi cheʼ bajcheʼ jiñi, laʼ lac pʌsbeñob ili página chaʼan Internet o laʼ lac chocbeñob majlel i direcciónlel ti jiñi tʼan yujiloʼ bʌ.

12. ¿Chuqui miʼ mejlel i cʌñob jiñi quixtañujob ti jiñi estudio loqʼuem bʌ ti Biblia am bʌ ti Internet?

¹² Ili estudio miʼ taj ti tʼan temaj tac bajcheʼ: Jiñi Biblia yicʼot majqui tsiʼ yʌcʼʌ tiʼ tsʼijbuntel, jiñi quixtañujob muʼ bʌ i ñumen ajlelob yaʼ ti Biblia yicʼot jiñi pijtaya am bʌ lac chaʼan. Cheʼ jiñi quixtañu miʼ cʌn ili cʌntesʌntel tac, miʼ mejlel i cʌn jaʼel ili tac:

• Bajcheʼ miʼ coltañonla jiñi Biblia,

• majqui jiñi Jehová, Jesús yicʼot jiñi ángelob,

• chucoch tsiʼ mele Dios jiñi wiñicob xʼixicob ila ti Pañimil yicʼot

• chucoch an jiñi wocol yicʼot jiñi jontolil.

Ti ili Estudio loqʼuem bʌ ti Biblia miʼ tsajintel jeʼel ili tac:

• chuqui mi caj i mel Jehová chaʼan miʼ jisan jiñi wocol yicʼot chʌmel,

• bajcheʼ mi caj i chaʼ tejchesan jiñi chʌmeñobix bʌ yicʼot

• bajcheʼ mi caj i jisʌntel jiñi yumʌlob maʼañobic bʌ i cʼʌjñibal chaʼan miʼ waʼchocontel i Yumʌntel Dios.

13. Tsictesan mi maʼañix mi caj la cʌcʼ estudio ti yotot jiñi quixtañujob cheʼ muqʼuix i yʌjqʼuel estudio ti Internet.

¹³ Cheʼ tsaʼ mejli ili estudio muʼ bʌ i yʌjqʼuel ti Internet mach yomic i yʌl chaʼan maʼañix mi caj la cʌqʼueñob estudio tiʼ yotot jiñi quixtañujob. Jesús an i yʌqʼueyonla ñuc bʌ la queʼtel: Mi lac sutqʼuin ti xcʌntʼan yambʌlob. La com chaʼan jiñi quixtañujob miʼ pejcañob jiñi temaj tac ti jiñi estudio am bʌ ti Internet, miʼ chʼʌmob ti ñuc muʼ bʌ i cʌñob, i cheʼ jiñi miʼ mulañob i ñumen cʌn. Mi cheʼʌch miʼ yujtel, tajol mi caj i jacʼ chaʼan juntiquil xsubtʼan miʼ cʼotel i yʌqʼuen estudio tiʼ yotot. Cheʼ miʼ yujtel i qʼuejlel jujumpʼejl temaj ti jiñi estudio am bʌ ti internet, miʼ subentel jiñi quixtañu chaʼan miʼ cʼajtin chaʼan juntiquil hermano miʼ coltan i ñumen cʌn am bʌ ti Biblia. Ti jujumpʼejl qʼuin, yaʼ ti lac página i chaʼan Internet, miʼ cʼotel cheʼ bʌ 230 solicitud i chaʼan jiñi quixtañujob añoʼ bʌ tiʼ pejtelel pañimil yomoʼ bʌ jumpʼejl estudio loqʼuem bʌ ti Biblia. Ñuc i cʼʌjñibal cheʼ jiñi quixtañujob miʼ julaʼtʌntelob tiʼ yotot chaʼan miʼ chʼʌmob jumpʼejl estudio.

