1, 2. a) ¿Chuqui mach jalix mi caj i subob jiñi yumʌlob? b) ¿Chuqui ti cʼajtiya tac yom mi la cʌqʼuen i jacʼbal?

LAʼ cu lac ñaʼtan chaʼan jiñi yumʌlob tsaʼ ujti i yʌlob chaʼan «ñʌchʼʌlix pañimil» yicʼot ‹maʼañix tsiquil bʌbʌqʼuen bʌ›. Tajol miʼ yʌlob chaʼan tsaʼix junyaj tajle ñʌchʼtʌlel wʌʼ ti pañimil (mulawil). I mi caj i ñopob i subeñoñobla chaʼan mejlʌch i tojʼesañob baqui jach bʌ wocol. Pero mach mejlic i mʌctañob muʼ bʌ i yujtel ti wiʼil. ¿Chucoch? Come jiñi Biblia miʼ yʌl chaʼan «mi caj i bʌcʼ jisʌntelob [...]. Mach mejlicob ti putsʼel» (1 Ts. 5:3).

² Jin chaʼan, an cʼajtiya tac yom bʌ mi la cʌqʼuen i jacʼbal: ¿Chuqui mi caj i yujtel ti jiñi ñuc bʌ wocol? ¿Chuqui miʼ cʼajtibeñonla Jehová chaʼan yom mi lac bej mel? I ¿bajcheʼ miʼ mejlel lac wʌn chajpan lac bʌ chaʼan xucʼul mi la cajñel ti jiñi ñuc bʌ wocol? (Mt. 24:21).

3. Cheʼ bajcheʼ miʼ yʌl Apocalipsis 17:5, 15-18, ¿bajcheʼ mi caj i jisan Dios jiñi «Ñuc bʌ Babilonia»?

³ (Pejcan Apocalipsis 17:5, 15-18). Jiñi «Ñuc bʌ Babilonia» mi caj i jisʌntel. Cheʼ bajcheʼ tsaʼix la cʌlʌ, jiñi yumʌlob maʼañic mi caj i mejlel i mʌctañob jiñi muʼ bʌ caj i yujtel. ¿Chucoch? Come Dios mi caj i yotsʌbeñob tiʼ ñaʼtʌbal chaʼan miʼ melob «chuqui yom». ¿Baqui bʌ jiñi? Jiñʌch cheʼ miʼ jisʌntel jiñi mach bʌ i sujmic ñopbalʌl tac yicʼot jiñi yambʌ ñopbalʌl  muʼ bʌ i lon alob chaʼan miʼ ñopob Cristo. Dios mi caj i yʌcʼ ili ñaʼtʌbal tiʼ pusicʼal jiñi«lujuntsʼijt xulub» i chaʼan bʌ jiñi «chʌctsʼeran bʌ bʌteʼel». Jiñi lujuntsʼijt xulub jiñobʌch jiñi yumʌlob muʼ bʌ i coltañob jiñi «jontol bʌ bʌteʼel» yom bʌ i yʌl, jiñi Naciones Unidas (Ap. 17:3, 11-13; 18:8). Cheʼ bʌ ili yumʌlob mi caj i contrajiñob jiñi mach bʌ i sujmic ñopbalʌl tac yom i yʌl chaʼan muqʼuix caj i tejchel jiñi ñuc bʌ wocol. Iliyi ti ora mi caj i bʌcʼ ujtel tiʼ pejtelel pañimil yicʼot bʌbʌqʼuentic mi caj i yujtel.

4. a) ¿Chuqui mi caj i yʌlob jiñi yumʌlob cheʼ bʌ miʼ caj i jisañob jiñi mach bʌ i sujmic ñopbalʌl tac? b) ¿Chuqui tajol mi caj i melob jiñi quixtañujob tsaʼ bʌ cʌn ajñiyob ti jiñi mach bʌ i sujmic ñopbalʌl?

