Hitoshi tsiʼ wen ubi i chʼijiyemlel cheʼ bʌ tsaʼ caji i sʌclan jumpʼejl eʼtel baqui mach yomic miʼ chaʼlen lot. Jumpʼejl ejemplo, cheʼ bʌ woli (yʌquel) i melbentel cʼajtiya tac chaʼan jumpʼejl eʼtel, tsiʼ yʌlʌ chaʼan maʼañic baqui ora mi caj i chaʼlen lot. Jiñi xmel cʼajtiya tsiʼ yʌlʌ: «¡Maʼañic mic ñaʼtan chucoch cheʼ maʼ wʌl bajcheʼ jiñi!». Tsaʼ subenti tiʼ familia yicʼot i yamigojob chaʼan maʼañic miʼ cʌy i bʌ, pero tsaʼ caji i ñaʼtan chaʼan mach wen i cʼʌjñibalix cheʼ miʼ mel chuqui utsʼat. Tsiʼ yʌlʌ: «Tsaʼ caji c ñaʼtan mi yomix to mic tsictesan chaʼan mach cujilic lot».

Jiñi tsaʼ bʌ ujti tiʼ tojlel Hitoshi miʼ pʌs chaʼan mach tiʼ pejtelel wiñicob xʼixicob (quixtañujob) miʼ qʼuelob ti ñuc cheʼ mi la cʌl chuqui isujm. Ñumen to mach weñic miʼ yubiñob jiñi añoʼ bʌ i yeʼtel chaʼan choñoñel. Juntiquil xʼixic ti Sudáfrica tsiʼ yʌlʌ: «Yonlel c piʼʌlob ti troñel mucʼob ti lot. Wen wocol jax chaʼan juntiquil maʼañic miʼ jacʼ cheʼ bʌ miʼ subentel i chaʼlen lot».

Jiñi lot jiñʌch wen cʌmbil bʌ ili ora. Ti jumpʼejl estudio tsaʼ bʌ i mele jiñi doctor Robert Feldman, juntiquil psicólogo muʼ bʌ ti eʼtel yaʼ ti Universidad i chaʼan Massachusetts, tsaʼ cʼoti ti ñaʼtʌntel chaʼan jiñi 60% quixtañu ñucobix bʌ, miʼ chaʼleñob lot cheʼ an jaxto 10 minuto i cajelob ti tʼan. Jiñi doctor Feldman miʼ yʌl: «Toj sajtel lon c pusicʼal. Tsaʼ c lon ñaʼta lojon chaʼan mach ti jujumpʼejlic qʼuin miʼ yʌjlel jiñi lot». Mi tiʼ pejtelel quixtañujob maʼañic miʼ mulañob i lotintel, ¿chucoch miʼ wen cʼʌjñel jiñi lot?

¿Chucoch wen pujquem jiñi lot, xujchʼ yicʼot yambʌ tac chuqui mach utsʼatic? ¿Baqui bʌ wocol miʼ yujtel tiʼ tojlel yañoʼ bʌ cheʼ maʼañic mi lac mel chuqui utsʼat? Pero ñumen i cʼʌjñibal bʌ, ¿chuqui yom mi lac mel chaʼan maʼañic mi lac toy jiñi?