14. Cheʼ bajcheʼ tsiʼ yʌlʌ Jesús yaʼ ti Mateo 28:19, 20, ¿chuqui mi lac chaʼlen wersa lac mel, i chucoch?

¹⁴ (Pejcan Mateo 28:19, 20). Cheʼ mi la cʌqʼuen estudio juntiquil quixtañu, yom mi lac chaʼlen wersa lac sujtesan ti xcʌntʼan yicʼot laj  cʌntesan chaʼan miʼ jacʼ pejtelel chuqui miʼ yʌl Jesús. Yom mi laj coltan jiñi quixtañujob chaʼan miʼ melbeñob i yeʼtel Jehová yicʼot miʼ coltʌbeñob i Yumʌntel. Ili yom i yʌl chaʼan yom mi lac ñijcʌbeñob i pusicʼal chaʼan miʼ melob muʼ bʌ i cʌñob am bʌ ti Biblia, miʼ yʌcʼob i cuxtʌlel ti Jehová yicʼot miʼ chaʼleñob chʼʌmjaʼ. Jin jach miʼ mejlel i coltañob chaʼan cuxul miʼ cʌytʌlob tiʼ qʼuiñilel Jehová (1 P. 3:21).

15. ¿Chuqui mach yomix mi la cʌqʼuen i yorajlel, i chucoch?

¹⁵ Cheʼ bajcheʼ an laj qʼuele, mach jalix yom chaʼan ili pañimil miʼ jisʌntel. Jin chaʼan, mach yomix mi la cʌqʼuen estudio juntiquil quixtañu mach bʌ yomic sujtel ti xcʌntʼan i chaʼan Cristo come woli jach lac toʼol ñusan qʼuin (1 Co. 9:26). Yom mi lac sebʼesan lac bʌ chaʼan mi lac chaʼlen subtʼan come cʌylemto cabʌl quixtañujob yomto bʌ miʼ ñʌchʼtañob jiñi wen tʼan chaʼan i Yumʌntel Dios cheʼ añixto i yorajlel.

16. Cheʼ bajcheʼ miʼ yʌl Apocalipsis 18:2, 4, 5, 8, ¿chuqui yom mi lac mel ti lac pejtelel? (Qʼuele jaʼel jiñi nota).

¹⁶ (Pejcan Apocalipsis 18:2, 4, 5, 8). Ili texto tac miʼ pʌsbeñonla chaʼan anto chuqui miʼ pijtan Jehová chaʼan mi lac mel. Pejtelel xñoptʼañonbʌla yom mi lac tʌtsʼ lac bʌ o ñajt yom mi la cajñel ti jiñi Ñuc bʌ Babilonia. Tajol jiñi muʼ bʌ i chʼʌmob jumpʼejl estudio, tsaʼ cʌn ajñiyob ti jumpʼejl ñopbalʌl mach bʌ i sujmic cheʼ bʌ maxto i cʌñʌyob jiñi i sujmlel. Tajol tsaʼ cʼoti i tempañob i bʌ yaʼi, tsiʼ yʌcʼʌyob i coltaya tiʼ melol jumpʼejl eʼtel o tsiʼ yʌcʼʌyob taqʼuin. Cheʼ bʌ muʼto caj i subentelob chaʼan mejlix i yochelob bajcheʼ xsubtʼañob maxto bʌ chʼʌmʌlic i chaʼan jaʼ, yom miʼ loqʼuelob ti jiñi ñaxam bʌ i ñopbal. Yom miʼ yʌcʼob i tʼan ti jumpʼejl jun chaʼan muqʼuix caj i loqʼuelob ti jiñi ñopbalʌl o an chuqui yom miʼ melob chaʼan maʼañix miʼ wis ñochtañob jiñi ñopbalʌl o yan tac bʌ ochem bʌ ti jiñi Ñuc bʌ Babilonia. *

17. ¿Chuqui ti eʼtel mach bʌ yomic mi lac mel jiñi xñoptʼañonbʌla, i chucoch?

¹⁷ Jiñi i sujm bʌ xñoptʼañonbʌla yom mi lac wen qʼuel chaʼan jiñi la queʼtel mach ochemic tiʼ chaʼan bʌ jiñi Ñuc bʌ Babilonia (2 Co. 6:14-17). Jumpʼejl ejemplo, maʼañic mi caj lac chaʼlen eʼtel ti jumpʼejl iglesia. Cheʼ jaʼel, mi woliyonla ti eʼtel ti jumpʼejl empresa mach la com lac wen chaʼlen eʼtel ti jumpʼejl otot muʼ bʌ i cʼʌjñel chaʼan jiñi mach bʌ i sujmic ñopbalʌl. I mi an lac bajñel eʼtel, maʼañic mi caj lac sub yicʼot maʼañic mi caj lac jacʼ cheʼ mi lac subentel lac chaʼlen eʼtel baqui ochem tiʼ chaʼan bʌ jiñi Ñuc bʌ Babilonia. ¿Chucoch miʼ lac mel bajcheʼ  iliyi? Come mach la com laj cotsan lac bʌ tiʼ chuqui miʼ mel yicʼot tiʼ mulil i chaʼan jiñi mach bʌ i sujmic ñopbalʌl mach bʌ sʌquic tiʼ wut Dios (Is. 52:11). *