⁴ Mach la cujilic chuqui mi caj i yʌlob jiñi yumʌlob chaʼan chucoch mi caj i contrajiñob jiñi Ñuc bʌ Babilonia. Tajol mi caj i yʌlob chaʼan jiñi ñopbalʌl tac miʼ mʌctan chaʼan an ñʌchʼtʌlel i chaʼan ti bele ora miʼ yotsañob i bʌ ti política. O miʼ mejlel i yʌlob chaʼan an tempʌbilob i chaʼan cabʌl taqʼuin yicʼot cabʌl chuqui an i chaʼañob (Ap. 18:3, 7). Cheʼ jaʼel, miʼ mejlel lac ñaʼtan chaʼan maʼañic mi caj i luʼ jisʌntelob jiñi yaʼ bʌ ochemob ti jiñi mach bʌ i sujmic ñopbalʌl. Pero muʼ bʌ caj i laj jisʌntel jiñʌch yaʼ baqui miʼ tempañob i bʌ. Cheʼ tsaʼix laj jisʌnti, jiñi tsaʼ bʌ cʌn ajñiyob yaʼi mi caj i qʼuelob chaʼan jiñi xcʌntesajob ti jiñi ñopbalʌl, maʼañic chuqui tsaʼ mejli i melob (chaʼleñob) i tajol maʼañix mi caj i ñochtañob jiñi mach bʌ i sujmic ñopbalʌl.

5. ¿Chuqui an i yʌlʌ Jehová chaʼan jiñi ñuc bʌ wocol, i chucoch?

⁵ Jiñi Biblia maʼañic miʼ tsictesan bajcheʼ jalel mi caj i yujtel i jisʌntel jiñi Ñuc bʌ Babilonia, pero la cujil bʌ jiñʌch cheʼ mach wen jalic mi caj i ñumel (Ap. 18:10, 21). Jehová an i yʌlʌ chaʼan mi caj i comʼesan i yorajlel jiñi ñuc bʌ wocol chaʼan maʼañic chuqui miʼ chaʼlen «jini yajcʌbiloʼ bʌ» yicʼot jiñi i sujm bʌ ñopbalʌl (Mr. 13:19, 20). Jin chaʼan, ¿chuqui miʼ pijtan Jehová chaʼan mi lac mel cheʼ bʌ miʼ tejchel jiñi ñuc bʌ wocol yicʼot jiñi Armagedón?

6. ¿Chuqui miʼ pijtan Jehová chaʼan mi lac mel?

⁶ Cheʼ bajcheʼ tsaʼ laj qʼuele yaʼ ti yambʌ temaj, Jehová miʼ pijtan chaʼan jiñi i wiñiconbʌla mi laj cʌy pejtelel yaʼ bʌ ochem tiʼ  chaʼan bʌ Ñuc Babilonia. Pero añʌch chuqui yom mi lac bej mel. Yom mi lac bej melben i yeʼtel (troñel) Dios ti jumpʼejl lac pusicʼal. Laʼ laj qʼuel chaʼchajp bajcheʼ miʼ mejlel lac mel.

7. a) ¿Bajcheʼ mi lac pʌs chaʼan mucʼʌch lac yoque jacʼ jiñi wem bʌ i mandar tac Jehová? b) Cheʼ bajcheʼ miʼ yʌl Hebreos 10:24, 25, ¿chucoch ñucʌch i cʼʌjñibal cheʼ mi lac tempan lac bʌ, ñumento ili ora?

⁷ Ñaxan, yom mi lac jacʼ jiñi toj bʌ i mandar tac Dios. Mach yomic mi laj qʼuel ti wen jiñi i tsucul melbal tac ili pañimil. Jumpʼejl ejemplo, mach weñic mi laj qʼuel i chaʼan tac bʌ tsʼiʼlel, yaʼ bʌ ochem cheʼ miʼ ñujpuñelob lajal bʌ xʼixicob o wiñicob yicʼot yan tac bʌ i melbalob (Mt. 19:4, 5; Ro. 1:26, 27). I chaʼpʼejlel, yom mi lac tem chʼujutesan Dios yicʼot la quermañujob. Mi lac mel ti baqui jach, yaʼ tiʼ Yotlel tempa bʌ, miʼ cʼʌjñibalʌch, tiʼ yotot juntiquil hermano o ti mucul jach. Mach yʌlʌlic chuqui miʼ yujtel, mach yomic mi laj cʌy lac tempan lac bʌ chaʼan mi lac melben i yeʼtel Dios. Tiʼ sujm, yomʌch mi lac mel ‹cojcoj wʌle cheʼ woli ti lʌcʼtiyel jiñi cojix bʌ qʼuin cheʼ bajcheʼ woli laj qʼuel› (pejcan Hebreos 10:24, 25).

