TI JIÑI noticia tac muʼ bʌ i ñumel ti televisión, an juntiquil quixtañu muʼ bʌ i yʌl chaʼan mi tal jaʼal, tsʌñal o ticwal. Cheʼ bʌ yujil chaʼan mi cajel tsʌts bʌ icʼ jaʼal ti jumpʼejl xchumtʌl, miʼ cʼojoʼtan chuqui miʼ mejlel i chaʼlen jiñi quixtañujob, jin chaʼan ti ora miʼ sub chuqui mi caj i tilel.

Cheʼ miʼ mel Jehová jaʼel come woliʼ suben pejtelel jiñi quixtañujob chaʼan lʌcʼʌlix tal jumpʼejl tsʌts bʌ wocol, ñumento bajcheʼ jumpʼejl icʼ jaʼal o yan tac bʌ. ¿Bajcheʼ miʼ mel? Yicʼot ¿chucoch mi lac ñop chaʼan wolʌch i yʌqʼuen cabʌl i yorajlel jiñi quixtañujob chaʼan chuqui yom miʼ melob? Chaʼan mi lac ñaʼtan i jacʼbal, laʼ lac tsajin chuqui tsiʼ mele Jehová ti wajali.

Ti wajali, Jehová mach junyajlic jach tiʼ subeyob jiñi wiñicob xʼixicob chaʼan mi caj i yʌqʼuen i xotʼ i mul jiñi mucʼ jach bʌ i yilol ñusan ti pʼis i mandar (Pr. 10:25; Jer. 30:23). Tiʼ pejtelel ora, tsiʼ wʌn subu chuqui ti wocol tac mi caj i tilel tiʼ tojlelob yicʼot tiʼ subeyob bajcheʼ yom miʼ qʼuextañob i melbal chaʼan utsʼat miʼ qʼuejlelob ti Dios (2 R. 17:12-15; Neh. 9:29, 30). Chaʼan miʼ coltañob i tojʼesan i melbal, Dios tsiʼ cʼʌñʌ xucʼul bʌ i wiñicob ila ti Pañimil chaʼan miʼ subeñob jiñi quixtañujob chuqui woliʼ ñaʼtan i mel yicʼot miʼ yʌqʼuen i ñaʼtañob chaʼan an chuqui yom miʼ melob ti ora (Am. 3:7).

Juntiquil xucʼul bʌ i wiñic Jehová jiñʌch Noé. Yicʼot i chʼejlel cabʌl jab tiʼ sube jiñi wiñicob xʼixicob muʼ bʌ i wen chaʼleñob tsʼiʼlel yicʼot jontolob chaʼan woliʼ lʌcʼtiyel tilel Butʼjaʼ, muʼ bʌ caj i pam pejtelel pañimil (Gn. 6:9-13, 17). Tiʼ subeyob jeʼel chuqui yom miʼ melob chaʼan cuxul miʼ cʌytʌlob. Tsiʼ wen chaʼle wersa chaʼan miʼ mel ili eʼtel, jin chaʼan tsaʼ cʼoti ti cʌjñel bajcheʼ juntiquil wiñic «tsaʼ bʌ i subu i sujmlel ili tʼan ti toj» (2 P. 2:5).

Anquese Noé tsiʼ wen chaʼle subtʼan, jiñi quixtañujob maʼañic tsiʼ yʌcʼʌyob i ñopoñel yicʼot maʼañic tsiʼ jacʼʌyob jiñi tʼan tilem bʌ ti Dios. Tiʼ caj jiñi, tsaʼ luʼ chʌmiyob cheʼ bʌ «tsaʼ tili butʼjaʼ» i tsaʼ ‹luʼ jisʌntiyob› (Mt. 24:39; He. 11:7). Maʼañic tsaʼ mejli i yʌlob chaʼan Dios maʼañic tiʼ subeyob.

Jehová cheʼʌch tsiʼ mele ti yan tac bʌ ora, tsiʼ ñaxan sube jiñi wiñicob xʼixicob cheʼ bʌ muʼto caj i choc tilel wocol tiʼ tojlelob. Pero tsiʼ yʌqʼue i yorajlel jiñi quixtañujob chaʼan añixto chuqui yom miʼ melob chaʼan miʼ coltañob i bʌ. Cheʼʌch tsiʼ mele cheʼ bʌ tsiʼ choco cʼotel jiñi lujunchajp wocol yaʼ ti Egipto. Laʼ lac ñaʼtan cheʼ bʌ maxto i choco cʼotel jiñi wucchajp wocol, jiñi tuñijaʼ. Jehová ñaxan tsiʼ choco majlel Moisés yicʼot Aarón chaʼan miʼ suben faraón yicʼot i wiñicob chuqui miʼ caj ti ujtel. Come tiʼ yijcʼʌlel mi caj i yajlel jiñi tuñijaʼ, ¿anto ba i yorajlel chaʼan miʼ sʌclañob i putsʼib? Jiñi Biblia miʼ tsictesan: «I winicob faraón tsaʼ bʌ i bʌcʼñayob i tʼan lac Yum tsiʼ pʌyʌyob ochel i mozojob yicʼot i yʌlacʼob. Pero jini mach bʌ anic tsiʼ pʼisiyob tiʼ wenta i tʼan lac Yum tsiʼ cʌyʌyob i mozojob yicʼot i yʌlacʼ yaʼ ti jamil» (Éx. 9:18-21). Tsiquil chaʼan Dios tsiʼ wen aqʼueyob i yorajlel chaʼan jiñi quixtañujob miʼ coltañob i bʌ. Wocolix i yʌlʌ iliyi, jiñi quixtañujob tsaʼ bʌ i jacʼʌyob tʼan maʼañic chuqui tsiʼ chaʼleyob cheʼ bʌ tsaʼ cʼoti jiñi wocol.