18. ¿Chuqui tsiʼ mele juntiquil hermano cheʼ bʌ tsaʼ subenti eʼtel ti jumpʼejl iglesia?

¹⁸ Ti wajali, juntiquil wiñic muʼ bʌ i sʌclan xʼeʼtelob tiʼ sube juntiquil anciano yujil bʌ jucʼteʼ chaʼan miʼ mel eʼtel ti jumpʼejl iglesia yaʼ baqui chumul. Jiñi wiñic yujil chaʼan jiñi hermano albil i chaʼan chaʼan maʼañic mi caj i wis mel eʼtel ti jumpʼejl iglesia. Pero ti jimbʌ ora, jiñi wiñic tiʼ sube chaʼan an majqui yom miʼ bʌcʼ mel jumpʼejl eʼtel. Anquese cheʼʌchi, jiñi hermano maʼañic tsiʼ jacʼʌ i mel come tsiʼ chʼʌmʌ ti ñuc jiñi principio tac am bʌ ti Biblia. Cheʼ ñumeñix jumpʼejl semana, ti jumpʼejl periódico tsaʼ loqʼui juntiquil xjucʼteʼ woli bʌ i tsʼʌp jumpʼejl cruz ti jiñi iglesia. Tsaʼic i jacʼʌ jiñi hermano, jin tsaʼ loqʼui ti jiñi periódico. I cheʼ jaʼel, tajol maʼañix tsaʼ caji i qʼuejlel ti wen yaʼ ti congregación yicʼot tsiʼ yʌqʼue i chʼijiyemlel Jehová.

19, 20. a) ¿Chuqui tsaʼix bʌ laj cʌñʌ tilel? b) ¿Chuquito yom mi lac ñumen cʌn?

¹⁹ Jiñi Biblia miʼ yʌl chaʼan jiñi yambʌ ñuc bʌ profecía mach bʌ jalix yom chaʼan miʼ tsʼʌctiyel jiñʌch cheʼ bʌ jiñi yumʌlob miʼ yʌlob chaʼan «ñʌchʼʌlix pañimil» yicʼot «maʼanic tsiquil bʌbʌqʼuen bʌ». Pero Jehová an i subeyonla chaʼan jiñi yumʌlob maʼañic mi caj i mejlel i ñoj chʼʌmob tilel ñʌchʼtʌlel maʼañic bʌ miʼ jilel ila ti pañimil. ¿Chuqui yom mi lac mel cheʼ bʌ maxto cʼotemic ti ujtel i miʼ tejchel jiñi ñuc bʌ wocol? Dios miʼ pijtan chaʼan mi lac bej chaʼlen subtʼan yicʼot mi lac chaʼlen wersa lac sujtesan ti xcʌntʼan jiñi quixtañujob. Cheʼ jaʼel, yom mi lac tʌtsʼ lac bʌ ti jiñi mach bʌ i sujmic ñopbalʌl. Ili yom i yʌl chaʼan yom mi laj cʌy jiñi mach bʌ i sujmic ñopbalʌl i mi laj tsajin chaʼan jiñi la queʼtel mach ochemic tiʼ chaʼan bʌ jiñi Ñuc bʌ Babilonia.

²⁰ Cabʌlto chuqui mi caj i yujtel tiʼ yujtibal ili cojix bʌ qʼuin tac i anto chuqui miʼ pijtan Jehová chaʼan mi lac mel. ¿Baqui tac bʌ jiñi? I ¿bajcheʼ miʼ mejlel lac chajpan lac bʌ chaʼan pejtelel chuqui mi caj i yujtel ti talto bʌ qʼuin? Mi caj laj qʼuel yaʼ ti yambʌ temaj.