8. ¿Chuqui tajol mi caj lac suben jiñi quixtañujob cheʼ tiʼ yorajlel ñuc bʌ wocol?

⁸ Tajol cheʼ bʌ miʼ tejchel jiñi ñuc bʌ wocol miʼ qʼuextʌyel chuqui mi caj lac suben jiñi wiñicob xʼixicob (quixtañujob). Ti wʌle bʌ ora, mi lac subeñob wen tʼan chaʼan i Yumʌntel Dios yicʼot mi lac chaʼlen wersa lac sutqʼuiñob ti xcʌntʼan. Pero ti jimbʌ ora, tojax chuqui mi caj lac subeñob, muʼ bʌ i lajin jiñi Biblia bajcheʼ tuñijaʼ (Ap. 16:21). Tajol mi caj lac sub chaʼan muqʼuix caj i ñoj jisʌntel ili i pañimil Satanás. Cheʼ miʼ ñumel majlel i yorajlel, mi caj laj cʌn chuqui mi caj lac sub yicʼot bajcheʼ mi caj la cʌl. ¿Jimba mi caj laj cʼʌn ti subtʼan am bʌ laj cʼʌñʌ tilel ñumen ti 100 jab o mi caj i qʼuextʌyel? Yom mi lac pijtan chaʼan miʼ cʼotel lac ñaʼtan. Mach yʌlʌlic bajcheʼ mi cajel lac chaʼlen subtʼan, mi caj la cʌqʼuentel jiñi ñuc bʌ eʼtel chaʼan mi lac sub yicʼot lac chʼejlel chaʼan jiñi quixtañujob mi caj i tojob i mul (Ez. 2:3-5).

9. ¿Chuqui tajol mi caj i melob jiñi yumʌlob cheʼ mi caj i ñʌchʼtañob chuqui mi caj lac sub, pero chuqui miʼ mejlel lac ñop?

⁹ Tajol chaʼan jiñi muʼ bʌ lac sub, jiñi yumʌlob mi caj i ñopob i xicʼoñobla chaʼan maʼañix mi lac wis chaʼlen subtʼan. Cheʼ bajcheʼ mi lac wen ñopben i coltaya Jehová ili ora cheʼ mi lac chaʼlen subtʼan, cheʼʌch mi caj lac mel ti jimbʌ ora. Miʼ mejlel lac ñop chaʼan jiñi lac Dios mi caj i coltañonla lac mel chuqui yom (Mi. 3:8).

10. Cheʼ bajcheʼ tsaʼ wʌn ajli ti Lucas 21:25-28, ¿chuqui mi caj i melob yonlel quixtañujob cheʼ bʌ mi caj i qʼuelob chuqui miʼ yujtel ti jiñi ñuc bʌ wocol?

¹⁰ (Pejcan Lucas 21:25-28). Cheʼ tiʼ yorajlel jiñi ñuc bʌ wocol, jiñi quixtañujob mi caj i bʌcʼñañob cheʼ bʌ mi caj i qʼuelob chuqui miʼ yujtel, cheʼ mi caj i jejmel i chaʼan bʌ política, choñoñibʌl tac yicʼot i chaʼan bʌ yan tac bʌ país. Mi caj i chaʼleñob ‹tsic pusicʼal› yicʼot mi caj i bʌcʼñañob ame tsʌnsʌnticob ti jimbʌ ora (Sof. 1:14, 15). Cheʼ jiñi, tajol wen tsʌts mi caj i ñusañob i cuxtʌlel jiñi quixtañujob, cheʼto jaʼel jiñi i wiñicob Dios. Tajol mi caj lac ñusan wocol tac come maʼañic mi la cotsan lac bʌ ti ili pañimil. I cheʼ jaʼel, wocol mi caj lac taj chuqui i cʼʌjñibal lac chaʼan.

11. a) ¿Chucoch pejtelel quixtañujob mi caj i michʼ qʼueloñobla? b) ¿Chucoch mach yomic mi lac bʌcʼñan jiñi ñuc bʌ wocol?