Dios tiʼ sube Moisés chaʼan suben jaʼel jiñi faraón yicʼot i wiñicob chaʼan jiñi lujunchajp wocol muʼ bʌ caj i choc cʼotel. Pero tsiʼ pʌsʌyob chaʼan maʼañobic i ñaʼtʌbal yicʼot maʼañic tsiʼ jacʼʌyob tʼan (Éx. 4:22, 23). Jin chaʼan, tsaʼ chʌmiyob jiñi ñaxam bʌ i yalobilob. ¡Wen chʼijiyemtic jax! (Éx. 11:4-10; 12:29) ¿Am ba chuqui tsaʼ mejli i melob yomic? Añʌch. ¿Chucoch cheʼ mi la cʌl? Moisés tsaʼʌch i sube jiñi israelitajob chaʼan mi caj i cʼotel jiñi wocol i tiʼ subeyob chuqui yom miʼ  melob chaʼan maʼañic chuqui miʼ chaʼlen jiñi i familiajob (Éx. 12:21-28). ¿Jaytiquil tsiʼ jacʼbeyob i tʼan? Miʼ ñaʼtʌntel chaʼan tsaʼ loqʼui ti Egipto ñumen ti 3 millón quixtañujob. Mach cojach jiñi israelitajob, yaʼ ochemob jeʼel «cabʌl yan tac bʌ winicob xʼixicob», chʼoyoloʼ bʌ ti ñajt bʌ tejclum tac yicʼot yaʼañob chaʼtiquil uxtiquil egiptojob, tsaʼ bʌ mejli i coltañob i bʌ chaʼan maʼañic miʼ tajob jiñi wocol (Éx. 12:38).

Cheʼ bajcheʼ miʼ pʌs ili ejemplo tac, Jehová ti bele ora tsiʼ ñaxan subu chuqui miʼ mejlel i melob jiñi quixtañujob chaʼan maʼañic miʼ yʌqʼueñob i xotʼ i mul (Dt. 32:4). ¿Chucoch? Jiñi apóstol Pablo tiʼ tsictesa chaʼan Jehová «mach yomic miʼ sajtel mi juntiquilic», yom chaʼan tiʼ pejtelelob miʼ cʌyob i mul (2 P. 3:9). Ili miʼ pʌs chaʼan Dios miʼ chʼʌm ti ñuc jiñi quixtañujob. Tsiʼ mulaj chaʼan jiñi quixtañujob miʼ cʌyob i mul i miʼ jacʼbeñob i tʼan cheʼ bʌ muʼto caj i choc cʼotel jiñi wocol (Is. 48:17, 18; Ro. 2:4).

Ili ora, yonlel quixtañujob yomʌch miʼ ñʌchʼtañob jiñi tʼan woli bʌ i sujbel ñumel tiʼ pejtelel Pañimil. Cheʼ bʌ tsajñi Jesús, tsiʼ yʌlʌ chaʼan ili pañimil mi caj i jisʌntel ti jiñi ñuc bʌ «wocol» (Mt. 24:21). Tsiʼ yʌlʌ jumpʼejl profecía i tiʼ tsictesa chuqui mi caj i qʼuelob yicʼot i ñusañob jiñi i wiñicob cheʼ bʌ miʼ lʌcʼtiyel tilel jiñi wocol. Tsiʼ taja ti tʼan woli bʌ ti ujtel tiʼ pejtelel pañimil ili ora (Mt. 24:3-12; Lc. 21:10-13).

Cheʼ bajcheʼ mi laj qʼuel ti ili profecía, Jehová miʼ suben pejtelel jiñi quixtañujob chaʼan miʼ melbeñob i yeʼtel yicʼot miʼ jacʼbeñob i tʼan. Yom chaʼan pejtelel muʼ bʌ i jacʼbeñob i tʼan miʼ tajob i tijicñʌyel ili ora yicʼot miʼ yʌqʼuentelob bendición tac yaʼ ti tsijiʼ bʌ pañimil (2 P. 3:13). Chaʼan jiñi quixtañujob miʼ yʌcʼob i ñopoñel ti chuqui albil i chaʼan, Jehová an i yʌqʼueyob «jini wen tʼan chaʼan i yumʌntel Dios» chaʼan miʼ tajob i coltʌntel. Jesús tsiʼ yʌlʌ chaʼan mi caj i sujbel «tiʼ pejtelel pañimil chaʼan miʼ yubintel tiʼ pejtelel pañimil» (Mt. 24:14). Dios an i chajpa jiñi i wiñicob chaʼan miʼ yʌcʼob ti cʌjñel ili tʼan ti 240 país yicʼot yambʌ tejclum tac. Yom chaʼan yonlel quixtañujob miʼ ñʌchʼtʌbeñob i tʼan chaʼan maʼañic miʼ tajob jiñi wocol cheʼ baʼ ora miʼ jisʌntel jiñi jontoloʼ bʌ (Sof. 1:14, 15; 2:2, 3).

Jin chaʼan, jiñi ñuc bʌ cʼajtiya mach jiñic mi Jehová muqʼuixto i yʌqʼuen i yorajlel jiñi quixtañujob chaʼan miʼ jacʼbeñob i tʼan. Tsiquil chaʼan mucʼʌch i mel. Jiñi ñuc bʌ cʼajtiya jiñʌch mi jiñi quixtañujob mucʼʌch caj i jacʼob chuqui miʼ subentelob cheʼ anto i yorajlel. Jin chaʼan, jiñi xsubtʼañonbʌla i chaʼan Dios, laʼ lac chʌn coltan yonlel quixtañujob chaʼan maʼañic chuqui miʼ chaʼleñob cheʼ miʼ tilel i jilibal ili pañimil.