¹¹ Mi caj i cʼotel i yorajlel cheʼ bʌ jiñi quixtañujob tsaʼ bʌ jisʌbentiyob i ñopbal miʼ michʼañob yicʼot jiñi i testigojonbʌla Jehová  come maʼañic tsaʼ jisʌbentiyonla lac ñopbal. Tiʼ sujm, mi caj i yʌcʼob ti ñaʼtʌntel tiʼ tojlel yambʌlob chaʼan wen michʼob, i tajol mi caj i cʼʌñob jiñi Internet. Jiñi yumʌlob yicʼot jiñi Satanás mi caj i tsʼaʼleñoñobla, come cojach jiñi lac ñopbal maʼañic tsaʼ jisʌnti. Maʼañic tsaʼ mejliyob i junyajl jisan jiñi ñopbal ila ti Pañimil. Jin chaʼan mi caj i michʼ qʼueloñobla. Ti jimbʌ ora, jiñi yumʌlob mi caj i yochelob bajcheʼ Gog. * Mi caj i tempañob i bʌ chaʼan miʼ contrajiñob i tejclum Jehová tiʼ pejtelelob i pʼʌtʌlel (Ez. 38:2, 14-16). Come mach lac luʼ cujil bajcheʼ mi caj i yujtel, tajol mi laj cʼojoʼtan pejtelel chuqui mi caj ti ujtel. Pero yom mi lac ñop iliyi: Mach yomic mi lac bʌcʼñan jiñi ñuc bʌ wocol come Jehová mi caj i coltañonla chaʼan cuxul mi laj cʌytʌl (Sal. 34:19). Mi caj lac letsan lac wut yicʼot lac jol come la cujil chaʼan ‹lʌcʼʌlix laj coltʌntel›. *

12. ¿Bajcheʼ an i chajpayonla «jini xucʼul bʌ xʼeʼtel am bʌ cabʌl i ñaʼtʌbal» chaʼan jiñi muʼ bʌ caj i yujtel ti talto bʌ qʼuin?

¹² «Jini xucʼul bʌ xʼeʼtel am bʌ cabʌl i ñaʼtʌbal» an i chajpayonla chaʼan mi lac pʌs lac xucʼtʌlel ti jiñi ñuc bʌ wocol (Mt. 24:45). Cabʌl bajcheʼ an i mele, pero laʼ lac ñaʼtan junchajp: Jiñi uxpʼejl bʌ qʼuin colem tempa bʌ tac ujtem bʌ ti 2016 cʼʌlʌl ti 2018. Ili an i ñuqʼuesa lac pusicʼal chaʼan mi lac pʼʌtʼesan jiñi melbalʌl tac muʼ bʌ caj i cʼʌjñibʌyel lac chaʼan cheʼ bʌ woli (choncol) i lʌcʼtiyel majlel jiñi i qʼuiñilel Jehová. Laʼ lac tsʼitaʼ qʼuel baqui tac bʌ.

13. ¿Bajcheʼ miʼ mejlel lac pʼʌtʼesan jiñi lac xucʼtʌlel ti Jehová, i chucoch yom mi lac mel ili ora?

¹³ Jiñi xucʼtʌlel. Jiñi temaj chaʼan jiñi colem tempa bʌ ti 2016 jiñʌch «Yom xucʼulonla ti Jehová». Tsiʼ pʌsbeyonla chaʼan xucʼul mi caj la cajñel mi weñʌch bajcheʼ añonla tiʼ tojlel Jehová. Tsiʼ cʼajtesʌbeyonla chaʼan mi lac lʌcʼtesan lac bʌ ti Dios cheʼ mi lac jamben lac pusicʼal ti oración yicʼot cheʼ mi lac wen pejcʌben i Tʼan. Ili mi caj i coltañonla chaʼan mi lac lʌtʼ jiñi wocol tac, cheʼto jaʼel jiñi tsʌts tac bʌ. Cheʼ woli (yʌquel) i lʌcʼtiyel majlel i jilibal i pañimil Satanás, mi caj i ñumen qʼuejlel mi añʌch lac xucʼtʌlel ti Dios yicʼot tiʼ Yumʌntel. Tajol mi caj lac bej wajlentel (2 P. 3:3, 4). Junchajp i sujmlel jiñʌch cheʼ maʼañic mi la cotsan lac bʌ ti ili pañimil. Yom mi lac pʼʌtʼesan ili ora jiñi lac xucʼtʌlel chaʼan jiñʌch mi lac pʌs cheʼ tiʼ yorajlel jiñi ñuc bʌ wocol.

14. a) ¿Chuqui mi caj i qʼuextʌyel tiʼ tojlel jiñi hermanojob muʼ bʌ qʼuelbeñob i yeʼtel Jehová ila ti pañimil? b) ¿Chucoch yom mi lac pʌs lac xucʼtʌlel ti jimbʌ ora?

¹⁴ Cheʼ tiʼ yorajlel jiñi ñuc bʌ wocol, mi caj i qʼuextʌyel majqui mi caj i qʼuelbeñob i yeʼtel Jehová ila ti pañimil. Mach la cujilic jala, pero jiñi bombiloʼ bʌ cʌylemobto bʌ ila ti Pañimil mi caj i pʌjyelob majlel ti panchan chaʼan miʼ chaʼleñob guerra cheʼ ti Armagedón (Mt. 24:31; Ap. 2:26, 27). Ili yom i yʌl chaʼan maʼañix mi caj i yajñelob yicʼotonla jiñi Junmojt muʼ bʌ i pʌsob bij. Anquese miʼ yujtel jiñi, jiñi motocña bʌ wiñicob xʼixicob wen chajpʌbil mi caj i yajñelob. Mi caj i qʼuelbeñob i yeʼtel Jehová jiñi hermanojob chajpʌbiloʼ bʌ ochemoʼ ti jiñi yambʌ tiñʌmeʼ. Mi caj lac pʌs lac xucʼtʌlel cheʼ mi laj coltan ili hermanojob yicʼot cheʼ mi lac jacʼ pejtel chuqui miʼ subeñonla Dios tiʼ tojlel ili wiñicob. Jin mi caj i coltañonla chaʼan cuxul mi la cajñel.

15. ¿Bajcheʼ miʼ mejlel lac pʼʌtʼesan lac bʌ tiʼ cuchol wocol, i chucoch ñumen wen cheʼ mi lac mel ili ora?

 ¹⁵ I cuchol wocol. Jiñi temaj chaʼan jiñi colem tempa bʌ ti 2017 jiñʌch «¡Mach lujbʼaquet!». Tsiʼ coltayonla lac pʼʌtʼesan lac bʌ tiʼ cuchol wocol. Tsaʼ laj cʌñʌ chaʼan mach cojach miʼ mejlel lac pʌs ili melbal cheʼ wen bajcheʼ añonla, i chaʼan miʼ mejlel lac pʼʌtʼesan cheʼ mi lac ñopben i coltaya Jehová (Ro. 12:12). Mach yomic miʼ ñajʌyel lac chaʼan ili i tʼan Jesús: «Jini muʼ bʌ i cuch i wocol cʼʌlʌl tiʼ jilibal mi caj i coltʌntel» (Mt. 24:13). Ili yom i yʌl chaʼan yom mi lac pʌs lac xucʼtʌlel cheʼ mi lac ñusan wocol tac. Cheʼ mi laj cuch wocol ili ora miʼ ñumen coltañonla cheʼ bʌ mi tilel jiñi ñuc bʌ wocol.

16. ¿Chuqui mi caj i coltañonla lac pʌs lac chʼejlel, i bajcheʼ miʼ mejlel lac pʼʌtʼesan ili ora?

¹⁶ Jiñi chʼejlel. Jiñi temaj chaʼan jiñi colem tempa bʌ ti 2018 jiñʌch «¡Yom chʼejlet!». Tsiʼ cʼajtesʌbeyonla chaʼan jiñi i sujm bʌ chʼejlel mach yaʼic cʌyʌl ti chuqui la cujil melol, yaʼʌch chucul cheʼ mi lac ñopben i coltaya Jehová, cheʼ bajcheʼ miʼ yujtel cheʼ mi laj cuch wocol. ¿Chuqui miʼ mejlel lac mel chaʼan mi lac ñumen ñopben i coltaya Jehová? Jiñʌch cheʼ mi lac pejcan jiñi Biblia ti jujumpʼejl qʼuin yicʼot cheʼ mi lac wen ñaʼtan bajcheʼ tsiʼ colta Dios jiñi i wiñicob ti wajali (Sal. 68:20; 2 P. 2:9). Cheʼ bʌ jiñi yumʌlob miʼ tech i contrajiñonla cheʼ tiʼ yorajlel ñuc bʌ wocol, mi caj lac pʌs lac chʼejlel yicʼot lac ñumen ñopben i coltaya Jehová (Sal. 112:7, 8; He. 13:6). Cheʼ mucʼʌch lac mel jiñi ti ili ora, mi caj lac pʌs lac chʼejlel cheʼ miʼ contrajiñonla jiñi Gog. *

17. ¿Chucoch mach yomic mi lac bʌcʼñan jiñi Armagedón? (Qʼuele jiñi dibujo am bʌ tiʼ tejchibal).

¹⁷ Cheʼ bajcheʼ tsaʼ laj qʼuele yaʼ ti yambʌ temaj, cabʌlonla an lac ñusa laj cuxtʌlel ti ili cojix bʌ qʼuin tac. Cheʼ jaʼel, la com chaʼan cuxul mi laj cʌytʌl ti jiñi ñuc bʌ wocol. Jiñi guerra i chaʼan Armagedón mi caj i ñoj jisan i pañimil Satanás. Pero mach yomic mi lac bʌcʼñan come jiñi guerra i chaʼañʌch Dios (Pr. 1:33; Ez. 38:18-20; Zac. 14:3). Cheʼ baʼ ora miʼ  yʌcʼ i tʼan Jehová, Jesucristo mi caj i tech jiñi guerra. Mi caj i yajñel yicʼotob jiñi yajcʌbiloʼ bʌ o bombiloʼ bʌ tsaʼix bʌ tejchisʌntiyob yicʼot bajcʼʌl ángelob. Tiʼ pejtelelob mi caj i contrajiñob Satanás, jiñi i xibajob yicʼot jiñi i wiñicob añoʼ bʌ ila ti pañimil (Dn. 12:1; Ap. 6:2; 17:14).

18. a) ¿Chuqui an i subeyonla Jehová b) ¿Bajcheʼ miʼ coltañonla Apocalipsis 7:9, 13-17 lac ñop chaʼan mi caj lac taj laj coltʌntel cheʼ ti talto bʌ qʼuin?

¹⁸ Jehová an i subeyonla iliyi: «Maʼanic mi junchajpic eʼtijibʌl chaʼan guerra muʼ bʌ mejlel i jisañet» (Is. 54:17). Yonlel «winicob xʼixicob» xucʼuloʼ bʌ cuxul mi caj i cʌytʌlob ti jiñi «ñuc bʌ wocol» i mi caj i bej chʼujutesañob Dios (pejcan Apocalipsis 7:9, 13-17). Tiʼ sujm, jiñi Biblia cabʌl chuqui miʼ yʌqʼueñonla lac ñop chaʼan mi caj lac taj laj coltʌntel cheʼ ti talto bʌ qʼuin. La cujil chaʼan Jehová «miʼ cʌntan jini muʼ bʌ i ñopob» o xucʼuloʼ bʌ (Sal. 31:23). Ti lac pejtelel, muʼ bʌ laj cʼuxbin yicʼot mi laj qʼuel ti ñuc Jehová tijicña mi caj la cubin lac bʌ cheʼ baʼ ora Jehová miʼ sʌqʼuesan jiñi chʼujul bʌ i cʼabaʼ (Ez. 38:23).

19. ¿Chuqui ti pijtaya mach jalix yom chaʼan miʼ tsʼʌctiyel?

¹⁹ Laʼ lac ñaʼtan bajcheʼ mi caj i tsictesan 2 Timoteo 3:2-5 jiñi quixtañujob muʼ bʌ caj i chumtʌlob yaʼ ti tsijiʼ bʌ pañimil cheʼ bʌ mach yaʼix an Satanás (qʼuele jiñi recuadro « ¿Bajcheʼ yilal mi cajelob jiñi quixtañujob ti talto bʌ qʼuin?»). Jiñi hermano George Gangas, * tsaʼ bʌ ajñi ti jiñi Junmojt muʼ bʌ i pʌsob bij, tiʼ tsictesa bajcheʼ iliyi: «¡Ñumen utsʼatax bajcheʼ mi caj lac chumtʌl cheʼ baʼ ora ti lac pejtelel la quermañujix lac bʌ! Mach jalix yom chaʼan mi lac chumtʌl ti jumpʼejl tsijiʼ bʌ pañimil. Chʌn cuxul mi caj la cajñel bajcheʼ Jehová. Mi caj lac chumtʌl tiʼ pejtelel ora». Tiʼ sujm, wen utsʼatax chuqui woli lac pijtan.